KUYUUJI 1
WAAÑI 2 Tu nombre es Jehová
Tan̈kujiʼptaʼmiñ Jehová
TEXTO YƗʼPPƗK AMTYƗY 2025: «Kujibaytyaʼamɨ jeʼm Jehová iñɨɨyi» (SAL. 96:8).
AN̈KEJAYOʼOYI
Juutypɨk tan̈kujiʼbaytyaʼmpa jeʼm Jehová iñɨɨyi.
1. ¿Juʼutspɨk jɨɨxi iniityyaj jaʼyan̈yaj?
YƗʼP jaama jaʼyan̈yaj numaaj nateguedayajtaap iyaʼak. Jeʼyukmɨ ipɨkyajpa jeʼm redes sociales iga ikkiʼmyajpa ityumpɨy jempɨk iwatneyaj iga wɨaiñ ikujiʼpyajta. Pero dyaʼ jaʼyan̈yaj jempɨk ikujiʼpyajpa Jehová. Yɨʼp kuyujijom tan̈kɨʼpin̈taʼmpa tyi nɨmtoʼoba iga tan̈kujiʼptaʼmiñ Jehová y tyiʼiga wɨɨ iga tan̈wattaʼmiñ. Tan̈kɨʼpin̈taʼmpatyim juutypɨk wɨap tan̈kujiʼptaʼm y juutypɨk dyaʼ jaʼyñeʼ jeʼ iwɨkujiʼppa iñɨɨyi.
¿TYI NƗMTOʼOBA IGA TAN̈KUJIʼPPA JEHOVÁ?
2. En jeʼm kootsɨk Sinaí, ¿juutypɨk in̈kej Jehová iga tsaam pɨɨmiɨy? (Aʼmɨtyim jeʼm imagen).
2 Jeʼm Biblia in̈kejpa iga Jehová tsaam pɨɨmiɨy. Jesɨgam Israel kɨakputta de Egipto Jehová in̈kej juʼtspɨy idyɨk pɨɨmiɨy. Tan̈kujɨɨstaʼmiñ iga an̈tuʼumaneyaj jaʼyan̈ israelitas jeʼm kootsɨk Sinaí iwiñjom iga ikumaton̈yajpa jempɨk Dios iñɨʼmayyajpa idyɨk. Tuum mɨjpɨk uʼksɨʼ ikujɨm jeʼm kootsɨk y tsukum tuum mɨjpɨk nasyɨʼɨxi y mojtyim puutyi jookoʼ iganam naksoʼypa ixɨʼ jeʼm majɨywiñ y jeʼm wan̈ pɨɨmi an̈jɨy (Éx. 19:16-18; 24:17; Sal. 68:8). Jesɨgam jeʼm israelitajyaj iaʼmyaj juʼtspɨy pɨɨmiɨy Jehová pɨɨmi aʼman̈jakyaj.
En jeʼm kootsɨk Sinaí Jehová in̈kejay jeʼm israelitajyaj juʼtspɨy idyɨk pɨɨmiɨy (Aʼmɨ jeʼm párrafo 2).
3. ¿Tyi nɨmtoʼoba iga tan̈kujiʼptaʼmiñ Jehová?
3 Taɨchtyam wɨaptyim tan̈kujiʼptaʼm Jehová jesɨk tanan̈madayyajpa tun̈gakyaj juʼuts Jehová y juʼtspɨy pɨɨmiɨy. Wɨaptyim tan̈kujiʼptaʼm jesɨk tanan̈mattaʼmpa juʼtspɨy tayooxpaʼtnetaʼm (Is. 26:12). Tan̈kujɨɨstaʼmiñ David jesɨgam iwat tuum an̈wejpadoʼoyi jeʼm Israel iwiñjom nɨm: «Mich, oh Jehová, tsaam mimɨj, mipɨɨmiɨy, miwɨɨ, michokpa y iniity teguedɨʼɨyi, iga ityumpɨy jempɨk ity sɨn̈yukmɨ y naxyukmɨ mich immɨʼɨchiʼ». Jesɨk yaj in̈wejpaʼt ityumpɨy jeʼm israelitajyaj ikujiʼpyaj Jehová (1 Crón. 29:11, 20).
