KUYUUJI 16
WAAÑI 64 Participemos con gozo en la cosecha
Tyi tayooxpaʼtpa iga majnam tamaymayaiñ jeʼm an̈matkuyjom
«Kuyooxataʼamɨ Jehová kun maymayaaji» (SAL. 100:2).
AN̈KEJAYOʼOYI
Yɨʼp kuyujijom tampaʼtpa weeñi jɨɨxian̈chioʼoyiyaj tayooxpaʼtyajpaʼap iga majnam tamaymayaiñ jeʼm an̈matkuyjom.
1. ¿Juʼuts in̈jaamyaj weeñiyaj jesɨk putyajpa jeʼm an̈matkuyjom? (Aʼmɨtyim jeʼm imagen).
JEMPƗK tan̈kuyooxataʼmpa Jehová taputtaʼmpa jeʼm an̈matkuyjom iga tantoytyaʼmpa y tansuntaʼmpa iga tun̈gakyaj iixpɨkyajiñ. Jaʼyan̈ tɨwɨtam tsaam maymayyaj jesɨk putyajpa, pero tun̈gakyaj dyaʼ. ¿Tyiʼiga? Weeñiyaj tsaʼayajpa y ijɨɨsyajpa iga dyaʼ wɨan̈kejayoyyajpa. Tun̈gakyaj kɨɨn̈yajpa iga dyaʼ kumaton̈yajtaap, o iga nan̈ayajtaap. Y tun̈gakyaj ijɨɨsyajpa iga dyaʼ wɨap ikutson̈yaj jesɨk wadayyajtaap akwagoʼoyiyaj. Mex iga ityoyyajpa Jehová, tan̈kaʼ in̈madayyaj tun̈gakyaj. Pero iga ikutɨʼɨyɨyyajpa iga tsaam importante tan̈wat yɨʼp yooxakuy, ityeguedayajpa iputyaj jeʼm an̈matkuyjom. ¡Jehová tsaam maymay iga iwatyajpa jeempɨk!
¿Mimaymay iga miputpa jeʼm an̈matkuyjom? (Aʼmɨ jeʼm párrafo 1).
2. ¿Tyiʼiga odoy tan̈yaʼguiñ siiga dyaʼ jespɨy tamaymay jeʼm an̈matkuyjom?
2 Y mich, ¿tan̈katyim immaymaya jeʼm an̈matkuyjom? Siiga a veces jeʼam iññaskaʼaba, odoy an̈yaʼakɨ. Wɨapsɨ iga jeempɨgam sɨʼ inikwiñkej humildad y dyaʼ iñxunba iga tun̈gakyaj mikujiʼpyajiñ. Sɨʼtyim inikwiñkej iga dyaʼ inin̈ayajtoʼoba tun̈gakyaj y maaj jesɨk dyaʼ miwɨkumaton̈yajtoʼoba. Jeʼm iñJaatun̈ sɨn̈yukmɨpɨk ikutɨʼɨyɨʼyba juʼuts inin̈jaam y miyooxpaʼttoʼoba (Is. 41:13). Yɨʼp kuyujijom tan̈kɨʼpin̈taʼmpa cinco jɨɨxian̈chioʼoyiyaj iga tayooxpaʼttaʼmpa iga majnam tamaymayataʼmiñ jeʼm an̈matkuyjom.
JEʼM DIOS IN̈MAATYI MIPƗƗMCHIʼIBA
3. ¿Tyi iyooxpaʼt Jeremías iga odoy kɨʼɨn̈iñ?
