1. ¿Tyiʼiga mimaymaywatpa iga Jehová tasaɨyñetaʼm jeʼm Biblia?

 ¡TSAAM tamaymaytyam iga Jehová tasaɨyñeʼ jeʼm Biblia! Jeem tampaʼttaʼmpa wɨtampɨk an̈kiʼmayoʼoyiyaj iga tayooxpaʼttaʼmpa jesɨk tanan̈teeñkamoktaʼmpa jeʼm kobakpiijiyaj. Tan̈kejaybatyim iga tanaitypa tuum wɨbɨk nɨgɨyoʼoyi. Y jempɨk maaj importante, tayooxpaʼtpa iga tañixpɨguiñ juʼuts Jehová. Jesɨk tan̈kujɨɨspa jeʼm wɨtampɨk jɨɨxiyaj y jaamoʼoyiyaj iga iniity Jehová, tayooxpaʼtpa iga tan̈kunuʼguiñ y tanamigojaiñ (Sal. 25:14).

2. ¿Tyityam ipɨkneʼ Jehová iga wɨaiñ tañixpɨktaʼm?

² Jehová ixunba iga ityumpɨyyaj iixpɨkyajiñ. Wiñɨk, jeʼ ipɨk jeʼm maawiñyaj, jeʼm pooñyaj y jeʼm sɨn̈pɨxiñtyam iga wɨaiñ iixpɨkta (Núm. 12:6; Hech. 10:3, 4). Pero, meʼega ityumpɨy yɨʼp dyaʼ i ijaykunuʼk, dyaʼ idyɨk wɨap tan̈kuyujkataʼm. Jeʼyukmɨ, Jehová iñɨʼmay weeñi pɨxiñtyam iga ijaykunuʼkyajiñ «tuum librojyuk» jempɨk jeʼ ixunba iga tanjoodon̈ataʼmiñ (Jer. 30:2). Wɨap tan̈kupɨktaʼm iga jeʼ iwɨkuix iga jaykunuʼktaiñ yɨʼp wɨbɨk an̈kejayoʼoyi, iga «jeʼm nuntapɨk Dios ityun̈ tsaam wɨɨ» (Sal. 18:30).

3. ¿Tyityam iwat Jehová iga wɨaiñ tanaitytyaʼm jeʼm Biblia yɨʼp jaama? (Isaías 40:8).

³ (Maayɨʼ Isaías 40:8). b Dende wiñɨgam, jeʼm Dios In̈maatyi tsaam iyooxpaʼtneʼ jeʼm Dios iyooxakɨʼɨwiñyaj. Pero, ¿juutypɨk iyooxpaʼtyajpa siiga jeʼm Biblia wiñɨgam jayñeta y juuty jaykunuʼkta jobity mɨsaap y kupugaʼyba idyɨk? Y sɨɨ dyam i ni tuum documento jaytyawɨʼɨp wiñɨk. Pero Jehová yooxpadoy iga jeʼm Biblia wadaytyaiñ copias. Jeʼm copistas tan̈kaɨyyajtyim idyɨk,  pero iwɨwatyaj iyooxakuy. Iga sɨʼ idyɨk ijɨykiʼm jeʼm Escrituras Hebreas, tuum jeʼm ikɨʼpin̈paʼap jeʼm Biblia nɨm: «Wɨap tan̈wɨkupɨk iga ni tuum libro jayñetawɨʼɨp wiñɨk, dyaʼ jespɨy kukaʼpsneʼ». Mex iga juuty jaykunuʼkta wiñɨk jeʼm Biblia tsaam idyɨk jobity mɨsaap y kupugaʼyba, y jempɨk ijayyaj tan̈kaɨyyajtyim idyɨk, wɨkejpa iga jempɨk tammaytyaʼmpa jeʼm Bibliajom iniity jeʼm Jehová ijɨɨxi.

4. ¿Tyi tan̈kɨʼpin̈taʼmpa yɨʼp kuyujijom?

