KUYUUJI 50
WAAÑI 135 Jehová te pide: “Sé sabio, hijo mío”
Mijaatun̈tam pɨɨmchiaytyaʼamɨ jeʼm immanɨktam ife
«Wɨa̱p iŋcutɨɨyɨ́y t́i ixunpa Dios iga taŋwattámpa» (ROM. 12:2).
AN̈KEJAYOʼOYI
Jɨɨxian̈chioʼoyiyaj iyooxpaʼtyajpaʼap jeʼm jaatun̈yaj iga wɨaiñ in̈kejayyaj jeʼm imanɨktam jempɨk nɨmpa jeʼm Biblia, iyooxpaʼtyajiñ ikunuʼkyaj Dios y ipɨɨmchiayyajiñ ife.
1, 2. ¿Tyi in̈wattaʼmiñ jesɨk jeʼm immanɨktam mikwaʼkyajpa tyiʼiga Jehová ichak jaʼyan̈ an̈kiʼmayoʼoyiyaj jeʼm Bibliajom?
JAʼYAN̈YAJ nɨmyajpa iga tsaam tan̈kaʼ jesɨk tanakmɨjayajpa jeʼm tammanɨktam. Siiga mich iniity immanɨktam y sɨʼ inin̈kejay juutypɨk wɨap ipɨɨmchiyaj ife, Jehová tsaam maymay (Deut. 6:6, 7). Wɨapsɨ iga jesɨk mɨjayajpa miwadayyajpa akwagoʼoyiyaj juʼuts iga tyiʼiga Jehová ichakneʼ jaʼyan̈ an̈kiʼmayoʼoyiyaj.
2 Wɨapsɨ iga jesɨk mikwaʼkyajpa, mojpa iñjɨɨs iga kuponaketneum jeʼm ife. Pero yɨʼpyaj akwagoʼoyiyaj wɨap ipɨɨmchiayyaj ife (1 Cor. 13:11). Jeʼyukmɨ jesɨk iwatyajpa yɨʼpyaj akwagoʼoyiyaj yooxpaʼtyaajɨ iga majnam ikutɨʼɨyɨyyajiñ jempɨk nɨmpa jeʼm Biblia y jeempɨgam pɨɨmchiayyaajɨ ife.
3. ¿Tyi tan̈kɨʼpin̈taʼmpa yɨʼp kuyujijom?
3 Yɨʼp kuyujijom tan̈kɨʼpin̈taʼmpa juutypɨk jeʼm jaatun̈yaj wɨap iyooxpaʼtyaj jeʼm imanɨktam iga iniityyajiñ fe y tyiʼiga jesɨk ikupɨkyajpa jeʼm jɨɨxian̈chioʼoyiyaj ityyajwɨʼɨp Bibliajom iwɨwadayyajpa y wɨaiñ ikupujyaj jempɨk ikupɨkyajpa. Tan̈kɨʼpin̈taʼmpatyim tyiʼiga wɨɨ iga jeʼm immanɨktam iwatyajiñ akwagoʼoyiyaj y juutypɨk wɨap iñyooxpaʼttaʼm in̈kejayyaj tun̈gakyaj jempɨk ikupɨkyajpa.
YOOXPAʼTYAAJƗ IGA IKUPƗKYAJIÑ JEMPƗK NƗMPA JEʼM BIBLIA
4. ¿Juʼptam akwagoʼoyiyaj wɨapsɨ iga nawadayyajtaap jeʼm immanɨktam y tyiʼiga?
4 Jeʼm jaatun̈yaj ijoodon̈yaj iga dyaʼ wɨap iknasayyaj jeʼm imanɨktam jeʼm fe iniidyayyajwɨʼɨp Dios, jeʼyukmɨ jesɨk mɨjabam iñɨkyaj nakwaʼkyajtaap: «¿Juutypɨk anjoodon̈ iga nunta ity Dios? ¿Dyaʼ sɨʼ mɨgoyba jeʼm Biblia?». Jeʼm Biblia taanmajan̈chiʼiba tantumpɨytyam iga tawɨjɨɨxiɨytyaʼmiñ y tan̈wɨkɨʼpin̈taʼmiñ ityumpɨy jempɨk tan̈kupɨkpa (Rom. 12:1; 1 Tes. 5:21). Pero juutypɨk jeʼm jaatun̈yaj wɨap iyooxpaʼtyaj jeʼm imanɨktam ipɨɨmchiyaj ife.
