¿Jeexpɨktyim trato iñchiʼiba jeʼm yomtam juʼuts iwatpa Jehová?
TSAAM tamaymaytyam iga tan̈wagakuyooxataʼmpa Jehová kun jaʼyan̈ yomtam iga ityoyyajpa. Tsaam tantsoowaixyajpa y tantoyyajpa yɨʼpyaj yoomtɨwɨtam a iga tsaam wɨyooxayajpa y kupɨgoyyajpa. Jeʼyukmɨ tanteguedataʼmiñ iga tanakwiñkejayyajiñ yaʼachan̈jamoʼoyi, respeto y odoy tanneejaixyajiñ. Pero, iga tatan̈kaɨykɨʼɨwiñtyam dyaʼ juchixkej wɨap tan̈wat jeempɨk. Y weeñi tɨwɨtam in̈an̈kamokyajpatyim tun̈gak jɨɨxi.
Weeñi pɨxiñtyam mɨjaneyaj juuty dyaʼ i ichoowaixpa jeʼm yomtam. Juʼuts akwiñkejoʼoyi, Hans tuum superintendente de circuito itywɨʼɨp Bolivia, nɨmpa: «Weeñiyaj mɨjaneyaj juuty jeʼm pɨxiñtyam tsaam nan̈kejyajtaap y kujiʼpyajtaap, y jeʼm yomtam dyaʼ tsoowaixyajtaap». Shengxian, tuum anciano itywɨʼɨp Taiwán, nɨmpa: «Juuty ɨch aity, jaʼyan̈ pɨxiñtyam ijɨɨsyajpa iga jeʼm yomtam odoy tɨgɨykuʼmyajiñ kun tyityam iwatyajpa o jeʼm jɨɨxi ipɨkyajpaʼap. Siiga tuum pɨɨxiñ ijɨykiʼmpa tyi ijɨɨspa tuum yoomoʼ, wɨapsɨ iga dyam naidyaytyaap respeto». Tun̈gakyaj dyaʼ ikwiñkejayyajpa respeto jeʼm yomtam jesɨk ijɨymɨɨchkayajpa.
Pero tuum pɨɨxiñ wɨap ikak ijɨɨxi mex iga mɨjaneʼ juuty neejaixyajtaap jeʼm yomtam (Efes. 4:22-24). ¿Tyi wɨap iyooxpaʼtyaj? Iwatkiʼpsyajiñ Jehová. En yɨʼp an̈kejayoʼoyi tanaʼmpa juʼutspɨk trato ichiʼiba Jehová jeʼm yomtam, tyi wɨap iyooxpaʼtyaj jeʼm tɨwɨtam iga jeexpɨktyim trato ichiʼiyajiñ y juutypɨk jeʼm ancianojyaj wɨap ichioyyaj tuum wɨbɨk akwiñkejoʼoyi.
¿JUʼUTSPƗK TRATO ICHIʼIBA JEHOVÁ JEʼM YOMTAM?
Jehová tsaam ichoowaixpa jeʼm yomtam. Jeʼ tuum Jaatun̈ iga ityoyba ityumpɨy ifamilia (Juan 3:16). Tsaam ityoyba jeʼm iyommanɨktam ikuyooxayajpaʼap. Tan̈kɨʼpin̈taʼmiñ juutypɨk Jehová ikwiñkejneʼ iga ityoyba y iniidyay respeto jeʼm yomtam.
Dyaʼ iñeejaixpa. Jehová iwat jeʼm pɨɨxiñ y jeʼm yoomoʼ juʼuts ikuwiñ (Gén. 1:27). Dyaʼ iwat jeʼm pɨxiñtyam iga iniityyajiñ maaj kutɨʼɨyɨyoʼoyi y maaj wɨaiñ iwatyaj tyidyin̈kej que jeʼm yomtam. Ikwɨstɨkyaj watyajta kun jeʼm jɨɨxi iga ikutɨʼɨyɨyyajiñ jeʼm an̈kejayoʼoyiyaj ityyajwɨʼɨp Bibliajom y ikwiñkejyajiñ jeʼm jaamoʼoyiyaj iniitywɨʼɨp Jehová. Jeʼ dyaʼ ikwiñkejaʼyba maaj toyoʼoyi jeʼm pɨxiñtyam (2 Crón. 19:7). Ichoowaixpa jeʼm fe ikwiñkejyajpaʼap ikwɨstɨkyaj y jeexpɨktyim an̈jogoʼoyi chiʼiñeyajta, iga iniityyajiñ jeʼm ityi dyapɨk kuyajpa yɨʼɨm Naxyukmɨ o sɨn̈yukmɨ y tsɨʼyyajiñ juʼuts an̈jagoʼoyiyaj y panijyaj (2 Ped. 1:1, nota). Wɨkejpa iga Jehová dyaʼ iñeejaixpa jeʼm yomtam.