⁴ «It́u̱mpɨy jém wɨ̱tampɨc cosa» y «jém wɨ̱tampɨc xaja» tachiʼiñeʼ Jehová, y jeʼm Biblia jeʼ tuum wɨbɨk xaaja iga tachiʼiñetaʼm (Sant. 1:17). Jesɨk algun i tachiʼiba tuum xaaja iga takuyooxaap, ikwiñkejpa iga tanunta ixpɨkpa y ijoodon̈ tyityam tatogoyay. Jeempɨktyim naspa kun jeʼm Biblia. Jesɨk tan̈kɨʼpin̈taʼmpa, maaj tañixpɨktaʼmpa Jehová. Tan̈kutɨʼɨyɨʼyba iga tawɨixpɨktaʼmpa y ijoodon̈ tyityam tatogoyaytyaʼm. Yɨʼp kuyujijom tan̈kɨʼpin̈taʼmpa tukuteen jɨɨxiyaj y jaamoʼoyiyaj iga iniity Jehová, y jeʼm Bibliajom tampaʼttaʼmpa: jeʼm ijoodon̈oʼoyi, jeʼm iwɨwadoʼoyi y jeʼm ityoyoʼoyi. Tanaʼmtaʼmiñ tyi tan̈kejaʼyba jeʼm Biblia de jeʼm Dios ijoodon̈oʼoyi.

5. ¿Juutypɨk ikwiñkejpa jeʼm Biblia iga iniity jeʼm Dios ijoodon̈oʼoyi?

⁵ Jehová ijoodon̈ iga tatogoyaytyaʼm jeʼm ian̈kiʼmayoʼoyiyaj. Jeʼyukmɨ tasajchiñetaʼm jeʼm Biblia, iga jemum ity jeʼm ijoodon̈oʼoyi. Jeʼm ian̈kiʼmayoʼoyiyaj tsaam yooxpadoʼyba. Jeʼm Biblia wɨap ikukagayay tun̈gakyaj iityi. Jesɨgam Moisés ijaykunuʼk jeʼm wiñtyipɨk librojyaj iga ity jeʼm Bibliajom, iñɨʼmay jeʼm israelitajyaj: «Dyaʼ xaajatyim sɨʼ in̈kumaton̈taʼm yɨʼpyaj an̈matyiyaj, mikupujaytyaʼmpa iñityi» (Deut. 32:47). Jempɨk ikupɨkyajpa idyɨk jeʼm Dios In̈maatyi maymayayajpa y iwɨnɨgayyajpa idyɨk (Sal. 1:2, 3). Mex iga jeʼm Biblia wiñɨgam jayñeta, wɨapnam iyooxpaʼt tun̈gakyaj iga ikakyajiñ iityi. Juʼuts akwiñkejoʼoyi, en jw.org juuty nɨmpa «Jeʼm Biblia ikagayyaj iityi», impaʼtpa maaj de 50 nasɨyoʼoyiyaj juuty in̈kejpa iga weeñiyaj ikakyaj jeʼm iityi jesɨk ikupɨkyaj jeʼm an̈kiʼmayoʼoyiyaj itywɨʼɨp Bibliajom (1 Tes. 2:13).

6. ¿Tyiʼiga tanɨmpa iga dyaʼ i tun̈gak libro iga jeex juʼuts jeʼm Biblia?

⁶ Dyaʼ i tun̈gak libro iga jeex juʼuts jeʼm Biblia. ¿Tyiʼiga? Iga jempɨk imɨʼɨchiʼ, jeʼ Jehová, jeʼm iniitywɨʼɨp ityumpɨy jeʼm pɨɨmi, jeʼ dyaʼ keman kaʼaba y tsaam iniity jaʼyan̈ joodon̈oʼoyi. Ity jaʼyan̈ librojyaj iga mayyajtapnam yɨʼp jaama mex iga jempɨk ijaykunuʼk kaʼaneum. Pero wɨapsɨ iga jeʼm ian̈kiʼmayoʼoyiyaj dyam yooxpadoyyajpa. Pero, jeʼm wɨtampɨk an̈kiʼmayoʼoyiyaj chioypaʼap jeʼm Biblia juchixkej kuyooxaoʼyba, dyaʼ tyi ijoo juʼp tiempo taitytyaʼm. Jesɨk tammaytyaʼmpa y tan̈kujɨɨstaʼmpa jeʼm an̈kiʼmayoʼoyiyaj tachiʼipaʼap, Jehová tayooxpaʼtpa kun iespíritu santo iga wɨaiñ tan̈kupɨktaʼm yɨʼpyaj an̈kiʼmayoʼoyiyaj (Sal. 119:27; Mal. 3:16; Heb. 4:12). Kujɨɨsɨ, jempɨk imɨʼɨchiʼ jeʼm Biblia miyooxpaʼttoʼoba kun ityumpɨy ianmaj. ¿Mianmajan̈chiʼiba yɨʼp iga juchixkej immayiñ jeʼm Biblia?

