KUYUUJI 35
WAAÑI 123 Seamos leales y sumisos al orden teocrático
Juutypɨk jeʼm ancianojyaj iyooxpaʼtyajpa jempɨk topneyajta jeʼm kumunjom
«Jém it́yajwɨɨp sɨŋyucmɨ más maymáya̱yajpa con tu̱m pɨ̱xiñ cuando ichacpa it́áŋca que con jém noventa y nueve jém wɨbɨc pɨxiñt́am jém d́apɨc táŋcaɨ́y» (LUC. 15:7).
AN̈KEJAYOʼOYI
Tyiʼiga weeñiyaj topyajtaap jeʼm kumunjom, y juutypɨk jeʼm ancianojyaj iyooxpaʼtyajpa iga ikakyajiñ ijɨɨxi iga eybɨktyim iniityyajiñ tuum wɨnanɨgoʼoyi kun Jehová.
1, 2. a) ¿Juʼuts in̈jaam Jehová jesɨk algun i tan̈kawatpa y dyaʼ ikakpa ijɨɨxi? b) ¿Tyi ixunba Jehová?
JEHOVÁ dyaʼ ikusuʼnɨʼyba iga algun i imalwadyiñ, ijooyixpa jeʼm tan̈kaʼ (Sal. 5:4-6). Jeʼ ixunba iga tan̈kupɨgaytyaʼmiñ jeʼm ian̈kiʼmayoʼoyiyaj itywɨʼɨp Bibliajom, dyaʼ in̈joʼkpa iga juchixkej tan̈wɨwadyiñ iga tatan̈kaɨykɨʼɨwiñtyaʼm (Sal. 130:3, 4). Pero Jehová ijooyixpa jempɨk tsoobɨytim imalwatpa numaaj iga jeʼ tsaam toyoʼyba (Jud. 4). Jeʼm Biblia nɨmpa iga dyaʼ jaʼyñeʼ iktogoyba ityumpɨy jempɨk tsoobɨytyim imalwatyajpa (2 Ped. 3:7; Apoc. 16:16).
2 Jehová dyaʼ ixunba iga algun i togoʼyiñ. Jeʼm tun̈gak kuyujijom tan̈kɨʼpin̈taʼm iga jeʼ ixunba iga ityumpɨyyaj ikakyajiñ ijɨɨxi (2 Ped. 3:9). Jeʼm ancianojyaj iwatkiʼpsyajpa Jehová jesɨk iyooxpaʼtyajpa jempɨk tan̈kawatneʼ iga ikaguiñ ijɨɨxi y eybɨk iniidyiñ jeʼm wɨnanɨgoʼoyi kun jeʼ, pero dyaʼ ityumpɨyyaj ipɨktson̈yajpa yɨʼp yooxpadoʼoyi (Is. 6:9). ¿Tyi iwatyajiñ jeʼm ancianojyaj jesɨk jempɨk tan̈kawatneʼ dyaʼ ikaktoʼoba ijɨɨxi mex iga watykɨyam yooxpaʼtneta?
TOPTAʼAMƗ JEMPƗK TAN̈KAWATPA IXƗʼ
3. a) Juʼuts nɨmpa jeʼm Biblia, ¿tyi wattaiñ siiga algun i tan̈kawat y dyaʼ ikaktoʼoba ijɨɨxi? b) ¿Tyiʼiga tanɨmpa iga iyaʼak ipɨk ijɨɨxi iga toptaiñ jeʼm kumunjom?
3 Jesɨk algun i tan̈kawatpa y dyaʼ ikakpa ijɨɨxi, jeʼm ancianojyaj iwatyajpa jempɨk nɨmpa 1 Corintios 5:13: «Toptaʼamɨ jempɨk sɨʼ imalwat», wɨap tan̈kupɨk iga iyaʼak ipɨk ijɨɨxi iga toptaiñ jeʼm kumunjom (Gál. 6:7). Mex iga jeʼm ancianojyaj watykɨy iyooxpaʼtyajtɨʼp dyaʼ ikupɨk jeʼm Jehová ian̈kiʼmayoʼoyi, dyaʼ iaʼmchiʼ iga yooxpaʼttaiñ (2 Rey. 17:12-15; Deut. 30:19, 20).
4. ¿Tyiʼiga akjoodon̈ayajtaap jeʼm tɨwɨtam jesɨk algun i toptaap jeʼm kumunjom?
