• «Keʼnam jeʼm an̈wɨdyaaya sɨʼ idyɨk apej».

• «Anjaampa idyɨk iga dyaʼ wɨɨ an̈keeji, dyaʼ tyi akumeskuy y dyaʼ wɨɨ idyɨk anan̈jaam».

• «An̈yaʼkpa idyɨk y ni i dyaʼ wɨap anan̈maday idyɨk juʼuts anan̈jaam».

• «Moj anjɨɨs iga Jehová dyaʼ ateguet».

Yɨʼpyaj an̈matyiyaj iwɨakwiñkejpa juʼuts in̈jaamyaj jeʼm yomtam jesɨk iwɨdyaaya iaʼmpa pornografía. Y siiga nɨkiam meses o amtyɨyam iga sɨʼ iyamwat, wɨap iga tan̈kaʼap eybɨk iniidyay confianza iwɨdyaaya. Tuum yoomoʼ nɨm: «Keʼnam dyaʼ idyɨk añixpɨkpa an̈wɨdyaaya. Anakwaʼktaap idyɨk tyiñam maaj sɨʼ iyamwat».

¿Iaʼmpa in̈wɨdyaaya pornografía? a Yɨʼp an̈kejayoʼoyi watta iga iyooxpaʼdyiñ jeʼm yoomtɨwɨtam jempɨk sɨʼ iñaskayaj yɨʼɨmpɨk. Kɨʼpin̈taap jɨɨxian̈chioʼoyiyaj itywɨʼɨp Bibliajom iga mikpoʼkspa, mikkupɨkpa iga Jehová dyaʼ michakpa in̈kutyum y miyoxpaʼtpa emocionalmente y espiritualmente. b

Mich dyaʼ wɨap inin̈jak ityumpɨy jempɨk iwatpa in̈wɨdyaaya, pero wɨap impɨk weeñi jɨɨxiyaj iga miyooxpaʼtpa iga iniidyiñ paz. Tanaʼmiñ juʼptam.

Odoy jɨɨsɨ iga mich iniity jeʼm culpa. Wɨapsɨ iga tuum yoomoʼ ijaampa jeempɨk jesɨk jeʼm iwɨdyaaya iaʼmpa pornografía. Juʼuts akwiñkejoʼoyi, Alice c jeʼam ijɨɨspa y nakwaʼktaap idyɨk: «¿Tyiʼiga an̈wɨdyaaya maaj ikusuʼnɨʼyba iaʼm tun̈gak yomtam?». Y weeñi yomtam ijɨɨsyajpa iga majtyim ijaʼyan̈watyajpa jempɨk naspa ixɨʼ kun jeʼm jɨɨxi ikwiñkejyajpaʼap. Daniela nɨmpa: «Pɨɨmi idyɨk anjoʼykaʼaba iga an̈wɨdyaaya iaʼmpa pornografía, y anjaampa idyɨk iga kun yɨʼp jɨɨxi ɨchtyim sɨʼ ammalwaday jeʼm anan̈komɨʼɨyi».

Siiga jeexam inin̈jaam, kujɨɨsɨ iga Jehová dyaʼ michagaʼyba culpa de jempɨk iwatpa in̈wɨdyaaya. Santiago 1:14 nɨmpa: «Tammalwatpa porque tsa̱m tanjɨ̱spa jém malopɨc  cosa tanjɨ̱xiaŋjo̱m. Ocmɨ taŋcusúnɨ́ypa hasta tammalwatpa» (Rom. 14:12; Filip. 2:12). Jeʼyukmɨ Jehová dyaʼ michagaʼyba jeʼm culpa, ichoowaixpa jeʼm in̈kupɨgoʼoyi (2 Crón. 16:9).

