1. ¿Tyi ixunba Jehová?

 JEMPƗK an̈koʼmɨyñeyaj maymayayajpa jesɨk nayba imaanɨkyaj. Mex iga xutyunam y ityoyyajpa ixunyajpatyim iga mɨjaiñ. Meʼega dyaʼ mɨjaap pɨɨmi an̈yaʼkyajpa. Jeextyim ijaam Jehová, tsaam maymay jesɨk mojpa tamɨjaaji espiritualmente pero dyaʼ ixunba iga juchixkej tatsɨʼyiñ «juuts jém xuxut́ tsɨ̱xt́am» (1 Cor. 3:1). Jeʼ ixunba iga tajɨɨxiɨytyaʼmiñ «juuts tu̱m tsa̱mipɨc pɨ̱xiñ» (1 Cor. 14:20).

2. ¿Juʼptam akwagoʼoyiyaj tan̈kutson̈taʼmpa yɨʼp kuyujijom?

² Yɨʼp kuyujijom tan̈kɨʼpin̈taʼmpa yɨʼpyaj akwagoʼoyiyaj: ¿tyi iwatpa y juʼuts ijɨɨxi tuum cristiano maduro?, ¿tyi tan̈wadyiñ iga tanaktsɨʼyiñ jeʼm madurez?, ¿juutypɨk tayooxpaʼtpa iga mɨjaiñ jeʼm tan̈wɨnanɨgoʼoyi kun Jehová jesɨk tan̈wɨkuyujkaʼaba jeʼm Biblia? y ¿tyiʼiga odoy tanjɨɨxiñ iga kaʼpsneum tamɨjaaji espiritualmente?

¿TYI IWATPA Y JUʼUTS IJƗƗXI TUUM CRISTIANO MADURO?

3. ¿Tyi nɨmtoʼoba jeʼm an̈maatyi «jɨ̱xiɨyt́aamɨ juuts tu̱m tsa̱mipɨc pɨ̱xiñ»?

³ Jesɨk jeʼm Biblia ipɨkpa jeʼm an̈maatyi griega «jɨ̱xiɨyt́aamɨ juuts tu̱m tsa̱mipɨc pɨ̱xiñ», nɨmtoʼoba iga algun i maduro y wɨjɨɨxiɨy dyaʼ tyi ijoo juʼtsan̈ amtyɨy iniity (1 Cor. 2:6). Juʼutstyim tuum xutyu tsɨɨxiʼ iga mɨjaap, taɨchtyam wɨap tammɨjataʼm espiritualmente y tantsɨʼytyaʼm juʼuts tuum cristiano maduro. Mex iga tamɨjaneum espiritualmente, odoy jeem tatsɨʼyiñ seguido tamɨjaiñ (1 Tim. 4:15). Mex iga algun i mañiñam o tsaamiam, ¿jutsaap tanjoodon̈a iga madurojam espiritualmente?

4. ¿Tyi iwatpa tuum cristiano maduro?

⁴ Jeʼm cristianos maduros ikupɨkyajpa ityumpɨy jeʼm Jehová ian̈kiʼmayoʼoyiyaj. Mex iga tan̈kaɨyyaj y jɨɨxtyogoyyajpa,  jeʼm iityijom ityeguedayajpa ikupɨkyaj Jehová. Iniityyaj jeʼm joomipɨk jɨɨxi y iwatyajpa juʼtspɨyam wɨayajpa iga jeexpɨktyim jɨɨxi iniityyajiñ juʼutspɨk Dios (Efes. 4:​22-24). Iga ijɨɨskupakneyajpa jeʼm Jehová ian̈kiʼmayoʼoyiyaj y jeʼm ijɨɨxian̈chioʼoyiyaj iwɨpɨkyajpa ijɨɨxi. Y dyaʼ nasuntaap iga kɨʼtykɨʼty an̈madayyajtaiñ tyi iwatyajpa, y jesɨk ipɨkyajpa tuum jɨɨxi ityeguedayajpa iga ikkupakyajpa (1 Cor. 9:​26, 27).

5. ¿Tyi wɨap iñaskayaj jempɨk dyaʼ mɨjaneyaj espiritualmente? (Efesios 4:​14, 15).