4 Siiga jempɨk tan̈kawatpa dyaʼ ikakpa jɨɨxi toptaap jeʼm kumunjom, jeʼyukmɨ jeʼm an̈tuʼumaajijom tuum anciano ikjoodon̈aap ityumpɨy jeʼm tɨwɨtam iga dyam jeʼ Testigo. a Iwatpa yɨʼɨmpɨk iga jeʼm kumun odom in̈pɨʼchiñ, dyaʼ iga ichaʼawatyajtoʼoba (1 Cor. 5:9-11). Jehová iwat yɨʼɨmpɨk iga ikuixtyoʼoba jeʼm kumun, jeʼm apóstol Pablo nɨm: «Iga uxaŋ levadura icpɨ̱pa it́u̱mpɨy jém jaapi» (1 Cor. 5:6). Siiga jempɨk tan̈kawatpa dyaʼ toptaap jeʼm kumunjom wɨapsɨ iga tun̈gakyaj ijɨɨsyajpa iga dyaʼ tyi naspa siiga dyaʼ tan̈kupɨkpa jeʼm Dios ian̈kiʼmayoʼoyiyaj (Prov. 13:20; 1 Cor. 15:33).
5. ¿Tyi odoy tanjɨɨxiñ jesɨk algun i topneta de jeʼm kumunjom?
5 Jesɨk algun i toptaap jeʼm kumunjom odoy tan̈kujɨɨstaʼmiñ iga ni kemannam ikuseetpa Jehová. Mex iga dyam tanan̈pɨʼtsyajpa, wɨɨ iga tanaʼmyajiñ juʼuts borregojyaj iga togoyñeyaj. Tan̈kujɨɨstaʼmiñ iga ikɨan̈kodayyajtyim iityi Jehová, pero sɨɨ dyaʼ sɨʼ ikkupakyaj jempɨk ijɨykamayyaj, iganam Jehová ikwiñkejpa jeʼm iyaʼachan̈jamoʼoyi y ichakneʼ tiempo wɨapsɨ iga ikakyajpanam ijɨɨxi (Ezeq. 18:31). Pero, juutypɨk jeʼm ancianojyaj wɨap iyooxpaʼtyaj jempɨk topneyajtawum de jeʼm kumunjom.
JUUTYPƗK JEʼM ANCIANOJYAJ IYOOXPAʼTYAJPA JEMPƗK TOPNEYAJTA JEʼM KUMUNJOM
6. ¿Juutypɨk jeʼm ancianojyaj iyooxpaʼtyajpa jempɨk topneyajta jeʼm kumunjom?
6 Jesɨk algun i topneta de jeʼm kumunjom, jeʼm ancianojyaj dyaʼ ichakyajpa ikutyum seguido iyooxpaʼtyajpa iga ikuseedyiñ Jehová. Jesɨk jeʼm comité de ancianos iñɨʼmayyajpa iga dyam wɨap ichɨʼy juʼuts Testigo, an̈madayyajtaptyim tyityam iwatyajiñ iga wɨaiñ ikakyaj ijɨɨxi. Iñɨʼmayyajpatyim iga eybɨk inimuruyajtoʼoba iga ijoodon̈ayajtoʼoba tyi ijɨɨspa, siiga jesɨk inimuruyajpa dyanam ikakneʼ ijɨɨxi eybɨk ianmajan̈chiyajpa iga ikuseedyiñ Jehová. Jeʼm ancianojyaj dyaʼ tyun̈kɨy inimuruyajpa iga seguido iyooxpaʼtyajtoʼoba.
7. ¿Juutypɨk jeʼm ancianojyaj ikwiñkejayyajpa yaʼachan̈jamoʼoyi jempɨk topnetawum de jeʼm kumunjom? (Jeremías 3:12).
