1. ¿Tyi tayooxpaʼtpa iga tan̈kusuʼnɨʼyiñ tan̈kuyujkaʼ jeʼm jɨychagoʼoyiyaj?

 «TSAAM an̈kusuʼnɨʼyba an̈kuyujkaʼ jeʼm jɨychagoʼoyiyaj itywɨʼɨp Bibliajom», nɨmpa tuum tɨɨwɨ iga iñɨɨyi Ben. ¿Jeextyim inin̈jaam? ¿O iñjɨɨspa iga jeʼm jɨychagoʼoyiyaj tsaam tan̈kaʼ tan̈kutɨʼɨyɨy? Siiga jeempɨgam iñjɨɨspa wɨap miyooxpaʼt jesɨk in̈kutɨʼɨyɨʼyba tyiʼiga Jehová ichak In̈matyijom jeʼm jɨychagoʼoyiyaj.

2. ¿Tyi tan̈kɨʼpin̈taʼmpa yɨʼp kuyujijom?

² Yɨʼp kuyujijom tan̈kɨʼpin̈taʼmpa tyiʼiga tan̈wɨixpɨguiñ jeʼm jɨychagoʼoyiyaj itywɨʼɨp Bibliajom y tyi tan̈wadyiñ iga wɨaiñ tan̈kutɨʼɨyɨy. Okmɨ tan̈kɨʼpin̈ba wɨsteen jɨychagoʼoyiyaj itywɨʼɨp en jeʼm libro de Daniel y tanaʼmpa juutypɨk tayooxpaʼtpa yɨʼp jaama jesɨk tan̈kutɨʼɨyɨʼyba.

3. ¿Tyi tan̈wadyiñ iga wɨaiñ tan̈kutɨʼɨyɨy jeʼm jɨychagoʼoyiyaj itywɨʼɨp Bibliajom?

³ Iga wɨaiñ tan̈kutɨʼɨyɨy jeʼm jɨychagoʼoyiyaj itywɨʼɨp Bibliajom, tan̈waʼguiñ yooxpadoʼoyi. Tanjɨɨstaʼmiñ yɨʼp akwiñkejoʼoyi. Kujɨɨsɨ iga nɨkneʼ mijooyi en tuum ciudad iga dyaʼ oyba miñɨki pero tuum iñamigo iga iwɨkuixan̈ nɨkneʼ mikpoy. Jeʼ iwɨjoodon̈ juuty miitytyaʼm y juuty mininɨktaʼmpa jeʼm tun̈. ¡Tsaam wɨɨ iga iñamigo oy mikpoy! Jeempɨktyim naspa kun Jehová jeʼ iwɨjoodon̈ juʼp tiempo taitytyaʼm y tyi naspa okmɨ. Jeʼyukmɨ iga wɨaiñ tan̈kutɨʼɨyɨy jeʼm jɨychagoʼoyiyaj, tan̈waʼgaʼyiñ iyooxpadoʼoyi (Dan. 2:28; 2 Ped. 1:19, 20).

4. ¿Tyiʼiga Jehová ichak In̈matyijom jeʼm jɨychagoʼoyiyaj? (Jeremías 29:11; aʼmɨtyim jeʼm foto).

⁴ Juʼutstyim tuum wɨbɨk jaatun̈, Jehová ixunba iga jeʼm  imanɨktam iwɨnɨgayyajiñ jeʼm iñɨgɨyoʼoyijom (maayɨʼ Jeremías 29:11). b Jehová wɨap tanɨʼɨyɨyay jempɨk naspa tannɨgɨyoʼoyijom, jeʼ ichak In̈matyijom jeʼm jɨychagoʼoyiyaj iga tan̈kutɨʼɨyɨʼyiñ tyityam naspa okmɨ (Is. 46:10). Wɨap tannɨm iga jeʼm jɨychagoʼoyiyaj jeʼ tuum wɨbɨk xaaja iga tachiʼiñetaʼm kun toyoʼoyi. ¿Pero tyi tayooxpaʼtpa tan̈kupɨk iga kupakyajpa?