Ikumaton̈ba. Jehová tsaam ityeguet juʼuts in̈jaamyaj y tyityam iñaskayajpa jeʼm yomtam. Juʼuts akwiñkejoʼoyi, ikumaton̈ y ikutson̈ jeʼm an̈wejpadoʼoyiyaj iwatwɨʼɨp Raquel y Ana (Gén. 30:22; 1 Sam. 1:10, 11, 19, 20). Iwat iga jeʼm In̈matyijom jaykunuʼktaiñ nasɨyoʼoyiyaj juuty jeʼm pɨxiñtyam ikumaton̈yaj jeʼm yomtam. Tuum de jeʼ Abrahán, ikupɨk Jehová jesɨgam iñɨʼmay iga ikumaton̈iñ jempɨk Sara sɨʼ iñɨʼmay (Gén. 21:12-14). Jeʼm an̈jagoʼoyi David ikumaton̈ Abigaíl. Nɨm iga Jehová ikutsatneʼ idyɨk iga inimuruiñ (1 Sam. 25:32-35). Jesús, iga tsaam iwɨwatkiʼpspa jeʼm jaamoʼoyiyaj iniitywɨʼɨp iJaatun̈, ikumaton̈ jeʼm iaapa María (Juan 2:3-10). Juʼuts tanaʼmtaʼm, Jehová ikwiñkejaʼyba respeto jeʼm yomtam jesɨk ikumaton̈ba.
Iniidyay confianza. Juʼuts akwiñkejoʼoyi, Jehová iñɨʼmay a Eva iga iyooxpaʼdyiñ Adán iga ikuixiñ yɨʼp Nas (Gén. 1:28). Dyaʼ ijɨɨspa idyɨk iga dyaʼ tyi kumeskuy jempɨk iwatpa Eva, jeʼ ichoowaixpa idyɨk iga iyooxpaʼtpa jeʼm iwɨdyaaya. Iñɨʼmaytyim jeʼm profetisa Débora y Huldá iga ijɨɨxian̈chiʼiyajiñ jeʼm kumun, tuum juez y tuum an̈jagoʼoyi (Juec. 4:4-9; 2 Rey. 22:14-20). Sɨɨ, Jehová iniidyaytyim confianza jeʼm yoomtɨwɨtam y iaʼmchiʼiba iga ikuyooxayajiñ juʼuts an̈matkɨʼɨwiñyaj, precursoras o misioneras. Yooxpadoyyajpa iga wattaiñ y wɨtsakseettaiñ jeʼm An̈tuʼumayoʼytyɨkyaj y jeʼm sucursales. Weeñiyaj kuyooxaoyyajpa en Betel o jeʼm Oficinas Remotas de Traducción. Jehová ipɨkpa ityumpɨy jeʼm yoomtɨwɨtam iga kupaguiñ jempɨk jeʼ ixunba (Sal. 68:11). Wɨkejpa iga Jehová tsaam ichoowaixpa jeʼm yooxakuy iwatyajpaʼap.
¿TYI IYOOXPAʼTYAJPA JEʼM TƗWƗTAM IGA ICHIʼIYAJIÑ JEEXPƗKTYIM TRATO JEʼM YOOMTƗWƗTAM JUʼUTS IWATPA JEHOVÁ?
Tɨwɨtam, iga wɨaiñ tanjoodon̈a siiga jeexpɨktyim trato sɨʼ tanchiʼityaʼm jeʼm tanyoomtɨwɨtam juʼuts iwatpa Jehová, tan̈wɨkɨʼpin̈iñ jempɨk tanjɨɨspa y tyityam tan̈watpa. Jeʼyukmɨ tatogoyaytyaʼm yooxpadoʼoyi. Juʼutstyim tuum máquina de rayos X iga tayooxpaʼtpa tanjoodon̈a siiga algun i mɨmneʼ ianmaj, tuum wɨbɨk amigo y jeʼm Dios In̈maatyi tayooxpaʼtpa tanaʼm siiga dyaʼ sɨʼ tan̈watkiʼps Jehová. Tanaʼmiñ juutypɨk.