5. ¿Juutypɨk wɨap iñyooxpaʼttaʼm jeʼm immanɨktam iga ikupɨkyajiñ jempɨk nɨmpa jeʼm Biblia? (Romanos 12:2).
5 Anmajan̈chiʼiyaajɨ iga iwɨkɨʼpin̈yajiñ iga jempɨk nɨmpa jeʼm Biblia dyaʼ jeʼ mɨgoʼoyi (maayɨʼ Romanos 12:2). Jesɨk jeʼm immanɨktam nawadayyajtaap akwagoʼoyiyaj, an̈kejayyaajɨ juutypɨk wɨap ikutson̈yaj yɨʼpyaj akwagoʼoyiyaj y ikuaʼmyajiñ yooxpadoʼoyi en jw.org. Nɨʼmayyaajɨ iga ikuaʼmyajiñ an̈kejayoʼoyiyaj y videos juuty in̈kejpa iga jeʼm Biblia dyaʼ mɨgoyba (1 Tes. 2:13). Wɨap ikɨʼpin̈yaj tyityam nɨmneyaj jeʼm totjaayiyaj juuty ijɨykimyajpa jeʼm wiñɨk tɨgan̈juj asiria de Nínive. Weeñiyaj jempɨk imayyajpa jeʼm Biblia nɨmyajpa iga yɨʼp tɨgan̈juj ni keman idyɨk jaʼy ityi, pero jeʼm amtyɨy 1850, paʼtta yɨʼp tɨgan̈juj naskukɨʼɨm, yɨʼp ikwiñkej iga jeʼm Biblia dyaʼ mɨgoyba (Sof. 2:13-15). Wɨaptyim ikɨʼpin̈yaj juutypɨk kupakyaj jeʼm jɨychagoʼoyiyaj jesɨk aktogoytya Nínive juuty nɨmpa «¿Lo sabía?» de jeʼm Totjaayi Takjoodon̈apaʼap de noviembre 2021. Anmajan̈chiɨʼ jeʼm immanɨktam iga ikukiʼpsyajiñ jempɨk nɨmneyaj jeʼm totjaayiyaj kun jempɨk nɨmyajpa tun̈gakyaj, yɨʼbam iyooxpaʼtyajpa iga majnam ikupɨkyajpa jempɨk nɨmpa jeʼm Biblia.
6. ¿Juutypɨk wɨap iñyooxpaʼttaʼm immanɨktam iga ikutɨʼɨyɨyyajiñ iga ity Dios? (Aʼmɨtyim jeʼm imagenyaj).
6 Yooxpaʼtyaajɨ iaʼmyaj iga jeʼm Biblia dyaʼ mɨgoyba. An̈kejaytyaʼamɨ jeʼm immanɨktam iga jempɨk ity Bibliajom dyaʼ jeʼ mɨgoʼoyi y ikupɨkyajiñ iga ity Dios. Wɨap ikɨʼpin̈taʼm libros o videos juuty ijɨykimyajpa tyityam iwatneʼ jeʼm pɨxiñtyam, wɨaptyim in̈kuaʼmtaʼm kun jeʼm immanɨktam imagenyaj en internet o jeʼm totjaayiyaj tanaitytyamwɨʼɨp juuty ijɨykiʼmpa jeʼm piedra moabita iga tampaʼtpa en jeʼm Museo del Louvre en París, tampaʼtpatyim tuum copia itywɨʼɨp en jeʼm central mundial de jeʼm Jehová itestigojyaj en Warwick, jeem naitytya jaʼyan̈ tyidyin̈kej y akkaʼmayñeta iñɨɨyi juʼuts «La Biblia y el nombre divino». Jeʼm piedra moabita jaykunuʼkneta iga jeʼm an̈jagoʼoyi Mesá itywɨʼɨp Moab inin̈a Israel y jeempɨktyim idyɨk nɨmneʼ jeʼm Biblia (2 Rey. 3:4, 5). Jeʼm immanɨktam ipɨɨmchiyajpa ife jesɨk iaʼmyajpa iga jeʼm Biblia dyaʼ mɨgoyba (aʼmɨtyim jempɨk nɨmpa 2 Crónicas 9:6).