5. ¿Tyi wɨap ikuyujkayaj jeʼm traytyipɨxiñtyam y wooñyomtam de jeʼm Max iakwiñkejoʼoyi?

⁵ Jeʼm traytyipɨxiñtyam y wooñyomtam in̈an̈kamokyajpa kutɨʼɨchiyaj iga juuty kuyujyajpa waatyiyaj dyaʼ iniidyayyaj respeto jeʼm Biblia. Y wɨapsɨ iga kun jempɨk nɨmyajpa o iwatyajpa wɨap ikagayyaj ijɨɨxi jempɨk ikupɨkpa Dios. Tanaʼmtaʼmiñ jempɨk iñaskaʼ Max. Jeʼ nɨmpa: «Jesɨk atraytyiñam idyɨk, moj anjɨɨs siiga jempɨk sɨʼ an̈kejayyaj anjaatun̈yaj jeʼam jeʼm nuntapɨk religión y siiga jeʼm Biblia Dios imɨʼɨchiʼ». ¿Tyi iwatyaj jeʼm ijaatun̈yaj? Max nɨmpa: «Dyaʼ ijoʼykayaj mex iga kobakpijpa idyɨk ixɨʼyaj». Ijaatun̈yaj ipɨkyaj jeʼm Biblia iga wɨaiñ ikutson̈ayyaj jeʼm iakwagoʼoyiyaj, y Max mojtyim kuyuuji iyaʼak. Jeʼ nɨmpa: «Moj an̈kuyujkaʼ jeʼm jɨychagoʼoyiyaj itywɨʼɨp Bibliajom y anan̈madaʼyba idyɨk tun̈gak tɨwɨtam jempɨk sɨʼ an̈kuyujkaʼ». ¿Juutypɨk iyooxpaʼt? Max nɨmpa: «Jempɨk an̈kuyujkaʼ, akkupɨk iga jeʼm jɨɨxi itywɨʼɨp Bibliajom Dios imɨʼɨchiʼ».

6. ¿Tyi wɨap tan̈wat siiga dyaʼ tan̈wɨkupɨkpa jempɨk nɨmpa jeʼm Biblia?

⁶ Juʼutstyim Max siiga dyaʼ in̈wɨkupɨkpa jempɨk nɨmpa jeʼm Biblia, odoy an̈yaʼakɨ, pero wɨkɨʼpin̈ɨ jempɨk dyaʼ in̈wɨkupɨkneʼ. Jesɨk dyaʼ tan̈wɨkupɨkpa tuum an̈kejayoʼoyi, keʼnam jesɨk ɨʼtspa algun tyi y siiga dyaʼ tan̈kujichaʼyba yajpa kuɨʼtsaʼayi. Jeʼyukmɨ iga iñfe odoy iñaskaiñ jeempɨk, nakwaʼktaajɨ: «¿An̈kupɨkpa jempɨk nɨmpa jeʼm Biblia jesɨk ijɨykiʼmpa tyi naspa jeʼm nɨgɨyoʼoyijom?». Siiga dyaʼ in̈wɨkupɨkpa nasuntaap iga in̈kuyujkaiñ jeʼm jɨychagoʼoyiyaj jempɨk kupakneyajum. ¿Tyi miyooxpaʼtpa?

7. ¿Tyi iyooxpaʼt Daniel iga ikutɨʼɨyɨʼyiñ jeʼm jɨychagoʼoyiyaj? (Daniel 12:10; aʼmɨtyim jeʼm foto).

