KUYUUJI 33
WAAÑI 130 Aprendamos a perdonar
Juutypɨk ixunba Jehová iga tañixyajiñ jempɨk tan̈kawatneyaj
«Pero siiga algun i tan̈kawatpa tanaitytyaʼm tuum yooxpadoʼoyi». (1 JUAN 2:1).
AN̈KEJAYOʼOYI
Tyityam tan̈kejaytyaʼmpa jempɨk iwat jeʼm kumun Corinto jesɨgam tuum tɨɨwɨ pɨɨmi tan̈kawat.
1. ¿Tyi ixunba Jehová iga tan̈wattaʼmiñ?
MEX iga Jehová tawatnetaʼm, tamaʼmchiʼiba iga tanyaʼak tampɨguiñ tanjɨɨxi y tumtum jaama tampɨktaʼmpa yɨʼp wɨbɨk xaaja. Jeʼm maaj wɨbɨk jɨɨxi iga wɨap tampɨktaʼm, jeʼ iga tan̈kɨan̈kodaytyaʼmiñ tañityi y tatsɨʼytyaʼmiñ juʼuts ifamilia. Jehová ixunba iga tantumpɨytyam tampɨktaʼmiñ yɨʼp jɨɨxi iga tatoytyaʼmpa y ixunba iga tawɨnɨgaytyaʼmiñ. Ixunbatyim iga tanaitytyaʼmiñ tuum wɨnanɨgoʼoyi kun jeʼ y tuum ityi dyapɨk kuyajpa (Deut. 30:19, 20; Gál. 6:7, 8).
2. ¿Tyi ixunba Jehová iga iwatyajiñ jempɨk pɨɨmi tan̈kawatneyaj? (1 Juan 2:1).
2 Jehová dyaʼ tateguedɨʼyba iga tan̈kuyooxaiñ, ixunba iga tanyaʼak tampɨguiñ tanjɨɨxi. Pero siiga algun i iga chin̈neum tan̈kawatpa y dyaʼ ikakpa ijɨɨxi toptaap de jeʼm kumunjom (1 Cor. 5:13). Pero Jehová ixunba iga jempɨk tan̈kawatneʼ ikuseedyiñ, jeʼyukmɨ ikutsat iMaanɨk iga wɨaiñ tawaday perdón (maayɨʼ 1 Juan 2:1). a Jehová tsaam toyoʼyba, jeʼyukmɨ ianmajan̈chiʼiba jempɨk tan̈kawatneyaj iga ikakyajiñ ijɨɨxi (Zac. 1:3; Rom. 2:4; Sant. 4:8).
3. ¿Tyi tan̈kɨʼpin̈taʼmpa yɨʼp kuyujijom?
3 Jehová ixunba iga jeempɨktyim tanaʼmyajiñ jempɨk tan̈kawatneyaj juʼuts jeʼ iaʼmpa. Yɨʼp kuyujijom tan̈kɨʼpin̈taʼmpa tyi iwatyaj jeʼm kumun Corinto jesɨk tuum tɨɨwɨ pɨɨmi tan̈kawat, tan̈kɨʼpin̈taʼmpatyim jempɨk jeʼm apóstol Pablo iñɨʼmay iga iwatyajiñ jesɨk jeʼm tan̈kawatnewɨʼɨp ikakneum idyɨk ijɨɨxi y tanaʼmtaʼmpatyim juutypɨk iaʼmpa Jehová jempɨk tan̈kawatneyaj.