Pɨɨkɨ tyityam ity en jeʼm museo iga iñyooxpaʼtyajpa jeʼm immanɨktam iga ikutɨʼɨyɨyyajiñ iga ity Dios. (Aʼmɨ jeʼm párrafo 6).
7, 8. a) ¿Tyi tan̈kejaytyaʼmpa ityumpɨy jempɨk watneta? (aʼmɨtyim jeʼm imagenyaj) b) ¿Juʼptam akwagoʼoyiyaj iyooxpaʼtyajpa jeʼm immanɨktam iga ikupɨkyajiñ iga ity Dios?
7 An̈kejayyaajɨ kun tyityam watneyajta. Jesɨk nɨkpa miyooxaaji o nɨkpa mijooyityam an̈kejayyaajɨ iga ityumpɨy jempɨk ity tsaam wɨwatneyajta. Yɨʼp iyooxpaʼtpa jeʼm immaanɨktam iga ikutɨʼɨyɨyyajiñ iga jempɨk iwat ityumpɨy tsaam iniity joodon̈oʼoyi. Jeʼm científicos dende pekam ikɨʼpin̈neyaj weeñi tyidyin̈kej juutypɨk watneyajta. Juʼuts jeʼm galaxias, jeʼm xooki iñaakaʼ iñɨɨyipɨk nautilo, jeʼm girasoles o weeñi ayyaj ityumpɨyyaj keʼnam jesɨk mojpa nan̈woyyajtaaji pero jesɨk nan̈woyyajtaap an̈aʼyba iñɨk. Tuum científico iñɨɨyi Nicola Fameli nɨmpa iga jesɨk iwatpa yɨʼɨmpɨk ixpɨktaap juʼuts sucesión de Fibonacci. a
8 En jeʼm escuela, jeʼm immanɨktam ikuyujkayajpa iga algun tyi iñɨʼɨyɨyaʼyba iga weeñi tyidyin̈kej jeempɨgam idyiñ. Tan̈kujɨɨstaʼmiñ juutypɨk watneyajta weeñi kuyan̈jujyaj, tuum kuy jesɨk mɨjajum iniitypa in̈gɨs y jeʼm in̈gɨsyukmɨ iniitypa ixutyu an̈gɨsyaj yɨʼp ixpɨktaap juʼuts fractales jeempɨkyim naspa kun tun̈gakyaj iga watneyajtatyim. Pero ¿tyiʼiga naspa yɨʼɨmpɨk? ¿Iapaʼap iwatpa iga naxiñ? Siiga jeʼm immanɨktam juchixkej nawadayyajtaap yɨʼpyaj akwagoʼoyiyaj wɨapsɨ iga majnam ikupɨkyajpa iga Dios iwatneʼ ityumpɨy (Heb. 3:4). Akwaʼkyaajɨ: «Siiga Dios jeempɨgam tawatnetam wɨaptyim tan̈kupɨk iga tachiʼiñeʼ an̈kiʼmayoʼoyiyaj iga tamaymayataʼmiñ». Okmɨ an̈kejayyaajɨ juʼptam an̈kiʼmayoʼoyiyaj tachiʼiñetaʼm jeʼm Bibliajom.
NASA, ESA, and the Hubble Heritage (STScl/AURA)-ESA/Hubble Collaboration
¿Iapaʼap iwatneʼ iga naxiñ yɨʼɨmpɨk? (Aʼmɨ jeʼm párrafos 7 y 8).