⁷ Siiga tan̈wɨkutɨʼɨyɨytyoʼoba jeʼm jɨychagoʼoyiyaj wɨɨ iga tan̈watkiʼpstaʼmiñ Daniel. Jeʼ ikuyujkaʼaba idyɨk kun tuum wɨbɨk jɨɨxi: ikutɨʼɨyɨytyoʼoba idyɨk. Iyooxpaʼttyim jeʼm humildad. Ijoodon̈ idyɨk iga Jehová ichiʼiba kutɨʼɨyɨyoʼoyi jempɨk iixpɨkyajpa y ikupɨgayyajpa jeʼm ian̈kiʼmayoʼoyiyaj (Dan. 2:27, 28; maayɨʼ Daniel 12:10). c Daniel ikwiñkej humildad jesɨgam iwaʼgay Jehová jeʼm iyooxpadoʼoyi (Dan. 2:18). Iwɨkuyujkaʼaba idyɨk jeʼm Dios In̈maatyi. Iwɨkɨʼpin̈tyim tun̈gak jaakayaj de jeʼm Dios In̈maatyi iga jayñetawum idyɨk peʼm tiempo (Jer. 25:11, 12; Dan. 9:2). ¿Juutypɨk wɨap tan̈watkiʼpstaʼm?

8. ¿Tyiʼiga weeñiyaj ikuyujkayajpa jeʼm jɨychagoʼoyiyaj, y tyi wɨɨ iga tan̈wattaʼmiñ?

 ⁸ Kujɨɨsɨ tyiʼiga in̈kuyujkaʼaba. ¿Tyiʼiga in̈kuyujkaʼaba jeʼm jɨychagoʼoyiyaj itywɨʼɨp Bibliajom? ¿In̈watpa iga majnam iñixpɨktoʼoba jeʼm nuntapɨk an̈kejayoʼoyi? Siiga jesaneum, Jehová miyooxpaʼtpa (Juan 4:23, 24; 14:16, 17). Pero weeñiyaj ikuyujkayajpa jeʼm Biblia kun tun̈gak jɨɨxi. Iaʼmyajtoʼoba siiga jeʼm Biblia Dios imɨʼɨchiʼ, siiga dyaʼ, jesɨk wɨap iwatyaj jempɨk jeʼeyaj ikusuʼnɨyyajpa. Jesɨk tan̈kuyujkaʼaba jeʼm jɨychagoʼoyiyaj wɨɨ iga tanaidyiñ tuum wɨbɨk jɨɨxi. Jeʼyukmɨ iga wɨaiñ tan̈kutɨʼɨyɨy nasuntaptyim humildad.

9. ¿Tyi tatogoyaytyaʼm iga tan̈kutɨʼɨyɨʼyiñ jeʼm jɨychagoʼoyiyaj itywɨʼɨp Bibliajom, y tyiʼiga?

⁹ Naityɨ humildad. Jehová iyooxpaʼtpa jempɨk ikwiñkejyajpa humildad (Sant. 4:6). Jeʼyukmɨ, siiga tan̈kutɨʼɨyɨytyoʼoba jeʼm jɨychagoʼoyiyaj tan̈waʼgaʼyiñ jeʼm iyooxpadoʼoyi. Siiga tanaity humildad, tampɨktson̈batyim jeʼm yooxpadoʼoyi tachiʼipaʼap jeʼm esclavo fiel, iga jeʼam ipɨkpa Jehová iga tawiʼktaʼmpa espiritualmente (Luc. 12:42). Jehová ikusuʼnɨʼyba iga wɨwattaiñ ityumpɨy, jeʼyukmɨ iga wɨaiñ tan̈kutɨʼɨyɨy jeʼm In̈maatyi tayooxpaʼtpa ikuyukmɨ jeʼm esclavo jempɨk jeʼ ikupin̈neʼ (1 Cor. 14:33; Efes. 4:4-6).

10. ¿Tyi min̈kejaʼyba jeʼm Esther iakwiñkejoʼoyi?

