1. ¿Tyiʼiga Jehová iwat iga jeʼm pɨɨxiñ y jeʼm yoomoʼ an̈koʼmɨyyajiñ?

 JEHOVÁ tsaam maymay y ixunbatyim iga tamaymayataʼmiñ (1 Tim. 1:11). Tachiʼiñetaʼm jaʼyan̈ xaajayaj iga wɨaiñ tammaymayataʼm (Sant. 1:17). Jeʼyukmɨ ichiʼiñeʼ jeʼm pɨɨxiñ y jeʼm yoomoʼ jeʼm xaaja iga an̈koʼmɨyyajiñ. Jeempɨgam wɨap inikwiñkejayyajta toyoʼoyi, respeto y nakuixyajtaptyim. Jesɨk nawɨnanɨgayyajtaap tsaam maymayayajpa (Prov. 5:18).

 2. ¿Tyi iñaskayajpa weeñiyaj jempɨk an̈koʼmɨyñeyajum?

² Sɨɨ jaʼyan̈ jempɨk an̈koʼmɨyñeyajum dyam ikkupakyajpa jempɨk ijɨykamneyaj, jeʼyukmɨ dyam maymayyaj. Jeʼm Organización Mundial de la Salud in̈matpa iga jaʼyan̈ pɨxiñtyam ikoʼtsyajpa jeʼm iyoomoʼ, imalmalnɨʼmayyajpa y iyaʼachwatyajpa. Jesɨk ityyajpa juuty ityñɨɨm wɨapsɨ iga ikwiñkejayyajpa toyoʼoyi, pero jesɨk ityyajum ikutyum iyaʼachwatyajpa. Y jaʼyan̈ yomtam yaʼachayajpa jesɨk jeʼm iwɨdyaaya iaʼmyajpa pornografía.

 3. ¿Tyiʼiga weeñiyaj iyaʼachwatyajpa iyoomoʼ?

³ ¿Tyiʼiga weeñiyaj iyaʼachwatyajpa iyoomoʼ? Wɨapsɨ iga jesɨk xutyuyajnam idyɨk jeempɨgam akmɨjayajta, iga jeʼm ijaatun̈ jaʼy ikoʼtsay jeʼm iaapa. Tun̈gakyaj an̈kejayñeyajta iga jeempɨgam ikwiñkejyajpa iapaʼap iniity jeʼm teguedɨʼɨyi ityɨkkɨʼɨm y wɨapsɨ iga dyatyim an̈kejayyajta tyi iwatyajiñ jesɨk joyyajpa. Weeñiyaj jempɨk iaʼmyajpa pornografía iniityyaj tuum malojpɨk jɨɨxi de jeʼm sexo. Jaʼyan̈yaj nɨmyajpa iga dende jesɨk tsukum  jeʼm COVID-19 jeʼm pɨxiñtyam majtyim iyaʼachwatyajpa jeʼm iyoomoʼ. Pero jeʼm pɨɨxiñ dyaʼ wɨɨ iga iwadyiñ jeempɨk.

 4. ¿Tyiʼiga jeʼm cristiano yoomɨyñewɨʼbam nasuntaap iga nakuixtyaiñ?

⁴ Tuum cristiano wɨɨ iga odoy iniidyiñ jeʼm jɨɨxi itywɨʼɨp yɨʼp naxyukmɨ. a ¿Tyiʼiga? Watykɨy jempɨk tanjɨɨspa maaj okmɨ tan̈watpa. Tanjɨɨstaʼmiñ jempɨk nas jeʼm kumun itywɨʼɨp Roma, maaj okmɨ iga tsɨʼyñeum idyɨk juʼuts kumun, Pablo iñɨʼmay jeʼm kupin̈neyajtawɨʼɨp: «Odoy jɨ̱staamɨ juuts jém malopɨc pɨxiñt́am» (Rom. 12:​1, 2). Yɨʼpyaj an̈matyiyaj tan̈kejaytyaʼmpa iga waatyiyaj sɨʼbam idyɨk ijɨɨsyaj y iwatyaj juʼuts tun̈gakyaj. Jeʼyukmɨ Pablo iñɨʼmay iga ikukakyajiñ ijɨɨxi y iwɨwatyajiñ. Yɨʼp jaama iyooxpaʼtyajpatyim yɨʼp an̈kiʼmayoʼoyi jempɨk an̈koʼmɨyñeyajum. Pero weeñi cristianojyaj iniityyajum yɨkxpɨk jɨɨxi y iwatyajpa juʼuts jempɨk ityyaj yɨʼp naxyukmɨ, jeʼyukmɨ iyaʼachwatyajpa jeʼm iyoomoʼ. b ¿Juutypɨk ixunba Jehová iga jeʼm pɨɨxiñ iwɨdyaiñ iyoomoʼ? Tan̈kutson̈taʼmpa yɨʼp akwagoʼoyi kun jeʼm texto juuty topneta yɨʼp kuyuuji.

