Yɨʼp kuyujijom tan̈kuyujkataʼm iga taɨchtyam y jeʼm sɨn̈pɨxiñtyam tampɨktaʼmiñ tanjɨɨxi iga tanakkuaʼyaytyaʼmpa jeʼm Jehová iñɨɨyi. Jemum tɨgɨykuʼmpa iga numaaj Jehová wɨap tan̈jaktaʼm y jeʼam jeʼm maaj wɨbɨk an̈jagoʼoyi. Y siiga taɨchtyam takupɨgoytyaʼmpa o dyaʼ, tɨgɨykuʼmpatyim iga wɨaiñ tanakkuaʼyaytyaʼm jeʼm iñɨɨyi.

Pero, ¿tyiʼiga sɨɨ jempɨk maaj teguedataap jeʼ jeʼm Jehová iñɨɨyi y iga akkuaʼyaytyaiñ? Tan̈kɨʼpin̈taʼmiñ tukuteen an̈kejayoʼoyiyaj.

Jeʼm wiñtyipɨk, en jeʼm jardín de Edén, jeʼm Wookkɨʼɨwiñ ityuʼudɨyay jeʼm Jehová iñɨɨyi. Jeʼm akwagoʼoyi iga jeʼm Wookkɨʼɨwiñ iwaday Eva, ikkutɨʼɨyɨy iga Jehová dyaʼ idyɨk chioʼyba jempɨk maaj wɨɨ y jeʼm ian̈kiʼmayoʼoyiyaj tsaam tan̈kaʼ. Okmɨ jeʼm Wookkɨʼɨwiñ in̈nɨʼmaykuʼm Jehová y nɨm iga migoʼyba idyɨk. Jeempɨgam ikujɨʼyay jeʼm Jehová iñɨɨyi. Jesɨgam tsɨʼy juʼuts «Diablo», iga yɨʼp nɨɨyi nɨmtoʼoba jeʼm kumɨgoyoypaʼap (Juan 8:44). Eva ikupɨk yɨʼp mɨgoʼoyi y dyam ikupɨk Jehová, jeempɨgam ikwiñkej iga dyaʼ ixunba idyɨk iga Jehová in̈jaguiñ (Gén. 3:1-6). Yɨʼp jaama jeʼm Wookkɨʼɨwiñ seguido sɨʼ ikujɨy jeʼm Dios iñɨɨyi, y jempɨk ikupɨkyajpa jeʼm mɨgoʼoyiyaj, wɨapsɨ iga dyam ikupɨkyajpa Jehová. Tsaam tan̈yaʼkpa iga kujɨyñeta jeʼm Jehová iñɨɨyi. Jeʼyukmɨ tsaam ity yaʼachaaji yɨʼp naxyukmɨ.

Wɨstenpɨk, iga ikumaykettoʼoba jempɨk iwatneʼ, Jehová ijɨɨsneʼ iga ikupujpa y ikkuaʼyba jeʼm iñɨɨyi. Jeʼ iwattoʼoba yɨʼɨmpɨk, jeʼyukmɨ nɨmpa: «Anakkuaʼyba annɨɨyi» (Ezeq. 36:23). Jesús nɨmtyim: «Agui cuáyñe mich i[ñ]ñɨ̱yi». Jeʼ in̈kejtsak tyi jempɨk maaj tanteguedaiñ jesɨk tan̈watpa an̈wejpadoʼoyiyaj (Mat. 6:9). Jeʼm Biblia juchixkej tanɨʼmaʼyba iga tan̈kujiʼbaʼyiñ jeʼm Jehová iñɨɨyi. Tanaʼmiñ weeñi akwiñkejoʼoyiyaj. «Kujiʼbaytyaʼamɨ jeʼm Jehová iñɨɨyi» (1 Crón. 16:29; Sal. 96:8). «Waʼnaytyaʼamɨ waañiyaj jeʼm iñɨɨyi» (Sal. 66:2). «Ni keman antsakpa iga an̈kujiʼppa jeʼm iññɨɨyi» (Sal. 86:12). Jesɨgam Jesús ity idyɨk jeʼm Jerusalén itemplo, iñɨʼmay yɨʼɨmpɨk iJaatun̈: «ManJa̱tuŋ Dios, wa̱tɨ juuts mich iñxunpa iga jém pɨxiñt́am micujípyajiñ». Jesɨk Jehová ikutson̈ jeʼm iMaanɨk iñɨʼmay: «Sɨɨp aŋwatneum y aŋwatpat́im e̱ybɨc iga acujípyajiñ jém pɨxiñt́am» (Juan 12:28). a

