KUYUUJI 5
WAAÑI 108 El amor leal de Jehová
Juutypɨk tawɨwadaʼyba jeʼm Jehová ityoyoʼoyi
«Oy i̱t́i yɨ́p naxyucmɨ jém tánO̱mi Jesucristo iga [ikɨakputpa] jém táŋcaɨywɨɨp» (1 TIM. 1:15).
AN̈KEJAYOʼOYI
Juutypɨk tawɨwadaʼyba jeʼm kɨakpudoʼoyi y juutypɨk wɨap tanakwiñkejaytyaʼm Jehová iga tantsoowaixtyaʼmpa.
1. ¿Juutypɨk wɨap tammaymaywattaʼm Jehová?
TAN̈KUJƗƗSTAʼMIÑ iga algun i iga tsaam tantoyba tanchiʼiba tuum wɨbɨk xaaja iga iwɨwadaʼyba. ¿Juʼuts tanan̈jaam jesɨk tanaʼmpa iga ipɨktson̈ba pero ikkaʼyba y ni keman dyaʼ ipɨkpa? Wɨapsɨ iga tan̈yaʼkpa. Pero tsaam tamaymayaap siiga tanaʼmpa iga jeʼm xaaja iga tanchiʼ tsaam ichoowaixpa. ¿Tyi tan̈kejaytyaʼmpa yɨʼp akwiñkejoʼoyi? Jehová ikɨan̈kot jeʼm iMaanɨk por taɨchtyam. ¡Tsaamsɨ maymay jesɨk iaʼmpa iga tantsoowaixtyaʼmpa jeʼm kɨakpudoʼoyi y jeʼm toyoʼoyi iga takwiñkejayñetaʼm! (Juan 3:16; Rom. 5:7, 8).
2. ¿Tyi tan̈kɨʼpin̈taʼmpa yɨʼp kuyujijom?
2 Jesɨk naspa jeʼm amtyɨyyaj wɨap tan̈kujaʼamay iga jeʼm kɨakpudoʼoyi jeʼ tuum xaaja. Tamaymaytyam iga tachiʼiñetamta, pero keʼnam iga tanakkaʼyba y tan̈kujaʼamaʼyba. Iga odoy tannaskataʼmiñ jeempɨk duroj tantsoowaixtyaʼmiñ y tan̈kujɨɨstaʼmiñ jempɨk Jehová y Jesús iwatneyaj por taɨchtyam. Yɨʼp kuyujijom tan̈kɨʼpin̈taʼmpa juutypɨk tawɨwadaytyaʼmpa jeʼm kɨakpudoʼoyi sɨɨ y jeʼm tannɨgɨyoʼoyijom. Tan̈kɨʼpin̈taʼmpatyim juutypɨk wɨap tanakwiñkejaytyaʼm Jehová iga tantsoowaixtyaʼmpa jeʼm ityoyoʼoyi, maaj jesɨk wattaap jeʼm Jɨɨskimoʼoyi.
JUUTYPƗK TAWƗWADAYTYAʼMPA SƗƗ JEʼM KƗAKPUDOʼOYI
3. ¿Juutypɨk tawɨwadaytyaʼmpa sɨɨ jeʼm kɨakpudoʼoyi?
3 Sɨʼbam tawɨwadaytyaʼm jeʼm Jesús ikaʼiʼ. Ikuyukmɨ jeʼm kɨakpudoʼoyi Jehová tawadaytyaʼmpa perdón jeʼm tantan̈kaʼ. Dyaʼ iwatpa iga algun i ipɨɨmɨʼyba, iwatpa iga jeempɨgam ixunba. Jesɨk David iwan tuum waañi jeʼ nɨm: «Mich, oh Jehová, tsaam miwɨɨ y juchixkej in̈watpa perdón» (Sal. 86:5; 103:3, 10-13).