YOOXPAʼTYAAJƗ IGA IKUTƗʼƗYƗYYAJIÑ TYIʼIGA IKUPƗKYAJIÑ JEʼM AN̈KIʼMAYOʼOYIYAJ
9. ¿Tyiʼiga jeʼm immanɨktam dyaʼ ikupɨkyajtoʼoba jempɨk in̈kejpa jeʼm Biblia?
9 Siiga jeʼm immanɨktam dyaʼ ikupɨkyajpa jempɨk nɨmpa jeʼm Biblia, odoy jobity jɨɨsɨ iga nunta dyaʼ ikupɨkyajtoʼoba. Wɨapsɨ iga dyaʼ wɨap in̈madayyaj tun̈gakyaj jempɨk ikupɨkyajpa, jeʼyukmɨ yooxpaʼatɨ jeʼm immanɨktam kun jeʼm libro Maymayaajɨ juuty ijɨykiʼmpa tyiʼiga wɨɨ iga tan̈kupɨktaʼmiñ jeʼm an̈kiʼmayoʼoyiyaj ityyajwɨʼɨp Bibliajom. b
10. ¿Juutypɨk iñyooxpaʼtyajpa jeʼm immanɨktam iga majtyim iamigojayajiñ Jehová?
10 Yooxpaʼtyaajɨ iga majtyim iamigojayajiñ Jehová. Jesɨk in̈wagakɨʼpin̈taʼmpa jeʼm Biblia wɨap impɨktaʼm jeʼm akwagoʼoyiyaj y jeʼm akwiñkejoʼoyiyaj ityyajwɨʼɨp en jeʼm libro Maymayaajɨ yɨʼɨmpɨgam iñjoodon̈aap tyi ijɨɨspa jeʼm immanɨktam (Prov. 20:5). Wɨap in̈kɨʼpin̈taʼm jeʼm an̈kejayoʼoyi 8 juuty kukiʼpstaap Jehová juʼuts tuum wɨbɨk amigo iga tanɨʼmaʼyba tyityam wɨɨ iga tan̈wadyiñ iga tawɨnɨgaʼyiñ jesɨk yajum in̈kɨʼpin̈taʼm 1 Juan 5:3, akwaʼkyaajɨ: «¿Tyiʼiga Jehová tawaʼgaʼyba iga tan̈wɨwadyiñ?». Yɨʼɨmpɨgam iñyooxpaʼtpa jeʼm immanɨktam iga ikutɨʼɨyɨyyajiñ iga Jehová tsaam tatoyba jeʼyukmɨ tachiʼiba an̈kiʼmayoʼoyiyaj (Is. 48:17, 18).
11. ¿Juutypɨk wɨap iñyooxpaʼttaʼm jeʼm immanɨktam iga majnam ityoyyajiñ jeʼm an̈kiʼmayoʼoyiyaj ityyajwɨʼɨp Bibliajom? (Proverbios 2:10, 11).
11 Yooxpaʼtyaajɨ iga ikutɨʼɨyɨyyajiñ juutypɨk iwɨwadayyajpa jeʼm an̈kiʼmayoʼoyiyaj. Jesɨk in̈wagamaytyaʼmpa jeʼm Biblia o jeʼm texto tumtum jaamapɨk nɨʼmayyaajɨ juutypɨk miwɨwadayñetam juʼuts familia. Kujɨɨstaʼamɨ, ¿ikutɨʼɨyɨyyajpasɨ jeʼm immanɨktam tyiʼiga wɨyooxayajiñ y iwɨwatyajiñ? (Heb. 13:18). Nɨʼmayyajɨtyim iga jeʼm an̈kiʼmayoʼoyiyaj iyooxpaʼtyajpa iga wɨityyajiñ y majtyim maymayayajiñ (Prov. 14:29, 30). Jesɨk in̈wattaʼmpa yɨʼɨmpɨk iñyooxpaʼttaʼmpa jeʼm immanɨktam iga majtyim ikupɨkyajiñ jeʼm an̈kiʼmayoʼoyiyaj ityyajwɨʼɨp Bibliajom (maayɨʼ Proverbios 2:10, 11). c
12. ¿Juutypɨk tuum an̈komɨʼɨyi iyooxpaʼtpa jeʼm imanɨktam iga ikutɨʼɨyɨʼyiñ juutypɨk iwɨwadaʼyba jesɨk ikupɨkpa jeʼm an̈kiʼmayoʼoyi?