7 Jeʼm ancianojyaj ikwiñkejayyajpa yaʼachan̈jamoʼoyi jesɨk tuum tɨɨwɨ toptaap jeʼm kumunjom. Tan̈kujɨɨstaʼmiñ jesɨgam jeʼm israelitajyaj dyaʼ kupɨgoyyaj Jehová dyaʼ in̈joʼkpa idyɨk iga iyaʼak ikuseetyajiñ, yooxpaʼtyajtaap iga ikakyajiñ ijɨɨxi mex iga dyanam idyɨk ityoʼyan̈jaamneyaj jempɨk iwatneyaj. Juʼuts tan̈kɨʼpin̈netaʼm jeʼm wɨstenpɨk kuyujijom, Jehová ikwiñkej juʼtspɨy yaʼachan̈jamoʼyba jesɨgam iñɨʼmay Oseas iga eybɨk ipɨktson̈iñ jeʼm iyoomoʼ mex iga tan̈kawatpanam idyɨk ijɨɨxi (Os. 3:1; Mal. 3:7). Juʼutstyim Jehová, jeʼm ancianojyaj ixunyajpa iga ikakyajiñ ijɨɨxi jempɨk tan̈kawatneʼ (maayɨʼ Jeremías 3:12). b
8. ¿Juutypɨk tayooxpaʼtpa jeʼm parábola juuty tuum pɨɨxiñ jɨɨxtyogoy imaanɨk? (Lucas 15:7).
8 Tan̈kujɨɨstaʼmiñ iga jeʼm wɨstenpɨk kuyuuji tan̈kɨʼpin̈taʼm tuum parábola juuty ijɨykiʼmpa iga tuum pɨɨxiñ jɨɨxtyogoy imaanɨk, jesɨgam seet ityɨkkɨʼɨm jeʼm ijaatun̈ jobity poʼyan̈tsukum y nɨk in̈nuʼusay, dyaʼ in̈joʼkpa idyɨk iga wadaytyaiñ perdón (Luc. 15:20). Juʼuts tanaʼm yɨʼp jaatun̈ iyaʼachan̈jaam y iwɨpɨktson̈ imaanɨk, jeextyim in̈jaamyaj jeʼm ancianojyaj. Jeʼyukmɨ pɨɨmi iyooxpaʼtyajpa jempɨk tan̈kawatneyaj iga ikakyajiñ ijɨɨxi (Luc. 15:22-24, 32). Jesɨk jempɨk tan̈kawatneʼ ikuseetpa Jehová, tantumpɨytyam tamaymayataʼmpa y jemɨk sɨn̈yukmɨ maymayayajpatyim (maayɨʼ Lucas 15:7).
9. ¿Tyi iwaʼgaʼyba Jehová iga iwatyajiñ jempɨk topneyajtawum jeʼm kumunjom?
9 Jehová dyaʼ iaʼmchiʼiba iga jempɨk tan̈kawatyajpa y dyaʼ ikakpa ijɨɨxi seguido idyiñ jeʼm kumunjom, pero dyaʼ nɨmtoʼoba iga ichakpa ikutyum seguido iyooxpaʼtpa iga ikaguiñ ijɨɨxi. Tanaʼmiñ tyi ijɨɨspa Jehová jesɨk algun i ikakpa ijɨɨxi en Oseas 14:4: «Anakpɨsyajpa iga tan̈kawatneʼ, an̈yaʼak antoyyajpa iga dyaʼ ajoʼyan̈jakpa kun jeʼeyaj». Jeʼm ancianojyaj ityeguedayajiñ jesɨk iaʼmyajpa iga algun i ikaktoʼoba ijɨɨxi y jempɨk topneyajta jeʼm kumunjom wɨɨ iga jobitytyi iwatyajiñ tyityam nasuntaap iga ikuseetyajiñ Jehová.
10, 11. ¿Juutypɨk iyooxpaʼtyajpa jeʼm ancianojyaj jempɨk pekam topneyajta jeʼm kumunjom?
10 ¿Juutypɨk iyooxpaʼtyajpa jeʼm ancianojyaj jempɨk pekam topneyajta jeʼm kumunjom? Wɨap iga dyam tan̈kawatyajpa ixɨʼyaj y weeñiyaj dyaʼ ijɨɨsyajpa tyiʼiga topneyajta, jeʼyukmɨ jeʼm ancianojyaj ikuaʼmyajiñ y nɨguiñ ijooyayyaj. Jesɨk iwatyajpa in̈wejpaʼtyajiñ Dios y ianmajan̈chiʼiyajiñ kun toyoʼoyi iga eybɨk ikuseetyajiñ Jehová, iga pekam topneta jeʼm kumunjom wɨapsɨ iga kupoʼnaketneʼ espiritualmente. Siiga nɨmpa iga ikuseettoʼoba Jehová, jeʼm ancianojyaj iñɨʼmayyajpa tuum tɨɨwɨ o tuum yoomtɨwɨ iga ikkuyujiñ mex iga dyanam tsɨʼyñeʼ juʼuts Testigo.
