¿Iñjoodon̈am idyɨk?
¿Tyiʼiga jeʼm David iejército iniity idyɨk pɨxiñtyam dyapɨk jeʼ israelitajyaj?
JEʼM David iejército iniity idyɨk pɨxiñtyam dyapɨk jeʼ israelitajyaj, juʼuts Zélec jeʼm ammonita, Urías jeʼm hitita y Itmá jeʼm moabita (1 Crón. 11:39, 41, 46). a Ityyajtyim idyɨk «jeʼm keretitas, jeʼm peletitas y jeʼm guititas» (2 Sam. 15:18). Wɨapsɨ iga jeʼm keretitas y jeʼm peletitas familiajyaj idyɨk kun jeʼm filisteos (Ezeq. 25:16). Y jeʼm guititas ityyaj idyɨk jeʼm ciudad filistea de Gat (Jos. 13:2, 3; 1 Sam. 6:17, 18).
¿Tyiʼiga David iaʼmchiʼ iga jempɨk dyaʼ jeʼ israelitajyaj tsɨʼyyajiñ en jeʼm iejército? Iga iwɨjoodon̈ idyɨk iga dyaʼ ijagan̈tsakyajpa y dyatyim ijagan̈tsakyajpa Jehová. Juʼuts akwiñkejoʼoyi, tuum diccionario bíblico nɨmpa: «Jesɨk David ity idyɨk juʼuts rey y in̈an̈kamok jaʼyan̈ yaʼachaaji jeʼm keretitas y jeʼm peletitas dyaʼ ijagan̈tsakyaj». ¿Juutypɨk tanjoodon̈tam? Jesɨk tuum pɨɨxiñ iñɨɨyipɨk idyɨk Seba ichak iga ityun̈ɨʼyba jeʼm rey David ityumpɨy jeʼm pɨxiñtyam israelitajyaj ijagan̈tsakyajtyim, jeʼm keretitas y jeʼm peletitas dyaʼ iwatyaj jeempɨk, iyooxpaʼtyaj David (2 Sam. 20:1, 2, 7). Maaj okmɨ jesɨk Adonías tuum David imaanɨk tsɨʼytyoʼoba idyɨk juʼuts rey, jeʼm keretitas y jeʼm peletitas dyaʼ ijagan̈tsakyaj David, yooxpadoyyaj iga Salomón tsɨʼyiñ juʼuts rey iga ijoodon̈yaj idyɨk iga Jehová ikupin̈neʼ (1 Rey. 1:24-27, 38, 39).
Tun̈gak iga dyatyim ijagan̈tsak David, jeʼ Ittái tuum guitita. Kun 600 soldados iyooxpaʼt David jesɨgam Absalón tuum David imaanɨk, iwattɨʼp iga jeʼm pɨxiñtyam israelitajyaj ityun̈ɨyyajiñ iga tsɨʼytyoʼoba idyɨk juʼuts rey. David iñɨʼmay Ittái iga dyaʼ jeʼ israelita dyaʼ nasuntaap iga nɨguiñ idyɨk iyooxpaʼt. Ittái ikutson̈: «¡Nuuma mannɨʼmaʼyba, juʼutsam Jehová vivo y mich mivivojtyim, manomi manrey, juutykej iga mixɨʼɨba jemum sɨʼɨba iñyooxakɨʼɨwiñ, dyaʼ tyi ijoo siiga avivo o akaʼaba!» (2 Sam. 15:6, 18-21).
Ittái dyaʼ ijagan̈tsak David, jeʼm rey jempɨk Jehová ikupɨn̈neʼ idyɨk.
Mex iga jeʼm keretitas, jeʼm peletitas y jeʼm guititas dyaʼ jeʼ israelitajyaj ikupɨkyaj iga Jehová jeʼam jeʼm nuntapɨk Dios, ikwiñkejayyajtyim respeto David iga ijoodon̈yaj idyɨk iga Jehová ikupin̈neʼ. David tsaam maymay idyɨk iga yɨʼpyaj pɨxiñtyam kupɨgoyyaj.
a Jeʼm Dios ian̈kiʼmayoʼoyi tampaʼtpaʼap Deuteronomio 23:3-6 nɨmpa idyɨk iga ni tuum ammonita ni moabita wɨap idyɨk ityɨgɨy jeʼm Israel ikumun. Yɨʼp nɨmtoʼoba iga dyaʼ wɨap idyɨk ichɨʼyyaj juʼuts nuntapɨk israelitajyaj y dyatyim idyɨk wɨap iniityyaj jeʼm derechos. Pero wɨap idyɨk in̈pɨʼtsyaj jeʼm israelitajyaj y wɨaptyim idyɨk iityyaj kun jeʼeyaj. Aʼmtaʼamɨ jeʼm obra Perspicacia para comprender las Escrituras, nɨkɨ juuty nɨmpa «Ammonitas» y okmɨ juuty nɨmpa «Se casan con israelitas».