⁵ Pero jempɨk dyaʼ mɨjaneyaj espiritualmente, maaj dyaʼ tan̈kaʼ ikupɨkyaj jempɨk in̈matyajpa mɨgoʼoyiyaj y jempɨk nɨmyajpa jeʼm apóstatas (maayɨʼ Efesios 4:​14, 15). a Wɨapsɨ iga kunaʼɨyoyyajpa, ikusuʼnɨyyajpa in̈ayajpa, jobity joyyajpa o tan̈kawatyajpa (1 Cor. 3:3).

6. ¿Juʼp akwiñkejoʼoyi tayooxpaʼtpa tan̈kutɨʼɨyɨy juʼuts jesɨk algun i mɨjaap espiritualmente y iktsɨʼyba jeʼm madurez? (Aʼmɨtyim jeʼm imagenyaj).

⁶ Juʼuts tanaʼmtaʼm jeʼm Biblia nɨmpa iga jesɨk algun i mɨjaap espiritualmente y iktsɨʼyba jeʼm madurez jeex juʼuts tuum tsɨɨxiʼ iga kaʼpsum mɨjaaji. Ity tyidyin̈kej iga jeʼm tsɨɨxiʼ dyanam ijoodon̈. Jeʼyukmɨ nasuntaap iga algun i ikuixiñ y ikupujiñ. Juʼuts akwiñkejoʼoyi, jesɨk tuum aapa imɨʼn̈kujakpa jeʼm calle kun ixutyu yommaanɨk imatsaʼyba ikɨʼ. Iga mɨjabam ixɨʼ wɨapsɨ iga iaʼmchiʼiba iga imɨʼn̈kujaguiñ ikutyum pero juchixkej ikjɨɨspa iga nakuixtyaiñ. Jesɨk mɨjan̈am wɨabam inikuixtya iyaʼak. Jeempɨktyim naspa espiritualmente: jeʼm cristianojyaj dyapɨknam iktsɨʼyñeyaj jeʼm madurez, a veces ityogoyayyajpa iga jeʼm cristianos maduros iyooxpaʼtyajiñ iga nakuixyajtaiñ espiritualmente y iwɨpɨkyajiñ ijɨɨxi. Pero jempɨk iktsɨʼyñeyajum jeʼm madurez, iwɨkujɨɨsyajpa tyi nɨmpa jeʼm Biblia iga ijoodon̈ayajiñ tyi ijɨɨspa Jehová wiñtyi iga ipɨkyajpa tuum jɨɨxi.

7. ¿Ityogoyayyaj jeʼm cristianos maduros iga yooxpaʼtyajtaiñ?

⁷ ¿Nɨmtoʼoba yɨʼp iga jeʼm cristianos maduros dyam ityogoyayyaj iga yooxpaʼtyajtaiñ? Dyaʼ jesaneʼ. A veces iwaʼkyajpatyim yooxpadoʼoyi. Jempɨk dyanam mɨjaneʼ  espiritualmente in̈joʼkpa iga nɨʼɨyɨyaytyaiñ tyi iwatpa, pero tuum cristiano maduro ijoodon̈ iga iyaʼak ipɨguiñ ijɨɨxi, mex iga iwaʼkpa yooxpadoʼoyiyaj kun tun̈gak tɨwɨtam iga iniityyaj maaj kutɨʼɨyɨyoʼoyi (Gál. 6:5).

8. ¿Tyiʼiga tanɨmpa iga ityumpɨy jeʼm cristianos maduros dyaʼ tumtyiyaj?