11 Jeʼm ancianojyaj iwatkiʼpsayyajtoʼoba jeʼm Jehová iyaʼachan̈jamoʼoyi, jeʼyukmɨ iwatyajpa juʼtspɨyam wɨayajpa iga ikuaʼmyajpa y iyooxpaʼtyajpa jempɨk ikakyajtoʼoba ijɨɨxi, siiga algun i ikakneum ijɨɨxi y dyam sɨʼ ityan̈kawat jobitytyi tsɨʼyba juʼuts Testigo (2 Cor. 2:6-8).
12. a) ¿Tyi iwatyajiñ jeʼm ancianojyaj wiñtyi iga ipɨktson̈yajiñ jeʼm kumunjom jempɨk pekam tan̈kawatneʼ? b) ¿Tyiʼiga odoy tanjɨɨxiñ iga Jehová ni kemannam ipɨktson̈ba? (Aʼmɨtyim jeʼm nota).
12 Jesɨk jeʼm ancianojyaj ipɨktson̈yajpa eybɨk jempɨk tan̈kawatneʼ wɨɨ iga ikɨʼpin̈yajiñ siiga imalwadayñeʼ tuum tsɨɨxiʼ, siiga ikujɨy jeʼm Jehová iorganización, siiga ikujɨɨs iga ipejpa iyoomoʼ iga wɨaiñ ichak, iaʼmyajiñtyim siiga nunta ikakneum ijɨɨxi (Mal. 2:14; 2 Tim. 3:6). Jeʼm ancianojyaj ikuixyajiñ jeʼm kumunyaj, ikutɨʼɨyɨyyajiñ iga Jehová iwadaʼyba perdón y iwɨpɨktson̈ba jempɨk ikakneyajum ijɨɨxi. Jeʼyukmɨ jesɨk ikɨʼpin̈yajpa jempɨk tan̈kawatneyaj pekaʼ, odoy ikkutɨʼɨyɨyyajiñ iga ni kemannam wadayyajtaap perdón y yaʼachan̈jaamyajtaap c (1 Ped. 2:10).
JUUTYPƗK WƗAP IYOOXPADOY JEʼM KUMUN
13. ¿Tyi tan̈watpa jesɨk tuum tɨɨwɨ an̈jɨyjaktaap jeʼm kumunjom y jesɨk algun i topnetawum?
13 Juʼuts tan̈kɨʼpin̈netaʼm jeʼm tun̈gak kuyujijom, jesɨk tuum tɨɨwɨ an̈jɨyjaktaap a veces jeʼm kumun ijoodon̈ayajpa, y jeʼeyaj wɨapnam tanan̈pɨʼtsyaj iga ikakneyajum ijɨɨxi (1 Tim. 5:20). Wɨɨ iga tananmajan̈chiʼiyajiñ iga seguido iwɨwatyajiñ y ikuyooxayajiñ Jehová (Heb. 10:24, 25). Pero dyaʼ jempɨk naspa kun jempɨk topneyajtawum jeʼm kumunjom, jeʼeyaj odom tanan̈pɨʼtsyajiñ y dyatyim tan̈waganawiʼkyajpa (1 Cor. 5:11).
14. ¿Tyi tan̈wattaʼmiñ cada tumtum de taɨchtyam jesɨk algun i topnetawum jeʼm kumunjom? (Aʼmɨtyim jeʼm imagenyaj).
14 Dyaʼ nɨmtoʼoba iga dyam tanteguedayajpa jempɨk topneyajta jeʼm kumunjom, siiga tanamigo idyɨk o tanfamiliar, wɨapsɨ iga tantɨʼppa iga nɨguiñ jeʼm an̈tuʼumaajijom. Pekaʼ jesɨk nɨkyajpa, dyaʼ idyɨk tandiuschiyajpa, pero sɨɨ siiga tanjɨɨxi dyaʼ tamogɨʼyba, wɨap tampɨk tanjɨɨxi siiga tadiuschiyajpa o dyaʼ pero odoy tanamuruyajiñ.
Cada tumtum de taɨchtyam tanyaʼak tampɨktaʼmpa tanjɨɨxi siiga tantɨʼppa algun i iga topnetawum jeʼm kumunjom jeʼm an̈tuʼumaajijom o siiga tandiuschiba jesɨk nɨkpa. (Aʼmɨ jeʼm párrafo 14).