4. ¿Juutypɨk Jesús ikujiʼp Jehová?
4 Jesɨgam Jesús jaʼy ityi yɨʼp naxyukmɨ ikujiʼp Jehová. Jesɨgam iwatpa idyɨk jeʼm milagros nɨmpa iga Jehová ichiʼ jeʼm ipɨɨmi iga wɨaiñ iwat (Mar. 5:18-20). Ikujiʼppatyim idyɨk jesɨk in̈madaʼyba tun̈gakyaj juʼuts Jehová. Tun̈kɨy jesɨgam ity idyɨk en tuum sinagoga jeem ity idyɨk tuum yoomoʼ iga ininɨkiam 18 amtyɨy iga iniity tuum demonio. Jeʼyukmɨ koʼmneʼ idyɨk ityuʼuñi. Jesɨgam iaʼm Jesús iga yɨʼp yoomoʼ pɨɨmi yaʼachaap ixɨʼ iñɨʼmay: «Miyo̱mo, sɨɨp Dios micpɨspa. Mictsacpa jém caacuy». Ichɨkkunuʼk jeʼm yoomoʼ y jobityi nuumtsɨʼy ityuʼuñi, jeʼyukmɨ moj ikujiʼp Dios (Luc. 13:10-13). Juʼutstyim yɨʼp yoomoʼ taɨchtyam wɨaptyim tan̈kujiʼptaʼm Jehová.
¿TYIʼIGA TAN̈KUJIʼPTAʼMPA JEHOVÁ?
5. ¿Tyiʼiga tanaidyaytyaʼm respeto Jehová?
5 Tan̈kujiʼptaʼmpa Jehová iga tsaam tanaidyaytyaʼm respeto. Jehová tsaam pɨɨmiɨy y ni keman kuyajpa jeʼm ipɨɨmi (Sal. 96:4-7). Kun tyityam iwatneʼ y juutypɨk tachiʼiñeʼ jeʼm tañityi y tachiʼiba tyityam tatogoyay kejpa iga tsaam iniity joodon̈oʼoyi y jeʼ tsaam wɨkɨʼpin̈oʼyba (Apoc. 4:11; 15:4). Juchixkej ikkupakpa jeʼm ijɨykamoʼoyiyaj (Jos. 23:14). Jeʼyukmɨ jeʼm profeta Jeremías nɨm: «Ityumpɨyyaj jempɨk ityyaj yɨʼp naxyukmɨ iniityyaj joodon̈oʼoyi, pero dya i tun̈gak juʼuts mimich» (Jer. 10:6, 7). Jeʼyukmɨ wɨɨ iga juchixkej tan̈kujiʼptaʼmiñ Jehová y tantoytyaʼmiñtyim.
6. ¿Tyiʼiga tantoytyaʼmpa Jehová?
6 Tan̈kujiʼptaʼmpa Jehová iga tsaam tantoytyaʼmpa. Jehová toyoʼyba y yaʼachan̈jamoʼyba jeʼyukmɨ tantoytyaʼmpa (Sal. 103:13; Is. 49:15). Jesɨk tayaʼachataʼmpa ikutɨʼɨyɨʼyba juʼuts tanan̈jaam y yaʼachaptyim (Zac. 2:8). Tayooxpaʼtpatyim tan̈kunuʼk y tanamigoja (Sal. 25:14; Hech. 17:27). Iga dyaʼ nakujiʼptaap «iaʼmpa tyityam naspa ixɨʼ sɨn̈yukmɨ y naxyukmɨ, iyooxpaʼtpa y iwɨkumaton̈ba jempɨk dyatyim nakujiʼptaap» (Sal. 113:6, 7). Jeʼyukmɨ juchixkej tan̈kujiʼptamtoʼoba (Sal. 86:12).
7. ¿Juchix wɨap tan̈kujiʼptaʼm Jehová?
