1. Juʼuts nɨmpa Hebreos 12:1, ¿tyi tan̈wadyiñ iga tampɨktson̈iñ jeʼm ityi dyapɨk kuyajpa?

 JEʼM Biblia nɨmpa iga juʼuts tacristianojtam tanaitytyaʼm tuum yooxakuy. Y jempɨk ikkupakyajpa iyooxakuy ipɨktson̈yajpa tuum ityi dyapɨk kuyajpa (2 Tim. 4:7, 8). Odoy tateeñan̈jaguiñ, dyam jaʼyñeʼ tampɨktson̈ba jeʼm kooñwɨyoʼoyi. Jeʼm apóstol Pablo ikkupak iyooxakuy, y in̈mat tyi wɨap tayooxpaʼttaʼm. Nɨm: «Wɨ̱ iga tantsacpa jém tantáŋca [...] iga tanyaachɨ́yiñ it́u̱mpɨy cosa iga taŋwattámpa juuts ixunpa Dios» (maayɨʼ Hebreos 12:1).

2. ¿Tyi nɨmtoʼoba idyɨk Pablo jesɨk nɨm iga «tantsacpa jém tantáŋca»?

² ¿Tyi nɨmtoʼoba jeʼm an̈matyiyaj «tantsacpa jém tantáŋca»? Pablo sɨʼ idyɨk iñɨm iga jeʼm cristianojyaj odoy iniityyajiñ jeʼm jɨɨxiyaj iga wɨap imalwaday. Yɨʼpyaj jɨɨxiyaj wɨap takkupoʼnaket y dyam taaʼmchiʼiba iga tanakkupaguiñ tanyooxakuy. Tanakɨʼpin̈taiñ siiga jeempɨgam sɨʼ tannaskaʼ. Pero odoy tantsaguiñ iga tan̈watpa tyityam tayooxpaʼtpa tampɨktson̈ jeʼm ityi dyapɨk kuyajpa (2 Tim. 2:5). Tan̈kɨʼpin̈taʼmiñ tyityam tayooxpaʼtpa.

3. a) Juʼuts nɨmpa Gálatas 6:5, ¿tyi iwadyiñ tumtum cristiano? b) ¿Tyi tan̈kɨʼpin̈taʼmpa yɨʼp kuyujijom, y tyiʼiga?

³ (Maayɨʼ Gálatas 6:5). En yɨʼp versículo Pablo  in̈mat tyi iwadyiñ tumtum cristiano, jeʼ nɨm: «Cada tu̱mtu̱m ininɨguiñ iyaac jém ichɨ̱mi». ¿Tyi nɨmtoʼoba idyɨk? Iga tumtum de taɨchtyam tanakkupaguiñ jempɨk Dios tawaʼgaʼyba iga tan̈wadyiñ. Yɨʼp kuyujijom tan̈kɨʼpin̈taʼmpa tyityam tawaʼgaʼyba Dios iga tan̈wadyiñ y tyityam tayooxpaʼtpa tanakkupak. Tan̈kɨʼpin̈taʼmpatyim juʼptam jɨɨxiyaj tamalwadaʼyba, y tyi tayooxpaʼtpa iga odoy tanaidyiñ. Siiga tan̈watpa numaaj jempɨk Dios tawaʼgaʼyba, wɨap tampɨktson̈ jeʼm ityi dyapɨk kuyajpa.

4. ¿Tyiʼiga wɨap tanakkupak jeʼm tan̈kɨan̈kodoʼoyi? (Aʼmɨtyim jeʼm imagenyaj).

⁴ Jeʼm tan̈kɨan̈kodoʼoyi. Jesɨk tan̈kɨan̈koday tañityi Jehová, tannɨʼmay iga tan̈koosteñaʼyba y tan̈watpa jempɨk jeʼ ixunba. Mex iga usan̈ tan̈kaʼ, wɨap tanakkupak jempɨk tanjɨykamayñeʼ. ¿Tyiʼiga? Iga Jehová tawatneʼ iga tan̈kuyooxaiñ (Apoc. 4:11). Takkamay jeʼm jɨɨxi iga tañixpɨktaʼmiñ y tan̈koosteñaytyaʼmiñ, tawattyim kun jeʼm jɨɨxiyaj y jaamoʼoyiyaj iga iniity. Jeʼyukmɨ wɨap  tan̈kunuʼktaʼm y tamaymaytyam iga tan̈kuyooxataʼmpa (Sal. 40:8). Y jesɨk tan̈watpa jempɨk Jehová ixunba y tan̈watkiʼpsaʼyba jeʼm iMaanɨk, tsaam wɨɨ tanan̈jaam (Mat. 11:28-30).