3 Dende wiñɨgam jeʼm Dios In̈maatyi ipɨɨmchiʼiñeʼ jeʼm iyooxakɨʼɨwiñyaj jesɨk tan̈kaʼ idyɨk ikkupakyaj tuum yooxakuy. Tan̈kɨʼpin̈aʼyiñ jeʼm profeta Jeremías iakwiñkejoʼoyi. Jesɨgam Jehová ikutsat iga nɨguiñ in̈mat kɨɨn̈ y nɨm: «Ɨch dyaʼ ajaayaʼ anjɨy. Tsaam atraytyiñam» (Jer. 1:6). ¿Tyi iyooxpaʼt iga odom kɨʼɨn̈iñ? Jeʼm Dios In̈maatyi ipɨɨmchiʼ. Nɨm: «Jeʼm in̈matyiyaj tsɨʼyyaj […] juʼuts tuum juktɨ noʼkedoypaʼap iga an̈nuʼkneʼ ampakjom y dyam anyaʼachɨy» (Jer. 20:8, 9). Mex iga tan̈kaʼ idyɨk jesɨgam jaʼy ityi Jeremías, jeʼm Dios In̈maatyi ipɨɨmchiʼ iga wɨaiñ ikkupak iyooxakuy .
4. ¿Juutypɨk tayooxpaʼtpa jesɨk tammayba jeʼm Dios In̈maatyi y jesɨk tan̈kujɨɨspa? (Colosenses 1:9, 10).
4 Taɨchtyam tapɨɨmchiʼityaʼmpatyim jeʼm Dios In̈matyi. Jesɨgam jeʼm apóstol Pablo ijaʼyay jeʼm cristianos de Colosas, iñɨʼmay iga jeʼm nuntapɨk ixpɨgoʼoyi ipɨɨmchiyajpa idyɨk iga seguido iwatyajiñ «jém wɨ̱tampɨc cosa» (maayɨʼ Colosenses 1:9, 10). Jeʼyukmɨ jesɨk tanan̈matpa jeʼm wɨtampɨk an̈matyiyaj, seguido sɨʼ tan̈wɨwat. Juʼuts tanaʼmtaʼmpa, jesɨk tammayba jeʼm Dios In̈maatyi y tan̈kujɨɨspa, ipɨɨmchiʼiba jeʼm fe tanaidyaywɨʼɨp Jehová y majnam tan̈wɨkutɨʼɨyɨʼyba tyiʼiga tsaam importante tanan̈mat jeʼm Dios iAn̈jagoʼoyi.
5. ¿Tyi tan̈wadyiñ iga tayooxpaʼdyiñ jeʼm Biblia?
5 Iga jeʼm Dios In̈maatyi tayooxpaʼdyiñ, odoy jikskɨy tammaʼyiñ, tan̈kuyujkaiñ y tan̈kujɨɨxiñ. ¿Tyi wɨap in̈wat siiga impaʼtpa tuum texto iga dyaʼ in̈kutɨʼɨyɨʼyba? Iga wɨaiñ in̈kutɨʼɨyɨy kuaʼmɨ jeʼm versículo en jeʼm Índice de las publicaciones Watch Tower o la Guía de estudio para los testigos de Jehová. Siiga iñtyoppa tiempo iga in̈wɨkɨʼpin̈ba, mɨjaap jeʼm confianza iniidyaywɨʼɨp jeʼm Dios In̈maatyi (1 Tes. 5:21). Y jesɨk maaj iniidyay confianza jeʼm Biblia, maaj mimaymayaap inin̈maday tun̈gakyaj jempɨk in̈kuyujkaneʼ.
NAWƗTSAKTAAJƗ WIÑTYI IGA MIPUDYIÑ JEʼM AN̈MATKUYJOM
6. ¿Tyiʼiga wɨɨ iga tanawɨtsaktaiñ wiñtyi iga tapudiñ jeʼm an̈matkuyjom?
6 Siiga miniwɨtsaktaap wiñtyi iga mipudyiñ jeʼm an̈matkuyjom dyaʼ mikɨɨn̈ba inimuruyaj tun̈gakyaj. Jesɨgam Jesús ikutsat jeʼm idiscípulos iga nɨguiñ in̈matyaj in̈kejay juutypɨk iwatyajiñ (Luc. 10:1-11). Iga kupɨgoyyaj tsaam maymayayaj kun tyityam iwatyaj (Luc. 10:17).
7. ¿Juutypɨk wɨap tanawɨtsakta wiñtyi iga tapudyiñ jeʼm an̈matkuyjom? (Aʼmɨtyim jeʼm imagen).