Tukutenpɨk, Jehová ixunba iga jeʼm iñɨɨyi juchixkej kujiʼbaytyaiñ. Tan̈kujɨɨstaʼmiñ juʼtspɨy tɨgɨykuʼmpa jeʼm Jehová iñɨɨyi jesɨk kuyajum jeʼm Mil Amtyɨy iga In̈jakpa Cristo, jesɨk kuyajum jeʼm in̈an̈pɨgam kutɨʼɨchi.  ¿Tyisɨ ijɨɨsyajpa jempɨk ityyajpa jeem y jeʼm sɨn̈pɨxiñtyam iga Jehová ikkuaʼyba jeʼm iñɨɨyi? Iga wɨaiñ tan̈kutɨʼɨyɨy, tanaʼmtaʼmpa eybɨk ikwɨstɨk jeʼm jɨɨxi tan̈kɨʼpin̈netamwɨʼɨp: jeʼm tan̈kupɨgoʼoyityam y iapaʼap jempɨk tan̈jakpa. Dyam eybɨk kutɨʼtsyajtaap siiga kupɨgoyyajpa jempɨk tsɨʼyyajpa. ¿Tyiʼiga? Iga dyam i tan̈kaɨʼyba y iyaʼachɨyyaj jeʼm in̈an̈pɨgam kutɨʼɨchi. Ipɨktson̈yajpa jeʼm ityi dyapɨk kuyajpa. ¿Algun iñam ijɨɨspa iga Jehová odoy tan̈jaguiñ? Dyam, ityumpɨyyaj iwɨpɨktson̈yajpa Jehová juʼuts an̈jagoʼoyi. ¿Tyiʼiga? Iga ikwiñkej iga jeʼam jeʼm maaj wɨbɨk an̈jagoʼoyi. Y jeʼm sɨn̈pɨxiñtyam ipɨktson̈yajpatyim juʼuts an̈jagoʼoyi. Pero, ¿tyi naspa kun jeʼm iñɨɨyi?

Jeʼm iñɨɨyi kuaʼyñeʼebam y dyam i wɨap ityuʼudɨyay. Ityumpɨy jempɨk ikuyooxayajpa igaʼman̈jakyajpa jeʼm iñɨɨyi, sɨn̈yukmɨ y Naxyukmɨ. ¿Tyiʼiga? Iga Jehová seguido iwatpa wɨtampɨk tyidyin̈kej. Jesús ikɨan̈kodaʼyba jeʼm iJaatun̈ ityeguedɨʼɨyi, «jesɨc it́u̱mpɨy cosa Dios imɨɨchi, iŋjacpat́im it́u̱mpɨy cosa» (1 Cor. 15:28). Okmɨ, ityumpɨy jempɨk iitykayajpa yɨʼp Nas, maymayayajpa iga kɨakputyajtaap «it́u̱mpɨy […] juuts jém Dios ima̱nɨctam» (Rom. 8:21). Y Jehová ikkupakpa jempɨk ijɨɨsneʼ, iga iniitypa tuum familia kun tumtyi jɨɨxi sɨn̈yukmɨ y Naxyukmɨ (Efes. 1:10).

¿Y juʼutssɨ in̈jaamyaj jeʼm Jehová ifamilia? Naxyukmɨ y sɨn̈yukmɨ seguido ikujiʼpyajtoʼoba Jehová. Jeʼm salmista David nɨm: «Kujiʼptaiñ Jehová Dios […]. Kujiʼbaytyaiñ jeʼm iñɨɨyi juchixkej» (Sal. 72:18, 19). Iga tumtum jaama majtyim tañixpɨktaʼmpa Jehová, majnam tan̈kujiʼptamtoʼoba.

Jeʼm Jehová iñɨɨyi ikwiñkejpa juʼutspɨk Dios. Jeʼyukmɨ, jesɨk tanjɨɨsaʼyba jeʼm iñɨɨyi, takjɨɨspa iga tsaam toyoʼyba (1 Juan 4:8). Juchixkej tanjɨɨskupakneʼeba iga Jehová tawat iga tatoyba, takɨakput iga tatoyba y ikwiñkej iga jeʼam jeʼm maaj wɨbɨk an̈jagoʼoyi iga tatoyba. Y tanaʼmpa juutypɨk Jehová ikwiñkejpanam jaʼyan̈ toyoʼoyi. Tumtum jaama tan̈kunuʼkpa tanJaatun̈ sɨn̈yukmɨpɨk y tan̈kujiʼbayba jeʼm iñɨɨyi (Sal. 73:28).