4. Juʼuts nɨmpa Lucas 5:32; 1 Timoteo 1:15, ¿ityam iwɨwadaʼyba jeʼm kɨakpudoʼoyi?
4 Weeñiyaj ijɨɨsyajpa iga dyaʼ ikooñwɨyñeyaj jeʼm Jehová iperdón. Y jesaneum ni tuum de taɨchtyam dyaʼ tan̈kooñwɨyñetaʼm. Jeempɨgam nɨm jeʼm apóstol Pablo, dyaʼ wɨɨ iga anɨʼmaytyaap iga «ɨch aapóstol». Y nɨmtyim «ɨch nu̱ma aapóstol porque Dios tsa̱m ayaachaŋja̱m y awɨ̱wadáy» (1 Cor. 15:9, 10). Siiga dyam maaj tatan̈kawatpa Jehová tawadaʼyba perdón. ¿Tyiʼiga? Dyaʼ iga tan̈kooñwɨyñetaʼm, jeʼ iga tatoytyaʼmpa. Jeʼyukmɨ jesɨk tanjaamtaʼmpa iga dyaʼ tan̈kooñwɨyñetam iga Jehová tawadaytyaʼmiñ perdón, tanjɨɨstaʼmiñ iga Jehová dyaʼ ichiʼ jeʼm kɨakpudoʼoyi jempɨk tsaam kukapsneyaj, ichiʼ jempɨk tan̈kaɨyyaj iga ichakyajiñ iga imalwatyajpa (maayɨʼ Lucas 5:32; 1 Timoteo 1:15).
5. ¿Tyiʼiga ni i dyaʼ wɨap iñɨm iga ikooñwɨyñeʼ jeʼm Jehová iyaʼachan̈jamoʼoyi?
5 Mex iga jaʼyan̈ amtyɨyam sɨʼ tan̈kuyooxataʼm Jehová ni keman tanjɨɨstaʼmiñ iga tan̈kooñwɨyñetaʼm jeʼm iyaʼachan̈jamoʼoyi. Tanjoodon̈tam iga ichoowaixpa ityumpɨy jempɨk tan̈wattaʼmpa por jeʼ (Heb. 6:10). Pero tachiʼiñetaʼm juʼuts tuum xaaja iga ikɨan̈kot jeʼm iMaanɨk, dyaʼ iga tayojaytyaʼmpa jempɨk tan̈watnetaʼm taɨchtyam. Meʼega tanɨmtaʼmpa iga tan̈kooñwɨyñetaʼm jeʼm iyaʼachan̈jamoʼoyi o maaj tawɨixtyaʼmpa, jesɨk sɨʼ tannɨmtaʼm iga dyaʼ tansuntaʼmpa iga Jesús kaʼiñ por taɨchtyam (aʼmɨtyim jempɨk nɨmpa Gálatas 2:21).
6. ¿Tyiʼiga Pablo tsaam ityegueda iga ikuyooxa Jehová?
6 Pablo iwɨjoodon̈ idyɨk iga dyaʼ wɨap ikooñwɨy jeʼm Jehová iperdón. Jesɨk, ¿tyiʼiga tsaam ityeguedaap idyɨk ikuyooxa Jehová? Iga ikwiñkejtoʼoba iga tsaam ichoowaixpa jeʼm iyaʼachan̈jamoʼoyi (Efes. 3:7). Jeempɨktyim taɨchtyam tan̈kuyooxataʼmpa Jehová dyaʼ numaaj iga takwiñkejaytyaʼmiñ yaʼachan̈jamoʼoyi. Tan̈wattaʼmpa iga tanakwiñkejaytyaʼmtoʼoba iga tantsoowaixtyaʼmpa iga tayaʼachan̈jamnetaʼm.
7. Juʼuts nɨmpa Romanos 5:1; Santiago 2:23, ¿juutypɨknam tawɨwadaʼyba sɨɨ jeʼm kɨakpudoʼoyi?
7 Jeʼm kɨakpudoʼoyi tayooxpaʼttampatyim iga sɨɨ wɨap tanaitytyaʼm tuum wɨnanɨgoʼoyi kun Jehová. a Juʼuts tanaʼmtaʼm jeʼm tun̈gak kuyujijom, jesɨk tanaytyaʼmpa dyaʼ tanaitytyam tuum wɨnanɨgoʼoyi kun Dios. Pero jeʼm kɨakpudoʼoyi tayooxpaʼttaʼmpa iga tanaitytyaʼmiñ paz kun Dios y wɨaiñ tan̈kunuʼktaʼm (maayɨʼ Romanos 5:1; Santiago 2:23).
8. ¿Tyiʼiga tantsoowaixtyaʼmiñ iga Jehová tachiʼiñetaʼm juʼuts xaaja jeʼm an̈wejpadoʼoyi?