 5. Juʼuts nɨmpa 1 Pedro 3:​7, ¿tyi iñɨʼmaʼyba Jehová iga iwatyajiñ jempɨk yoomɨyñeyajum?

⁵ (Maayɨʼ 1 Pedro 3:7). Jehová iñɨʼmaʼyba jeʼm pɨxiñtyam yoomɨyñeyajwɨʼbam iga iwɨdyayajiñ jeʼm iyoomoʼ. Jeʼyukmɨ iwɨjɨʼyayyajiñ, ikwiñkejayyajiñ toyoʼoyi y iwatyajiñ tyityam nasuntaap iga ikuixyajiñ. Yɨʼp kuyujijom tan̈kɨʼpin̈taʼmpa juutypɨk jempɨk yoomɨyñeyajum wɨap iwɨdyayaj iyoomoʼ. Wiñtyi tan̈kɨʼpin̈taʼmpa tyityam wɨap iyaʼachwatyaj.

ODOY WAATƗ JEMPƗK IMALWADAʼYBA IÑYOOMOʼ

 6. ¿Juʼuts iaʼm Jehová jempɨk ikoʼtsyajpa jeʼm iyoomoʼ? (Colosenses 3:19).

⁶ Odoy koʼotsɨʼ jeʼm iñyoomoʼ. Jehová ijooyixpa jempɨk imalwadayyajpa tun̈gakyaj (Sal. 11:5). Y maaj jempɨk ikoʼtsyajpa jeʼm iyoomoʼ (Mal. 2:16; maayɨʼ Colosenses 3:19). 1 Pedro 3:7 in̈matpa iga jempɨk ikoʼtspa iyoomoʼ imalwadaʼyba jeʼm iwɨnanɨgoʼoyi kun Jehová y dyam kumaton̈aytyaap jeʼm ian̈wejpadoʼoyi.

 7. Juʼuts nɨmpa Efesios 4:​31, 32, ¿juutypɨk jeʼm pɨɨxiñ ijɨʼyayyajiñ jeʼm iyoomoʼ?

⁷ Odoy wogaʼayɨ y odoy malnɨʼmaʼayɨ jeʼm iñyoomoʼ. Weeñiyaj pɨɨmi ichotyjɨʼyayyajpa jeʼm iyoomoʼ y iñɨʼmayyajpa an̈matyiyaj iga wɨap imalwadayyaj. Jehová ijooyixpa jempɨk jɨyba kun jooya, jempɨk imalwadaʼyba y imalnɨʼmaʼyba c tun̈gakyaj juʼuts nɨmpa Efesios 4:​31, 32 (maayɨʼ). Jeʼ ikumaton̈ba juutypɨk jeʼm pɨɨxiñ ijɨʼyayyajpa jeʼm iyoomoʼ mex iga ityyaj ikutyum. Jesɨk dyaʼ iwɨdyaap jeʼm iyoomoʼ dyaʼ numaaj imalwadaʼyba jeʼm ian̈komɨʼɨyi, imalwadaybatyim jeʼm iwɨnanɨgoʼoyi kun Jehová (Sant. 1:26).

 8. ¿Juʼuts iaʼm Jehová jeʼm pornografía, y tyiʼiga?

