1. ¿Tyiʼiga tsaam importante jeʼm jaama jesɨk wattaap jeʼm Jɨɨskimoʼoyi? (Lucas 22:​19, 20).

 JEMPƗK ikuyooxayajpa Jehová, jeʼm jaama majpɨk importante tumtum amtyɨy jeʼ jesɨk jɨɨstaap tyiʼiga kaʼ Cristo. Jeʼ pɨʼɨmɨyoy iga wattaiñ yɨʼɨmpɨk (maayɨʼ Lucas 22:​19, 20). ¡Tansuntaʼmpa iga nuʼguiñam yɨʼp jaama! ¿Tyiʼiga? Tanaʼmtaʼmiñ.

2. ¿Tyiʼiga tansuntaʼmpa iga nuʼguiñam jeʼm jaama jesɨk wattaap jeʼm Jɨɨskimoʼoyi?

² Jeʼm Jɨɨskimoʼoyi tayooxpaʼttaʼmpa tan̈kujɨɨstaʼm juʼtspɨy tsoʼowɨy jeʼm kɨakpudoʼoyi. Takjɨɨspa juutypɨk tanakwiñkejpa agradecimiento iga Jesús ikɨan̈kot iityi (2 Cor. 5:​14, 15). Tayooxpaʼtpatyim tananmajan̈chiʼiyaj jeʼm tantɨwɨtam (Rom. 1:12). Tumtum amtyɨy, jaʼyan̈ inactivos nɨkyajpa jesɨk itypa jeʼm Jɨɨskimoʼoyi, y weeñiyaj ikuseetyajpa Jehová jesɨk iaʼmyajpa iga akwiñkejayyajtaap toyoʼoyi. Y jaʼyan̈yaj ikusuʼnɨyyajpa jempɨk iaʼmyajpa y ikumaton̈yajpa, y mojpa ikuyujkayaj jeʼm Biblia. Jeʼyukmɨ tsaam tanan̈joʼktaʼmpa iga nuʼguiñ jeʼm jaama jesɨk itypa jeʼm Jɨɨskimoʼoyi.

3. ¿Juutypɨk jeʼm Jɨɨskimoʼoyi tayooxpaʼtpa tanaʼm iga tumtyi jɨɨxi tanaitytyaʼm? (Aʼmɨtyim jeʼm imagen).

³ Jesɨk wattaap jeʼm Jɨɨskimoʼoyi ikwiñkejpa iga tumtyi jɨɨxi tanaitytyaʼm. Ityumpɨy jeʼm Jehová itestigojyaj an̈tuʼumaayajpa juutypɨgam kutsuʼuyaap iñɨk tumtum an̈eymɨ. Tantumpɨytyam tan̈kumaton̈taʼmpa tuum najɨʼyoʼoyi iga tan̈kejaytyaʼmpa tyiʼiga tsaam importante jeʼm kɨakpudoʼoyi, wɨskɨy wannɨɨmpa, aknastaap jeʼm kaxtyañaañi y jeʼm vino, y wattaap cuatro an̈wejpadoʼoyiyaj y kun ityumpɨy tananmaj tanɨmtaʼmpa «amén». En 24 horas jeʼm  kumunyaj iwatyajpa yɨʼɨmpɨk. ¿Wɨap tanan̈jɨɨsaktaʼm juʼtspɨy maymayayajpa Jehová y Jesús iga tantumpɨytyam tan̈kujiʼptaʼmpa?

4. ¿Tyi tan̈kɨʼpin̈taʼmpa yɨʼp kuyujijom?

⁴ Yɨʼp kuyujijom tan̈kutson̈taʼmpa yɨʼpyaj akwagoʼoyiyaj: ¿juutypɨk wɨap tan̈wɨtsak tananmaj wiñtyi iga nuʼkpa jeʼm Jɨɨskimoʼoyi?, ¿juutypɨk wɨap tanyooxpaʼt tun̈gakyaj iga iwɨwadayyajiñtyim? y ¿juutypɨk wɨap tanyooxpaʼtyaj jeʼm inactivos? Siiga tan̈kɨʼpin̈taʼmpa yɨʼpyaj jɨɨxiyaj tayooxpaʼtyajpa iga taidyiñ listo.

¿JUUTYPƗK WƗAP TAN̈WƗTSAK TANANMAJ WIÑTYI IGA WATTAIÑ JEʼM JƗƗSKIMOʼOYI?