Tan̈waʼgaʼyiñ yooxpadoʼoyi tuum wɨbɨk amigo (Prov. 18:17). Tanamuruiñ tuum amigo o amiga iga tanaidyay confianza, y tanakwaʼguiñ: «¿Juʼutspɨk trato anchiʼiyajpa jeʼm yoomtɨwɨtam? ¿Ijaamyajpa iga anaidyayyaj respeto? ¿Tyi dyaʼ sɨʼ an̈wɨwat?». Siiga tajɨɨxian̈chiʼiba odoy tanjoʼykaʼiñ, tan̈wɨpɨktson̈iñ y tan̈wadyiñ jeʼm kukakiyaj nasuntapaʼap.
Tan̈kuyujkaiñ jeʼm Dios In̈maatyi. Maaj wɨap tanjoodon̈a juʼutspɨk trato sɨʼ tanchiʼiyaj jeʼm yoomtɨwɨtam jesɨk tan̈kukiʼpspa jempɨk tanjɨɨspa y tyityam tan̈watpa kun jempɨk nɨmpa jeʼm Biblia (Heb. 4:12). Jesɨk tan̈kuyujkataʼmpa, tanaʼmtaʼmpa iga weeñi pɨxiñtyam ikwiñkejayyaj respeto jeʼm yomtam y tun̈gakyaj dyaʼ. Jeʼyukmɨ tanakwaʼktaiñ ityam sɨʼ tan̈watkiʼpsyaj. Y tan̈kɨʼpin̈taʼmiñ weeñi textos iga odoy tanneeja kutɨʼɨyɨytyaʼmiñ, yɨʼbam tayooxpaʼttaʼmpa iga odoy tanneejaixyajiñ. Juʼuts akwiñkejoʼoyi, 1 Pedro 3:7 nɨmpa iga «jém yo̱mtam d́a jex ipɨ̱mi juuts tu̱m pɨ̱xiñ». b ¿Nɨmtoʼoba yɨʼp iga jeʼm pɨɨxiñ maaj iniity kutɨʼɨyɨyoʼoyi y maaj wɨap iwat tyidyin̈kej? ¡Dyaʼ jesaneʼ! Iga odoy tanneeja kutɨʼɨyɨʼyiñ jempɨk nɨm Pedro, tan̈kujɨɨxiñ jempɨk nɨmpa Gálatas 3:26-29. Jeem nɨmpa iga Jehová ikupin̈neʼ yomtam y pɨxiñtyam iga tsɨʼyyajiñ juʼuts an̈jagoʼoyi kun Jesús jemɨk sɨn̈yukmɨ. Siiga tan̈kuyujkataʼmpa jeʼm Biblia, tan̈waʼgaytyaʼmpa yooxpadoʼoyi tuum amigo o amiga, tanakwiñkejayyajpa respeto jeʼm yoomtɨwɨtam.
¿JUUTYPƗK IKWIÑKEJYAJPA JEʼM ANCIANOJYAJ IGA INIIDYAYYAJ RESPETO JEʼM YOOMTƗWƗTAM?
Jeʼm tɨwɨtam wɨaptyim ikwiñkejayyaj respeto jeʼm yoomtɨwɨtam jesɨk iaʼmyajpa iga jeʼm ancianojyaj iwatyajpa jeempɨk. ¿Juutypɨk? Tanaʼmiñ juutypɨk jeʼm ancianojyaj ikwiñkejyajpa iga iniidyayyaj respeto y ityoyyajpa jeʼm yoomtɨwɨtam.
Iñɨʼmayyajpa iga tsaam iwɨwatyajpa iyooxakuy. Jeʼm apóstol Pablo jeʼ tuum wɨbɨk akwiñkejoʼoyi iga jeʼm ancianojyaj wɨap iwatkiʼpsyaj. Jesɨgam ijaʼyay jeʼm kumun itywɨʼɨp Roma, iñɨʼmay waatyi yoomtɨwɨtam iga iwɨwatneyaj iyooxakuy (Rom. 16:12). ¿Tan̈kujɨɨstaʼmpa juʼtspɨy maymayayaj jesɨgam maytya jeʼm carta? Jeempɨktyim iwatyajpa jeʼm ancianojyaj, iñɨʼmayyajpa jeʼm yoomtɨwɨtam iga sɨʼ iwɨwatyaj iyooxakuy, iniityyaj wɨtampɨk jaamoʼoyiyaj y tsaam maymayyaj iga sɨʼ ikuyooxayaj Jehová. Yɨʼɨmpɨgam ijaamyajpa iga akwiñkejayyajtaap respeto y tsoowaixyajtaap. Jesɨk tuum anciano ianmajan̈chiʼiba tuum yoomtɨwɨ, wɨapsɨ iga iyooxpaʼtpa iga seguido ikuyooxaiñ Jehová (Prov. 15:23).
