KUYUUJI 3
WAAÑI 124 Siempre fieles y leales
Jehová miyooxpaʼtpa jesɨk miyaʼachaap iñxɨʼ
«Jehová [ . . . ] ity anan̈wɨɨmɨ, ni tyi dyaʼ axiʼkspa» (Sal. 16:8).
AN̈KEJAYOʼOYI
Tyi tan̈wadyiñ iga wɨaiñ tampɨktson̈ jeʼm Jehová iyooxpadoʼoyi jesɨk tayaʼachaap tansɨʼ.
1, 2. ¿Juʼptam nasɨyoʼoyiyaj wɨap tanan̈an̈kamoktaʼm?
TUUM tan̈kapɨk nasɨyoʼoyi jobity wɨap ikukagay tañityi. Tanaʼmiñ weeñi akwiñkejoʼoyiyaj. Tuum jaama, tuum doctor iñɨʼmay jeʼm tɨɨwɨ Luis a iga iniity cáncer y dyaʼ jaʼyñeʼ kaʼaba idyɨk. Monika kun iwɨdyaaya sɨʼ idyɨk iwagakuyooxayaj Jehová y jeʼ anciano idyɨk. Pero okmɨ ijoodon̈a iga dende pekam tan̈kawatpa idyɨk ixɨʼ. Olivia iga dyanam jaʼayɨyñeʼ, ichak ityɨk iga nuʼuki idyɨk tuum huracán. Jesɨgam seet iaʼm iga jeʼm ityɨk mɨsaneʼ idyɨk. Tsaam jobity kukakyaj jeʼm iityi. ¿Jeempɨktyim iññaskaneʼ?
2 Juʼutstyim iñaskayajpa tun̈gakyaj, jempɨk ikuyooxayajpa Jehová yaʼachayajpa y mɨmneaktɨn̈yajpa. Tayaʼachwatyajpatyim jempɨk ijooyixyajpa jeʼm Dios ikumun. Jehová dyaʼ takkaʼyaʼyba jeʼm tanyaʼachaaji, pero ijɨykamneʼ iga tayooxpaʼtpa (Is. 41:10). Kun jeʼm iyooxpadoʼoyi wɨap tammaymaya, tan̈wɨpɨk tanjɨɨxi y tan̈kupɨgoy mex iga taya’achaap tansɨʼ. Yɨʼp kuyujijom tanaʼmtaʼmpa maktasteen jɨɨxiyaj iga juutypɨk Jehová tayooxpaʼtpa. Tanaʼmtaʼmpatyim tyi wɨap tan̈wat iga wɨaiñ tampɨktson̈ay jeʼm iyooxpadoʼoyi.
JEHOVÁ TAKUPUJPA
3. ¿Tyi tan̈kaʼ tan̈wat jesɨk tayaʼachaap tansɨʼ?
3 Siiga sɨʼ tannaskaʼ tuum yaʼachaaji, wɨapsɨ iga tan̈kaʼ tan̈wɨjɨɨs tyi tan̈watpa. ¿Tyiʼiga? Wɨapsɨ iga jempɨk sɨʼ tannaskaʼ pɨɨmi tan̈yaʼkwatpa y dyaʼ tanjoodon̈ tyi tan̈watpa. Jeexam idyɨk in̈jaamyaj jeʼm yoomtɨwɨtam jɨykimyajtawɨʼɨp jeʼm wiñtyipɨk párrafo. Olivia nɨmpa: «Jesɨk jeʼm huracán imɨswat antɨk, tsaam akkobakpij y dyaʼ anjoodon̈ idyɨk tyi an̈watpa». Monika in̈matpa juʼuts idyɨk in̈jaam jesɨgam jeʼm iwɨdyaaya ipej, nɨmpa: «Pɨɨmi an̈yaʼkneʼ idyɨk. Keʼnam jesɨk akutsen̈nasayñeta ananmaj. Dyaʼ wɨap idyɨk an̈wat jeʼm yooxakuyyaj tumtum jaamapɨk. Ni keman anjɨɨs iga annaskaʼaba yɨʼɨmpɨk». ¿Juutypɨk ijɨykamneʼ Jehová iga tayooxpaʼtpa jesɨk tanjaampa iga dyam wɨap tanyaʼachɨy?
4. ¿Tyi ijɨykamneʼ Jehová en Filipenses 4:6, 7?