8 Iga tanaitytyaʼm tuum wɨnanɨgoʼoyi kun Jehová. Wɨap tanan̈wejpaʼttaʼm. Jeʼ dyaʼ numaaj ikumaton̈ba jeʼm an̈wejpadoʼoyi wattapaʼap en jeʼm an̈tuʼumaajiyaj. Ikumaton̈batyim jempɨk cada tumtum de taɨchtyam tan̈wadaytyaʼmpa. Jeʼm an̈wejpadoʼoyi tayooxpaʼtpa iga tanaidyiñ paz tananmajom, pero dyaʼ numaaj jeempɨk. Tayooxpaʼtpatyim iga tampɨɨmchiʼiñ jeʼm tan̈wɨnanɨgoʼoyi kun Dios (Sal. 65:2; Sant. 4:8; 1 Juan 5:14). Jesɨk Jesús oy ityi yɨʼp naxyukmɨ juchixkej in̈wejpaʼtpa idyɨk Jehová y ikupɨk iga jeʼ ikumaton̈aʼyba idyɨk ian̈wejpadoʼoyi. Yɨʼbam ipɨɨmchiay jeʼm iwɨnanɨgoʼoyi kun jeʼ (Luc. 5:16). Tamaymaytyam iga Jesús ikɨan̈kot jeʼm iityi por taɨchtyam, jeʼyukmɨ sɨɨ wɨap tanamigojatam Jehová y takumaton̈aytyaʼmpa jeʼm tanan̈wejpadoʼoyi .
JUUTYPƗK TAWƗWADAYTYAʼMPA JEʼM KƗAKPUDOʼOYI TANNƗGƗYOʼOYIJOM
9. ¿Juutypɨk iwɨwadayyajpa jeʼm kɨakpudoʼoyi jeʼm Jehová iyooxakɨʼɨwiñyaj?
9 Jehová ichiʼiba jeʼm iyooxakɨʼɨwiñyaj jeʼm ityi dyapɨk kuyajpa ikuyukmɨ jeʼm kɨakpudoʼoyi. Jaʼyan̈yaj ijɨɨsyajpa iga dyaʼ wɨap tanaitytyaʼm tuum ityi dyapɨk kuyajpa iga dende wiñɨgam tsaam jaʼyan̈yaj kaʼaneyaj. Pero Jehová tawatnetaʼm iga wɨaiñ tañitytyaʼm juchixkej. Mex iga tan̈kaʼ tan̈kupɨk, Jehová iyoj jeʼm tantan̈katam iga iMaanɨk ikɨan̈kot iityi y sɨɨ eybɨk wɨap tampɨktson̈taʼm tuum ityi dyapɨk kuyajpa (Rom. 8:32).
10. ¿Tyi sɨʼ in̈joʼkyaj kun maymayaaji jeʼm kupin̈neyajtawɨʼɨp y jeʼm tun̈gak ovejas?
10 Mex iga jeʼm ityi dyapɨk kuyajpa tampɨktson̈taʼmpa tannɨgɨyoʼoyijom, Jehová ixunba iga tanan̈joʼktaʼmiñ kun maymayaaji. Jempɨk kupin̈neyajta maymayyaj in̈joʼkyaj iga nɨkyajpa sɨn̈yukmɨ y tsɨʼyyajpa juʼuts an̈jagoʼoyi kun Cristo (Apoc. 20:6). Y jeʼm tun̈gak ovejas in̈joʼkyajpa iga iitykayajpa yɨʼp Nas jesɨk tsɨʼyum juʼuts tuum Paraíso y dyam itypa maaj yaʼachaaji (Apoc. 21:3, 4). ¿Miitytyoʼoba juchixkej yɨʼp Naxyukmɨ? Jehová tawattaʼm iga taitytyaʼmiñ juchixkej yɨʼp Naxyukmɨ. Jeʼyukmɨ tsaam tamaymayataʼmpa jesɨk tampɨktson̈taʼmpa jeʼm ityi dyapɨk kuyajpa.
11, 12. ¿Juʼptam kumaykedoʼoyiyaj tampɨktson̈tampaʼap en jeʼm Paraíso sɨʼ tanan̈joʼktaʼm? (Aʼmɨtyim jeʼm imagenyaj).
11 Kujɨɨsɨ juʼutsam iñityi jesɨk miityum en jeʼm Paraíso. Dyam maaj mikobakpijpa iga mimɨmneʼeba o iga mikaʼaba (Is. 25:8; 33:24). Jehová michiʼiba ityumpɨy jempɨk mich iñxunba. ¿Maaj in̈wɨixpɨkyajtoʼoba jeʼm animatyaj? ¿In̈kuyujkatoʼoba iñtyɨksoy? ¿In̈kuyujkatoʼoba in̈wat dibujojyaj? En jeʼm Paraíso nasuntaap jempɨk wɨap iwatyaj jeʼm tɨk, nasuntaptyim jempɨk ñipñiboyyajpa, jempɨk wiʼkkuywatyajpa y jempɨk ikuixyajpa jeʼm ñipñiboʼoyi (Is. 35:1; 65:21). Iga jesɨk iniitypam jaʼyan̈ tiempo wɨap in̈kuyujkaʼ jaʼyan̈ tyidyin̈kej.