7 ¿Juutypɨk wɨap tanawɨtsakta wiñtyi iga tapudyiñ jeʼm an̈matkuyjom? Wiñtyi tan̈kujɨɨstaʼmiñ juutypɨk tanan̈mattoʼoba jeʼm Dios In̈maatyi. Kujɨɨsɨtyim tyityam wɨap mikwaʼkyaj y juutypɨk in̈kuston̈yajpa. Jesɨk tan̈watpa jeempɨk, dyaʼ takɨɨn̈ba tanamuruyaj y tan̈wɨjɨʼyayyaj tun̈gakyaj.
Nawɨtsaktaajɨ jesɨk miputpa jeʼm an̈matkuyjom. (Aʼmɨ jeʼm párrafo 7).
8. ¿Tyiʼiga jeʼm cristianos akwiñkejyajtaap kun jeʼm suʼun̈nas?
8 Jeʼm apóstol Pablo ipɨk tuum akwiñkejoʼoyi jesɨk in̈mat jeʼm yooxakuy iga tan̈wattaʼmpa jeʼm an̈matkuyjom. Nɨm: «Tanait́ yɨ́p wɨbɨc juctɨ aŋtso̱ca jém nassuuŋjo̱m» (2 Cor. 4:7). Pero ¿tyiapaʼap jeʼm juktɨan̈tsookaʼ? Yɨʼp ikwiñkejpa jesɨk nɨkpa tanan̈mat jeʼm Dios iAn̈jagoʼoyi iga tun̈gakyaj wɨaiñ inikɨakputyajta (2 Cor. 4:1). ¿Y tyiapaʼap jeʼm suʼun̈nas? Taɨchtyam jempɨk tanan̈mattaʼmpa jeʼm wɨtampɨk an̈matyiyaj. Jesɨgam jaʼy ityi Pablo, jeʼm maymaʼyoyyajpaʼap ikukomayyajpa idyɨk jeʼm suʼun̈nas wiʼkkuy, vino o tumiñ. Yɨʼp jaama Jehová tachiʼiñetaʼm tuum wɨbɨk yooxakuy iga tanan̈madyiñ jeʼm wɨtampɨk an̈matyiyaj. Y kun jeʼm iyooxpadoʼoyi wɨap tanakkupak yɨʼp yooxakuy.
WAʼGAʼAYƗ DIOS IGA MIYOOXPAʼDYIÑ IGA ODOY MIKƗʼƗN̈IÑ
9. ¿Tyi tayooxpaʼtpa iga odoy tan̈kɨʼɨn̈iñ tun̈gakyaj? (Aʼmɨtyim jeʼm imagen).
9 A veces wɨapsɨ iga tankɨɨn̈ba tun̈gakyaj. ¿Tyi tayooxpaʼtpa iga odoy takɨʼɨn̈iñ? Tan̈kujɨɨstaʼmiñ jeʼm an̈wejpadoʼoyi iwatyajwɨʼɨp jeʼm apóstoles jesɨgam pɨʼɨmɨyyajta iga odom maaj in̈matyajiñ. Iwaʼgayyaj Jehová iga iyooxpaʼtyajiñ iga odoy kɨɨn̈yajiñ y jeʼ jikskɨy ikutson̈ (Hech. 4:18, 29, 31). Jesɨk kɨɨn̈ba tanan̈madayyaj tun̈gakyaj tan̈waʼgaʼyiñ Jehová iga tayooxpaʼdyiñ. Tan̈waʼgaʼyiñtyim iga ipɨɨmchiʼiñ jeʼm toyoʼoyi tanaidyayyajwɨʼɨp tun̈gakyaj.
Waʼgaʼayɨ Dios iga miyooxpaʼdyiñ iga odoy mikɨʼɨn̈iñ. (Aʼmɨ jeʼm párrafo 9).
10. ¿Juʼptam yooxpadoʼoyi tanaity iga wɨaiñ tanakkupak jeʼm yooxakuy juʼuts Jehová itestigojyaj? (Isaías 43:10-12).