7 Tan̈kujiʼptaʼmpa Jehová jesɨk tanyooxpaʼtyajpa tun̈gakyaj iga iixpɨkyajiñ. Jeʼm Wookkɨʼɨwiñ tsaam ikujɨyñeʼ y weeñiyaj ikupɨkneyaj yɨʼpyaj mɨgoʼoyiyaj (2 Cor. 4:4). Nɨmneʼ iga Jehová juchixkej joʼyba dyaʼ tateguedaap y jeʼam jempɨk tayaʼachwatpa. Jeʼyukmɨ tanan̈kejayyajiñ juʼuts Jehová y jesɨk tan̈watpa jeempɨk sɨʼ tan̈kujiʼptaʼm (Is. 43:10). Tan̈kɨʼpin̈taʼmpa weeñi versículos de jeʼm Salmo 96 juuty tanɨʼɨyɨyaʼyba juutypɨk wɨap tan̈kujiʼp Jehová.
¿JUUTYPƗK TAN̈KUJIʼPTAʼMPA JEHOVÁ?
8. ¿Juutypɨk wɨap tan̈kujiʼptaʼm Jehová? (Sal. 96:1-3).
8 (Maayɨʼ Salmo 96:1-3). a Wɨap tan̈kujiʼptaʼm Jehová kun tyityam tanɨmtaʼmpa. Yɨʼpyaj versículos ityɨʼppa jempɨk ikuyooxayajpa Dios iga iwanayyajiñ Jehová, ikujibayyajiñ jeʼm iñɨɨyi, in̈matyajiñ jeʼm wɨtampɨk an̈matyiyaj y in̈madayyajiñ tun̈gakyaj juʼtspɨy pɨɨmiɨy. Jesɨk tan̈watpa yɨʼɨmpɨk sɨʼ tan̈kujiʼptaʼm tanJaatun̈ sɨn̈yukmɨpɨk. Jeʼm israelitajyaj y jeʼm judíoyaj jaʼywɨʼɨp ityiyaj en jeʼm wiñtyipɨk siglo juchixkej ikupujyaj jeʼm Jehová iñɨɨyi y in̈madayyaj tun̈gakyaj jempɨk jeʼ iwatneʼ idyɨk (Dan. 3:16-18; Hech. 4:29). ¿Tyi wɨap tan̈wattaʼm taɨchtyam?
9, 10. ¿Tyi min̈kejaʼyba jempɨk iwat Angelina? (Aʼmɨtyim jeʼm imagen).
9 Tanaʼmiñ jempɨk iwat tuum yoomtɨwɨ iñɨɨyipɨk Angelina. b Jeʼ dyaʼ kɨɨn̈ y ikupujay jeʼm Jehová iñɨɨyi juuty yooxaap. Yaguiñ idyɨk mojneʼ yooxaaji, jeʼyukmɨ tɨʼpyajta jempɨk yaguiñ mojneʼ yooxaajiyaj iga in̈matyajiñ juʼuts iityiyaj. Jeʼ iwɨtsak weeñi fotografías iga in̈kejpa idyɨk juʼtspɨy maymay iga sɨʼ ikuyooxa Jehová. Pero wiñtyi iga in̈matpa, tuum jeʼm iwaganayooxapaʼap moj in̈mat iga jeʼ akmɨjata juʼuts Jehová itestigo y moj ikujɨy jempɨk tan̈kupɨktaʼmpa. Angelina nɨmpa: «Anjaam keʼnam iga putpa jeʼm ananmaj». Okmɨ anakwaʼkta: «¿Anaʼmchiʼiba iga ikujɨʼyiñ Jehová o an̈kupujpa?».
10 Jesɨk yajum jɨɨyi jeʼm pɨɨxiñ, Angelina iwat tuum an̈wejpadoʼoyi. Iwɨjɨʼyay y nɨm: «Ɨch jeempɨktyim akmɨjata y seguido an̈kuyooxaneʼ Jehová». Mex iga tan̈kaʼ idyɨk jeʼ wɨjɨy. Moj in̈kej weeñi fotos iga juutytyam idyɨk oyñeʼ y ikupuj jempɨk ikupɨkpa (1 Ped. 3:15). Jesɨk yaj jɨɨyi, jeʼm pɨɨxiñ nɨm iga ijɨɨspanam jesɨk akmɨjata juʼuts Jehová itestigo. Angelina nɨmpa: «¡Tuum wɨbɨk xaaja iga wɨap tan̈kupujaytyaʼm jeʼm Jehová iñɨɨyi!». Taɨchtyam jeempɨktyim tan̈wattaʼmiñ, tan̈kupujaytyaʼmiñ y tan̈kujibaytyaʼmiñ jeʼm Jehová iñɨɨyi y maaj jesɨk tun̈gakyaj ikujɨyyajpa.