¹⁰ Wɨkuyujkaɨʼ jeʼm Dios In̈maatyi. Kujɨɨsɨ tuum jɨychagoʼoyi iga in̈kusuʼnɨʼyba y jeʼam wɨap in̈kuyujkaʼ. Tuum yoomtɨwɨ iñɨɨyipɨk Esther jeʼam iwat. Jeʼ ijoodon̈atoʼoba idyɨk jeʼm jɨychagoʼoyiyaj in̈matpaʼap juchix wiñkejpa jeʼm Mesías. Nɨmpa: «Jesɨgam 15 anamtyɨy, anaʼmtoʼoba idyɨk anyaʼak iga jeʼm jɨychagoʼoyiyaj nunta jayyajta wiñtyi iga miʼñiñ Jesús yɨʼp Naxyukmɨ». ¿Y tyi iwat? Moj imay jeʼm Rollos del mar Muerto, y jempɨk imay iyooxpaʼt iga iwɨkupɨguiñ. Esther nɨmpa: «Yɨʼpyaj rollos jaykunuʼkyajta wiñtyi iga Jesús miʼñiñ yɨʼp naxyukmɨ. Jeʼyukmɨ jeʼm jɨychagoʼoyiyaj iga ityyaj jeem Dios imɨʼɨchiʼ». Nɨmpatyim: «Iga wɨaiñ an̈kutɨʼɨyɨy watykɨy ammay». Tsaam iyooxpaʼt iga ikɨʼpin̈ yɨʼpyaj jɨychagoʼoyiyaj. Jeʼ in̈matpa juʼuts in̈jaam: «Iga anyaʼak an̈kɨʼpin̈ an̈wɨkutɨʼɨyɨy iga jeʼm Biblia dyaʼ tamɨgoyaʼyba».

11. ¿Juutypɨk tayooxpaʼtpa jesɨk tan̈wɨkɨʼpin̈ba iga jeʼm Biblia dyaʼ tamɨgoyaʼyba?

¹¹ Jesɨk tan̈kɨʼpin̈ba juutypɨk kupakneyaj weeñi jɨychagoʼoyiyaj itywɨʼɨp jeʼm Dios In̈matyijom, majtyim tanaidyaʼyba confianza Jehová y tan̈kupɨkpa jempɨk tanɨʼmaʼyba. Yɨʼpyaj jɨychagoʼoyiyaj ipɨɨmchiʼibatyim jeʼm tanan̈jogoʼoyi y tayooxpaʼtpa iga tanaidyiñ tuum wɨbɨk jɨɨxi naxiñ tyi naspa. Sɨɨ tan̈kɨʼpin̈taʼmpa wɨsteen jɨychagoʼoyiyaj itywɨʼɨp en jeʼm libro de Daniel iga kupakpa ixɨʼyaj yɨʼp jaama. Jesɨk tan̈kutɨʼɨyɨʼyba tayooxpaʼtpa tan̈wɨpɨk tanjɨɨxi.

12. ¿Juʼuts jeʼm watyñax ipuyyaj, y tyi ikwiñkejpa? (Daniel 2:41-43).

¹² (Maayɨʼ Daniel 2:41-43). Jeʼm an̈jagoʼoyi Nabucodonosor imaawiñix tuum watyñax iga jeʼm ipuyyaj jeex juʼuts  jeʼm «suʼun̈nas mujnewɨʼɨp iga motneʼ kun tɨʼn̈kuy». Jesɨk tan̈kɨʼpin̈ba kun tun̈gak jɨychagoʼoyiyaj in̈matwɨʼɨp Daniel y jempɨk ityyaj en Apocalipsis, tanaʼmpa iga jeʼm ipuyyaj ikwiñkejpa jeʼm potencia mundial itywɨʼɨp yɨʼp jaama, juuty tɨgɨykuʼmneyaj jeʼm Reino Unido y Estados Unidos. Jesɨgam Daniel in̈maday Nabucodonosor tyi nɨmtoʼoba jeʼm imaawiñ, iga sɨʼ idyɨk ijɨykiʼm jeʼm potencia mundial nɨm yɨʼɨmpɨk: «Jeʼm an̈jagoʼoyi jemtyim pɨɨmi y jemtyim dyaʼ pɨɨmi». ¿Tyiʼiga dyaʼ pɨɨmi? Iga dyaʼ ityumpɨyyaj jempɨk an̈jakneyajta ikuyaʼgɨyyajpa, jeʼeyajam jeʼm suʼun̈nas mujnewɨʼɨp iga dyaʼ ipɨɨmchiʼiba jeʼm tɨʼn̈kuy. d