Siiga in̈wɨdyaaya iaʼmpa pornografía dyaʼ nɨmtoʼoba iga mich in̈culpa. Jeʼm expertos nɨmyajpa iga jeʼm pornografía iwatpa iga iniityyajiñ kusuʼnɨyoʼoyiyaj sexuales y ni tuum yoomoʼ wɨap iktogoy yɨʼpyaj kusuʼnɨyoʼoyiyaj.

Odoy jɨɨsjɨsneɨʼ. Catherine nɨmpa iga tumtum jaama ijɨɨsjɨsneʼeba idyɨk tyiʼiga jeʼm iwɨdyaaya iaʼmpa pornografía. Dyaʼ idyɨk wɨap ikujaʼamay. Frances nɨmpa: «Jesɨk dyaʼ anjoodon̈ juuty ity an̈wɨdyaaya, tsaam akkobakpijpa iga dyaʼ anjoodon̈ tyi sɨʼ iwat». Tun̈gak yoomtɨwɨtam nɨmyajpa iga tsaʼayajpa iityyaj kun tɨwɨtam y yoomtɨwɨtam jempɨk ijoodon̈yaj tyi naspa ixɨʼ kun jeʼm iwɨdyaaya. Y tun̈gakyaj ijaamyajpa iga ityyaj ikutyum iga ijɨɨsyajpa iga dyaʼ i wɨap ikutɨʼɨyɨyyaj.

Dyaʼ malo siiga yɨkx inin̈jaam, pero siiga iñjɨɨsjɨsneʼeba majtyim min̈yaʼkpa. Maaj wɨɨ iga iñtyeguedaiñ jeʼm in̈wɨnanɨgoʼoyi kun Jehová, yɨʼbam miyooxpaʼtpa iga wɨaiñ inin̈an̈kamok (Sal. 62:2; Efes. 6:10).

¿Juutypɨk miyooxpaʼtpa siiga immayba jeʼm Biblia y in̈kujɨɨspa jempɨk immayñeʼ? Impaʼtpa akwiñkejoʼoyiyaj de yomtam iga iñaskayaj tan̈kapɨk nasɨyoʼoyiyaj y jesɨk in̈wejpaʼtyaj Jehová wɨam idyɨk in̈jaamyaj. Dyaʼ akkaʼyayyajta jeʼm ikobakpiijiyaj, pero chiʼiyajta paz. Kujɨɨsɨ jempɨk iñaskaʼ Ana, tsaam idyɨk «an̈yaʼkneʼ». Jeʼ pɨɨmi in̈wejpaʼt Jehová y ijaam paz mex iga dyaʼ ijoodon̈ idyɨk tyi naspa okmɨ (1 Sam. 1:10, 12, 18; 2 Cor. 1:3, 4).

Waʼgaʼayɨ jeʼm ancianojyaj itywɨʼɨp in̈kumunjom iga miyooxpaʼtyajiñ. Jeʼeyaj wɨap ichɨʼyyaj juʼuts «tuum yamkuy jesɨk sujoʼyba jeʼm saawa, tuum yamkuy jesɨk pɨɨmi jeʼm kutujkɨʼ» (Is. 32:2). Wɨapsɨ iga miñɨʼmaytyaap iga inimuruiñ tuum yoomtɨwɨ iniidyaywɨʼɨp confianza iga inin̈madaʼyiñ juʼuts inin̈jaam (Prov. 17:17).

Wɨapsɨ iga minikwaʼktaap siiga wɨap iñyooxpaʼt in̈wɨdyaaya iga odom iaʼmiñ pornografía. Jeʼm Biblia nɨmpa iga jesɨk iwɨtsakyajpa tuum kobakpiiji o ikooñwɨyyajtoʼoba tuum enemigo, «tuum dyaʼ wɨap, maaj wɨɨ siiga wɨstenyaj» (Ecl. 4:9-12). Jeʼm expertos nɨmyajpa iga maaj dyaʼ tan̈kaʼap ichak jeʼm  pornografía y naidyayyajta confianza siiga jeʼm pɨɨxiñ y jeʼm yoomoʼ nayooxpaʼtyajtaap.