⁸ Mex iga nuʼkpa jesɨk tantumpɨytyam kaʼpsum tammɨjajityam dyaʼ tatumtyityam físicamente, jeempɨktyim naspa kun jeʼm cristianos maduros dyaʼ tumtyi cualidades iniityyaj. Juʼuts akwiñkejoʼoyi weeñiyaj iniityyaj joodon̈oʼoyi, tun̈gakyaj iga dyaʼ kɨɨn̈yajpa, chioyyajpa tyityam iniityyaj y weeñiyaj ikutɨʼɨyɨyyajpa juʼuts in̈jaamyaj tun̈gakyaj. Y jesɨk wɨsteen cristianos maduros in̈an̈kamokyajpa jeexpɨktyim nasɨyoʼoyi, y maaj siiga tɨgɨykuʼmpa temas de conciencia, wɨap iga jeʼm jɨɨxi ipɨkyajpaʼap kukakneʼ, pero ikwɨstɨk tɨgɨykuʼmpa kun jempɨk in̈kejpa jeʼm Biblia. Jeʼyukmɨ dyaʼ nakujɨyyajtaap iga dyaʼ tumtyi jɨɨxi ipɨkyaj, ityeguedayajpa iga idyiñ paz (Rom. 14:10; 1 Cor. 1:10).

¿TYI TAN̈WADYIÑ IGA TANAKTSƗʼYIÑ JEʼM MADUREZ?

9. ¿Tyiʼiga tanɨmpa iga dyaʼ tajeex juʼuts jeʼm tsɨɨxiʼ iga mɨjaap iyaʼak?

⁹ Tuum tsɨɨxiʼ iyaʼak mɨjaap y nuʼkpa jaama jesɨk kaʼpspa mɨjaaji, pero dyaʼ jeempɨk naspa siiga tatsɨʼytyoʼoba juʼuts tuum cristiano maduro. Juʼuts akwiñkejoʼoyi, jeʼm tɨwɨtam de Corinto ikupɨkyaj jeʼm wɨtampɨk an̈matyiyaj, chin̈yaj, ipɨktson̈yaj jeʼm espíritu santo y tsaam iyooxpaʼtyaj jempɨk iwat jeʼm apóstol Pablo (Hech. 18:​8-11). Pero nasneum idyɨk weeñi amtyɨy iga chin̈neyaj y dyatyi iktsɨʼyñeyaj idyɨk jeʼm madurez (1 Cor. 3:2). ¿Tyi wɨap tan̈wat iga odoy tannaskaiñ jeempɨk?

10. ¿Tyi tan̈wadyiñ iga wɨaiñ tantsɨʼy juʼuts tuum cristiano maduro? (Judas 20).

¹⁰ Iga wɨaiñ tammɨja espiritualmente, wiñtyi tanaidyiñ tananmajom yɨkxpɨk jɨɨxi. Pero jempɨk juchixkej tsɨʼyyajtoʼoba juʼuts tsɨxtyam dyaʼ mɨjayajpa espiritualmente (Prov. 1:22). Dyaʼ tajesatoʼoba juʼuts weeñiyaj iga mex iga mɨjtamyajam ixunyajpatyi iga jeʼm ijaatun̈yaj iñɨʼmayyajiñ tyi iwatyajpa. Taɨchtyam dyaʼ tantsagaʼyba tun̈gakyaj iga jeʼam takmɨjayajiñ espiritualmente (maayɨʼ Judas 20). Siiga mich iñjaampa iga dyanam iniktsɨʼyñeʼ jeʼm madurez espiritual, waʼgaʼayɨ Jehová iga miyooxpaʼdyiñ y michiʼiñ «jém wɨbɨc jɨ̱xi iga iŋwatpa juuts je ixunpa» (Filip. 2:13).

11. ¿Juutypɨk tayooxpaʼtpa Jehová iga tatsɨʼyiñ juʼuts tuum cristiano maduro? (Efesios 4:​11-13).

¹¹ Jehová tayooxpaʼtpa iga tanaktsɨʼyiñ jeʼm madurez ikuyukmɨ jeʼm pastores y maestros ityyajwɨʼɨp jeʼm kumunjom iga «je̱mpɨgam tatsɨ́ypa juuts tatsa̱mit́am, iga wɨa̱p taŋwat it́u̱mpɨy juuts ixunpa Cristo» (maayɨʼ Efesios 4:​11-13). Tachiʼibatyim jeʼm iespíritu santo iga tayooxpaʼtpa tanaidyay jeʼm «Jesucristo ijɨ̱xi» (1 Cor. 2:​14-16). Iwat iga jaykunuʼktaiñ jeʼm cuatro Evangelios iga wɨaiñ tañixpɨk jempɨk Jesús iwat jesɨgam jaʼy ityi yɨʼp Naxyukmɨ. Siiga tan̈watkiʼpsaʼyba jeʼm ijɨɨxi, juutypɨk jɨyba idyɨk y tyityam iwat, tatsɨʼyba juʼuts tuum cristiano maduro.