4 Jempɨk iwatpa Jehová. Jeʼm Bibliajom ijɨykamneʼ iga tachiʼiba «jém wɨbɨc jɨ̱xi» tananmajom (maayɨʼ Filipenses 4:6, 7). Yɨʼp wɨbɨk jɨɨxi ikkunajpa tananmaj iga tanaity tuum wɨnanɨgoʼoyi kun Jehová. Tsaam wɨɨ y «d́a i̱ wɨa̱p icutɨɨyɨ́y yɨ́p jɨ̱xi jutsa̱p tayo̱xpát Dios». ¿Inin̈wejpaʼtneʼ Jehová y jesɨk yaj mu in̈wat wɨam idyɨk inin̈jaam? Yɨʼbam «jém wɨbɨc jɨ̱xi» tachiʼipaʼap Dios.
5. ¿Juutypɨk ikupujpa jeʼm tanjɨɨxi y jeʼm tananmaj jeʼm wɨbɨk jɨɨxi tachiʼipaʼap Dios?
5 Filipenses 4:7 nɨmpatyim iga «yɨ́p wɨbɨc jɨ̱xi miwadáypa cuenta [iñanmaj] y iñjɨ̱xi». Jeʼm an̈maatyi «miwadáypa cuenta» pɨktaap idyɨk jesɨk jɨykimtaap jeʼm soldados iga ikuixyajpa jeʼm tɨgan̈juj iga odoy kutɨgɨytyaiñ. Jempɨk ityyaj jeem wɨmon̈yajpa idyɨk iga jeʼm soldados kuixoyyajpa. Jeempɨktyim naspa kun jeʼm «wɨbɨc jɨ̱xi» tachiʼipaʼap Dios, ikupujpa tananmaj y tanjɨɨxi, y yɨʼp tayooxpaʼtpa iga tanaidyiñ paz (Sal. 4:8). Mex siiga dyaʼ jobity wɨtsɨʼyba jempɨk sɨʼ tannaskaʼ, tanaitypa paz y kunajpa tananmaj juʼutstyim nas kun Ana (1 Sam. 1:16-18). Y jesɨk, maaj dyaʼ tan̈kaʼap tan̈wɨpɨk tanjɨɨxi.
An̈wejpaʼatɨ Jehová y iñaʼmpa juutypɨk jeʼm paz michiʼipaʼap ikuixpa iñanmaj y iñjɨɨxi. (Aʼmɨ jeʼm párrafojyaj 4 a 6).
6. ¿Tyi tan̈wadyiñ iga Dios tachiʼiñ jeʼm paz? (Aʼmɨtyim jeʼm imagenyaj).
6 Jempɨk taɨchtyam tan̈wattaʼmiñ. Juʼutstyim jempɨk ityyaj idyɨk en tuum tɨgan̈juj iga wɨap iwaʼgayyaj tuum soldado iga ikuixyajiñ, taɨchtyam wɨaptyim tan̈waʼgaytyaʼm Jehová iga takuixtyaʼmiñ. Tanan̈wejpaʼdyiñ iga tachiʼiñ jeʼm wɨbɨk jɨɨxi (Luc. 11:9; 1 Tes. 5:17). Jeʼam iwatyaj Luis y jeʼm iyoomoʼ Ana, jesɨgam nɨʼmayyajta iga jeʼ dyam jaʼyñeʼ kaʼaba. Jeʼ nɨmpa: «Dyaʼ i wɨap ikujɨɨs juʼtspɨy tan̈kaʼ tan̈wɨpɨk tanjɨɨxi, juʼutspɨk tratamiento tampɨktson̈ba jesɨk tanan̈an̈kamokpa yɨkxpɨk nasɨyoʼoyi. Pero jeʼm an̈wejpadoʼoyi ayooxpaʼtnetaʼm iga anaitytyaʼmiñ paz». Ikwɨstɨkyaj nɨmyaj iga pɨɨmi in̈wejpaʼtyajpa Jehová y iwaʼgayyajpa iga ichiʼiyajiñ paz, ikuixayyajiñ ianmaj y chiʼiyajtaiñ joodon̈oʼoyi iga wɨaiñ iwɨpɨkyaj ijɨɨxi. Y iaʼmyaj iga Jehová iyooxpaʼtyaj. Siiga miyaʼachaap iñxɨʼ, seguido an̈wejpaʼatɨ. Iñaʼmpa juutypɨk michiʼiba paz y mikupujaʼyba iñjɨɨxi y iñanmaj (Rom. 12:12).