Wɨap tan̈kujiʼptaʼm Jehová kun tyityam tanɨmpa (Aʼmɨ jeʼm párrafos 9 y 10). f
11. ¿Juutypɨk tan̈kupɨktaʼmpa jeʼm an̈kiʼmayoʼoyi itywɨʼɨp en jeʼm Salmo 96:8?
11 (Maayɨʼ Salmo 96:8). c Wɨap tan̈kujiʼptaʼm Jehová kun tyityam tanaity. Jempɨk tan̈kuyooxataʼmpa Jehová juchixkej tan̈kujiʼpnetaʼm yɨʼɨmpɨk (Prov. 3:9). Tan̈kujɨɨstaʼmiñ jeʼm israelitas iga chioyyaj tyityam iniityyaj idyɨk iga wɨaiñ iwatta jeʼm templo (2 Rey. 12:4, 5; 1 Crón. 29:3-9). Weeñiyaj jempɨk ityun̈ɨyyaj Cristo iyooxpaʼtyajtyim Jesús y jeʼm iapóstolyaj kun tyityam iniityyaj idyɨk (Luc. 8:1-3). En jeʼm wiñtyipɨk siglo jeʼm tɨwɨtam iyooxpaʼtyajtyim ityɨwɨtam kun tyityam iniityyaj idyɨk (Hech. 11:27-29). Sɨɨ taɨchtyam wɨaptyim tan̈kujiʼptaʼm Jehová jesɨk tachioytyaʼmpa jeʼm donaciones y tyityam tanaitytyaʼm.
12. ¿Juutypɨk tan̈kujiʼptaʼmpa Jehová kun jeʼm tandonaciones? (Aʼmɨtyim jeʼm imagen).
12 Tanaʼmtaʼmiñ juutypɨk tan̈kujiʼptaʼmpa Jehová kun jeʼm tandonaciones. Jeʼm amtyɨy 2020 iga piijchɨʼy jaama en Zimbabue, jaʼyan̈yaj wɨap idyɨk iyuʼukayaj. Jeempɨktyim idyɨk wɨap iñaskaʼ jeʼm yoomtɨwɨ Prisca. Mex iga tan̈kaʼ idyɨk jeʼm iityi juchixkej put jeʼm an̈matkuyjom tumtum miércoles y viernes, dyatyi ijoo siiga nasuntaap idyɨk iga nɨguiñ ijɨɨt iñas. Jeʼm ivecinos ikuxikkayajpa idyɨk iga putpa jeʼm an̈matkuyjom y dyaʼ nɨkpa yooxaaji ikamjom. Nɨʼmaytyaap idyɨk: «¡Miyuʼukaʼaba!». Pero jeʼ ikutson̈: «Jehová dyaʼ ichakpa ikutyum jempɨk ikuyooxayajpa». Ikuyukmɨ jeʼm donaciones jeʼm organización wɨa mu ikutsaday tyityam ityogoyay idyɨk. Jesɨk jeʼm ivecinos iaʼmyaj jempɨk nanɨgaytya tsaam aʼman̈jakyaj y nɨmyaj: «Dios dyaʼ michakneʼ in̈kutyum. Añixpɨktamtoʼobatyim». Y sietejyaj moj nɨkiyaj jeʼm an̈tuʼumaajijom.
Wɨap tan̈kujiʼptaʼm Jehová kun tyityam tanaity (Aʼmɨ jeʼm párrafo 12). g
13. ¿Juutypɨk wɨap tan̈kujiʼptaʼm Jehová kun tyityam tan̈watpa? (Salmo 96:9).