5. a) ¿Tyiʼiga tan̈kujɨɨstaʼmiñ juʼtspɨy tsoʼowɨy jeʼm kɨakpudoʼoyi? (Salmo 49:​7, 8). b) An̈maatɨ tyi min̈kejay jeʼm video ¿Tyiʼiga kaʼ Jesús?

⁵ Tuum manera iga wɨap tan̈wɨtsak tananmaj jeʼ iga tan̈kujɨɨxiñ juʼtspɨy tsoʼowɨy jeʼm Jesús ikɨan̈kodoʼoyi. Odoy tan̈kujaʼamaʼyiñ iga dyaʼ wɨap idyɨk tanakɨakputtamta tanyaʼak (maayɨʼ Salmo 49:​7, 8; a aʼmɨtyim jeʼm video ¿Tyiʼiga kaʼ Jesús?). b Jehová iaʼmchiʼ iga jeʼm iMaanɨk tsampɨk ityoyba kaʼiñ por taɨchtyam y tsaam tsoʼowɨy ipudayyaj (Rom. 6:23). Jesɨk tan̈kujɨɨstaʼmpa ityumpɨy jempɨk iwatyaj, majtyim tantsoowaixtyaʼmpa jeʼm kɨakpudoʼoyi. Sɨɨ, tanaʼmtaʼmiñ tyityam iwatneyaj por taɨchtyam. Pero wiñtyi, tan̈kɨʼpin̈taʼmiñ juutypɨk takɨakputtamta.

6. ¿Tyityam tɨgɨykuʼmpa kun jeʼm kɨakpudoʼoyi, y tyiʼiga Jesús iwat?

⁶ Jeʼm kɨakpudoʼoyi nɨmtoʼoba iga juyputtaap o kuyojnastaap algun tyi. Jeʼm wiñtyipɨk pɨɨxiñ, Adán, dyaʼ tan̈kaɨy idyɨk jesɨgam watta. Pero jesɨk tan̈kawat, ipatstogoy jeʼm ityi dyapɨk kuyajpa y jeʼm imanɨktam dyamtyim wɨa mu ipɨktson̈yaj. Iga wɨaiñ ijuyput jempɨk Adán ipatstogoy, Jesús ikɨan̈kot iityi. Jesɨgam jaʼy ityi yɨʼp Naxyukmɨ, Jesús «d́a iwat ni tu̱m táŋca. D́a i̱ imɨgóyáy» (1 Ped. 2:22). Dyaʼ tan̈kaɨy idyɨk jesɨgam kaʼ, jeʼyukmɨ jespɨytyim tsoʼowɨy jeʼm iityi juʼuts jempɨk ipatstogoy Adán (1 Cor. 15:45; 1 Tim. 2:6).

7. An̈maatɨ juʼptam kutɨʼɨchiyaj in̈teeñkamok Jesús.

⁷ Jesɨgam jaʼy ityi yɨʼp Naxyukmɨ, Jesús juchixkej ikupɨk iJaatun̈ sɨn̈yukmɨpɨk mex iga in̈teeñkamok kutɨʼɨchiyaj. Ichɨɨxjom, ikupɨk ijaatun̈yaj mex iga jeʼeyaj tan̈kaɨyyaj idyɨk (Luc. 2:51). Itraytyipɨxiñjom, iyaʼachɨy mex iga tun̈gakyaj wɨapsɨ iga ityeguedɨyyajpa idyɨk iga odoy kupɨgoʼyiñ. Y jesɨk pɨɨxiñam idyɨk, jeʼm Wookkɨʼɨwiñ ikutɨʼts y iñɨʼmay iga odoy ikupɨguiñ Jehová (Mat. 4:​1-11). Ixunba idyɨk iga Jesús tan̈kawadyiñ iga odoy takɨakputtaʼmiñ.

8. ¿Juʼpnam kutɨʼɨchiyaj in̈teeñkamok Jesús?

⁸ Jesús in̈teeñkamoktyim kutɨʼɨchiyaj jesɨgam jaʼy in̈mat jeʼm Dios In̈maatyi. Juʼuts akwiñkejoʼoyi, jeʼm ienemigojyaj iyaʼachwatyaj y iotyɨʼmayyaj iga ikkaʼayajpa (Luc. 4:​28, 29; 13:31). Iyaʼachɨʼytyim jesɨk jeʼm ikuyujkɨʼɨwiñyaj jɨɨxtyogoyyaj (Mar. 9:​33, 34). Jesɨk kɨʼpin̈ta pɨɨmi yaʼachwatta y okmɨ akkaʼata juʼuts algun i iga imalwatneʼ idyɨk (Heb. 12:​1-3). Y jesɨk kaʼabam idyɨk ixɨʼ, Jehová dyam iyooxpaʼt, jeʼyukmɨ iyaʼachɨy ikutyum jeʼm kutɨʼɨchiyaj (Mat. 27:46). c

9. ¿Juʼuts tanan̈jaam jesɨk tan̈kujɨɨspa jempɨk Jesús iwat por taɨchtyam? (1 Pedro 1:8).