13. ¿Juʼptam an̈kejayoʼoyiyaj takkutɨʼɨyɨʼyba yɨʼp jɨychagoʼoyi?

¹³ Iga Daniel in̈mat tyi ikwiñkejpa jeʼm watyñax ipuyyaj, tayooxpaʼtpa tan̈kutɨʼɨyɨy weeñi an̈kejayoʼoyi. Wiñtyipɨk, jeʼm potencia mundial iga tɨgɨykuʼmneʼ jeʼm Reino Unido y Estados Unidos ikwiñkejneʼ iga pɨɨmiɨy. Juʼuts akwiñkejoʼoyi, yooxpadoyyaj iga kooñwɨytyaiñ ikwɨstɨk jeʼm Guerra Mundial. Pero jesɨk jeʼm tɨgan̈juj in̈teeñkamokyajpa jeʼm an̈jagoʼoyiyaj iga dyaʼ ikusuʼnɨyyajpa jempɨk sɨʼ iwatyaj, ikwiñkejyajpa iga dyaʼ jespɨy pɨɨmi. Wɨstenpɨk, yɨʼbam jeʼm in̈an̈pɨgam potencia mundial iga itypa, wiñtyi iga jeʼm Dios iAn̈jagoʼoyi iktogoʼyiñ jeʼm an̈jagoʼoyiyaj itywɨʼɨp yɨʼp naxyukmɨ. Wɨapsɨ iga tun̈gak naciónyaj in̈teeñkamokyajpa, pero dyam itypa tun̈gak potencia. Tanjoodon̈tam iga jeʼm jɨychagoʼoyi ijɨykiʼmpa tuum «tsaʼ» iga ikwiñkejpa —jeʼm Dios iAn̈jagoʼoyi— ikkukɨʼdan̈aʼyba jeʼm watyñax ipuy (Dan. 2:34, 35, 44, 45).

14. Jesɨk tan̈kutɨʼɨyɨʼyba tyi ikwiñkejpa jeʼm watyñax ipuy, ¿juutypɨk tayooxpaʼtpa tan̈wɨpɨk tanjɨɨxi?

¹⁴ ¿In̈wɨkupɨkneʼ mich tyi ikwiñkejpa jeʼm watyñax ipuyyaj? Siiga jesaneum, inikwiñkejpa jeʼm iñityijom. Dyaʼ iñtyeguedaap iga iniitypa jaʼyan̈ tumiñ o iniitypa tyidyin̈kej iga iñjoodon̈ iga dyaʼ jaʼyñeʼ ityumpɨy yɨʼpyaj togoyyajpa (Luc. 12:16-21; 1 Juan 2:15-17). Jesɨk in̈kutɨʼɨyɨʼyba yɨʼp jɨychagoʼoyi, miyooxpaʼtpa iga maaj iñtyeguedaiñ jeʼm an̈matkuy y iñyooxpaʼdyiñ tun̈gakyaj (Mat. 6:33; 28:18-20). Sɨɨ iga tan̈kɨʼpin̈netaʼmum yɨʼp jɨychagoʼoyi, nakwaʼktaajɨ: «¿Anakwiñkejpa kun jeʼm jɨɨxiyaj ampɨkpaʼap iga an̈wɨkupɨkpa iga jeʼm Dios iAn̈jagoʼoyi dyaʼ jaʼyñeʼ iktogoyba jeʼm an̈jagoʼoyiyaj yɨʼp naxyukmɨpɨk?».