7. ¿Juutypɨk jeʼm Biblia iyooxpaʼt wiñɨk jaama jeʼm Dios ikumun iga iniityyajiñ idyɨk tumtyi jɨɨxi?

⁷ Ityñam tun̈gak akwiñkejoʼoyi in̈kejpaʼap iga jeʼm Biblia iniity jeʼm Dios ijoodon̈oʼoyi, jeʼam iyooxpaʼtpa iga jeʼm ikumun iniityyajiñ tumtyi jɨɨxi. Jesɨgam jeʼm israelitajyaj imɨʼɨchayaj jeʼm Nas juuty Jɨykamayñeyajta idyɨk, dyaʼ tumtyi an̈eymɨ tsɨʼyyaj. Y dyaʼ tumtyi yooxakuy iniityyaj idyɨk, weeñiyaj imatsyajpa idyɨk tɨʼɨpɨʼ, ñipñiboyyajpa y tun̈gakyaj ikmɨjayajpa idyɨk animatyaj y ikuixyajpa. Jeʼyukmɨ jeʼm israelitajyaj ityyajwɨʼɨp idyɨk tuum an̈eymɨ, wɨapsɨ iga jobitytyi idyɨk ikujaʼamayyajpa  jempɨk tsɨʼyyaj maaj juʼumjom. Pero Jehová iwat iga ityumpɨyyaj an̈tuʼumayajiñ idyɨk iga ikumaton̈ayyajpa y ikuyujkaayyajpa In̈maatyi (Deut. 31:10-13; Neh. 8:2, 8, 18). Kujɨɨsɨ juʼtspɨy idyɨk maymay tuum israelita jesɨk nuʼkpa Jerusalén y ipaʼtpa idyɨk tun̈gak israelitajyaj tsukumneyajwɨʼɨp tun̈gak an̈eymɨ iga nɨkneyajtyim ikoosteñayyaj Jehová. Jeempɨgam Jehová iyooxpaʼt iga iniityyajiñ tumtyi jɨɨxi. Maaj okmɨ, en jeʼm wiñtyipɨk siglo, jeʼm kumunjom ityyajtyim idyɨk pɨxiñtyam y yomtam iga ikukagayñeyajtyim idyɨk jeʼm iityi, dyaʼ tyi ijoo siiga tumiñɨyyaj idyɨk o dyaʼ, o siiga jɨyyajpa idyɨk tun̈gak an̈matyiimɨ. Pero, iga ityumpɨyyaj ityoyyajpa idyɨk jeʼm Dios In̈maatyi, an̈tuumjom ikuyooxayajpa idyɨk Jehová. Jeʼm cristianojyaj iyooxpaʼtyajpa idyɨk jempɨk yaguiñ mojneʼ ikuyujkayaj jeʼm Dios In̈maatyi iga wɨaiñ idyɨk iwɨkutɨʼɨyɨyyaj, jeʼm an̈tuʼumaajiyaj iyooxpaʼtyajpatyim idyɨk (Hech. 2:42; 8:30, 31).

8. ¿Juutypɨk ipɨkpa Jehová yɨʼp jaama jeʼm Biblia iga jeʼm ikumun iniityyajiñ tumtyi jɨɨxi?

⁸ Yɨʼp jaama, Jehová sɨʼtyim ipɨk jeʼm Biblia iga in̈kejaʼyba jeʼm ikumun y jeempɨgam iniityyajiñ tumtyi jɨɨxi. Jemum toptaap jeʼm wiʼkkuy espiritual iga tampɨktson̈taʼmpa. Juʼuts tacristianojtam tanɨktaʼmpa jeʼm an̈tuʼumaajiyaj y jeʼm mɨjtampɨk an̈tuʼumaajiyaj, jeem tammaytyaʼmpa jeʼm Biblia, y tan̈kɨʼpin̈taʼmpa iga majnam tan̈kutɨʼɨyɨytyaʼmiñ. Wɨkejpa iga Jehová ipɨkpa jeʼm Biblia iga ikkupakpa jeʼm ijɨɨxi iga  jeʼm iyooxakɨʼɨwiñyaj an̈tuumjom ikuyooxayajiñ (Sof. 3:9).