 ⁹ Wɨkejpa iga Jesús tsaam tsoʼowɨy mu iyoj jesɨk takɨakputtaʼm. Jesɨk tan̈kujɨɨspa ityumpɨy jempɨk iwat por taɨchtyam, majtyim tantoytyaʼmpa (maayɨʼ 1 Pedro 1:8).

10. ¿Tyi iwat Jehová iga wɨaiñ takɨakputtaʼm?

¹⁰ ¿Tyi iwat Jehová iga Jesús wɨaiñ ikɨan̈kot iityi? Juʼuts tanjoodon̈tam, Jehová tsaam ityoyba jeʼm iMaanɨk (Prov. 8:30). Tan̈kujɨɨstaʼmiñ juʼuts mu in̈jaam jesɨgam iaʼm juʼtspɨy yaʼachaap idyɨk ixɨʼ Jesús. Pɨɨmi ityoʼyan̈jaam iga jeʼm iMaanɨk jooyixaytya, koʼtsaytya y yaʼachwadaytya.

11. ¿Tyi tayooxpaʼtpa tan̈kutɨʼɨyɨy juʼuts mu in̈jaam Jehová jesɨgam akkaʼata Jesús?

¹¹ Jempɨk kaʼaneyaj tuum imaanɨk ijoodon̈yaj juʼtspɨy toyba tanan̈jaam jesɨk naspa yɨʼɨmpɨk. Mex iga tan̈kupɨkpa iga itypa jeʼm aktsukumoʼoyi, tantoʼyan̈jaampa jesɨk kaʼaba algun i. Yɨʼp akwiñkejoʼoyi tayooxpaʼtpa tan̈kutɨʼɨyɨy juʼtspɨy ityoʼyan̈jaam Jehová jesɨgam iaʼm iga yaʼachwadaytya y akkaʼaytya jeʼm iMaanɨk jeʼm amtyɨy 33 (Mat. 3:17). d

12. ¿Juutypɨk wɨap tan̈wɨpɨk tantiempo wiñtyi iga wattaiñ jeʼm Jɨɨskimoʼoyi?

¹² Iga dyanam nuʼkneʼ jeʼm Jɨɨskimoʼoyi, ¿tyiʼiga dyaʼ iñtyoppa tiempo iga in̈kujɨɨspa jeʼm kɨakpudoʼoyi jesɨk miwɨkuyujpa iñyaʼak o jesɨk iniitypa jeʼm kuyuuji en familia? Pɨɨkɨ jeʼm Guía de estudio para los testigos de Jehová o pɨɨkɨ tun̈gak totjaayiyaj iga majnam iñjoodon̈aiñ. e Tun̈ɨ’ɨyɨ jempɨk maytyaap Bibliajom para jeʼm Jɨɨskimoʼoyi iga ity en jeʼm Totjaayi tan̈kuyujkapaʼap jeʼm an̈tuʼumaajijom Taidyiñ y Tanan̈kejiñ juʼuts iwat Jesús. Aʼmɨtyim jeʼm najɨʼyoʼoyi kukejakɨʼɨmpɨk jeʼm jaama jesɨk wattaap jeʼm Jɨɨskimoʼoyi. Siiga tan̈wɨtsakpa tananmaj wiñtyi iga nuʼkpa yɨʼp jaama, wɨap tanyooxpaʼtyaj tun̈gakyaj iga iwɨwadayyajiñtyim (Esd. 7:10).

TANYOOXPAʼTYAJIÑ TUN̈GAKYAJ IGA IWƗWADAYYAJIÑ JEʼM JƗƗSKIMOʼOYI

13. ¿Tyi wɨap tan̈wat iga tun̈gakyaj iwɨwadayyajiñtyim jeʼm Jɨɨskimoʼoyi?