TYI IWAT JEʼM KUMUN CORINTO JESƗK TUUM TƗƗWƗ PƗƗMI TAN̈KAWAT
4. ¿Tyi idyɨk naspa jeʼm kumun Corinto? (1 Corintios 5:1, 2)
4 Maayɨʼ 1 Corintios 5:1, 2. Jesɨgam Pablo sɨʼ idyɨk iwat jeʼm tukuteen viaje misional, ijoodon̈a iga jeʼm kumun Corinto tuum tɨɨwɨ ichaʼyaneʼ idyɨk ichɨñaapa. Pablo nɨm iga tun̈gakyaj jempɨk dyaʼ ikuyooxayajpa Dios, ijoodon̈yajam idyɨk iga sɨʼ imalwat, pero jeʼm kumun iaʼmchiñeyaj idyɨk iga seguido idyiñ jeʼm kumunjom, ijɨɨsyajpa iga jeempɨgam sɨʼ idyɨk ikwiñkejyaj yaʼachan̈jamoʼoyi juʼutstyim iwatpa Dios. Pero Jehová dyaʼ iwɨixpa idyɨk jempɨk sɨʼ iwat yɨʼp pɨɨxiñ, jeʼyukmɨ tun̈gakyaj sɨʼbam idyɨk ikujɨyyaj jeʼm kumun y wɨapsɨ iga weeñi tɨwɨtam wɨaptyim idyɨk imalwatyaj, jeʼyukmɨ Pablo in̈kiʼm tyi idyɨk iwatyajiñ yɨʼp kumun.
5. ¿Tyi iñɨʼmay Pablo iga iwatyajiñ jeʼm kumun Corinto? (1 Corintios 5:13; aʼmɨtyim jeʼm imagen).
5 Maayɨʼ 1 Corintios 5:13. b Pablo ijayyaj tuum carta jeʼm kumun juuty nɨʼmayyajta iga ityopyajiñ yɨʼp pɨɨxiñ iga dyaʼ idyɨk ikakneʼ ijɨɨxi. ¿Tyi idyɨk iwatyajiñ jeʼm tun̈gak tɨwɨtam? Nɨʼmayyajta iga odom maaj in̈pɨʼtsyajiñ, odoytyim iwaganawiʼkyajiñ (1 Cor. 5:11). Jesɨk tan̈waganawɨʼktaʼmpa algun i majtyim tanamuruyajpa, jeʼyukmɨ Pablo nɨm iga odom maaj in̈pɨʼtsyajiñ yɨʼp pɨɨxiñ, jeempɨgam ikuixyajpa idyɨk jeʼm tɨwɨtam (1 Cor. 5:5-7). Iyooxpaʼtpatyim idyɨk yɨʼp pɨɨxiñ iga ikutɨʼɨyɨʼyiñ juʼtspɨy tan̈kawatneʼ Jehová iwiñjom y ikaguiñ ijɨɨxi.
Pablo ijaʼyay jeʼm kumun Corinto iga ityopyajiñ de jeʼm kumunjom jeʼm pɨɨxiñ tan̈kawatnewɨʼɨp iga dyaʼ ikakneʼ idyɨk ijɨɨxi. (Aʼmɨ jeʼm párrafo 5).
6. ¿Juutypɨk iyooxpaʼt jeʼm carta ikutsadaywɨʼɨp Pablo jeʼm kumun Corinto y jeʼm tan̈kawatnewɨʼɨp?
6 Okmɨ iga Pablo ikutsaday yɨʼp carta jeʼm kumun Corinto, moj ikujɨɨs tyi idyɨk iwatyajpa jeʼm tɨwɨtam, dyaʼ jaʼy Tito in̈maday iga iwɨpɨktson̈yaj y ikupɨkyaj yɨʼpyaj an̈kiʼmayoʼoyiyaj (2 Cor. 7:6, 7). Jesɨgam Pablo ikutsat tun̈gak carta yɨʼp pɨɨxiñ ikakneum idyɨk ijɨɨxi y mojneum idyɨk ikupɨk jeʼm Jehová ian̈kiʼmayoʼoyiyaj (2 Cor. 7:8-11). Pablo ichiʼ tun̈gak jɨɨxian̈chioʼoyiyaj yɨʼp kumun. ¿Juʼptam?