5. ¿Tyi miyooxpaʼtpa iga inikkupaguiñ jeʼm in̈kɨan̈kodoʼoyi? (1 Juan 5:3).

⁵ ¿Tyi miyooxpaʼtpa? Wiñtyipɨk, pɨɨmchiɨʼ jeʼm iñtyoyoʼoyi por Jehová. Siiga in̈kujɨɨspa juʼtspɨy miyooxpaʼtneʼ y juʼtsan̈ kumaykedoʼoyi michiʼiba jeʼm iññɨgɨyoʼoyijom, majtyim iñtyoyba. Y jesɨk maaj iñtyoyba, maaj dyaʼ tan̈kaʼap in̈kupɨk jeʼm ian̈kiʼmayoʼoyiyaj (maayɨʼ 1 Juan 5:3). Wɨstenpɨk, watkiʼpsɨ Jesús. Iga iwatpa idyɨk an̈wejpadoʼoyiyaj y ikujɨɨspa idyɨk jempɨk impɨktson̈ba, wɨa mu iwat jempɨk Dios ixunba (Heb. 5:7; 12:2). Juʼutstyim Jesús, tanan̈wejpaʼdyiñ Jehová y tanjɨɨskupakneiñ jeʼm tanan̈jogoʼoyi. Siiga impɨɨmchiʼiba jeʼm iñtyoyoʼoyi por Jehová y in̈watkiʼpsaʼyba jeʼm iMaanɨk iakwiñkejoʼoyi, wɨap inikkupak in̈kɨan̈kodoʼoyi.

6. ¿Tyiʼiga tan̈kuixtyaʼmiñ jeʼm tanfamilia? (Aʼmɨtyim jeʼm imagenyaj).

⁶ Tan̈kuixtyaʼmiñ tanfamilia. Wɨɨ iga tantoʼyiñ tanfamilia, pero tanakwiñkejiñ iga maaj tantoyba Jehová y Jesús (Mat. 10:37). Y jesɨk tan̈kuyooxaap Jehová, dyaʼ nɨmtoʼoba iga dyam wɨap tan̈kuix tanfamilia, jeʼeyaj ixunyajpa iga tanakkupaguiñ yɨʼp yooxakuy (1 Tim. 5:4, 8). Siiga tan̈watpa jeempɨk, maaj tamaymayaap. Jehová ijoodon̈ iga jeʼm familia iwɨnɨgayyajpa jesɨk jeʼm yoomoʼ y jeʼm pɨɨxiñ natoyyajtaap y nakwiñkejaytaap respeto, jesɨk jeʼm jaatun̈yaj ityoyyajpa y ijɨɨxian̈chiʼiyajpa jeʼm imanɨktam, y jesɨk jeʼm manɨktam ikupɨkyajpa jeʼm ijaatun̈yaj (Efes. 5:33; 6:1, 4).

7. ¿Tyi miyooxpaʼtpa inikkupak iñyooxakuy iñfamiliajom?

⁷ ¿Tyi miyooxpaʼtpa? Mijaatun̈tam, miwɨdyaaya, miyomtam, o mimanɨktam, kupɨktaʼamɨ jeʼm an̈kiʼmayoʼoyi itywɨʼɨp Bibliajom. Odoy waatɨ juʼuts iwatyajpa y nɨmyajpa tun̈gakyaj, y odoy namɨgoyaytyaajɨ iga juutypɨk mich iñjɨɨspa maaj wɨɨ (Prov. 24:3, 4). Jeʼm totjaayijomyaj impaʼtpa an̈kiʼmayoʼoyiyaj iga miyooxpaʼtpa in̈watkiʼps jeʼm jɨɨxian̈chioʼoyiyaj itywɨʼɨp Bibliajom. Juʼuts akwiñkejoʼoyi, jeʼm jaakaʼ juuty nɨmpa «Yooxpadoʼoyi para jeʼm familiajyaj» iniity an̈kejayoʼoyiyaj para jempɨk an̈koʼmɨyñeyaj, jeʼm jaatun̈yaj y para jeʼm traytyipɨxiñtyam y wooñyomtam iga ijoodon̈ayajiñ tyi wɨap iwatyaj jesɨk in̈an̈kamokyajpa tuum nasɨyoʼoyi. b Siiga iñfamiliajom numaaj mich in̈kupɨkpa jeʼm an̈kiʼmayoʼoyiyaj itywɨʼɨp Bibliajom, seguido kupɨɨkɨ, iñaʼmpa iga iwɨwadaʼyba jeʼm iñfamilia y Jehová mikumayketpa (1 Ped. 3:1, 2).