Aʼmɨtyim siiga jeʼm in̈wɨdyaaya ipɨkneʼ ijɨɨxi iga nunta dyam iaʼmtoʼoba pornografía. ¿Iñjoodon̈ siiga iwaʼgayñeum Jehová iga iyooxpaʼdyiñ y ikuaʼmneum jeʼm ancianojyaj iyooxpadoʼoyi? (2 Cor. 4:7; Sant. 5:14, 15). ¿Sɨʼ ikwiñkej kun tyityam iwatpa iga dyam iaʼmtoʼoba pornografía? Juʼuts akwiñkejoʼoyi, ¿dyam jespɨy ipɨkpa jeʼm idispositivos electrónicos y iwatpa juʼtspɨy wɨap iga odom iaʼmiñ eybɨk? (Prov. 27:12). ¿Ipɨktson̈toʼoba jeʼm iñyooxpadoʼoyi y min̈madaʼyba tyityam iwatpa? Siiga jeempɨgam iwatpa, wɨap iñyooxpaʼt.

¿Pero juutypɨk wɨap in̈wat? Aʼmɨ jempɨk iwatpa Felicia. Jeʼm iwɨdyaaya Ethan dende ixutyujom moj iaʼm pornografía. Felicia iwatpa juʼtspɨyam wɨap iga jeʼm iwɨdyaaya in̈madaʼyiñ jesɨk iaʼmtoʼoba pornografía. Ethan nɨmpa: «Anan̈madaʼyba anyoomoʼ juʼuts anan̈jaam, jeʼ akwiñkejaʼyba toyoʼoyi y ayooxpaʼtpa iga odoy eybɨk anaʼmiñ. Juchixkej akwaʼkpa juʼuts anan̈jaam y ayooxpaʼtpa an̈wɨpɨk jeʼm internet». Pero Felicia ityoʼyan̈jaampa iga jeʼm iwɨdyaaya ikusuʼnɨʼyba jeʼm pornografía. Jeʼ nɨmpa: «Mex iga antoʼyan̈jaampa y anjoʼykaʼaba, anjoodon̈ iga yɨʼpyaj jaamoʼoyiyaj dyaʼ iyooxpaʼtpa iga ichaguiñ jeʼm pornografía. Jeʼyukmɨ wiñtyi anan̈mattaʼmpa juʼuts in̈jaam y okmɨ anaʼmtaʼmpa tyi wɨap ayooxpaʼt iga odoy pɨɨmi antoʼyan̈jaamiñ».

Jesɨk nan̈madayyajtaap juʼuts in̈jaamyaj iyooxpaʼtpa jeʼm wɨdyaaya iga odoy iaʼmiñ pornografía, y jeʼm iyoomoʼ iyooxpaʼtpa iga eybɨk iniidyaʼyiñ confianza. Jesɨk tuum pɨɨxiñ in̈madaʼyba jeʼm iyoomoʼ jempɨk sɨʼ iñaskaʼ, tyityam iwatpa o juuty ity, jesɨk jeʼm iyoomoʼ dyaʼ imalkujɨɨspa.

¿Iñjɨɨspa iga wɨaptyim in̈wat jeempɨk iga iñyooxpaʼdyiñ in̈wɨdyaaya? Siiga wɨap, wagakɨʼpin̈taʼamɨ yɨʼp an̈kejayoʼoyi. ¿Juʼp jɨɨxi iniidyiñ jeʼm in̈wɨdyaaya? Odom iaʼmiñ pornografía y eybɨk iniidyaʼyiñ confianza. Siiga inimurutoʼoba de jempɨk sɨʼ iñaskaʼ odoy ijoʼykaiñ, maaj wɨɨ iga ikutɨʼɨyɨʼyiñ juʼtspɨy iñtyoʼyan̈jaampa jempɨk naspa ixɨʼ. Y mich, ¿tyi wɨɨ iga in̈wadyiñ? Yooxpaʼatɨ iga wɨaiñ in̈an̈kamok yɨʼp kutɨʼɨchi. Wɨɨ iga in̈kwɨstɨktam in̈kutɨʼɨyɨytyaʼmiñ tyiʼiga jaʼyan̈yaj iaʼmyajpa pornografía y tyi miyooxpaʼttaʼmpa iga wɨaiñ inin̈an̈kamoktaʼm. d