12 Steve, iga ity Francia, in̈matpa juutypɨk kun iyoomoʼ iyooxpaʼtneyaj jeʼm imaanɨk, Ethan, iga ikutɨʼɨyɨʼyiñ juutypɨk Jehová tatoyba jeʼyukmɨ tachiʼiba an̈kiʼmayoʼoyiyaj: «An̈wadaytyaʼmpa yɨʼpyaj akwagoʼoyiyaj: ¿Tyiʼiga Jehová iwaʼkpa iga tan̈kupɨguiñ yɨʼp an̈kiʼmayoʼoyi? ¿Juutypɨk ikwiñkejpa iga tatoyba? ¿Juutypɨk miwɨwadaʼyba jesɨk in̈kupɨkpa yɨʼp an̈kiʼmayoʼoyi?». Yɨʼpyaj akwagoʼoyiyaj iyooxpaʼtneʼ Ethan iga ikupɨguiñ iga Jehová dyaʼ tamɨgoyaʼyba. Steve nɨmpa: «Anyooxpaʼttamtoʼoba ammanɨktam iga ikutɨʼɨyɨʼyiñ iga jeʼm an̈kiʼmayoʼoyiyaj ityyajwɨʼɨp Bibliajom maaj tawɨwadaʼyba que jempɨk tachiʼiyajpa tun̈gakyaj.
13. ¿Tyi wɨap miyooxpaʼttaʼm inin̈kejaytyaʼm immanɨktam iga maaj wɨɨ siiga ikupɨkyajpa jeʼm Jehová ian̈kiʼmayoʼoyiyaj?
13 Yooxpaʼtyaajɨ iga ikupɨkyajiñ jeʼm Jehová ian̈kiʼmayoʼoyiyaj. Wɨapsɨ iga jeʼm maestros iwaʼgayyajpa jeʼm immanɨktam iga imayyajiñ tuum libro. Pero yɨʼp libro in̈kejayyajpa iga iwatyajiñ jempɨk Jehová dyaʼ ikusuʼnɨʼyba o iga dyaʼ malo siiga an̈ayajpa wɨap inikwaʼkyaj jeʼm immanɨktam juʼuts in̈jaam Jehová jesɨk algun i imalwatpa (Prov. 22:24, 25; 1 Cor. 15:33; Filip. 4:8). Yɨʼɨmpɨgam ikutɨʼɨyɨyyajpa iga maaj wɨɨ siiga tan̈kupɨkpa jeʼm Jehová ian̈kiʼmayoʼoyiyaj. Y jesɨk jeʼm maestros y jempɨk iwaganakuyujyajpa ikwaʼkyajpa tyi ikuyujkayaj de jeʼm libro, jeʼ wɨap in̈mat jempɨk ikupɨkpa.
YOOXPATYAAJƗ IGA IN̈KEJYAJIÑ JEMPƗK IKUPƗKYAJPA
14. ¿Tyiʼiga weeñiyaj kɨɨn̈yajpa in̈matyaj iga ityumpɨy jempɨk ity watneyajta?
14 Wɨapsɨ iga weeñiyaj kɨɨn̈yajpa in̈matyaj jempɨk ikupɨkyajpa. Y maaj jesɨk juuty kuyujyajpa nasuntaap iga in̈kejyajiñ iga ityumpɨy jempɨk ity watneyajta. ¿Juutypɨk wɨap iñyooxpaʼttaʼm immanɨktam iga odoy kɨɨn̈iñ in̈matyaj jempɨk ikupɨkyajpa?
15. ¿Tyi wɨap iyooxpaʼtyaj jeʼm immanɨktam iga ikutɨʼɨyɨyyajiñ iga jempɨk ikupɨkyajpa dyaʼ jeʼ mɨgoʼoyi?