9. ¿Juʼp wɨbɨk jɨɨxi nasuntaap iga wɨaiñ tan̈kutɨʼɨyɨy jempɨk in̈kejpa jeʼm Biblia? (Lucas 10:21).

⁹ Tan̈kɨʼpin̈taʼmiñ juutypɨknam ikwiñkejneʼ Jehová jeʼm ijoodon̈oʼoyi. Jeʼ iwat iga weeñi jaakayaj de jeʼm Biblia numaaj ikutɨʼɨyɨyyajiñ jempɨk dyaʼ nakujiʼpyajtaap (maayɨʼ Lucas 10:21). Jeʼm Biblia jeʼ tuum libro iga wɨap imayyaj ityumpɨyyaj. Tuum especialista nɨm iga «dyaʼ numaaj jeʼ tuum libro iga tsaam mayñeta, wɨkɨʼpin̈taptyim iga wɨkutɨʼɨyɨytyaiñ», yɨʼp nɨmtoʼoba iga jeʼam jempɨk maaj wɨkuyujkaneta. Pero numaaj jempɨk dyaʼ nakujiʼpyajtaap wɨap ikutɨʼɨyɨyyaj y wɨap ikkupakyaj jeʼm an̈kiʼmayoʼoyiyaj jeʼm iityijom (2 Cor. 3:15, 16).

10. ¿Juutypɨknam jeʼm Biblia ikwiñkejneʼ jeʼm Jehová ijoodon̈oʼoyi?

¹⁰ Tanaʼmtaʼmiñ juutypɨknam jeʼm Biblia ikwiñkejpa jeʼm Jehová ijoodon̈oʼoyi. Dyaʼ numaaj ipɨkpa jeʼm Biblia iga in̈kejaʼyba jeʼm ikumun, tan̈kejaytyaʼmpa tumtum de taɨchtyam y taanmajan̈chiʼityaʼmpa. Jesɨk tammayba jeʼm In̈maatyi, wɨap tanaʼm iga Jehová tsaam tateguettam tumtum de taɨchtyam (Is. 30:21). Jesɨk sɨʼ idyɨk tannaskaʼ tuum kobakpiiji, ¿tammayñeʼ tuum texto iga tsaam tayooxpaʼt? Wɨapsɨ iga watykɨy tannaskaneʼ jeempɨk. Pero, siiga jeʼm Biblia watneta iga jaʼyan̈yaj wɨaiñ imayyaj, ¿jesɨk jutsaneʼ iga jeʼm ian̈kiʼmayoʼoyiyaj wɨap tayooxpaʼttaʼm tumtum de taɨchtyam? Iga jempɨk imɨʼɨchiʼ jeʼm Biblia iniity jaʼyan̈ joodon̈oʼoyi (2 Tim. 3:16, 17).

11. ¿Juutypɨk ikwiñkej Dios iga dyaʼ neejaixoʼyba jesɨgam jaytya jeʼm Biblia?

¹¹ Tuum jeʼm jɨɨxi o jaamoʼoyi jempɨk maaj ikwiñkejpa Jehová jeʼ jeʼm wɨwadoʼoyi (Deut. 32:4). Iga Jehová juchixkej iwɨwatpa, dyaʼ neejaixoʼyba (Hech. 10:34, 35; Rom. 2:11). Ikwiñkej jesɨgam ikupin̈ juʼp an̈matyiimɨ jaytyaiñ jeʼm Biblia. Jeʼm wiñtyipɨk 39 librojyaj, jaytya hebreo an̈matyiimɨ. Yɨʼbam idyɨk jeʼm an̈maatyi iga ikutɨʼɨyɨyyajpa jeʼm Dios ikumun. Pero maaj okmɨ, jeʼm wiñtyipɨk cristianojyaj jɨyyajpa idyɨk griego. Jeʼyukmɨ jeʼm in̈an̈pɨgam 27 librojyaj iga iniity jeʼm Biblia jaytya yɨʼp an̈matyiimɨ. Jehová ikusuʼnɨy iga jeʼm In̈maatyi jaʼyaytya dyaʼ numaaj tuum an̈matyiimɨ. Yɨʼp jaama, toomi 8.000 millones jempɨk taitytyaʼm yɨʼp Naxyukmɨ, y dyaʼ tumtyi an̈matyiimɨ tajɨytyaʼmpa. ¿Tyi tayooxpaʼtnetaʼm iga tantumpɨytyam wɨaiñ tañixpɨktaʼm Jehová?