8. ¿Tyi naspa jesɨk dyaʼ tan̈wɨpɨkpa tanjɨɨxi?

⁸ Jesɨk tampɨkpa tanjɨɨxi. Jehová tachiʼiñeʼ jeʼm xaaja iga tanyaʼak tampɨguiñ tanjɨɨxi, y jeʼ ixunba iga tawɨnɨgaʼyiñ jesɨk tan̈wɨpɨkpa. Pero jesɨk dyaʼ tan̈wɨpɨkpa, tamalnɨgaʼyba (Gál. 6:7, 8). Jeʼyukmɨ siiga dyaʼ tan̈wɨjɨɨspa tyi tanɨmpa, tyi tan̈watpa o jobity tampɨkpa tanjɨɨxi, odoy  tanan̈joʼguiñ iga tawɨnɨgaʼyba. Wɨap iñas iga jeʼm tanjɨɨxi tamoʼogɨʼyba y dyaʼ wɨɨ tanan̈jaam. Yɨʼp tayooxpaʼtpa iga tanan̈madyiñ jempɨk tan̈watneʼ y tan̈kaguiñ tanjɨɨxi. Jesɨk wɨapnam tampɨktson̈ jeʼm ityi dyapɨk kuyajpa.

9. ¿Tyi miyooxpaʼtpa siiga dyaʼ in̈wɨpɨkneʼ iñjɨɨxi? (Aʼmɨtyim jeʼm imagenyaj).

⁹ ¿Tyi miyooxpaʼtpa? Jempɨk in̈watneʼ dyam wɨap in̈kukagay. Pero odoy jɨɨsjɨsneɨʼ tyiʼiga immalwat, y odoytyim tsagaʼayɨ culpa tun̈gakyaj. Maaj wɨɨ iga in̈kaguiñ iñjɨɨxi. Y siiga dyaʼ wɨɨ inin̈jaam por jempɨk iwatneʼ, an̈wejpaʼatɨ Jehová, y waʼgaʼayɨ iga miwadaʼyiñ perdón (Sal. 25:11; 51:3, 4). Y siiga immalwadayñeʼ algun i, namuruujɨ y waʼgaʼayɨ perdón. Y siiga nasuntaap, kuaʼmɨ jeʼm ancianojyaj iyooxpadoʼoyi (Sant. 5:14, 15). Jɨɨskupakneɨʼ iga wiñtyi iga miñɨʼmiñ o in̈wadyiñ algun tyi, wɨpɨɨkɨ iñjɨɨxi. Kupɨɨkɨ iga Jehová miyooxpaʼtpa y mikwiñkejaʼyba iyaʼachan̈jamoʼoyi (Sal. 103:8-13).

10. ¿Tyiʼiga odoy tan̈kukiʼpxiñ jempɨk tan̈watpa kun jempɨk iwatyajpa tun̈gakyaj? (Gálatas 6:4).

¹⁰ Jesɨk tan̈wattoʼoba tyityam dyaʼ wɨap tan̈wat. Tanakwiñkejpa yɨʼp jɨɨxi jesɨk tanakukiʼpstaap kun jempɨk iwatyajpa tun̈gakyaj (maayɨʼ Gálatas 6:4). Siiga tan̈watpa yɨʼɨmpɨk, wɨap iga tan̈kunaʼɨʼyba tun̈gakyaj y tanan̈kejtaap (Gál. 5:26). Y jesɨk tan̈wattoʼobatyim juʼuts tun̈gakyaj, wɨapsɨ iga tanatsɨksoʼpstaap. Jeʼm Biblia nɨmpa: «Jesɨk dyaʼ jobity kupakpa jempɨk tanan̈joʼkneʼ ikmɨmneaktɨn̈ba tananmaj» (Prov. 13:12). Pɨɨmi takkobakpijpa siiga dyaʼ wɨap tanakkupak jempɨk tan̈wattoʼoba, y takkupoʼnaketpa espiritualmente (Prov. 24:10).

11. ¿Tyi tayooxpaʼtpa iga odoy tan̈kukiʼpxiñ jempɨk tan̈watpa kun jempɨk iwatyajpa tun̈gakyaj?