TYIʼIGA TAN̈WƗKUYUJKAIÑ JEʼM BIBLIA

12. ¿Tyiapaʼap «jém Cristo iŋquímayooyi jém mojwɨɨp taŋcuyujca»?

¹² Iga wɨaiñ tanaktsɨʼy jeʼm madurez dyaʼ numaaj tan̈kuyujkaiñ «jém Cristo iŋquímayooyi jém mojwɨɨp taŋcuyujca». Yɨʼp nɨmtoʼoba jeʼm an̈kejayoʼoyiyaj dyapɨk tan̈kaʼ  tan̈kutɨʼɨyɨy juʼuts iga tan̈kaguiñ tanjɨɨxi, tantsaguiñ tantan̈kaʼ, tanaidyiñ fe, tachin̈iñ y tan̈kupɨguiñ jeʼm aktsukumoʼoyi (Heb. 6:​1, 2). Ityumpɨy jeʼm nuntapɨk cristianojyaj wɨɨ iga iixpɨkyajiñ. Jeʼam ijɨykiʼm jeʼm apóstol Pedro en jeʼm Pentecostés (Hech. 2:​32-35, 38). Iga wɨaiñ tantun̈ɨy Cristo nasuntaap iga tan̈kupɨguiñ yɨʼpyaj an̈kejayoʼoyiyaj. Jeʼyukmɨ Pablo nɨm iga jempɨk dyaʼ ikupɨkpa jeʼm aktsukumoʼoyi dyaʼ jeʼ tuum nuntapɨk cristiano (1 Cor. 15:​12-14). Odoy tatsɨʼyiñ numaaj kun jeʼm an̈kejayoʼoyiyaj jempɨk tan̈kuyujkaneum.

13. ¿Tyi wɨap tan̈wat iga tawɨwadaʼyiñ jeʼm wiʼkkuy espiritual ijɨykimpaʼap Hebreos 5:14? (Aʼmɨtyim jeʼm imagenyaj).

¹³ Dyaʼ numaaj tanaitytyaʼm jeʼm an̈kejayoʼoyiyaj dyapɨk tan̈kaʼ, tanaitytyaʼmtyim jeʼm wiʼkkuy espiritual iga maaj tayooxpaʼttaʼmpa. Jeem dyaʼ numaaj tɨgɨykuʼmpa jeʼm Jehová ian̈kiʼmayoʼoyiyaj, tɨgɨykuʼmpatyim jeʼm ijɨɨxian̈chioʼoyiyaj y yɨʼpyaj tayooxpaʼtyajpa tanjoodon̈a jempɨk jeʼ ijɨɨspa. Iga majnam tawɨwadaʼyiñ nasuntaap iga tammayiñ jeʼm Biblia, tan̈kujɨɨxiñ y tanakkupaguiñ jempɨk tan̈kuyujkaʼ. Yɨʼpyaj tayooxpaʼtyajpa tampɨkyaj wɨtampɨk jɨɨxiyaj iga imaymaywatpa Jehová (maayɨʼ Hebreos 5:14). b

14. ¿Juutypɨk iyooxpaʼt Pablo jeʼm corintios iga iktsɨʼyyajiñ jeʼm madurez?