10 Jehová takupin̈ juʼuts iTestigos (maayɨʼ Isaías 43:10-12). a Y ijɨykamneʼ iga tayooxpaʼtpa. Tan̈kɨʼpin̈taʼmiñ maktasteen maneras iga iwatpa. Wiñtyi, Jesús dyaʼ tatsakpa tan̈kutyum jesɨk tanan̈matpa jeʼm wɨtampɨk an̈matyiyaj (Mat. 28:18-20). Wɨstenpɨk, Jehová ikupin̈neʼ weeñi sɨn̈pɨxiñtyam iga tayooxpaʼttaʼmiñ (Apoc. 14:6). Tukutenpɨk, Jehová tayooxpaʼtpa ikuyukmɨ jeʼm iespíritu santo iga tanjɨɨxiñ jempɨk tan̈kuyujkaneʼ (Juan 14:25, 26). Y maktastenpɨk, Jehová tachiʼiba tɨwɨtam y yoomtɨwɨtam iga tayooxpaʼtyajiñ. Kun jeʼm Jehová iyooxpadoʼoyi y jeʼm tantɨwɨtam, dyaʼ takɨɨn̈ba tanan̈kejayyaj tun̈gakyaj.
KAAKƗ JEMPƗK ININ̈MADAʼYBA Y NAITYI TUUM WƗBƗK JƗƗXI
11. ¿Tyi wɨap tan̈wat iga tanan̈kejayyajiñ tun̈gak jeʼm Dios In̈maatyi? (Aʼmɨtyim jeʼm imagen).
11 ¿Min̈yaʼkpa jesɨk dyaʼ impaʼtyajpa jempɨk nɨkpa ininmuru? Jesɨk nakwaʼktaajɨ: «¿Juutysɨ nɨkneyaj? ¿Yooxaap ixɨʼyaj o nɨkneʼ jooyiyaj»? (Hech. 16:13). Siiga dyaʼ impaʼtyajpa, jesɨk pɨɨkɨ iñjɨɨxi iga in̈in̈madayyajpa jempɨk nɨkiyaj calle. Tuum tɨɨwɨ iñɨɨyipɨk Joshua nɨmpa: «Tsaam ayooxpaʼtneʼ anan̈mat jeʼm Dios In̈maatyi en jeʼm mercados, juuty maymaʼyyoyñɨɨmpa y juuty teeñyajpa jeʼm carro». Jeʼ y jeʼm iyoomoʼ Bridget, maaj ipaʼtyajpa ityɨkkɨʼɨm jempɨk nɨmpa inimuruyaj jesɨk tsuʼuyiam y jeʼm domingo kugapaama (Efes. 5:15, 16).
Kukaakɨ jempɨk inin̈madaʼyba. (Aʼmɨ jeʼm párrafo 11).
12. ¿Juutypɨk wɨap tanjoodon̈a tyi ikupɨkyajpa y tyi ijoodon̈ayajtoʼoba jempɨk tanamuruyajpa?
12 Siiga jempɨk inimuryajpa dyaʼ miwɨkumaton̈yajtoʼoba, kujɨɨsɨ tyi ikupɨkyajpa y tyi ikkobakpijyajpa. Joshua y Bridget ipɨkyajpa jeʼm akwagoʼoyiyaj inimiñpaʼap jeʼm tratados iwiñjom. Juʼuts akwiñkejoʼoyi, jesɨk ichiʼiyajpa algun i jeʼm tratado ¿Mich juʼuts iñaʼm jeʼm Biblia?, nɨmyajpa: «Weeñiyaj ikupɨkyajpa iga jeʼm Biblia Dios imɨʼɨchiʼ. Y mich, ¿tyi iñjɨɨspa?». Yɨʼbam iyooxpaʼtyaj iga wɨaiñ inimuruyaj tun̈gak.
13. ¿Tyiʼiga wɨap tammaymaya jeʼm an̈matkuyjom mex iga dyaʼ i takumaton̈toʼoba? (Proverbios 27:11).