15. ¿Iapaʼap yɨʼp jaama «jeʼm nortejpɨk an̈jagoʼoyi» y «jeʼm surpɨk an̈jagoʼoyi»? (Daniel 11:40).

¹⁵ (Maayɨʼ Daniel 11:40). e Jeʼm capítulo 11 de Daniel ijɨykiʼmpa wɨsteen an̈jagoʼoyiyaj iga nan̈teeñkamokyajtaap. Jesɨk tan̈kɨʼpin̈ba yɨʼp jɨychagoʼoyi y tun̈gakyaj iga itytyim jeʼm Bibliajom, takkutɨʼɨyɨʼyba iga yɨʼp jaama Rusia y jeʼm iyooxpaʼtyajpaʼap jeʼam «jeʼm nortejpɨk an̈jagoʼoyi», y jeʼm potencia mundial juuty tɨgɨykuʼmneyaj jeʼm Reino Unido y Estados Unidos jeʼam «jeʼm surpɨk an̈jagoʼoyi». f

16. ¿Juʼptam yaʼachaajiyaj sɨʼ in̈an̈kamokyaj jeʼm Dios iyooxakɨʼɨwiñyaj jempɨk ityyaj juuty in̈jakneʼ «jeʼm nortejpɨk an̈jagoʼoyi»?

¹⁶ «Jeʼm nortejpɨk an̈jagoʼoyi» sɨʼ  iyaʼachwat jeʼm Dios iyooxakɨʼɨwiñyaj jempɨk ityyaj juuty in̈jakneʼ. Weeñi Testigojyaj koʼtsneyajta y pajneyajta iga ikupɨkyajpa Dios. Pero jeʼm tantɨwɨtam dyaʼ ikɨɨn̈neyaj yɨʼp «nortejpɨk an̈jagoʼoyi». Majtyim pɨɨmianeyaj jeʼm ife. ¿Tyiʼiga? Iga ijoodon̈yaj iga yɨʼp yaʼachaaji jɨychakneta en jeʼm libro de Daniel (Dan. 11:41). g Jesɨk tanjɨɨskupakneʼeba juutypɨk kupakpa ixɨʼ yɨʼp jɨychagoʼoyi, ipɨɨmchiʼiba jeʼm tanan̈jogoʼoyi y tayooxpaʼtpatyim iga tan̈kupɨguiñ Jehová.

17. ¿Juʼptam yaʼachaajiyaj in̈an̈kamokneyaj jeʼm Dios iyooxakɨʼɨwiñyaj jempɨk ityyaj juuty in̈jakneʼ «jeʼm surpɨk an̈jagoʼoyi»?

¹⁷ Pekaʼ, «jeʼm surpɨk an̈jagoʼoyi» iyaʼachwattyim jeʼm Jehová ikumun. En jeʼm siglo veinte pajyajta jaʼyan̈ tɨwɨtam y jaʼyan̈ tsɨxtyam iga Testigojyaj topyajta juuty kuyujyajpa. Pero, yɨʼp in̈an̈pɨgam amtyɨyyaj, jempɨk ikuyaʼgɨyyajpa jeʼm Dios iAn̈jagoʼoyi  in̈an̈kamokneyajtyim kutɨʼɨchiyaj. Juʼuts akwiñkejoʼoyi jesɨk itypa jeʼm campañas iga kupin̈taap tuum an̈jagoʼoyi, wɨapsɨ iga tuum cristiano mojpa ijɨɨs siiga ikuyaʼgɨʼyba tuum de jeʼeyaj. Mex iga dyaʼ nɨkpa votación, wɨapsɨ iga jeʼm ijɨɨxian̈jom y jeʼm ianmajom ixunba iga tuum ikooñwɨʼyiñ. Jeʼyukmɨ juchixkej tan̈kuixiñ jempɨk tan̈watpa, tanjɨɨspa y tanjaampa (Juan 15:18, 19; 18:36).