13 (Maayɨʼ Salmo 96:9). d Wɨap tan̈kujiʼptaʼm Jehová kun tyityam tan̈watpa. Pekaʼ jeʼm panijyaj nakutseʼayyajtaap idyɨk wiñtyi iga kuyooxaoyyajiñ en jeʼm templo (Éx. 40:30-32). Taɨchtyam takuaʼyñetaʼmiñtyim físicamente, pero maaj tanteguedaiñ tan̈wat jempɨk Dios ikusuʼnɨʼyba (Sal. 24:3, 4; 1 Ped. 1:15, 16). Tanteguedaiñ tantsak jeʼm «wiñɨcpɨc jɨ̱xi» y tampɨktson̈iñ jeʼm «jo̱mipɨc jɨ̱xi». Yɨʼp nɨmtoʼoba iga odom maaj tammalwadyiñ, tanjɨɨxiñ y tan̈wadyiñ jempɨk Jehová ikusuʼnɨʼyba (Col. 3:9, 10). Kun jeʼm iyooxpadoʼoyi tun̈gakyaj wɨaptyim ikakyaj iityi y ijɨɨxi, mex iga tsaam imalwatneyaj.
14. ¿Tyi min̈kejaʼyba jempɨk iñaskaʼ Jack? (Aʼmɨtyim jeʼm imagen).
14 Tan̈kɨʼpin̈taʼmiñ jempɨk iñaskaʼ Jack, tuum pɨɨxiñ iga tsaam idyɨk malo y nɨʼmaytyaap idyɨk Demonio. Jesɨk pajta nɨʼmaytya iga akkaʼataap idyɨk. Iganam sɨʼ idyɨk in̈joʼk juchix akkaʼataap moj ikuyujkaʼ jeʼm Biblia. Mex iga Jack tsaam idyɨk imalwatneʼ, jeʼ ikak ijɨɨxi y okmɨ chin̈. Tsaam pɨɨmi ikak iityi, jeʼyukmɨ jesɨk akkaʼata weeñi jempɨk ikuixyajpa jempɨk pajneyajta moj weejiyaj. Tuum sargento nɨm: «Wiñtyi Jack tsaam idyɨk imalwatpa. Pero sɨɨ iwɨwatpam idyɨk». Tuum semana okmɨ jesɨk jeʼm tɨwɨtam eybɨk iknasyaj jeʼm an̈tuʼumaajiyaj iaʼmyaj iga tuum jempɨk pajneta jeem nɨknetyim jeʼm an̈tuʼumaaji. ¿Tyiʼiga? Iga iaʼm iga Jack ikukak iityi, jeʼyukmɨ ipɨk ijɨɨxi iga jeʼ ikukaktoʼobatyim idyɨk iityi y ikoosteñaytyoʼobatyim idyɨk Jehová. Tanaʼmnetaʼm iga kun tyityam tan̈wattaʼmpa wɨap tan̈kujiʼptaʼm tanJaatun̈ sɨn̈yukmɨpɨk (1 Ped. 2:12).
Wɨap tan̈kujiʼptaʼm Jehová kun tyityam tan̈watpa (Aʼmɨ jeʼm párrafo 14). h
¿JUUTYPƗK JEHOVÁ DYAʼ JAʼYÑEʼ IKUJIʼPPA IÑƗƗYI?
15. ¿Tyi iwatpa Jehová dyaʼ jaʼyñeʼ iga ikkuaʼyba iñɨɨyi? (Salmo 96:10-13).
15 (Maayɨʼ Salmo 96:10-13). e Jeʼm Salmo 96 in̈matpa iga Jehová juʼuts An̈jagoʼoyi wɨkɨʼpin̈oʼyba. ¿Juutypɨk Jehová dyaʼ jaʼyñeʼ ikujiʼppa iñɨɨyi? Jesɨk wɨkɨʼpin̈oʼyba y dyaʼ jaʼyñeʼ iktogoyba jeʼm Mɨjpɨk Babilonia iga tsaam ityuʼdɨʼɨyayñeʼ jeʼm iñɨɨyi (Apoc. 17:5, 16; 19:1, 2). Weeñiyaj jesɨk iaʼmyajpa iga aktogoytyabam jeʼm religión mɨgoyyajpaʼap wɨapsɨ iga mojpa ikuyooxayaj Jehová. Jesɨk tsukumpa Armagedón Jehová iktogoyba jempɨk in̈jakneʼ jeʼm Wokkɨʼɨwiñ, jempɨk ijooyixyajpa y ityuʼdɨʼɨyayyajpa iñɨɨyi. Pero ikɨakputpa jempɨk kupɨgoyyajpa, ityoyyajpa y ikujibayyajpa iñɨɨyi (Mar. 8:38; 2 Tes. 1:6-10). Jesɨk kuyajum jeʼm Mil Amtyɨy iga In̈jakpa Cristo, Jehová ikkuaʼyba iñɨɨyi (Apoc. 20:7-10). Peʼm tiempo «jeʼm naxyukmɨ komneʼeba kun jeʼm Jehová iixpɨgoʼoyi juʼuts jeʼm nɨʼ iga ikompa jeʼm lamar» (Hab. 2:14).