12 ¡Tamaymaytyam jesɨk aktsukumyajtawum jempɨk kaʼaneyajum! (Hech. 24:15). Majnam tañixpɨkpa Jehová y ityumpɨy jempɨk jeʼ iwatneʼ (Sal. 104:24; Is. 11:9). Jempɨk maaj tamaymaywattaʼmpa jeʼ iga wɨap tan̈kuyooxataʼm Jehová y dyam tan̈yaʼktaʼmpa iga tammalwatnetaʼm. Ni keman tampatstogoytyamtoʼoba yɨʼp wɨbɨk kumaykedoʼoyi numaaj iga tan̈wattoʼoba «juuts iwɨ̱an̈ja̱myaj jém malopɨc pɨxiñt́am» (Heb. 11:25). Jeʼm ityi iga tampɨktson̈taʼmpa en jeʼm Paraíso maaj wɨɨ que jeʼm tun̈gak tyidyin̈kej iga ity yɨʼp naxyukmɨ. Nuʼkpa jaama iga en jeʼm Paraíso dyam numaaj tanan̈joʼktaʼmpa, jemum taitytyaʼmpa juchixkej. Jehová wɨap iwat yɨʼɨmpɨk iga tsaam tatoytyaʼmpa, jeʼyukmɨ iaʼmchiʼ iga jeʼm iMaanɨk kaʼiñ por taɨchtyam.
¿Juʼp kumaykedoʼoyi iñaʼmtoʼoba en jeʼm Paraíso? (Aʼmɨ jeʼm párrafos 11 y 12).
TANAKWIÑKEJAYTYAʼMIÑ JEHOVÁ IGA TANTSOOWAIXTYAʼMPA JEʼM KƗAKPUDOʼOYI
13. ¿Juutypɨk wɨap tanakwiñkejtaʼm iga tantsoowaixtyaʼmpa jeʼm xaaja iga Jehová tachiʼiñetaʼm? (2 Corintios 6:1).
13 ¿Juutypɨk wɨap tanakwiñkejaytyaʼm Jehová iga tantsoowaixtyaʼmpa jeʼm kɨakpudoʼoyi? Jesɨk maaj tanteguedataʼmpa iga tan̈kuyooxataʼmpa Jehová (Mat. 6:33). Jesús kaʼ y aktsukumseetta iga jempɨk imalwatyajpa odom iwatyajiñ juʼuts jeʼeyaj ixunyajpa, iwatyajiñ juʼuts ixunba Cristo (2 Cor. 5:15). Ni keman tampatstogoytyamtyoʼoba yɨʼp xaaja iga Jehová tachiʼiñetaʼm (maayɨʼ 2 Corintios 6:1).
14. ¿Juutypɨk wɨap tantsoowaixtyaʼm jeʼm Jehová ityoyoʼoyi jesɨk tampɨktaʼmpa tanjɨɨxi?
14 Wɨaptyim tanakwiñkejtaʼm iga tantsoowaixtyaʼmpa jeʼm Jehová ityoyoʼoyi jesɨk tanakwiñkejtaʼmpa fe y tan̈kupɨktaʼmpa jeʼm jɨɨxian̈chioʼoyi iga tachiʼityaʼmpa. ¿Juutypɨk wɨap tan̈wattaʼm? Jesɨk tampɨktaʼmpa tanjɨɨxi: juʼtsan̈ takuyujtaʼmpa o juʼutspɨk yooxakuy tampɨktson̈taʼmpa. Jesɨk tampɨktaʼmpa tanjɨɨxi juchixkej tanjɨɨskupaknetaʼmiñ tyi ijɨɨspa Jehová (1 Cor. 10:31; 2 Cor. 5:7). Jesɨk tanakwiñkejtaʼmpa fe kun jempɨk tan̈wattaʼmpa, tanaʼmtaʼmpa jaʼyan̈ kumaykedoʼoyiyaj. Jeʼm tanfe y jeʼm tan̈wɨnanɨgoʼoyi kun Jehová majtyim mɨjaap, y jeʼm tanan̈jogoʼoyiʼ tampɨɨmchiʼityaʼmpa (Rom. 5:3-5; Sant. 2:21, 22).
15. ¿Juutypɨk wɨap tanakwiñkejtaʼm iga tantsoowaixtyaʼmpa jeʼm Jesús ikaʼiʼ jesɨk wattaap jeʼm Jɨɨskimoʼoyi?