¹³ ¿Juutypɨk wɨap tanyooxpaʼtyaj tun̈gakyaj iga iwɨwadayyajiñ jeʼm Jɨɨskimoʼoyi? Wiñtyi, tantɨʼpyajiñ. Wɨap tan̈wat yɨʼɨmpɨk  jesɨk tanchiʼiyajpa jeʼm invitación, pero wɨaptyim tanjaykunuʼk ityam tantɨʼpyajtoʼoba, juʼuts jeʼm tanfamiliaryaj, jempɨk tan̈waganayooxayajpa, jempɨk tan̈waganakuyujyajpa y tun̈gakyaj. Siiga yajpa jeʼm invitaciones, wɨap tan̈kutsadayyaj tuum enlace en versión digital. ¡Dyaʼ tanjoodon̈tam juʼtsan̈ nɨkyajpa! (Ecl. 11:6).

14. An̈maatɨ tuum akwiñkejoʼoyi iga in̈kejpa juʼtspɨy yooxpadoʼyba tuum invitación.

¹⁴ Odoy kujaʼamaʼayɨ juʼtspɨy wɨap iyooxpadoy tuum invitación. Tuum jaama, tuum yoomtɨwɨ aʼman̈jak jesɨgam jeʼm iwɨdyaaya iga dyaʼ jeʼ Testigo iñɨʼmay iga nɨkpa ikpoy jesɨk itypa jeʼm Jɨɨskimoʼoyi. ¿Tyiʼiga aʼman̈jak? Iga watykɨyam ityɨʼpneʼ idyɨk y jeʼ ni tun̈kɨy dyaʼ oy. ¿Tyiʼiga ipɨk jeʼm ijɨɨxi iga nɨkpa? Jeʼ nɨm iga tuum anciano iga iixpɨkpa ichiʼ tuum invitación. Dende jesɨgam moj nɨki tumtum amtyɨy.

15. ¿Tyi tanjɨɨskupakneiñ siiga tantɨʼppa algun i jesɨk wattaap jeʼm Jɨɨskimoʼoyi?

¹⁵ Tan̈kujɨɨstaʼmiñ iga jesɨk algun i tantɨʼppa a jeʼm Jɨɨskimoʼoyi, wɨapsɨ iga iniitypa weeñi akwagoʼoyiyaj y maaj siiga ni tun̈kɨy dyaʼ oyñeʼ jeʼm an̈tuʼumaajijom. Jeʼyukmɨ tan̈kujɨɨstaʼmiñ juʼptam akwagoʼoyiyaj wɨap iniityyaj y juutypɨk wɨap tan̈kutson̈ayyaj (Col. 4:6). Juʼuts akwiñkejoʼoyi, wɨapsɨ iga nakwaʼktaap: «¿Tyi wattaap jeem? ¿Juʼtsan̈ jaʼyba yɨʼp an̈tuʼumaaji? ¿Juutypɨk tanapuʼktugɨyñetaiñ tannɨk? ¿Tatseʼgaytyaap iga wɨaiñ tantɨgɨy? ¿Tawaʼgaytyaap tumiñ?». Jeʼyukmɨ wɨap tanakwaʼk tyi ijoodon̈atoʼoba y tanan̈madaʼyiñ. Wɨaptyim tampɨk jeʼm video Tanjɨɨsaytyaʼmiñ jeʼm Jesús ikaʼiʼ y ¿Juuts jém anaŋtuuma̱jit́am? Y jeʼm an̈kejayoʼoyi 28 de jeʼm libro Maymayaajɨ iniity weeñi jɨɨxiyaj iga wɨap tanan̈kejay.

16. ¿Juʼpnam akwagoʼoyiyaj wɨapsɨ iga nawadaytyaap jempɨk yaguiñ oy jesɨk watta jeʼm Jɨɨskimoʼoyi?

¹⁶ Wɨapsɨ iga iniitypa maaj akwagoʼoyiyaj jesɨk oyñeum jeʼm Jɨɨskimoʼoyi. Wɨap iga nakwaʼktaap tyiʼiga dyaʼ i (o dyaʼ waatyiyaj) ikɨʼɨsyaj jeʼm kaxtyañaañi o uk jeʼm  vino. Wɨapsɨ iga takwaʼkpatyim juʼtsan̈ veces tan̈wattaʼmpa jeʼm Jɨɨskimoʼoyi, y siiga juchixkej tan̈wattaʼmpa jeempɨk jeʼm an̈tuʼumaajijom. Mex iga jeʼm najɨʼyoʼoyijom wɨan̈matta yɨʼpyaj jɨɨxiyaj wɨapsɨ iga jempɨk yaguiñ nɨkneyaj nasuntaap iga okmɨ tan̈wɨan̈madayyajiñ. Iga wɨaiñ tan̈kutson̈ay jeʼm iakwagoʼoyiyaj wɨap tampɨk jeʼm an̈kejayoʼoyi itywɨʼɨp en jw.org «¿Por qué los testigos de Jehová celebran la Cena del Señor de forma diferente a otras religiones?». Tan̈wattoʼoba juʼtspɨy tawɨap iga tanyooxpaʼdyiñ tun̈gakyaj wiñtyi iga tsukumiñ jeʼm Jɨɨskimoʼoyi, jesɨk sɨʼbam iwatta y jesɨk kuyajum (Hech. 13:48).