15 Yooxpaʼtyaajɨ iga majtyim iwɨan̈matyajiñ jempɨk ikupɨkyajpa. Jeʼm immanɨktam odoy tsaayajiñ in̈matyaj iga ikupɨkyajpa iga ityumpɨy jempɨk ityyaj watneyajta (2 Tim. 1:8). Jaʼyan̈ científicos jesɨk iaʼmyajpa iga ityumpɨy jempɨk ity tsaam wɨwatneta, ikutɨʼɨyɨyyajpa iga jeʼm ityi dyaʼ iyaʼak nawatneta. Jeʼyukmɨ dyamtyim ikupɨkyajpa jesɨk jeʼm escuelas in̈kejyajpa iga ityumpɨy jempɨk ity dyaʼ i iwatneʼ. Wɨaptyim ipɨɨmchiyaj ife jesɨk ikujɨɨsyajpa tyityam iyooxpaʼtneyaj weeñi tɨwɨtam iga ikupɨkyajiñ iga ityumpɨy jempɨk ity dyaʼ iyaʼak nawatneta. d
16. ¿Tyityam wɨap iyooxpaʼt immanɨktam iga in̈matyajiñ iga ityumpɨy jempɨk ity watneta? (1 Pedro 3:15, aʼmɨtyim jeʼm imagen).
16 Yooxpaʼtyaajɨ iga wɨaiñ iwɨan̈kejayyaj tun̈gakyaj iga ityumpɨy jempɨk ity watneta (maayɨʼ 1 Pedro 3:15). Wɨap in̈kɨʼpin̈taʼm an̈kejayoʼoyiyaj ityyajwɨʼɨp en jw.org juuty in̈matyajpa iga ityumpɨy jempɨk ity watneta. Y ¿tyiʼiga jeʼm ityi dyaʼ iyaʼak nawatta? An̈kejayyajɨtyim iga jesɨk inimuruyajpa algun i odoy inin̈ayajiñ. Siiga jempɨk iwaganakuyujpa iñɨʼmaʼyba: «Ɨch an̈kupɨkpa numaaj jempɨk anaʼmpa y ni keman dyaʼ anaʼmneʼ Dios». Jeʼ wɨap ikutson̈: «Kujɨɨsɨ iga mityogoyñeʼ juuty tsaam ity kuyan̈jujyaj y impaʼtpa tuum muutɨʼ, wɨapsɨ in̈kujɨɨs iga algun i iwat yɨʼp muutɨʼ. Jeempɨktyim naspa kun jeʼm tanuniverso ityumpɨy jempɨk ity watneta».
Jesɨk inimurupa jempɨk in̈waganakuyujyajpa pɨɨkɨ akwiñkejoʼoyiyaj dyapɨk tan̈kaʼ ikutɨʼɨyɨyyaj (Aʼmɨ jeʼm párrafos 16 y 17). e
17. ¿Tyi iyooxpaʼtpa jeʼm immanɨktam iga wɨaiñ in̈kejay jeʼm iwaganakuyujpaʼap jempɨk nɨmpa jeʼm Biblia?
17 Anmajan̈chiʼiyaajɨ iga in̈kejayyajiñ tun̈gakyaj jempɨk nɨmpa jeʼm Biblia (Rom. 10:10). Jesɨk tanan̈madaʼyba tun̈gakyaj jempɨk nɨmpa jeʼm Biblia jex juʼuts jesɨk algun i ikuyujkaʼaba ityɨks tuum guitarra. Wɨapsɨ iga wiñtyi tan̈kaʼap iktsɨy, pero iga seguido ikuyujkaʼaba okmɨ majnam wɨabam ityɨks. Jeempɨgam naspa jesɨk tanan̈kejayyajpa tun̈gakyaj jempɨk nɨmpa jeʼm Biblia: Wiñtyi uxtyam uxtyam tanan̈madaʼyba. Tuum tɨɨwɨ wɨap iwaday yɨʼp akwagoʼoyi jeʼm iwaganakuyujpaʼap: «¿Iñjoodon̈ idyɨk iga jeʼm científicos iwatputyajpa jempɨk iwatneʼ Dios? Aʼmɨ yɨʼp video». Okmɨ wɨap in̈kejay tuum video jeʼm jaakaʼ juuty nɨmpa «¿watneta?». Y wɨap ikwaʼk: «Siiga tuum científico kujiʼptaap iga iwatputneʼ jempɨk Dios iwatneʼ, ¿iapaʼap maaj wɨɨ iga kujiʼptaiñ?». Jeempɨgam jempɨk iwaʼganakuyujpa wɨapsɨ iga majnam ijoodon̈atoʼoba.
