Jeʼm apóstol Pablo ijaʼyay Timoteo yɨʼpyaj an̈matyiyaj iga ancianojtyim idyɨk. «Sɨɨp cupɨ̱cɨ juʼuts mannɨ́máypa porque tanjo̱doŋ iga taixt́ámpa tanJa̱tuŋ Dios y tánO̱mi Jesucristo con jém sɨŋyucmɨpɨc pɨxiñt́am. Siiga imalwatpa tu̱m jém tánamigo, jesɨc taŋwogáypat́im. Taŋcɨɨpiŋpa parejo porque d́a wɨ̱ iga tanaŋyámáypa it́áŋca». En tun̈gak an̈matyiimɨ jeʼm Biblia ipɨkpa jeʼm an̈maatyi «kupin̈neyajtawɨʼɨp» (1 Tim. 5:21). ¿Ityam jeʼ jeʼm sɨn̈pɨxiñtyam jɨykimyajtapaʼap yɨʼɨm?

Pablo dyaʼ idyɨk sɨʼ ijɨykiʼm jeʼm 144,000. Jesɨgam Pablo ijaʼyay Timoteo, dyanam idyɨk aktsukumneyajta jeʼm kupin̈neyajtawɨʼɨp. Jeʼm apóstoles y tun̈gakyaj dyanam idyɨk nɨkneyaj sɨn̈yukmɨ, jeʼyukmɨ dyaʼ jeʼ jeʼm sɨn̈pɨxiñtyam ijɨykimwɨʼɨp Pablo (1 Cor. 15:​50-54; 1 Tes. 4:​13-17; 1 Juan 3:2).

Dyatyim idyɨk jeʼ jeʼm sɨn̈pɨxiñtyam iga dyaʼ kupɨgoyyaj jesɨk nas jeʼm Diluvio. Jeʼeyaj ityun̈ɨyyaj jeʼm Wokkɨʼɨwiñ, tsɨʼyyaj juʼuts demonios y tsɨʼyyajtyim juʼuts Jesús ienemigo (Gén. 6:2; Luc. 8:​30, 31; 2 Ped. 2:4). Jeʼm tanɨgɨyoʼoyijom Jesús ipajpa jeʼm Wokkɨʼɨwiñ y jeʼm demonios jeʼm mɨjpɨk josjom por 1,000 amtyɨy y okmɨ aktogoyyajtaap (Jud. 6; Apoc. 20:​1-3, 10).

1 Timoteo 5:21 nɨmpa iga jeʼm sɨn̈pɨxiñtyam kupin̈neyajtawɨʼɨp iwaganaityyaj Dios y Jesús. Jeʼyukmɨ wɨap tannɨmtaʼm iga jeʼeyaj wagayooxayajpa jemɨk sɨn̈yukmɨ.

Tsaam jaʼyan̈ sɨn̈pɨxiñtyam ityyaj y dyaʼ tumtyi yooxakuy iwatyajpa (Heb. 12:​22, 23; Apoc. 14:​17, 18). Tan̈kujɨɨstaʼmiñtyim jesɨk tuum sɨn̈pɨɨxiñ oy ikkaʼ 185,000 asirios (2 Rey. 19:35). Jesús nɨmtyim iga weeñi sɨn̈pɨxiñtyam ityopyajpa «jém Dios ipɨxiñt́ámaŋjo̱m it́u̱mpɨy jém malopɨc pɨxiñt́am con it́u̱mpɨy jém icmalwatneyajwɨɨp it́ɨ̱wɨtam» (Mat. 13:​39-41). Tun̈gak sɨn̈pɨxiñtyam in̈tuʼumawatpa jeʼm kupin̈neyajtawɨʼɨp (Mat. 24:31). Tun̈gakyaj takuixyajpa juʼuts nɨmpa Salmo 91:11 (Mat. 18:10; aʼmɨtyim jempɨk nɨmpa Mateo 4:11 y Lucas 22:43).

Yɨʼpyaj sɨn̈pɨxiñtyam ijɨykimpaʼap 1 Timoteo 5:21 wɨap iga chiʼiñeyajta jeʼm yooxakuy iga ikuixyajiñ jeʼm kumun. En yɨʼp capítulo Pablo sɨʼ idyɨk ijɨykiʼm jeʼm ancianojyaj y juutypɨk jeʼm tɨwɨtam ikwiñkejayyajiñ respeto. Jeʼm ancianojyaj iwɨakkupakyajiñ idyɨk iyooxakuyyaj y odoy nejaixoyyajiñ y iwɨpɨkyajiñtyim ijɨɨxi. Jesɨgam pablo nɨm iga jeʼeyaj ikuyooxayajpa ityɨwɨtam, Dios, Jesús y jeʼm sɨn̈pɨxiñtyam iwiñjom nɨmpa idyɨk ixɨʼ iga sɨʼ iaʼmyaj iga juutypɨk jeʼm ancianojyaj ikuixyajpa jeʼm kumun. Juʼuts tanaʼmtaʼm weeñi sɨn̈pɨxiñtyam chiʼiñeyajta jeʼm yooxakuy iga ikuixyajiñ jeʼm kumun, takuixtyaʼmin, iaʼmyajiñ juutypɨk tan̈wattaʼmpa jeʼm an̈matkuy y okmɨ in̈madayyajpa Jehová jempɨk iaʼmyajpa (Mat. 18:10; Apoc. 14:6).