Nɨʼmaytyaʼamɨ iga sɨʼ iwɨwatyaj iyooxakuy
Jesɨk jeʼm ancianojyaj iñɨʼmayyajpa jeʼm yoomtɨwɨtam iga tsaam iwɨwatyajpa iyooxakuy, iwatyajpa kun ityumpɨy ianmaj. ¿Tyiʼiga? Tanaʼmiñ jempɨk nɨmpa Jessica: «Tsaam tan̈kusuʼnɨʼyba jesɨk algun i tanɨʼmaʼyba ‹In̈wɨwatneʼ›. Pero tsaam taanmajan̈chiʼiba jesɨk tanɨʼmaytyaap tyiapaʼap tan̈wɨwatneʼ, juʼuts iga tanyooxpaʼtpa jeʼm tammanɨktam iga odoy mɨɨchyajiñ jeʼm an̈tuʼumaajijom o iga nɨkpa tammeʼts tuum kuyujkɨʼɨwiñ iga miʼñiñ jeʼm an̈tuʼumaaji». Jesɨk jeʼm ancianojyaj iñɨʼmayyajpa jeʼm yoomtɨwɨtam tyiapaʼap jempɨk iwɨwatneʼ, ijaamyajpa iga toyyajtaap y tsoowaixayyajtaap jeʼm iyooxakuyyaj jeʼm kumunjom.
Ikumaton̈yajpa. Jeʼm ancianojyaj dyapɨk nakujiʼpyajtaap dyaʼ ijɨɨsyajpa iga numaaj jeʼeyaj iniityyaj wɨtampɨk jɨɨxiyaj. Jeʼyukmɨ iwaʼgayyajpa yooxpadoʼoyi jeʼm yoomtɨwɨtam y iwɨkumaton̈yajpa jempɨk nɨmyajpa. Yɨʼɨmpɨgam nayooxpaʼtyajtaap. ¿Y juutypɨk iwɨwadaʼyba jeʼm ancianojyaj? Gerardo, tuum anciano iga kuyooxaoʼyba Betel nɨmpa: «Anaʼmneʼ iga maaj an̈wɨwatpa anyooxakuy jesɨk jeʼm yoomtɨwɨtam ajɨɨxian̈chiʼiyajpa. Watykɨy jempɨk maaj pekam sɨʼ iwatyaj jeʼm yooxakuy jeʼ jeʼm yoomtɨwɨtam». Jeʼm kumunjom ity jaʼyan̈ yoomtɨwɨtam iga precursoras, y iwɨixpɨkyajpa jeʼm territorio. Tuum anciano iñɨɨyipɨk Bryan nɨmpa: «Jeʼm yoomtɨwɨtam tsaam yooxpaʼdoyyajpa en jeʼm Jehová iorganización. ¡Tan̈kuyujkataʼmiñ jempɨk ijoodon̈yaj!».
Kumaton̈taʼamɨ
Jeʼm ancianojyaj a veces iwatyajpa juutypɨgam ijɨɨxian̈chiʼiyajpa jeʼm yoomtɨwɨtam. ¿Tyiʼiga? Tuum anciano iñɨɨyipɨk Edward nɨmpa: «Siiga tuum tɨɨwɨ ikumaton̈ba jesɨk ijɨɨxian̈chiʼiba tuum yoomtɨwɨ, iyooxpaʼtpa iga ikutɨʼɨyɨʼyiñ jempɨk naspa ixɨʼ y iwɨkutɨʼɨyɨʼyiñ juʼuts in̈jaam tun̈gakyaj» (Prov. 1:5). Y mex siiga dyaʼ wɨap iwatyaj juutypɨk nɨm jeʼm yoomtɨwɨ, jeʼm ancianojyaj ichiʼiyajpa gracias iga nɨm jeʼm ijɨɨxi.
In̈kejayyajpa. Jeʼm ancianojyaj ikwiñkejyajpa joodon̈oʼoyi jesɨk ikuaʼmyajpa juutypɨk in̈kejayyajpa jeʼm yoomtɨwɨtam. Wɨap in̈kejayyaj juutypɨk wɨap ityopyaj jeʼm grupo para jeʼm an̈matkuy siiga dyaʼ i tuum tɨɨwɨ chin̈newɨʼɨp iga iwatpa. Wɨaptyim iwɨan̈madayyaj juutypɨk ipɨkyajiñ weeñi herramientas y máquinas iga wɨaiñ iyooxpadoyyaj en jeʼm construcción. En Betel, jeʼm superintendentes in̈kejayñeyaj jeʼm yoomtɨwɨtam iga iwatyajiñ juʼptyin̈kej yooxakuy, juʼuts mantenimiento, compras, contabilidad y programación. Jeʼm ancianojyaj iga iwatyajpa yɨʼɨmpɨk ikwiñkejyajpa iga iniidyayyaj confianza jeʼm yoomtɨwɨtam iga iwɨwatyajpa iyooxakuyyaj.