JEHOVÁ TAYOOXPAʼTPA
7. ¿Juʼutssɨ tanan̈jaam siiga sɨʼ tanan̈an̈kamok tuum tan̈kapɨk nasɨyoʼoyi?
7 Siiga sɨʼ tannaskaʼ tuum yaʼachaaji, wɨapsɨ iga tan̈kaʼ tan̈wɨpɨk tanjɨɨxi y dyaʼ tan̈kutɨʼɨyɨʼyba tyi tan̈watpa. Juʼutstyim tuum barco iga pɨɨmi tsɨgoʼyba jesɨk lapatspa jeʼm lamar, jeempɨktyim wɨap tannaskaʼ jesɨk tayaʼachaap tansɨʼ. Jeʼam nas kun Ana jesɨgam kaʼ iwɨdyaaya. Jeʼ nɨmpa: «A veces pɨɨmi an̈yaʼkpa idyɨk y dyaʼ an̈kutɨʼɨyɨʼyba tyi an̈watpa. Pero watykɨy ajoʼyñeʼeba idyɨk iga Luis dyam i kun aɨch». Nɨmpatyim iga a veces ijaampa idyɨk iga ity ikutyum y tsaam kobakpijpa iga sɨɨ jeʼam jempɨk ipɨkpa jeʼm jɨɨxiyaj. Ijaampa idyɨk iga keʼnam jesɨk ity kuk lamarjom juuty naspa ixɨʼ tuum tormenta. ¿Juutypɨk tayooxpaʼtpa Jehová jesɨk tanjaampa iga dyam wɨap tanyaʼachɨy?
8. ¿Tyi ijɨykamneʼ Jehová en Salmo 16:8?
8 Jempɨk iwatpa Jehová. Jeʼ ijɨykamneʼ iga tayooxpaʼtpa (maayɨʼ Salmo 16:8). b Jesɨk tuum barco nɨki juuty ity tuum tormenta, pɨɨmi mojpa tsɨgoʼoyi. Iga odoy pɨɨmi tsɨgoʼyiñ, jaʼyan̈ barcos iniityyaj weeñi estabilizadores iga ityyaj nɨʼkukɨʼɨm. Yɨʼɨmpɨgam jeʼm barco dyaʼ pɨɨmi tsɨgoʼyba y jempɨk iñɨkkayajpa dyaʼ an̈jeʼkyajpa. Jaʼyan̈ sistemas de estabilización maaj wɨyooxayajpa jesɨk jeʼm barco nɨki nɨʼkɨʼɨm. Jeempɨktyim naspa kun taɨchtyam, siiga tansunba iga Jehová tayooxpaʼdyiñ jesɨk tayaʼachaap tansɨʼ, odoy tateeñan̈jaguiñ, yɨʼp nɨmtoʼoba iga seguido tan̈kuyooxaiñ.
Jeʼm totjaayiyaj wɨap miyooxpaʼtyaj iga odoy mikupoʼnakedyiñ. (Aʼmɨ jeʼm párrafojyaj 8 y 9).
9. ¿Juutypɨk tayooxpaʼttaʼmpa Jehová? (Aʼmɨtyim jeʼm imagenyaj).