15 Wɨaptyim tanakwiñkejtaʼm iga tantsoowaixtyaʼmpa jeʼm kɨakpudoʼoyi y jeʼm Jehová ityoyoʼoyi jesɨk taputtaʼmpa jeʼm an̈matkuy iga jɨɨsaytyaap jeʼm Jesús ikaʼiʼ. Taitytyaʼmpatyim jeem y wɨaptyim tantɨʼpyaj tun̈gakyaj (1 Tim. 2:4). Tanan̈madayyajiñ tyiʼiga tsaam wɨɨ iga tanteguedataʼmiñ jeʼm najɨʼyoʼoyi. Wɨaptyim tanan̈kejayyaj jeʼm videos itywɨʼɨp en jw.org ¿Tyiʼiga kaʼ Jesús? y Tanjɨɨsaytyaʼmiñ jeʼm Jesús ikaʼiʼ. Jeʼm ancianojyaj ityɨʼpyajpa jempɨk pekam ichagan̈putneyaj Jehová. In̈kujɨɨspa juʼtspɨy maymayayajpa jempɨk ityyaj sɨn̈yukmɨ y jempɨk ityyajpa Naxyukmɨ iga weeñi jempɨk ijagan̈tsakneyaj Jehová eybɨk ikuseetyajpa (Luc. 15:4-7). Jesɨk tanjɨɨsaytyaʼmpa jeʼm Jesús ikaʼiʼ dyaʼ numaaj tanawɨpɨktson̈tamtaiñ, tan̈wɨpɨktson̈yajiñtyim jempɨk yaguiñ mojneʼ nɨkiyaj y jempɨk pekam dyam oyba nɨkiyaj. ¡Tan̈wattaʼmiñ iga ijaamyajiñ iga toyyajtaap! (Rom. 12:13).
16. ¿Tyiʼiga jesɨk wattaap jeʼm Jɨɨskimoʼoyi majnam tan̈kuyooxaiñ Jehová?
16 Jesɨk wattaap jeʼm Jɨɨskimoʼoyi majnam wɨap tan̈kuyooxa Jehová. Yɨʼɨmpɨgam wɨap tanakwiñkejay juʼtspɨy tantsoowaixpa jempɨk jeʼ y Jesús iwatneyaj por taɨchtyam. Jesɨk maaj taputtaʼmpa jeʼm an̈matkuyjom maaj tanaʼmtaʼmpa juʼtspɨy Jehová tayooxpaʼttaʼmpa y yɨʼp iwatpa iga majnam tanaidyaytyaʼmiñ confianza (1 Cor. 3:9). Jeʼm semana iga wattaap jeʼm Jɨɨskimoʼoyi tammaytyaʼmiñ jeʼm textos ityyajwɨʼɨp en jeʼm folleto Examinemos las Escrituras todos los días y jeʼm recuadro itywɨʼɨp en jeʼm Totjaayi tan̈kuyujkapaʼap jeʼm an̈tuʼumaajijom. Wɨaptyim tampɨk yɨʼpyaj textos jesɨk tawɨkuyujpa tanyaʼak.
17. ¿Tyi jempɨk imaymaywatpa Jehová? (Aʼmɨtyim jeʼm recuadro « Juutypɨk wɨap inikwiñkej iga iñchoowaixpa jeʼm Jehová ityoyoʼoyi»).
17 ¿Tyi naspa siiga dyaʼ wɨap inikkupak ityumpɨy jempɨk tan̈kɨʼpin̈netaʼm yɨʼp kuyujijom? Odoy an̈yaʼakɨ. Jɨɨsɨ iga Jehová dyaʼ ikukiʼpspa jempɨk mich in̈watpa kun jempɨk tun̈gak iwatyajpa. Jeʼ iaʼmpa jempɨk iniity iñanmajom y tsaam maymay iga mich iñchoowaixpa jeʼm kɨakpudoʼoyi iga jeʼ tuum xaaja michiʼiñewɨʼɨp (1 Sam. 16:7; Mar. 12:41-44).
18. ¿Tyiʼiga tantsoowaixtyaʼmpa jempɨk Jehová y Jesús iwatneyaj?
18 Iga Jehová takɨakputnetaʼm wɨap tawadaytyaʼm perdón jeʼm tantan̈kaʼ, tanamigojatam y tampɨktson̈taʼm tuum ityi dyapɨk kuyajpa. Juchixkej tanakwiñkejtaʼmiñ iga tantsoowaixtyaʼmpa jeʼm Jehová ityoyoʼoyi, jeʼyukmɨ tachiʼityaʼm jaʼyan̈ kumaykedoʼoyiyaj (1 Juan 4:19). Y tantsoowaixtyamiñtyim iga Jesús tatoytyaʼmpa y ikɨan̈kot iityi por taɨchtyam (Juan 15:13).
WAAÑI 154 Dios nos enseñó a amar