TYI IWAT JEʼM KUMUN JESƗK JEʼM TAN̈KAWATNEWƗʼƗP IKAKNEUM IDYƗK IJƗƗXI
7. ¿Tyi iwat yɨʼp pɨɨxiñ jesɨgam an̈jɨyjakta y topta jeʼm kumun? (2 Corintios 2:5-8).
7 Maayɨʼ 2 Corintios 2:5-8. Iga yɨʼp pɨɨxiñ an̈jɨyjakta y topta jeʼm kumun iyooxpaʼt iga ikaguiñ ijɨɨxi y iwɨwadyiñ. Jesɨgam iwat yɨʼɨmpɨk, Pablo iñɨʼmay jeʼm ityɨwɨtam iga eybɨktyim in̈pɨʼtsyajiñ (Heb. 12:11).
8. ¿Tyiñam maaj iñɨʼmay Pablo jeʼm kumun?
8 Pablo iñɨʼmay jeʼm tɨwɨtam iga iwadayyajiñ perdón y ikpoʼksyajiñ yɨʼp pɨɨxiñ, jeʼyukmɨ maaj okmɨ nɨʼmayyajta: «Aŋquejaayɨ yɨ́p pɨ̱xiñ iga e̱ybɨc iñt́oyt́ámpa». Pablo ixunba iga jeʼm tɨwɨtam ikwiñkejayyajiñ iga nunta iwadayñeyum perdón y iga ityoyyajpa idyɨk. Yɨʼɨmpɨgam jeʼm pɨɨxiñ ikaknewɨʼɨp ijɨɨxi ikutɨʼɨyɨʼyba iga jeʼm tɨwɨtam tsaam maymayyaj iga eybɨk sɨʼ ikuyooxa Jehová.
9. ¿Tyiʼiga weeñiyaj tan̈kaʼa iwɨpɨktson̈yaj jeʼm pɨɨxiñ tan̈kawatneum mex iga ikakneum idyɨk ijɨɨxi?
9 Wɨapsɨ iga weeñi tɨwɨtam tan̈kaʼa iwɨpɨktson̈yaj yɨʼp pɨɨxiñ mex iga ikakneum idyɨk ijɨɨxi, iga kun jempɨk iwat pɨɨmi iyaʼachwat jeʼm kumun. Jeʼyukmɨ weeñiyaj ijɨɨsyajpa idyɨk iga dyaʼ nasuntaap iga wɨpɨktson̈taiñ yɨʼp pɨɨxiñ iga tsaam imalwat, iganam jeʼeyaj ikupɨkyaj jeʼm Jehová ian̈kiʼmayoʼoyiyaj (aʼmɨtyim jempɨk nɨmpa Lucas 15:28-30). Pero, ¿tyiʼiga nasuntaap idyɨk iga ikwiñkejayyajiñ iga nunta ityoyyajpa sɨɨ iga yɨʼp tɨɨwɨ ikuseetneum Jehová?
10, 11. ¿Tyi idyɨk nas meʼega jeʼm tɨwɨtam dyaʼ iwadayyaj perdón jeʼm pɨɨxiñ tan̈kawatnewɨʼɨp?
10 Meʼega jeʼm ancianojyaj dyaʼ iaʼmchiyajpa iga seedyiñ idyɨk jeʼm kumunjom y jeʼm tɨwɨtam dyaʼ ipɨktson̈yajpa kun toyoʼoyi. Wɨap iga yɨʼp pɨɨxiñ pɨɨmi idyɨk an̈yaʼkpa y mojpa ijɨɨs iga dyam tyi kumeskuy, y dyamsɨ idyɨk ityeguedaap iwɨtsak jeʼm iwɨnanɨgoʼoyi kun Jehová.