9 Jempɨk taɨchtyam tan̈wattaʼmiñ. Siiga pɨɨmi tayaʼachaap tansɨʼ, tan̈wadyiñ juʼtspɨyam tawɨap iga tanaidyiñ tuum wɨbɨk rutina espiritual. Wɨapsɨ iga dyam jespɨy wɨap tan̈kuyooxaoy, pero tan̈kujɨɨstaʼmiñ iga Jehová tsaam ichoowaixpa jempɨk tan̈watpa (maayɨtyim Lucas 21:1-4). Toopɨ tiempo iga miwɨkuyujpa iñyaʼak y in̈kujɨɨxiñ jempɨk immayba. Ikuyukmɨ jeʼm iorganización, Jehová tachiʼiñetaʼm an̈kejayoʼoyi y videos iga wɨap tayooxpaʼttaʼm. Iga wɨaiñ impaʼt jempɨk mityogoyay, tɨgɨɨyɨ en jeʼm aplicación JW Library®, jeʼm Índice de las publicaciones Watch Tower y jeʼm Guía de estudio para los testigos de Jehová. Monika, jɨykimtawɨʼɨp wiñtyi, in̈mat iga jeʼ ipɨk yɨʼpyaj yooxpadoʼoyiyaj jesɨk pɨɨmi an̈yaʼkpa idyɨk. Juʼuts akwiñkejoʼoyi, a veces ikuaʼmpa idyɨk jeʼm an̈matyiyaj ira, traición o lealtad, y imayba jeʼm información y okmɨ wɨam idyɨk in̈jaam. Jeʼ nɨmpa: «Jesɨk mojpa idyɨk anjaykunuʼk yɨʼpyaj an̈matyiyaj, pɨɨmi an̈yaʼkneʼeba y jesɨk yajum wɨam idyɨk anan̈jaam, keʼnam jesɨk Jehová anuʼusmats. Anaʼm iga jeʼ ikutɨʼɨyɨʼyba juʼuts anan̈jaam y sɨʼ idyɨk ayooxpaʼt». Jehová wɨaptyim miyooxpaʼt iga iniidyiñ paz jesɨk miyaʼachaap iñxɨʼ (Sal. 119:143, 144).
JEHOVÁ TAKAʼMMATSPA
10. ¿Juʼutssɨ tanan̈jaam jesɨk tayaʼachaap tansɨʼ?
10 Jesɨk tayaʼachaap tansɨʼ wɨapsɨ iga itypa jaamayaj iga takupoʼnaketneʼeba físico y emocionalmente. Wɨapsɨ iga jeex tanan̈jaam juʼuts tuum atleta iga kuuxujaneʼ y dyam wɨap ipoy jikskɨy. O tsaam tan̈kaʼ tan̈wat yooxakuyyaj iga wiñtyi jobity tan̈watpa idyɨk o dyaʼ tan̈wattoʼoba jempɨk tan̈kusuʼnɨʼyba idyɨk tan̈wat. Juʼutstyim Elías, wɨapsɨ iga takupoʼnaketneʼ y dyam tayustoʼoba (1 Rey. 19:5-7). ¿Tyi iwatpa Jehová jesɨk takupoʼnaketneʼeba?
11. ¿Tyiñam iwatpa Jehová iga tayooxpaʼttaʼmpa? (Salmo 94:18).
11 Jempɨk iwatpa Jehová. Jeʼ ijɨykamneʼ iga tapɨɨmchiʼiba (maayɨʼ Salmo 94:18). c Juʼutstyim tuum atleta iga kuuxujaneʼ y ityogoyay yooxpadoʼoyi iga wɨaiñ iwity, wɨapsɨ iga tatogoyaytyim yooxpadoʼoyi iga seguido tan̈kuyooxaiñ Jehová. Jesɨk sɨʼ tannaskaʼ yɨʼɨmpɨk, jeʼ tanɨʼmaʼyba: «Ɨch, Jehová inDios, mammatsayñeʼ inin̈wɨɨkɨʼ; jempɨk miñɨʼmaʼyba: ‹Odoy kɨɨn̈ɨ. Ɨch manyooxpaʼtpa›» (Is. 41:13). Jesɨgam jeʼm an̈jagoʼoyi David yaʼacha y jeʼm enemigojyaj in̈an̈kamokyaj, iaʼm iga Jehová sɨʼ idyɨk iyooxpaʼt, jeʼyukmɨ iñɨʼmay: «Inin̈wɨɨkɨʼ awɨkaʼmmatsneʼ» (Sal. 18:35). Pero ¿juutypɨk takaʼmmatspa Jehová?
Pɨktson̈ɨ jeʼm yooxpadoʼoyi michiʼiyajpaʼap iñfamilia, iñamigojyaj y jeʼm ancianojyaj. (Aʼmɨ jeʼm párrafojyaj 11 a 13).
12. ¿Ityam wɨap ipɨk Jehová iga tayooxpaʼttaʼmiñ?