⁸ Odoy aʼmɨ pornografía. ¿Juʼuts iaʼm Jehová jeʼm pornografía? Jeʼ ijooyixpa.  Tuum pɨɨxiñ iaʼmpaʼap pornografía imalwadaʼyba jeʼm iwɨnanɨgoʼoyi kun Jehová y imalwadaybatyim jeʼm iyoomoʼ. d Jehová in̈joʼkpa iga jempɨk yoomɨyñeyajum odoy ipejyajiñ jeʼm iyoomoʼ ni kun jeʼm ijɨɨxi. Jesús nɨm iga siiga tuum pɨɨxiñ iaʼmpa tuum yoomoʼ kun tuum malojpɨk jɨɨxi pejoyñeum ianmajom (Mat. 5:​28, 29). e

 9. ¿Tyiʼiga Jehová ijooyixpa iga tuum cristiano ityeguedɨʼyiñ iyoomoʼ iga iniidyiñ sexo juutypɨgam jeʼ ixunba y ichɨktsaawatpa?

⁹ Odoy waatɨ tyityam wɨap ichɨktsaawat iñyoomoʼ jesɨk iniitypa sexo. Weeñiyaj ityeguedɨyyajpa jeʼm iyoomoʼ iga iniityyajiñ sexo juutypɨgam jeʼeyaj ixunyajpa y yɨʼp iwatpa iga jeʼm iyoomoʼ ijaamiñ iga dyatyi kumeskuy y dyaʼ toytyaap. Jehová ijooyixpa iga jempɨk yoomɨyñeyajum iniityyajiñ yɨkxpɨk jɨɨxi. Jeʼ ixunba iga ityoyyajiñ jeʼm iyoomoʼ, iwɨdyayajiñ y ikwiñkejayyajiñ respeto (Efes. 5:​28, 29). Pero siiga jeʼ tuum cristiano jempɨk sɨʼ iwat jeempɨk, ¿tyi wɨap iyooxpaʼt iga ikaguiñ ijɨɨxi y iwɨwadyiñ?

TYI IYOOXPAʼTPA JEMPƗK YOOMƗYÑEYAJUM IGA IKAKYAJIÑ IJƗƗXI

10. ¿Juutypɨk jempɨk yoomɨyñeyajum wɨap iwatyaj juʼuts Jesús?

¹⁰ Siiga tuum cristiano ikaktoʼoba ijɨɨxi nasuntaap iga iwadyiñ juʼuts Jesús. Yɨʼp iyooxpaʼtpa iga odoy imalwadaʼyiñ iyoomoʼ. Mex iga Jesús dyaʼ keman yoomɨy, jeʼ iwɨkuix y iwɨjɨʼyay jeʼm idiscípulos (Efes. 5:25). Tan̈kɨʼpin̈taʼmiñ juutypɨk wɨap iyooxpaʼtyaj jempɨk yoomɨyñeyajum jeʼm Jesús iakwiñkejoʼoyi y juutypɨk jeʼ ijɨʼyay y iwɨwaday jeʼm iapóstolyaj.

11. ¿Tyi iwat Jesús kun jeʼm iapóstolyaj?

¹¹ Jesús juchixkej ikwiñkejay toyoʼoyi jeʼm iapóstolyaj y dyaʼ ichɨktsaawat. Dyaʼ ichotyjɨʼyay y dyaʼ nakujiʼpta mex iga jeʼam idyɨk jeʼm iOmi, ni keman ikwiñkej iga jeʼam jempɨk maaj iniity teguedɨʼɨyi (Juan 13:​12-17). Jeʼyukmɨ iñɨʼmay jeʼm idiscípulos: «Cuyujcataamɨ ɨch anaŋquímayooyi porque je d́a taŋca. Ɨch d́a malo [ananmaj]. Manyo̱xpátpa. Impáttámpa ju̱t́ wɨa̱p ijej jém [iñanmaj]» (Mat. 11:​28-30). Jesɨk algun i dyaʼ malo wɨap inin̈jakta y dyaʼ jobity joʼyba.

12. ¿Juutypɨk Jesús ijɨʼyaʼyba idyɨk tun̈gakyaj?

¹² Jesús iwɨwaday y ianmajan̈chiʼ tun̈gakyaj kun tyityam nɨm. Ni keman ichotyjɨʼyay jeʼm idiscípulos (Luc. 8:​47, 48). Jesɨk jeʼm ienemigojyaj sɨʼ idyɨk ikujɨyyaj y iyaʼachwatyaj jeʼ dyaʼ ikɨan̈seeday (1 Ped. 2:​21-23; Mat. 27:​12-14). ¡Ichaʼgay tuum wɨbɨk an̈kejayoʼoyi jempɨk an̈koʼmɨyñeyajum!