18. ¿Juʼuts tanan̈jaam jesɨk tanaʼmpa iga yɨʼp wɨsteen an̈jagoʼoyiyaj sɨʼ inin̈teeñkamokyajta? (Aʼmɨtyim jeʼm imagenyaj).

¹⁸ Wɨapsɨ iga jempɨk dyaʼ ikupɨkyajpa jeʼm jɨychagoʼoyiyaj itywɨʼɨp Bibliajom, an̈yaʼkyajpa jesɨk iaʼmyajpa iga «jeʼm surpɨk an̈jagoʼoyi» y «jeʼm nortejpɨk an̈jagoʼoyi» sɨʼ inin̈teeñkamokyajta (Dan. 11:40). Yɨʼp wɨsteen an̈jagoʼoyiyaj iniityyaj jeʼm bombas nucleares iga wɨap ikkutogoyay ityumpɨy jempɨk ity yɨʼp Naxyukmɨ. Pero Jehová dyaʼ sɨʼ iaʼmchiʼ iga naxiñ jeempɨk (Is. 45:18). Jeʼyukmɨ dyaʼ tan̈yaʼktaʼmpa y dyaʼ takɨɨn̈taʼmpa. Jesɨk tanaʼmpa iga «jeʼm nortejpɨk an̈jagoʼoyi» y «jeʼm surpɨk an̈jagoʼoyi» an̈aapa ixɨʼyaj, ipɨɨmchiʼiba jeʼm tanfe iga dyam jaʼyñeʼ nuʼkpa jeʼm aktogoyoʼoyi.

19. ¿Tyiʼiga tanteguedaiñ jeʼm jɨychagoʼoyiyaj itywɨʼɨp Bibliajom?

¹⁹ Dyaʼ tanjoodon̈tam juutypɨk kupakyajpa weeñi jɨychagoʼoyiyaj itywɨʼɨp Bibliajom. Jeʼm profeta Daniel dyatyim iwɨkutɨʼɨyɨʼyba idyɨk ityumpɨy jempɨk ijaykunuʼk (Dan. 12:8, 9). Mex iga dyaʼ tan̈wɨkutɨʼɨyɨʼyba juutypɨk kupakpa tuum jɨychagoʼoyi, dyaʼ nɨmtoʼoba iga dyaʼ sɨʼ ikupak. Tan̈wɨkupɨkpa iga Jehová tanɨʼɨyɨyaʼyba tananɨk juʼutstyim iwat pekaʼ (Amós 3:7).

20. ¿Juʼptam jɨychagoʼoyiyaj dyaʼ jaʼyñeʼ kupakyajpa, y tyi tan̈wadyiñ?

²⁰ Jeʼm naciónyaj nɨmyajpa «D́a t́i id́ɨ́yɨ́y, d́a i̱ jém tamalwadaypáppɨc» (1 Tes. 5:3). Jesɨk nɨmyajpa yɨʼp an̈maatyi, jeʼm an̈jagoʼoyiyaj mojpa ikkutogoyayyaj jeʼm religiónyaj mɨgoyyajpaʼap (Apoc. 17:16, 17). Okmɨ jeempɨktyim iwatyajtoʼoba kun jeʼm Dios ikumun (Ezeq. 38:18, 19). Jesabam ichukum Armagedón (Apoc. 16:14, 16). Tan̈wɨkupɨknetaʼm iga dyaʼ jaʼyñeʼ naspa ityumpɨy yɨʼp. Iganam tanan̈joʼkpa, tanakwiñkejiñ iga tantoyba tanJaatun̈ sɨn̈yukmɨpɨk y tanteguedaiñ jeʼm jɨychagoʼoyiyaj, y tanyooxpaʼdyiñ tun̈gakyaj iga jeempɨktyim iwatyajiñ.