11 Meʼega jeʼm tɨwɨtam dyaʼ iwadayyajpa idyɨk perdón yɨʼp tɨɨwɨ, wɨap idyɨk imalwadayyaj iwɨnanɨgoʼoyi kun Jehová. Dyatyim idyɨk sɨʼ iwatkiʼpsay Jehová iga jeʼ juchixkej iwadaʼyba perdón jempɨk ikakyajpa ijɨɨxi, ikwiñkejayyajpa idyɨk jeʼm Wookkɨʼɨwiñ ijɨɨxi iga jeʼ tsaam imalwatpa y yaʼachwadoʼyba, keʼnam jesɨk sɨʼ idyɨk iwaganayooxayaj iga yɨʼp tɨɨwɨ odom maaj ikuyooxaiñ Jehová (2 Cor. 2:10, 11; Efes. 4:27).
12. ¿Juutypɨk idyɨk jeʼm kumun Corinto wɨap iwatkiʼpsay Jehová?
12 ¿Juutypɨk idyɨk jeʼm kumun Corinto wɨap iwatkiʼpsyaj Jehová y dya jeʼm Wookkɨʼɨwiñ? Iwatyajiñ juʼuts Jehová iga iwadaʼyba perdón jempɨk ikakyajpa ijɨɨxi, tanaʼmiñ tyi nɨmyaj weeñiyaj jempɨk ijayyaj jeʼm Biblia. David nɨm: «Tsaam miwɨɨ y juchixkej iwatpa perdón» (Sal. 86:5). Miqueas ijaykunuʼk: «¿Iapaʼap jeex juʼuts mich, Dios iga in̈watpa perdón y in̈kujaʼamaʼyba jeʼm tan̈kaʼ [...]?» (Miq. 7:18). Isaías nɨm: «Jeʼm pɨɨxiñ imalwatpaʼap ichaguiñ jeʼm malojpɨk tun̈ y jeʼm malojpɨk pɨɨxiñ ichaguiñ jeʼm ijɨɨxi; ikuseedyiñ Jehová y jeʼ ikwiñkejaʼyba yaʼachan̈jamoʼoyi, ikuseedyiñ tanDios iga jeʼ tsaam iwadaʼyba perdón» (Is. 55:7).
13. ¿Tyiʼiga eybɨk pɨktson̈taiñ idyɨk yɨʼp pɨɨxiñ jeʼm kumunjom? (Aʼmɨ jeʼm recuadro « ¿Juchix pɨktson̈ta eybɨk jeʼm pɨɨxiñ tan̈kawatnewɨʼɨp?»).
13 Jeʼm kumun Corinto iwatkiʼpsyajpa idyɨk Jehová, jesɨk ipɨktson̈yajpa kun toyoʼoyi yɨʼp pɨɨxiñ. Pablo nɨm iga jesɨk iwatyajpa idyɨk jeempɨk ikwiñkejyajpa iga juchixkej kupɨgoyyajpa (2 Cor. 2:9). Iga an̈jɨyjakta yɨʼp pɨɨxiñ jobity ikak ijɨɨxi, jeʼyukmɨ jeʼm ancianojyaj eybɨktyim idyɨk ipɨktson̈yajiñ jeʼm kumunjom, mex iga dyanam idyɨk nasneʼ watyña meses iga topneta.
JUUTYPƗK TAN̈WATKIʼPSAʼYBA JEʼM JEHOVÁ IWƗWADOʼOYI Y JEʼM IYAʼACHAN̈JAMOʼOYI
14, 15. ¿Tyi tan̈kejaytyaʼmpa jempɨk iwatyaj jeʼm kumun Corinto? (2 Pedro 3:9; aʼmɨtyim jeʼm imagen).