13 Tamaymayaap jesɨk taputpa jeʼm an̈matkuyjom mex iga dyaʼ ityumpɨyyaj takumaton̈yajpa. ¿Tyiʼiga? Iga sɨʼ tan̈wat jempɨk Jehová y jeʼm iMaanɨk ikusuʼnɨyyajpa (Hech. 10:42). Jesɨk taputpa jeʼm an̈matkuyjom juchixkej tammaymaywatpa tanJaatun̈ sɨn̈yukmɨpɨk. Jeʼyukmɨ dyaʼ tan̈yaʼkpa mex iga tun̈gakyaj dyaʼ iwɨpɨktson̈yajpa jempɨk tanan̈kejayyajpa (maayɨʼ Proverbios 27:11). b
14. ¿Juʼuts tanan̈jaam jesɨk tuum tɨɨwɨ ipaʼtpa algun i iga ikuyujkatoʼoba jeʼm Biblia, y tyiʼiga?
14 Wɨaptyim tammaymaya jesɨk tun̈gak tɨwɨtam ipaʼtyajpa algun i iga ikuyujkatoʼoba jeʼm Biblia. Jeʼm Totjaayi Takjoodon̈apaʼap ikukiʼpspa jeʼm an̈matkuy juʼuts jesɨk kuaʼmtaap tuum tsɨɨxiʼ iga togoyñeʼ. Jaʼyan̈yaj ikuaʼmyajpa jutykej, y jesɨk kejum jeʼm tsɨɨxiʼ ityumpɨyaj maymayayajpa, mex iga numaaj tyuum jempɨk ipaʼt. Jeempɨktyim naspa jesɨk tanan̈kejayyajpa tun̈gakyaj iga ikuyooxayajiñ Dios. Tantumpɨytyam tanan̈mattaʼmpa jutykej, pero tsaam tamaymaytyam jesɨk algun i mojpa nɨki jeʼm an̈tuʼumaajiyaj.
JƗƗSKUPAKNEƗʼ JEʼM TOYOʼOYI INIIDYAWƗʼƗP JEHOVÁ Y TUN̈GAKYAJ
15. ¿Tyi tayooxpaʼtpa iga majnam tamaymayaiñ? (Mateo 22:37-39; aʼmɨtyim jeʼm imagen).
15 Jesɨk tanjɨɨskupakneʼeba jeʼm toyoʼoyi tanaidyaywɨʼɨp Jehová y tun̈gakyaj, maaj tamaymayaap jeʼm an̈matkuyjom (maayɨʼ Mateo 22:37-39). Kujɨɨsɨ juʼtspɨy maymayaap Jehová jesɨk iaʼmpa iga taputpa jeʼm an̈matkuyjom y juʼtspɨy maymayayajpa jempɨk mojpa ikuyujkayaj jeʼm Biblia. Y odoy kujaʼamaʼayɨ iga jempɨk ikumaton̈yajpa wɨap inikɨakputyajta (Juan 6:40; 1 Tim. 4:16).
Jeʼm toyoʼoyi iniidyaywɨʼɨp Jehová y tun̈gakyaj miyooxpaʼtyajpa iga majnam mimaymayajiñ jeʼm an̈matkuyjom. (Aʼmɨ jeʼm párrafo 15).
16. ¿Tyi tayooxpaʼtpa iga wɨaiñ tammaymaya jeʼm an̈matkuyjom mex iga dyaʼ wɨap tamput tantɨkkɨʼɨm? An̈maatɨ tuum akwiñkejoʼoyi.