¹¹ ¿Tyi miyooxpaʼtpa? Odoy nateguedɨytyaajɨ siiga algun tyi dyaʼ wɨap in̈wat, Jehová dyaʼ mityeguedɨʼyba (2 Cor. 8:12). Jehová dyaʼ mikukiʼpspa kun jempɨk iwatyajpa tun̈gakyaj (Mat. 25:20-23). Jeʼ ichoowaixpa jempɨk mich wɨap in̈wat, iga in̈kuyooxaap kun ityumpɨy iñanmaj, mikupɨgoʼyba y iniity yaʼachɨyoʼoyi. Jeʼm modestia miyooxpaʼtpa iñjɨɨs iga jeʼm iñamtyɨy, jeʼm mɨmneiyaj y tun̈gak nasɨyoʼoyiyaj jobity wɨap ikukagay iñityi. Juʼutstyim Barzilái, odoy pɨktson̈ɨ yooxakuyyaj iga dyam wɨap in̈wat (2 Sam. 19:35, 36). Juʼutstyim Moisés, waʼakɨ yooxpadoʼoyi y aʼmchiɨʼ iga tun̈gakyaj miyooxpaʼtyajiñ (Éx. 18:21, 22). Siiga inikwiñkejpa modestia, dyaʼ miniteguedɨytyaap iga in̈watpa jempɨk dyaʼ wɨap in̈wat.

12. ¿Tanaitypa culpa jesɨk tun̈gakyaj dyaʼ iwɨpɨkyajpa ijɨɨxi?

¹² Jesɨk tanjaampa iga tanaity culpa iga tun̈gakyaj dyaʼ iwɨpɨkyajpa ijɨɨxi. Dyaʼ wɨap tampɨʼɨmɨy tun̈gakyaj iga iwɨpɨkyajiñ ijɨɨxi y odoy yaʼachayajiñ. Jeʼm jaatun̈yaj tsaam yaʼachayajpa jesɨk tuum imaanɨk ichakpa Jehová. Wɨap iga ijaamyajpa iga jeʼam iniityyaj jeʼm culpa iga jeʼm imaanɨk dyaʼ iwɨpɨk ijɨɨxi y yɨʼp wɨap imalwaday, pero Jehová dyaʼ ixunba iga ijɨɨsyajiñ jeempɨk (Rom. 14:12).

13. ¿Tyi wɨap iwat tuum jaatun̈ jesɨk jeʼm imaanɨk dyaʼ iwɨpɨkpa ijɨɨxi?

¹³ ¿Tyi miyooxpaʼtpa? Kujɨɨsɨ iga Jehová tachiʼiñeʼ jeʼm xaaja iga tanyaʼak tampɨguiñ tanjɨɨxi siiga tan̈kuyooxaap o dyaʼ. Jehová ijoodon̈ iga mityan̈kaɨytyim, y inikkupakneʼ jeʼm iñyooxakuy  juʼuts mijaatun̈. Siiga immaanɨk dyam ikuyooxaap Jehová, dyaʼ mich in̈culpa (Prov. 20:11). Wɨapsɨ iga seguido iñjɨɨspa jesɨk mijɨɨxtyogoy juʼuts mijaatun̈. Pero an̈madaʼayɨ Jehová juʼuts inin̈jaam y waʼgaʼayɨ perdón. Jeʼ ijoodon̈ iga dyam wɨap in̈kukagay jempɨk nas. Jehová dyaʼ in̈joʼkpa iga mich inikkaʼyaʼyiñ jeʼm immaanɨk iyaʼachaaji iga tan̈kawatneʼ. Y odoy kujaʼamaʼayɨ iga siiga jeʼm immaanɨk ikuseetpa Jehová, jeʼ eybɨk ipɨktson̈ba (Luc. 15:18-20).

14. ¿Tyiʼiga odoy tanjɨɨsjɨsneiñ jeʼm tan̈kaʼ tan̈watnewɨʼɨp?

¹⁴ Jesɨk pɨɨmi tanjɨɨspa jeʼm tan̈kaʼ tan̈watnewɨʼɨp. Jesɨk tatan̈kawatpa dyaʼ wɨɨ tanan̈jaam. Pero siiga tanjɨɨsjɨsneʼeba wɨap tamalwaday, y Jehová dyaʼ ixunba iga tan̈wadyiñ jeempɨk. ¿Tyi tayooxpaʼtpa iga odoy pɨɨmi tanjɨɨxiñ jeʼm tan̈kaʼ tan̈watnewɨʼɨp? Siiga tanan̈matneum, tan̈kuaʼmneum jeʼm yooxpadoʼoyi y tampɨkneʼ tanjɨɨxi iga dyam maaj tan̈watpa, wɨap tan̈kupɨk iga Jehová tawadayñeum perdón (Hech. 3:19). Jesɨk tan̈watneum yɨʼɨmpɨk, Jehová dyaʼ ixunba iga juchixkej tanjɨɨsjɨsneiñ jempɨk tan̈wat (Sal. 31:10). Siiga pɨɨmi tan̈yaʼkpa, wɨap iga dyam taaʼmchiʼiba iga tan̈kuyooxaap Jehová y dyam wɨap tampɨktson̈ jeʼm ityi dyapɨk kuyajpa (2 Cor. 2:7).