¹⁴ Jeʼm cristianos jempɨk dyanam iktsɨʼyñeyaj jeʼm madurez tan̈kaʼ ipɨkyaj ijɨɨxi jesɨk dyaʼ ipaʼtyajpa jeʼm Bibliajom tuum an̈kiʼmayoʼoyi iga iñɨʼɨyɨyaʼyiñ tyi iwatpa. Y jesɨk dyaʼ ipaʼtyajpa wɨapsɨ iga weeñiyaj mojpa ijɨɨsyaj iga wɨap iwatyaj tyityam jeʼ ikusuʼnɨyyajpa. Tun̈gakyaj wɨapsɨ iga iwaʼkyajpa iga toptaiñ tuum an̈kiʼmayoʼoyi mex iga dyaʼ nasuntaap. Juʼuts akwiñkejoʼoyi, wɨap iga jeʼm cristianos de Corinto iwaʼgayyaj Pablo iga ikkaʼmiñ tuum an̈kiʼmayoʼoyi juuty nɨʼɨyɨyyajtaiñ siiga wɨap ikɨʼɨsyaj jeʼm wiʼkkuy kɨan̈kodayñetawɨʼɨp jeʼm dios watyñaxyaj. Pablo dyaʼ iñɨʼmay tyi iwatyajiñ, nɨʼmayyajta iga tumtum de jeʼeyaj ipɨkyajiñ ijɨɨxi. Ijɨykiʼm waatyi jɨɨxian̈chioʼoyiyaj itywɨʼɨp Bibliajom iga iyooxpaʼtyajpa idyɨk iwɨpɨkyaj ijɨɨxi y  odoy imalwadayyajiñ tun̈gakyaj (1 Cor. 8:​4, 7-9). Yɨʼɨmpɨgam sɨʼ idyɨk iyooxpaʼtyajta iga iktsɨʼyyajiñ jeʼm madurez, iwɨpɨkyajiñ ijɨɨxi y odoy in̈joʼkyajiñ iga tun̈gakyaj iñɨʼɨyɨyayyajiñ idyɨk tyi iwatyajiñ o in̈kuaʼmyajpa tun̈gak an̈kiʼmayoʼoyiyaj.

15. ¿Juutypɨk iyooxpaʼt Pablo jeʼm cristianos hebreos iga seguido mɨjayajiñ espiritualmente?

¹⁵ Tampaʼtpa wɨtampɨk an̈kejayoʼoyiyaj kun jeʼm an̈matyiyaj jempɨk Pablo ijaʼyay jeʼm cristianos hebreos. Weeñiyaj dyanam mɨjaneyaj idyɨk espiritualmente, jeʼyukmɨ nɨʼmayyajta: «Mijex juuts tu̱m tsɨ̱xi jém iucpáppɨc leche, jém d́apɨc wɨa̱p icút wíccuy» (Heb. 5:12). Dyaʼ ikutɨʼɨyɨyyaj y dyatyim ipɨktson̈yaj jeʼm joomipɨk an̈kejayoʼoyiyaj iga Jehová sɨʼ idyɨk ichioʼy jeʼm ikumunjom (Prov. 4:18). Juʼuts akwiñkejoʼoyi, jaʼyan̈yaj cristianos judío ijɨɨsyajpanam idyɨk iga kupɨktaiñ jeʼm Moisés In̈kiʼmayoʼoyi mex iga nasneum 30 amtyɨy idyɨk iga jeʼm Cristo ikɨakpudoʼoyi ikkuyajneum yɨʼp an̈kiʼmayoʼoyi (Rom. 10:4; Tito 1:10). Nasneum idyɨk jaʼyan̈ amtyɨy iga ikutɨʼɨyɨyyajiñ idyɨk yɨʼp an̈kejayoʼoyi. Y Pablo iyooxpaʼttoʼoba idyɨk ikuyukmɨ yɨʼp carta, iga jeʼeyaj ipɨktson̈yajiñ idyɨk yɨʼp joomipɨk an̈kejayoʼoyi. Yɨʼbam iyooxpaʼtyajpa idyɨk iga jeʼeyaj ikutɨʼɨyɨyyajiñ iga juutypɨk in̈kejtsak Jesús iga koosteñaytyaiñ Jehová maaj wɨɨ, iyooxpaʼtyajpatyim idyɨk iga odoy kɨɨn̈yajiñ y seguido in̈matyajiñ mex iga jeʼm judíojyaj iyaʼachwatyajpa idyɨk (Heb. 10:​19-23).

TYIʼIGA ODOY TANJƗƗXIÑ IGA KAʼPSNEUM TAMƗJAJI ESPIRITUALMENTE

16. ¿Tyi tan̈wadyiñ okmɨ iga tanaktsɨʼyñeum jeʼm madurez?