16. ¿Juʼp jɨɨxi impɨkneʼ mich? (Aʼmɨtyim jeʼm imagen).
16 Tsaam tamaymaytyam jesɨk ityumpɨyyaj ikujibayyajpa jeʼm Jehová iñɨɨyi. Iganam nuʼkpa jeʼm jaama tan̈wattaʼmiñ juʼtspɨy tawɨap iga juchixkej tan̈kujiʼptaʼmiñ tanDios. Iga wɨaiñ tanakkupaktaʼm yɨʼp yooxakuy jeʼm Kumun Nayooxaoyyajpaʼap ikupin̈neyaj Salmo 96:8 para jeʼm texto yɨʼppɨk amtyɨy 2025: «Kujibaytyaʼamɨ jeʼm Jehová iñɨɨyi».
¡Nuʼkpa jeʼm jaama iga tantumpɨytyam tan̈kujiʼptaʼmpa Jehová! (Aʼmɨ jeʼm párrafo 16).
WAAÑI 12 Jehová, nuestro gran Dios
a Salmo 96:1-3: 1 Wanaytyaʼamɨ tuum joomipɨk waañi Jehová. ¡Iñtyumpɨytyam wanaytyaʼamɨ Jehová! 2 Wanaytyaʼamɨ Jehová, kujiʼbaytyaʼamɨ iñɨɨyi. Tumtum jaama an̈mattaʼamɨ jeʼm wɨtampɨk an̈matyiyaj takɨakputpaʼap. 3 An̈madaytyaʼamɨ tun̈gakyaj juʼtspɨy pɨɨmiɨy y ityumpɨy jeʼm wɨtampɨk tyidyin̈kej iga iwatneʼ.
b Weeñi nɨɨyi kukagayñeyajta.
c Salmo 96:8 Kujiʼbaytyaʼamɨ jeʼm Jehová iñɨɨyi, namiñaytyaʼamɨ tuum xaaja y tɨgɨytyaʼamɨ jeʼm ian̈kɨʼɨm.
d Salmo 96:9 Koosteñaytyaʼamɨ Jehová iga tsaam kuaʼyñeʼ. ¡Iñtyumpɨytyaʼm kɨɨn̈taʼamɨ!
e Salmo 96:10-13: 10 An̈mattaʼamɨ jeʼm tɨgan̈jom: «¡Jehová tsɨʼyñeum juʼuts an̈jagoʼoyi! Jeʼm nas kammatsneʼ; dyaʼ i wɨap iktsɨgoy. Jeʼ iwɨkɨʼpin̈ba jeʼm tɨgan̈jomyaj». 11 Maymayataʼamɨ jempɨk miitytyaʼm sɨn̈yukmɨ, maymayataʼamɨtyim jempɨk miitytyaʼm naxyukmɨ; pɨɨmi an̈jɨʼyiñ jeʼm lamar y ityumpɨy jempɨk ityyaj jeem; 12 maymayayajiñ ityumpɨy jempɨk ity yɨʼp naxyukmɨ. Jeempɨktyim jeʼm kuyan̈jujyaj an̈wejyajiñ kun maymayaaji 13 Jehová iwiñjom, iga miñiam iwɨkɨʼpin̈ yɨʼp nas. Iwɨkɨʼpin̈ba ityumpɨy jempɨk iwɨwatneyaj y jeʼm tɨgan̈jujyaj iga kupɨgoyyaj.