16 ¿Y siiga dyaʼ wɨap imput iñtyɨkkɨʼɨm? Jesɨk waatɨ juʼtspɨyam miwɨap iga inikwiñkejiñ iga iñtyoyba Jehová y jeʼm tun̈gakyaj. Jesɨgam jaʼy ityi jeʼm pandemia del COVID-19, Samuel y Dania dyaʼ wɨap idyɨk iputyaj. In̈matyajpa idyɨk jeʼm Dios In̈maatyi por teléfono, ijayyajpa idyɨk cartas y akkuyujoyyajpa idyɨk por Zoom. Samuel in̈kejaʼyba idyɨk tun̈gakyaj en tuum clínica juuty ipɨktson̈ba tuum tratamiento iga iniity cáncer. Jeʼ nɨmpa: «Jesɨk tayaʼachaap wɨapsɨ iga takupoʼnaketpa física, mental y espiritualmente. Pero jeʼm maymayaaji tanjaampaʼap iga tan̈kuyooxaap Jehová tayooxpaʼtpa». Okmɨ Dania tsut y dyaʼ wɨa mu ichukum tukuteen meses. Y por seis meses ipɨk tuum silla de ruedas iga wɨaiñ iwity. Jeʼ nɨmpa: «An̈wat juʼtspɨyam awɨa iga anan̈matpa idyɨk jeʼm Dios In̈maatyi. Wɨa mu anan̈kejay tuum enfermera iga miñba idyɨk ajooyay y jeʼm repartidores iga nuʼkyajpa antɨkkɨʼɨm. An̈wɨnamurutyim por teléfono tuum yoomoʼ iga yooxaap en tuum empresa médica». Ityumpɨy jempɨk iwatyaj Samuel y Dania imaymaywatyaj mex iga kukakneyaj idyɨk iityi.
17. ¿Tyi tan̈wadyiñ iga majnam tayooxpaʼdyiñ jeʼm jɨɨxian̈chioʼoyiyaj iniitywɨʼɨp yɨʼp kuyuuji?
17 Jeʼm jɨɨxian̈chioʼoyiyaj iga iniity yɨʼp kuyuuji maaj tayooxpaʼtpa siiga ityumpɨy tan̈watkiʼpspa. Cada tumtum jeexyaj juʼuts jesɨk tan̈watpa tuum wiʼkkuy, jesɨk tanamotpa ityumpɨy jempɨk tan̈kukomaʼyba tuum wiʼkkuy tsaam kɨɨnba. Siiga tan̈watkiʼpspa ityumpɨy yɨʼpyaj jɨɨxian̈chioʼoyiyaj tayooxpaʼtpa iga odoy tan̈yaʼguiñ y tamaymayaap jeʼm an̈matkuyjom.
¿JUUTYPƗK TAYOOXPAʼTYAJPA YƗʼPYAJ JƗƗXIAN̈CHIOʼOYIYAJ IGA MAJNAM TAMAYMAYAIÑ JEʼM AN̈MATKUYJOM?
-
Nawɨtsaktaajɨ wiñtyi iga miputpa jeʼm an̈matkuyjom.
-
Waʼgaʼayɨ jeʼm Dios iyooxpadoʼoyi.
-
Jɨɨskupakneɨʼ jeʼm toyoʼoyi iniidyaywɨʼɨp Jehová y tun̈gakyaj.
WAAÑI 80 “Prueben y vean que Jehová es bueno”
a Isaías 43:10-12: 10 Michtyam an̈kujɨʼyɨytyaʼmpa juʼuts mantestigojtam —nɨmpa Jehová—, jɨ, mich jeʼm manyooxakɨʼɨwiñ, jempɨk man̈kupɨn̈ne, iga añixpɨktaʼmiñ, an̈kupɨktaʼmiñ y in̈kutɨʼɨyɨʼytyaʼmiñ iga dyaʼ akakneʼ. Wiñtyi iga aidyiñ dyaʼ idyɨk i ni tuum Dios, y okmɨ dyatyim i ni tuum. 11 Ɨch, a Jehová, dyaʼ i ni tuum juʼuts ɨch iga kɨakpudoʼyba». 12 «Ɨch jempɨk anɨm, akɨakpudoy y manakjoodon̈ataʼm jesɨk dyaʼ idyɨk i tun̈gak diosyaj. Jeʼyukmɨ mimichtyam mantestigojtam —nɨmpa Jehová—, ɨch iñDios.
b Proverbios 27:11 Akwiñkeejɨ joodon̈oʼoyi, mammaanɨk, y maymaywaatɨ ananmaj iga wɨaiñ an̈kutson̈ jempɨk sɨʼ akujɨy.