An̈kejaytyaʼamɨ
Jaʼyan̈ yoomtɨwɨtam an̈kejayñeyajta iga iyooxpaʼtyajpa tun̈gakyaj. Weeñiyaj jempɨk an̈kejayñeyajta construcción yooxpadoyyajpa jesɨk watseetyajtaap tɨkyaj juuty nasneʼ tuum desastre natural. Tun̈gakyaj ikupɨkyajpa jeʼm an̈kiʼmayoʼoyiyaj chiʼiñeyajtawɨʼɨp iga wɨaiñ iputyaj jeʼm an̈matkuy juuty agui nasnɨɨmpa y iyooxpaʼtyajpa tun̈gak yoomtɨwɨtam iga jeempɨktyim iwatyajiñ. ¿Tyi nɨmyajpa jeʼm yoomtɨwɨtam kun jempɨk an̈kejayñeyajta? Jennifer nɨmpa: «Jesɨk ayooxpadoy iga watta tuum An̈tuʼumayoʼytyɨk, tuum tɨɨwɨ ityop tiempo iga an̈kejay. Jeʼ ikuixpa idyɨk jempɨk an̈watpa y anɨʼmaʼyba idyɨk iga sɨʼ an̈wɨwat. An̈kusuʼnɨʼyba idyɨk an̈waganayooxa iga anaidyay idyɨk confianza y ichoowaixpa jeʼm anyooxakuy».
IWƗWADAYYAJPA JEʼM YOOMTƗWƗTAM JESƗK TANAʼMYAJPA JUʼUTS FAMILIA
Tantoyyajpa jeʼm tanyoomtɨwɨtam juʼuts iwatpa Jehová y tanaʼmyajpa juʼuts tanfamilia (1 Tim. 5:1, 2). Tamaymaytyam iga tan̈kuyooxataʼmpa Jehová kun jeʼeyaj. Y tamaymaywatpatyim iga ijaamyajpa iga toyyajtaap y yooxpaʼtyajtaap. Vanessa nɨmpa: «Tsaam amaymay iga Jehová aaʼmchiñeʼ iga aidyiñ jeʼm iorganizaciónjom juuty ity tɨwɨtam iga tsaam ayooxpaʼtneyaj». Tuum yoomtɨwɨ itywɨʼɨp Taiwán nɨmpa: «Anchiʼiba yukwɨʼbam Jehová y jeʼm iorganización iga tsaam atsoowaixtyaʼmpa y anaidyaytyaʼm respeto. Yɨʼp ipɨɨmchiʼiba anfe y maaj antsoowaixpa iga aity jeʼm Jehová ikumunjom».
Jehová tsaam maymay jesɨk iaʼmpa iga jeʼm tɨwɨtam ichiʼiyajpa jeexpɨktyim trato jeʼm yoomtɨwɨtam juʼuts iwatpa jeʼ (Prov. 27:11). Benjamin, tuum anciano itywɨʼɨp Escocia nɨmpa: «Sɨɨ jaʼyan̈ pɨxiñtyam dyaʼ ikwiñkejayyajpa respeto jeʼm yomtam. Jeʼyukmɨ, jesɨk tɨgɨyyajpa jeʼm An̈tuʼumayoʼytyɨkjom tansuntaʼmpa iga ijaamyajiñ iga akwiñkejayyajtaap respeto y toyyajtaap». Tanteguedaiñ juʼtspɨyam tawɨap iga tan̈watkiʼpxiñ Jehová y tanakwiñkejayyajiñ jeʼm tanyomtɨwɨtam iga tantoyyajpa y tanaidyayyaj respeto (Rom. 12:10).
a Yɨʼp an̈kejayoʼoyi jesɨk ijɨykiʼmpa yoomtɨwɨtam, sɨʼ ijɨykiʼm ityumpɨy jempɨk ikuyooxayajpa Jehová.
b Iga majnam in̈kutɨʼɨyɨʼyiñ yɨʼp an̈maatyi, maayɨʼ jeʼm kuyuuji «“El valor de ‹un vaso más débil›», de jeʼm Totjaayi Takjoodon̈apaʼap del 15 de mayo de 2006, en español, y «Consejos sabios para los casados», de jeʼm Totjaayi Takjoodon̈apaʼap del 1 de marzo de 2005, en español.