¹⁶ Odoy numaaj tanteguedaiñ tanaktsɨʼy jeʼm madurez, nasuntaptyim iga odoy tampatstogoʼyiñ. Jeʼyukmɨ odoy tanjɨɨxiñ iga kaʼpsneum tamɨjaji espiritualmente (1 Cor. 10:12). Wɨɨ iga juchixkej tanakɨʼpin̈taiñ juʼtspɨyam tamɨjaneʼ espiritualmente (2 Cor. 13:5).

17. ¿Tyi tan̈kejaytyaʼmpa jeʼm Carta a los Colosenses?

¹⁷ En jeʼm Carta a los Colosenses, Pablo ijɨykiʼm tyiʼiga wɨɨ iga iktsɨʼyyajiñ jeʼm madurez y odoy ipatstogoyyajiñ. Peʼmyaj cristianos iktsɨʼyñeyajum idyɨk jeʼm madurez, jeʼyukmɨ nɨʼmayyajta iga nakuixyajtaiñ y odoy  iaʼmchiyajiñ iga mɨgoyayyajtaiñ (Col. 2:​6-10). Epafras iga iwɨixpɨkpa idyɨk peʼmyaj cristianos, juchixkej in̈wejpaʼtpa idyɨk Jehová iga jeʼeyaj odoy ichakyajiñ «jém Dios iŋma̱t́i» (Col. 4:12). ¿Tyi tan̈kejaytyaʼmpa? Siiga dyaʼ tampatstogoytyoʼoba jeʼm madurez, seguido tanteguedaiñ y tan̈kuaʼmaʼyiñ jeʼm Jehová iyooxpadoʼoyi. Pablo y Epafras ixunyajpa idyɨk iga jeʼm colosenses seguido mɨjayajiñ espiritualmente mex iga in̈an̈kamokyajpa kutɨʼɨchiyaj.

18. ¿Tyi wɨap iñaskaʼ tuum cristiano mex iga iktsɨʼyñeum jeʼm madurez? (Aʼmɨtyim jeʼm imagen).

¹⁸ Pablo iñɨʼmay jeʼm hebreos iga jesɨk algun i mex iga iktsɨʼyñeum jeʼm madurez wɨaptyim ichagan̈put Jehová. Siiga dyam kupɨgoʼyba y ikamamwatpa ianmaj, wɨapsɨ iga dyam ityoʼyan̈jampa jempɨk iwatpa y dyam ikuaʼmaʼyba jeʼm Jehová iperdón. Pero jeʼm hebreos, dyanam idyɨk sɨʼ iñaskayaj jeempɨk (Heb. 6:​4-9). ¿Tyi naspa sɨɨ kun jeʼm inactivos o jeʼm expulsados iga ityoʼyan̈jaamyajpa kun jempɨk iwatneyaj? Siiga iniityyaj humildad y ityoʼyan̈jaamneyaj jempɨk iwatneyaj, sɨʼ ikwiñkejyaj iga dyaʼ jeexyaj juʼuts jempɨk ijɨykiʼm Pablo. Pero jesɨk ikuseetyajpa Jehová ityogoyayyajpa jeʼm iyooxpadoʼoyi (Ezeq. 34:​15, 16). Jeʼyukmɨ, wɨapsɨ iga jeʼm ancianojyaj iwaʼgayyajpa tuum tɨɨwɨ iga iyooxpaʼdyiñ iwɨtsak jeʼm iwɨnanɨgoʼoyi kun Jehová.

19. ¿Tyi tan̈wattaʼmiñ?

¹⁹ Siiga iniktsɨʼyñeum jeʼm madurez, seguido teguedaajɨ. Duroj kɨʼpin̈ɨ jeʼm an̈kejayoʼoyiyaj tan̈kapɨk tan̈kutɨʼɨyɨy y tumtum jaama jɨɨsɨ juʼuts ijɨɨspa Jehová. Y siiga iniktsɨʼyñeum jeʼm madurez, waatɨ juʼtspɨyam miwɨap iga odoy impasttogoʼyiñ.