TANYOOXPAʼTYAJIÑ JEʼM INACTIVOS

17. ¿Juutypɨk jeʼm ancianojyaj wɨap iyooxpaʼtyaj jeʼm inactivos? (Ezequiel 34:​12, 16).

¹⁷ ¿Juutypɨk jeʼm ancianojyaj wɨap iyooxpaʼtyaj jeʼm inactivos jesɨk dyam jaʼyñeʼ itypa jeʼm Jɨɨskimoʼoyi? Ityeguedayajiñ y ikwiñkejayyajiñ toyoʼoyi (maayɨʼ Ezequiel 34:​12, 16). f Miancianojtam, kuaʼmtaʼamɨ jeʼm inactivos wiñtyi iga wattaiñ jeʼm Jɨɨskimoʼoyi. Nɨʼmaytyaʼamɨ iga tsaam iñtyoytyaʼmpa y in̈wattamtoʼoba juʼtspɨyam miwɨataʼmpa iga iñyooxpaʼttamtoʼoba. Tɨʼptaʼamɨ iga nɨguiñ jesɨk wattaap jeʼm Jɨɨskimoʼoyi, siiga nuʼkyajpa wɨpɨktson̈taʼamɨ. Y jesɨk nasum, odoy kujaʼamayyaajɨ y yooxpaʼtyaajɨ espiritualmente iga ikuseetyajiñ Jehová (1 Ped. 2:25).

18. ¿Juutypɨk wɨap tanyooxpaʼttaʼm jeʼm inactivos? (Romanos 12:10).

¹⁸ Tantumpɨytyam wɨap tanyooxpaʼttaʼm jeʼm inactivos jempɨk nɨkyajpa jeʼm Jɨɨskimoʼoyi. ¿Juutypɨk? Tanakwiñkejayyajiñ toyoʼoyi, yaʼachan̈jamoʼoyi y respeto (maayɨʼ Romanos 12:10). Tan̈kujɨɨstaʼmiñ iga  yɨʼpyaj Jehová iovejajyaj tan̈kaʼa mu iñɨkyaj jeʼm an̈tuʼumaaji. Wɨapsɨ iga nakwaʼkyajtaap idyɨk juutypɨk pɨktson̈yajtaap. g Jeʼyukmɨ odoy tan̈wadayyajiñ akwagoʼoyiyaj o tannɨʼmayyajiñ algun tyi iga wɨap ichɨktsaʼawatyaj (1 Tes. 5:11). Tsaam tamaymay iga eybɨk tan̈koosteñaytyaʼmpa Jehová kun yɨʼpyaj tɨwɨtam (Sal. 119:176; Hech. 20:35).

19. ¿Juutypɨk tawɨwadaytyaʼmpa jesɨk tanjɨɨsaytyaʼmpa jeʼm Jesús ikaʼiʼ?

¹⁹ Kun ityumpɨy jempɨk tan̈kɨʼpin̈taʼm, dyaʼ tagaʼman̈jaktaʼmpa iga Jesús nɨm iga jɨɨsaytyaiñ jeʼm ikaʼiʼ tumtum amtyɨy. Iga tan̈wattaʼmpa yɨʼɨmpɨk tawɨwadaytyaʼmpa taɨchtyam y tun̈gakyaj (Is. 48:​17, 18). Tayooxpaʼtpa iga majnam tantoʼyiñ Jehová y Jesús. Tayooxpaʼtpatyim tanakwiñkej juʼtspɨy tantsoowaixpa jempɨk iwatneyaj por taɨchtyam. Maaj tan̈wɨnanɨgayyajpa jeʼm tantɨwɨtam. Taaʼmchiʼibatyim tanyooxpaʼtyaj tun̈gakyaj iga ijoodon̈ayajiñ juutypɨk wɨap ipɨktson̈yaj jeʼm kumaykedoʼoyiyaj tachiʼipaʼap Jehová ikuyukmɨ jeʼm kɨakpudoʼoyi. Jeʼyukmɨ, taitytyaʼmiñ listo jeʼm jaama jesɨk wattaap jeʼm Jɨɨskimoʼoyi.