 Siiga iñjɨɨspa iga jobity iñjoʼykaʼaba jesɨk inin̈mattaʼmpa jempɨk naspa ixɨʼ, waganamurutaʼamɨ tuum anciano jempɨk iniidyaytyaʼm confianza iga miyooxpaʼttaʼmiñ. Jɨɨskupakneɨʼ iga mininɨgaʼyba tiempo iga eybɨk iniidyaʼyiñ confianza in̈wɨdyaaya mex iga dyam iaʼmpa pornografía. Odoy an̈yaʼakɨ, aʼmɨ juutypɨk jeʼm kukakiyaj sɨʼ iwɨwaday jeʼm inin̈komɨʼɨyi. Siiga in̈watpa jeempɨk y iñyaʼachɨʼyba, iñaʼmpa iga jeʼm inin̈koʼmɨyoʼoyijom eybɨk iniitytyaʼmpa maymayaaji (Ecl. 7:8; 1 Cor. 13:4).

Siiga in̈wɨdyaaya eybɨk iaʼmpa, ¿nɨmtoʼoba iga dyaʼ ichaktoʼoba o ni keman dyam sɨʼ ichak? Dyaʼ, siiga yɨʼp malojpɨk jɨɨxi ityum ianmajom, wɨapsɨ iga tan̈kaʼap ichak, y wɨap iga eybɨk iaʼmpa pornografía mex iga amtyɨyam dyaʼ iaʼmneʼ. Iga odoy eybɨk iaʼmiñ, iwadyiñ tyityam nasuntaap iga seguido in̈teeñkamoguiñ mex iga keʼnam ikooñwɨyñeum yɨʼp kutɨʼɨchi (Prov. 28:14; Mat. 5:29; 1 Cor. 10:12). Ikaguiñ jeʼm ijɨɨxi y ijooyixiñ jempɨk dyaʼ wɨɨ, juʼuts jeʼm pornografía y jeʼm masturbación (Efes. 4:23; Sal. 97:10; Rom. 12:9). Siiga iwatpa ityumpɨy yɨʼp, wɨap ikooñwɨy jeʼm kutɨʼɨchi. e

¿Y siiga jeʼm in̈wɨdyaaya dyaʼ ichaktoʼoba yɨʼp malojpɨk kusuʼnɨyoʼoyi? Wɨap iga min̈yaʼkpa, iñtyoʼyan̈jaampa y iñjoʼykaʼaba. An̈madaʼayɨ Jehová juʼuts inin̈jaam, y yɨʼp miyooxpaʼtpa iga iniidyiñ paz (1 Ped. 5:7). Seguido kuyujkaɨʼ jeʼm Biblia, waatɨ an̈wejpadoʼoyi y kujɨɨsɨ jempɨk in̈kuyujkaneʼ, jesɨk majtyim in̈kunuʼkpa Jehová, y jeʼ mikunuʼkpatyim. «Jehová toomi ity kun jempɨk yaʼachayajpa» y ixunba iga eybɨk maymayayajiñ (Sal. 34:18). Waatɨ juʼtspɨy miwɨap iga seguido in̈kuyooxaiñ Jehová, kuaʼmɨ jeʼm ancianojyaj iyooxpadoʼoyi y kujɨɨsɨ iga jeʼm in̈wɨdyaaya wɨapnam ikukak ijɨɨxi maaj okmɨ (Rom. 2:4; 2 Ped. 3:9).