13. ¿Juutypɨk jeʼm pɨɨxiñ ikwiñkejpa iga juchixkej iwaganaitytyoʼoba jeʼm iyoomoʼ? (Mateo 19:​4-6; aʼmɨtyim jeʼm imagen).

¹³ Jesús iñɨʼmay jempɨk yoomɨyñeyajum iga odoy ipejyajiñ jeʼm iyoomoʼ. Nɨm jeʼm an̈matyiyaj nɨmnewɨʼɨp iJaatun̈ iga tuum pɨɨxiñ iwaganaitypa jeʼm iyoomoʼ (maayɨʼ Mateo 19:​4-6). Jeʼm an̈maatyi iwaganaitypa nɨmtoʼoba iga  keʼnam jesɨk algun tyi tsajkunuʼkneta y dyaʼ i wɨap ikuneksay. Jeempɨgam ityyaj jesɨk tuum pɨɨxiñ y tuum yoomoʼ an̈koʼmɨyñeyaj, siiga tuum de jeʼeyaj imalwatpa ikwɨstɨkyaj yaʼachayajpa. Jeʼyukmɨ siiga jeʼm pɨɨxiñ ityoyba jeʼm iyoomoʼ dyaʼ iaʼmpa jeʼm pornografía. Dyaʼ iaʼman̈tayaap jempɨk dya wɨɨ (Sal. 119:37). Yɨʼp nɨmtoʼoba iga dyaʼ iaʼman̈tayaap tun̈gak yoomoʼ kun tuum malojpɨk jɨɨxi (Job 31:1).

14. ¿Tyi iwadyiñ jeʼm cristiano iga iwɨtsaguiñ jeʼm iwɨnanɨgoʼoyi kun Jehová y jeʼm iyoomoʼ?

¹⁴ Jeʼm pɨɨxiñ ikoʼtspaʼap iyoomoʼ y imalnɨʼmaʼyba nasuntaap iga iwɨtsaguiñ jeʼm iwɨnanɨgoʼoyi kun Jehová y kun jeʼm iyoomoʼ. ¿Tyityam wɨɨ iga iwadyiñ? Uno, ikutɨʼɨyɨʼyiñ iga nunta jɨɨxtyogoyñeʼ. Jehová iaʼmpa ityumpɨy jempɨk sɨʼ iwat (Sal. 44:21; Ecl. 12:14; Heb. 4:13). Dos, ichaguiñ iga ikoʼtspa y imalnɨʼmaʼyba iyoomoʼ y ikaguiñ jeʼm ijɨɨxi. (Prov. 28:13). Tres, iwaʼgaʼyiñ perdón a Jehová y jeʼm iyoomoʼ. (Hech. 3:19). Iwaʼgaʼyiñ Jehová iga iyooxpaʼdyiñ in̈jak jempɨk ijɨɨspa, jempɨk nɨmpa y jempɨk iwatpa y iyooxpaʼdyiñtyim iga wɨaiñ iwat jeʼm kukaki (Sal. 51:​10-12; 2 Cor. 10:5; Filip. 2:13). Cuatro, iwadyiñ juutypɨgam iwaʼgayñeʼ Jehová, ijooyixiñ jeʼm an̈maatyi dyapɨk wɨtam y ijooyixiñtyim iga koʼtsoʼyba (Sal. 97:10). Cinco, jobitytyi ikuaʼmayiñ jeʼm ancianojyaj iyooxpadoʼoyi y jeʼeyaj iyooxpaʼtyajpa kun toyoʼoyi (Sant. 5:​14-16). Seis, ijɨɨskupaguiñ tyityam wɨap iwat iga odom eybɨk imalwadyiñ. Jeʼm pɨɨxiñ yoomɨyñewɨʼbam siiga iaʼmpa pornografía iwadyiñ juʼuts nɨmpa yɨʼpyaj jɨɨxian̈chioʼoyi. Jehová ikumayketpa jesɨk ityeguedayajpa iga ikakyajpa ijɨɨxi (Sal. 37:5). Pero dyaʼ numaaj nasuntaap iga tuum cristiano ijooyixiñ jempɨk dyaʼ wɨɨ; nasuntaptyim iga iwɨdyaiñ jeʼm iyoomoʼ. Tanaʼmtaʼmiñ juutypɨk wɨap iwat.