15. ¿Tyi miyooxpaʼtpa iga odoy pɨɨmi iñjɨɨxiñ jeʼm tan̈kaʼ in̈watnewɨʼɨp? (1 Juan 3:19, 20; aʼmɨtyim jeʼm fotojyaj).

¹⁵ ¿Tyi miyooxpaʼtpa? Siiga pɨɨmi iñjɨɨspa jeʼm tan̈kaʼ in̈watnewɨʼɨp, kujɨɨsɨ iga Dios miwadayñeum perdón (Sal. 130:4). Jesɨk algun i ichakpa iga imalwatpa y ikakpa ijɨɨxi, Jehová ikkupakpa yɨʼp jɨykamoʼoyi: «Dyam maaj anjɨɨsaʼyba jeʼm ityan̈kaʼ» (Jer. 31:34). Yɨʼp nɨmtoʼoba iga jesɨk Jehová miwadaʼyba perdón, dyam mikjɨɨspa jempɨk in̈watneʼ. Pero siiga okmɨ miyaʼachaap iga mityan̈kawatneʼ, dyaʼ nɨmtoʼoba iga Jehová dyanam  miwadayñeʼ perdón. Y siiga sɨɨ dyaʼ wɨap in̈wat weeñi yooxakuyyaj jeʼm kumunjom, odoy an̈yaʼakɨ. Jehová ikujaʼamayñeum jeʼm iñtyan̈kaʼ…, ¿tyiʼiga dyaʼ jeempɨktyim in̈watpa? (Maayɨʼ 1 Juan 3:19, 20).

16. ¿Tyi tanjɨɨskupakneiñ iga wɨaiñ tanakkupak tanyooxakuy?

¹⁶ Iga wɨaiñ tampɨktson̈ jeʼm ityi dyapɨk kuyajpa, tan̈kupɨguiñ yɨʼp an̈kiʼmayoʼoyi: «Wattaamɨ juuts ixunpa Dios con it́u̱mpɨy impɨ̱mi iga wɨa̱iñ iŋcoñwɨ́y jém wɨbɨc premio» (1 Cor. 9:24). Iga wɨaiñ tan̈kooñwɨy, tanjɨɨskupakneiñ tyityam tan̈wadyiñ y odoy tanaidyiñ jeʼm jɨɨxiyaj tamalwadaypaʼap. Yɨʼp kuyujijom tan̈kɨʼpin̈netaʼm juʼptam, pero ityñam tun̈gakyaj. Jesús nɨm: «D́a wɨ̱ siiga tsa̱m it́ jém malopɨc jɨ̱xi [iñanmajom], tsa̱m miucpa, tsa̱m iñjɨ̱spa jém iniit́wɨɨp yɨ́p naxyucmɨ» (Luc. 21:34). Yɨʼpyaj textos y tun̈gakyaj tayooxpaʼtpa tanaʼm juʼptam kukakiyaj nasuntaap iga tan̈wadyiñ iga wɨaiñ tanakkupak tanyooxakuy y tampɨktson̈ jeʼm ityi dyapɨk kuyajpa.

17. ¿Tyiʼiga tan̈kupɨkpa iga wɨap tampɨktson̈ jeʼm ityi dyapɨk kuyajpa?

¹⁷ Tan̈kupɨktaʼmpa iga wɨap tampɨktson̈taʼm jeʼm ityi dyapɨk kuyajpa iga Jehová tayooxpaʼtpa (Is. 40:29-31). Jeʼyukmɨ odoy teeñan̈jaakɨʼ. Waatɨ juʼutstyim jeʼm apóstol Pablo, jeʼ iwɨkuyooxa Jehová iga wɨaiñ ipɨktson̈ jeʼm ikumaykedoʼoyi (Filip. 3:13, 14). Dyaʼ i wɨap miwaday jeʼm yooxakuy, pero Jehová dyaʼ michakpa in̈kutyum. Michiʼiba jeʼm yooxpadoʼoyi mityogoyaywɨʼɨp iga wɨaiñ inikkupak (Sal. 68:19). Jeʼyukmɨ kun jeʼm iyooxpadoʼoyi wɨap iñyaʼachɨy y impɨktson̈ jeʼm ityi dyapɨk kuyajpa.