12 Watykɨy Jehová takaʼmmatspa jesɨk iwatpa iga tun̈gakyaj tayooxpaʼtyajiñ. Juʼuts akwiñkejoʼoyi, tun̈kɨy David tsaam an̈yaʼkneʼ idyɨk, pero jeʼm iamigo Jonatán oy ipɨɨmchiʼ y ianmajan̈chiʼ (1 Sam. 23:16, 17). Y Jehová ikupin̈ Eliseo iga iyooxpaʼdyiñ Elías (1 Rey. 19:16, 21; 2 Rey. 2:2). Yɨʼp jaama, tapɨɨmchiʼiba ikuyukmɨ tanfamilia, tanamigojyaj o jeʼm ancianojyaj. Pero jesɨk pɨɨmi tan̈yaʼkneʼeba, wɨapsɨ iga taitytyoʼoba tan̈kutyum, y dyaʼ tyi naspa. Jeʼyukmɨ, ¿tyi tan̈wadyiñ siiga tampɨktson̈toʼoba jeʼm yooxpadoʼoyi tachiʼipaʼap Jehová?
13. ¿Tyi tan̈wadyiñ siiga tampɨktson̈toʼoba jeʼm yooxpadoʼoyi tachiʼipaʼap Jehová? (Aʼmɨtyim jeʼm imagenyaj).
13 Jempɨk taɨchtyam tan̈wattaʼmiñ. Odoy taitytyaʼmiñ tan̈kutyum. Jesɨk dyaʼ tanan̈pɨʼtsyajpa tun̈gakyaj, majtyim tanteguedaap jempɨk sɨʼ tannaskaʼ, y yɨʼp iwatpa iga odoy tan̈wɨpɨguiñ tanjɨɨxi (Prov. 18:1). Wɨapsɨ iga jesɨk tannaskaʼaba algun tyi o tayaʼachaap, taitytyoʼoba tan̈kutyum. Pero, siiga juchixkej taitypa tan̈kutyum, wɨap iga dyaʼ sɨʼ tampɨktson̈ jeʼm yooxpadoʼoyi tachiʼipaʼap Jehová. Jeʼyukmɨ, mex siiga tan̈kaʼaneʼ tañityi, tampɨktson̈iñ jeʼm yooxpadoʼoyi tachiʼipaʼap tanfamilia, tanamigojyaj y jeʼm ancianojyaj. Tanaʼmiñ iga jeempɨgam sɨʼ tayooxpaʼt Jehová (Prov. 17:17; Is. 32:1, 2).
JEHOVÁ TAKPOʼKSPA
14. ¿Tyityam wɨap tatsɨgan̈jeʼk?
14 Wɨapsɨ iga a veces tsaam takɨɨn̈ba. Jeʼm Biblia in̈matpa iga weeñi Dios iyooxakɨʼɨwiñyaj ikɨɨn̈neyaj idyɨk jeʼm ienemigojyaj o iniityyaj idyɨk tun̈gak yaʼachaajiyaj (Sal. 18:4; 55:1, 5). ¿Y taɨchtyam? ¿Sɨʼtyim tayaʼachwatyaj jempɨk tan̈waganakuyujyajpa o tan̈waganayooxayajpa, jeʼm tanfamiliaryaj o jeʼm An̈jagoʼoyiyaj? ¿Sɨʼ tanyaʼacha iga tanaity tuum mɨmneʼiʼ iga wɨap takkaʼ? Siiga jeʼam sɨʼ tannaskaʼ, wɨap tanjaam iga tajeex juʼuts tuum xutyu tsɨɨxiʼ iga dyaʼ wɨap inikupujta. ¿Juutypɨk tayooxpaʼttaʼmpa Jehová?
15. Juʼuts nɨmpa Salmo 94:19, ¿tyi ijɨykamneʼ Jehová iga iwatpa?
15 Jempɨk iwatpa Jehová. Jeʼ takpoʼkspa y takkunajaʼyba tananmaj (maayɨʼ Salmo 94:19). d Tan̈kujɨɨstaʼmiñ tuum xutyu wooñi iga kɨɨn̈neʼ y dyaʼ wɨap imon̈ iga pɨɨmi keʼnba y naksoʼyba ixɨʼ jeʼm majɨywiñ. Pero okmɨ, nuʼkpa jeʼm ijaatun̈, iñuʼusmatspa y moʼn̈an̈jakpa. Mex iga seguido naksoʼyba jeʼm majɨywiñ, jeʼ dyam kɨɨn̈ba iga ijaatun̈ iñuʼusmatsneʼ. Jeempɨktyim naspa jesɨk tsaam takɨɨn̈neʼ, tatogoyaytyaʼm jeʼm tanJaatun̈ sɨn̈yukmɨpɨk iyooxpadoʼoyi keʼnam jesɨk tanuʼusmatspa. ¿Tyi tan̈wadyiñ iga Jehová takpoʼkxiñ?