15. ¿Ityam sɨʼ ijɨykiʼm 2 Juan 9-11? (Aʼmɨtyim jeʼm recuadro ¿« Tyumtyi tan̈kaʼ ijɨykimyaj Juan y Pablo?»).
15 Wɨapsɨ iga tanakwaʼktamtaap, ¿tyiʼiga tandiuschiyajiñ jempɨk topneyajtawum jeʼm kumunjom siiga jeʼm Biblia dyaʼ nɨmpa iga tan̈wadyiñ jeempɨk? (maayɨʼ 2 Juan 9-11). Yɨʼpyaj versículos sɨʼ idyɨk ijɨykiʼm jeʼm apóstatas, y jempɨk tsoobɨytyim imalwatyajpa (Apoc. 2:20). Jeʼm ancianojyaj dyaʼ nɨkpa ijooyayyaj jeʼm apóstatas y jempɨk tsoobɨytyim tan̈kawatyajpa. Wɨapsɨ iga maaj okmɨ ikakyajpa ijɨɨxi, pero siiga dyanam iwatneyaj, dyaʼ wɨɨ iga tantɨʼpyajiñ jeʼm an̈tuʼumaajijom y dyatyim tandiuschiyajpa.
WATKIʼPSAYTYAʼAMƗ JEʼM JEHOVÁ IYAʼACHAN̈JAMOʼOYI
16, 17. a) ¿Tyi ixunba Jehová iga iwatyajiñ jempɨk tan̈kawatneyaj? (Ezequiel 18:32). b) ¿Juutypɨk jeʼm ancianojyaj iwaganayooxayajpa Jehová?
16 Yɨʼpyaj kuyujijom tan̈kɨʼpin̈netaʼm iga Jehová dyaʼ ixunba iga algun i togoʼyiñ (maayɨʼ Ezequiel 18:32). d Jeʼ ixunba iga ityumpɨyyaj ikakyajiñ ijɨɨxi (2 Cor. 5:20). Jeʼyukmɨ dende pekaʼ ianmajan̈chiʼiba iga jempɨk tan̈kawatyajpa ikakyajiñ ijɨɨxi y ikuseetyajiñ. Jeʼm ancianojyaj iniityyaj tuum wɨbɨk yooxakuy, iga iwaganayooxayajpa Jehová jesɨk iyooxpaʼtyajpa jempɨk tan̈kawatneyaj iga ikakyajiñ ijɨɨxi (Rom. 2:4; 1 Cor. 3:9).
17 Tsaam tamaymaytyam jesɨk tan̈kujɨɨstaʼmpa iga Jehová maymayaap iga jempɨk tan̈kawatneʼ ikakpa ijɨɨxi y ikuseetpa. Juchixkej tan̈kujɨɨstaʼmiñ jeʼm Jehová iyaʼachan̈jamoʼoyi y ityoyoʼoyi, jeempɨgam jeʼm toyoʼoyi tanjaampaʼap por jeʼ majtyim mɨjaap (Luc. 1:78).
WAAÑI 111 Los motivos de nuestro gozo
a Dyam tanɨmtaʼmpa iga algun i putneʼ expulsada de jeʼm kumunjom, juʼuts nɨm Pablo en 1 Corintios 5:13, sɨʼ tanɨmtaʼmpa iga topneta de jeʼm kumunjom.
b Jeremías 3:12: Nɨkɨ y an̈maatɨ yɨʼpyaj an̈matyiyaj jemɨk norte akuseetɨ oh Israel iga dyam mikupɨgoʼyba nɨmpa Jehová dyaʼ manjoʼoyixtyaʼmpa iga ni keman mantsaknetaʼm, nɨmpa Jehová iga dyaʼ juchixkej ajoʼyan̈jakpa.
c Jeʼm Biblia nɨmpa iga jempɨk ikamamwatyajpa ikobak y dyam kupɨgoyyajpa y juchixkej in̈teeñkamokyajpa Jehová, pɨɨmi tan̈kawatyajpa ixɨʼyaj y wɨapsɨ iga dyam wadayyajtaap perdón, numaaj Jehová y Jesús ikɨʼpin̈yajpa yɨkxpɨk tan̈kaʼ (Mar. 3:29; Heb. 10:26, 27).
d Ezequiel 18:32: Dyaʼ amaymaywatpa jesɨk algun i kaʼaba —nɨmpa jeʼm tanOmi An̈jagoʼoyi Jehová—. Jeʼyukmɨ akuseettaʼamɨ y itytyaʼamɨ.