SEGUIDO YOOXPAʼTYAAJƗ IGA MAJNAM IPƗƗMCHIYAJIÑ IFE
18. ¿Juutypɨk wɨap iñyooxpaʼt jeʼm immanɨktam iga seguido ipɨɨmchiyajiñ ife?
18 Yɨʼp naxyukmɨ jaʼyan̈yaj dyam ikupɨkyajpa iga ity Jehová (2 Pedro 3:3). Jeʼyukmɨ mijaatun̈tam, jesɨk in̈wagakuyujkataʼmpa jeʼm Biblia kun jeʼm immanɨktam, yooxpaʼtyaajɨ iga ikutɨʼɨyɨyyajiñ y majnam ityoyyajiñ jeʼm an̈kiʼmayoʼoyiyaj iniitywɨʼɨp. Yooxpaʼtyajɨtyim iga ikɨʼpin̈yajiñ ityumpɨy jempɨk Jehová iwatneʼ. Kun jempɨk nɨmpa jeʼm Biblia ikɨʼpin̈yajiñtyim jeʼm jɨychagoʼoyiyaj kupakneyajwɨʼbam y wagaan̈wejpattaʼamɨ Dios. Kupɨktaʼamɨ iga Jehová ikumayketpa jesɨk iñtyeguedataʼmpa iñyooxpaʼttaʼm jeʼm immanɨktam iga majnam ipɨɨmchiyajiñ ife (2 Crón. 15:7).
WAAÑI 133 Sirvamos a Jehová en nuestra juventud
a Siiga majnam iñjoodon̈atoʼoba aʼmɨ jeʼm video en jw.org Las maravillas de la Creación Revelan la gloria de Dios: Patrones en la naturaleza.
b Siiga jeʼm immanɨktam yajneum ikuyujkayaj jeʼm libro Maymayaajɨ wɨap in̈kɨʼpin̈taʼm weeñi an̈kejayoʼoyiyaj de jeʼm jaakaʼ 3 y 4 juuty ijɨykiʼmpa jeʼm Jehová ian̈kiʼmayoʼoyiyaj.
c Proverbios 2: 10, 11: 10 Jesɨk jeʼm joodon̈oʼoyi tɨgɨyba iñanmajom y jeʼm ixpɨgoʼoyi iwɨwadaʼyba jeʼm iñityi, 11 jempɨk in̈kujɨɨspa mikuixpa y jeʼm kutɨʼɨyɨyoʼoyi mikupujpa.
d Aʼmɨ jeʼm an̈kejayoʼoyi «¿Por qué creemos que hay un Creador?» de jeʼm ¡Despertad! de septiembre de 2006, y jeʼm folleto El origen de la vida. Cinco cuestiones dignas de análisis siiga majnam iñaʼmtoʼoba akwiñkejoʼoyiyaj aʼmɨ en jw.org juuty nɨmpa «Tyi ijɨɨsyajpa de juuty tamiññetaʼm» iniity weeñi videos.
e JEMPƗK NASPA IXƗʼ EN JEʼM IMAGEN : Tuum tɨɨwɨ sɨʼ in̈kejay jeʼm iwaganakuyujpaʼap tuum video iga ity juuty nɨmpa «¿Watneta?», iga jeʼ tsaam ikusuʼnɨʼyba jeʼm drones.