Aʼmchiɨʼ iga jeʼm iñJaatun̈ sɨn̈yukmɨpɨk mikpoʼkxiñ kun jeʼm In̈maatyi. (Aʼmɨ jeʼm párrafojyaj 15 y 16).
16. ¿Tyi tan̈wadyiñ siiga tansunba iga Jehová takpoʼkxiñ? (Aʼmɨtyim jeʼm imagenyaj).
16 Jempɨk taɨchtyam tan̈wattaʼmiñ. Tsaam importante iga juchixkej tanan̈wejpaʼdyiñ Jehová y tammayiñ jeʼm In̈maatyi (Sal. 77:1, 12-14). Jeempɨgam, jesɨk tannaskaʼaba tuum yaʼachaaji, wɨapsɨ iga jobity tan̈kuaʼmpa jeʼm tanJaatun̈ sɨn̈yukmɨpɨk iyooxpadoʼoyi. Tanan̈madaʼyiñ Jehová juʼuts tanan̈jaam y tyi tan̈kɨɨn̈ba, y tanaʼmchiʼiñ iga jeʼ takutson̈iñ y takpoʼkxiñ kun jeʼm In̈maatyi (Sal. 119:28). Weeñi jaakayaj de jeʼm Biblia wɨap taanmajan̈chiʼiyaj jesɨk tayaʼachaap tansɨʼ, juʼuts jeʼm libro de Job, Salmos y Proverbios, y jeʼm an̈matyiyaj nɨmwɨʼɨp Jesús en jeʼm capítulo 6 de Mateo. Siiga mich inin̈wejpaʼtpa Jehová y immayba jeʼm In̈maatyi, iñaʼmpa juutypɨk mikpoʼkspa.
17. ¿Tyi odoy tan̈kujaʼamaʼyiñ?
17 Odoy tan̈kujaʼamaʼyiñ: mex iga tayaʼachaap tansɨʼ Jehová juchixkej tayooxpaʼtpa. Dyaʼ keman tatsakpa tan̈kutyum (Sal. 23:4; 94:14). Jeʼ ijɨykamneʼ iga takuixpa, tayooxpaʼtpa, tawɨkaʼmmatsneʼeba y takpoʼkspa. Isaías iñɨʼmay Jehová: «In̈kupujpa jempɨk nunta mikupɨkneyaj, juchixkej iñchiʼiyajpa paz, mich jempɨk mikupɨkneyaj» (Is. 26:3). Jeʼyukmɨ, kupɨɨkɨ Jehová y wɨpɨɨkɨ jeʼm yooxpadoʼoyi michiʼipaʼap. Siiga in̈watpa yɨʼɨmpɨk, wɨap inin̈teeñkamok juʼptyin̈kej yaʼachaajiyaj.
¿TYISƗ IN̈KUTSON̈BA?
-
¿Juchix maaj tatogoyaytyaʼmpa jeʼm Jehová iyooxpadoʼoyi?
-
¿Juutypɨk tayooxpaʼtpa Jehová jesɨk tanan̈an̈kamokpa tan̈kapɨk nasɨyoʼoyiyaj?
-
¿Tyi tan̈wadyiñ siiga tampɨktson̈toʼoba jeʼm yooxpadoʼoyi tachiʼipaʼap Jehová?
WAAÑI 12 Jehová, nuestro gran Dios
a Weeñi nɨɨyiyaj kukagayñeyajta.
b Salmo 16:8: Juchixkej anaity Jehová an̈wiñjom. Iga jeʼ ity anan̈wɨɨmɨ, ni tyi dyaʼ axiʼkspa.
c Salmo 94:18: Jesɨk anɨmpa idyɨk «Ampuyyaj nepyɨɨtyajpa», oh Jehová, jeʼm iñtyoyoʼoyi kukaʼpsnewɨʼɨp awɨkaʼmmatspa idyɨk.
d Salmo 94:19: Jesɨk jeʼm kobakpiijiyaj an̈yaʼkwatyajpa idyɨk, mich anakpoʼkspa idyɨk y anakkunajaʼyba anjɨɨxi.