 AKWIÑKEJAAYƗ TOYOʼOYI Y RESPETO IÑYOOMOʼ

15. ¿Juutypɨk jeʼm pɨɨxiñ wɨap ikwiñkej iga ityoyba iyoomoʼ?

¹⁵ Akwiñkejaayɨ toyoʼoyi. Weeñiyaj iga an̈koʼmɨyñeyajum maymayyaj iga juchixkej nakwiñkejayyajtaap juʼtspɨy natoyyajtaap (1 Juan 3:18). Tuum cristiano yoomɨyñewɨʼbam wɨap iwat yɨʼɨmpɨk jesɨk imatsaʼyba ikɨʼ y iñuuspa iyoomoʼ. Wɨaptyim ikutsaday mensaje iga iñɨʼmaʼyba «Mantoyba» o «¿Tyi sɨʼ in̈wat?». Y wɨaptyim ijaʼyay tuum carta. Jesɨk iwatpa yɨʼɨmpɨk ikwiñkejaʼyba iyoomoʼ iga ityoyba y maaj iwɨnɨgayyajpa jeʼm ian̈koʼmɨyoʼoyijom.

16. ¿Tyiʼiga jeʼm pɨɨxiñ ikujiʼbiñ iyoomoʼ?

¹⁶ Nɨʼmaʼayɨ juʼtspɨy iñchoowaixpa. Jeʼm pɨɨxiñ iwɨdyaap iyoomoʼ jesɨk juchixkej iñɨʼmaʼyba juʼtspɨy ichoowaixpa jempɨk iwatpa (Col. 3:15). Jesɨk jeʼm pɨɨxiñ ikujiʼppa iyoomoʼ iga tsaam iyooxpaʼtpa, jeʼ ijaampa iga toytyaap y wɨdyaneta (Prov. 31:28).

17. ¿Juutypɨk jeʼm pɨɨxiñ ikwiñkejaʼyba respeto jeʼm iyoomoʼ?

¹⁷ Yaʼachan̈jaamɨ y naidyaʼayɨ respeto. Jeʼm pɨɨxiñ ityoypaʼap iyoomoʼ iaʼmpa juʼuts tuum wɨbɨk xaaja iga Jehová ichiʼiñeʼ (Prov. 18:22; 31:10). Jeʼyukmɨ ichoowaixpa, ikuixpa, iyaʼachan̈jaampa y iniidyaʼyba respeto y maaj jesɨk iniityyajpa sexo. Dyaʼ ityeguedɨʼyba iga iwadyiñ jempɨk dyaʼ ikusuʼnɨʼyba, dyaʼ ichɨktsaawatpa y dyatyim ikwatpa jempɨk wɨap ityuʼdɨyay ijɨɨxi. f Y jeʼm pɨɨxiñ wɨɨ iga ityeguedaiñ iga kuayñeiñtyim ijɨɨxi Jehová iwiñjom (Hech. 24:16).

18. ¿Tyi iwatyajiñ jempɨk yoomɨyñeyajum? (Aʼmɨtyim jeʼm recuadro « Cuatro jɨɨxiyaj iga juutypɨk inikwiñkejaʼyba respeto jeʼm iñyoomoʼ»).

¹⁸ Miyoʼomɨyñetamwɨʼɨp, kupɨktaʼamɨ iga Jehová iaʼmpa y ichoowaixpa iga in̈wɨdyataʼmpa iñyoomoʼ. Jeʼyukmɨ odoy wattaamɨ juʼuts tun̈gakyaj iga imalwadayyajpa iyoomoʼ. Akwiñkejaytyaʼamɨ toyoʼoyi, yaʼachan̈jaamoʼoyi y respeto. Yɨʼɨmpɨgam inikwiñkejaytyaʼmpa iga iñchoowaixtyaʼmpa. Siiga in̈wɨdyataʼmpa iñyoomoʼ sɨʼ in̈kuixtyaʼm jeʼm in̈wɨnanɨgoʼoyi kun Jehová (Sal. 25:14).