14 Jehová iwat iga jaykunuʼktaiñ Bibliajom jempɨk iwatyaj jeʼm kumun Corinto iga tayooxpaʼttoʼoba (Rom. 15:4). Tan̈kejaʼyba iga mex iga Jehová pɨɨmi yaʼachan̈jamoʼyba, ni keman iaʼmchiʼiba iga jempɨk tan̈kawatpa y dyaʼ ikakpa ijɨɨxi idyiññam jeʼm kumunjom. Jeʼ ni keman ikukakpa jeʼm ian̈kiʼmayoʼoyiyaj (Jud. 4). Meʼega Jehová iaʼmchiʼiba iga jempɨk tan̈kawatpa y dyaʼ ikakpa ijɨɨxi idyiññam jeʼm kumunjom, dyaʼ sɨʼ ikwiñkej yaʼachan̈jamoʼoyi iga wɨap imalwaday tun̈gakyaj (Prov. 13:20; 1 Cor. 15:33).
15 Tan̈kejaʼybatyim iga Jehová dyaʼ ixunba iga algun i togoʼyiñ, jeʼ ikɨakputtoʼoba ityumpɨyyaj. Jeʼyukmɨ ikwiñkejaʼyba yaʼachan̈jamoʼoyi jempɨk ikakyajpa ijɨɨxi y jempɨk iwɨtsakyajtoʼoba jeʼm iwɨnanɨgoʼoyi kun jeʼ (Ezeq. 33:11; maayɨʼ 2 Pedro 3:9). Jesɨgam jeʼm kumun Corinto tuum pɨɨxiñ tan̈kawat y okmɨ ikak ijɨɨxi Jehová ikuyukmɨ Pablo iñɨʼmay jeʼm kumun iga iwadayyajiñ perdón y eybɨktyim iwɨpɨktson̈yajiñ.
Jeʼm kumun iwatkiʼpsayyajpa jeʼm Jehová ityoyoʼoyi y iyaʼachan̈jamoʼoyi jesɨk iwɨpɨktson̈yajpa jempɨk ikakneyajum ijɨɨxi. (Aʼmɨ jeʼm párrafojyaj 14 y 15)
16. ¿Tyi iñjaampa por Jehová sɨɨ iga tan̈kɨʼpin̈taʼmum jempɨk iwatyaj jeʼm kumun Corinto?
16 Jempɨk nas en jeʼm kumun Corinto tan̈kejaʼyba iga Jehová pɨɨmi toyoʼyba, iwɨwatpa y wɨkɨʼpin̈oʼyba (Sal. 33:5). Jeʼyukmɨ tan̈kujiʼptaʼmiñ, iga tatan̈kaɨykɨʼɨwiñtyam nasuntaap iga tawadaytyamtyaiñ perdón. Tantsoowaixtyaʼmpa iga takɨakputtaʼm iga jeempɨgam wɨap tawaday perdón. Tsaam tamaymaytyam iga Jehová tatoytyaʼmpa y ixunba iga tawɨnɨgaʼyiñ.
17. ¿Tyi tan̈kɨʼpin̈taʼmpa jeʼm tun̈gak kuyujijom?
17 Yɨʼp jaama siiga algun i tan̈kawatpa jeʼm ancianojyaj ikwiñkejayyajpa toyoʼoyi, iyooxpaʼtyajpatyim iga ikakyajiñ ijɨɨxi. ¿Juutypɨk iwatyajpa? Y siiga ipɨkyajpa ijɨɨxi iga ityopyajpa o eybɨk ipɨktson̈yajpa jeʼm kumunjom, ¿tyi wɨɨ iga tan̈wattaʼmiñ? Tan̈kɨʼpin̈taʼmpa jeʼm tun̈gak kuyujijom.
WAAÑI 109 Amémonos de todo corazón
a 1 Juan 2:1: Mammanɨktam manjaʼyaytyaʼmpa yɨʼpyaj an̈matyiyaj iga odom maaj mityan̈kawattaʼmiñ, pero siiga algun i tan̈kawatpa tanaitytyaʼm tuum yooxpadoʼoyi iga ity kun iJaatun̈ jeʼ ni keman imalwatneʼ.
b 1 Corintios 5:13: Iganam Dios ikɨʼpin̈ba jempɨk putneyaj. «Mimichtyam toptaʼami jempɨk sɨʼ imalwat.