12. ¿Juutypɨk kupakneʼ Daniel 12:4 yɨʼp in̈an̈pɨgam jaama?

¹² Jehová ijɨykaʼm ikuyukmɨ jeʼm profeta Daniel iga jeʼm in̈an̈pɨgam jaama «jeʼm nuntapɨk ixpɨgoʼoyi jaʼyan̈aap» yɨʼp nɨmtoʼoba iga jaʼyan̈yaj ikutɨʼɨyɨyyajpa idyɨk jempɨk in̈kejpa jeʼm Biblia (maayɨʼ Daniel 12:4). c Jempɨk yooxpadoyñeʼ iga kupaguiñ yɨʼp jɨykamoʼoyi jeʼ iga jeʼm Biblia watneta tun̈gak an̈matyiimɨyaj y tsaam jaʼyan̈yaj iniityyaj, y watnetatyim tun̈gak totjaayiyaj. Jeʼm Biblia jeʼam jeʼm libro jempɨk maaj naitytya y watneta tun̈gak an̈matyiimɨyaj. Jaʼyan̈ Biblia iga watneyajta tsaam tsoʼowɨyyaj tanjuy. Pero jeʼm Jehová ikumun iwatneyaj tuum jaakaʼ o ikumuuma jeʼm Biblia en maaj de 240 an̈matyiimɨ, y ityumpɨyyaj wɨap iniityyaj y dyaʼ tseʼgayyajtaap. ¿Juutypɨk yooxpadoyñeʼ? Jaʼyan̈yaj jempɨk ityyaj juʼptyin̈kej an̈eymɨ sɨʼ ipɨktson̈yaj jeʼm «wɨbɨc aŋma̱t́i», wiñtyi iga nuʼkpa jeʼm aktogoyoʼoyi (Mat. 24:14). Jehová jeʼ tuum Dios iga juchixkej iwɨwatpa y ixunba iga jaʼyan̈yaj iixpɨkyajiñ jesɨk imayayyajpa jeʼm In̈maatyi. ¿Tyiʼiga iwatpa jeempɨk? Iga tsaam tatoytyaʼmpa.

13. ¿Tyiʼiga tanɨmpa iga jeʼm Biblia ikwiñkejpa jeʼm Dios ityoyoʼoyi? (Juan 21:25).

¹³ Jeʼm Biblia ikwiñkejpa jeʼm jaamoʼoyi majpɨk importante iga iniity Jehová: jeʼm toyoʼoyi (1 Juan 4:8). Juʼuts akwiñkejoʼoyi, tan̈kujɨɨstaʼmiñ tyityam nɨm Dios iga jaykunuʼktaiñ jeʼm Bibliajom y tyityam dyaʼ. Jeʼ tawɨnɨʼmayñeʼ jempɨk tatogoyay iga wɨaiñ tanamigoja, wɨaiñ tammaymaya y juutypɨk tanaitypa tuum ityi dyapɨk kuyajpa. Pero, iga Jehová tsaam tatoytyaʼmpa, dyaʼ tan̈madayñetaʼm tyidyin̈kej iga dyaʼ nasuntaap iga tanjoodon̈ataʼmiñ (maayɨʼ Juan 21:25).

14. ¿Juutypɨknam jeʼm Biblia ikwiñkejpa jeʼm Dios ityoyoʼoyi?

¹⁴ Jehová takwiñkejaybatyim jeʼm ityoyoʼoyi kun tyityam tanɨʼmaʼyba. Jeʼm Bibliajom, dyaʼ tachiʼiñeʼ tuum yagatspɨk lista juuty tan̈madaʼyba tyi wɨɨ y tyi dyaʼ wɨɨ tan̈wat. Iga wɨaiñ tampɨk wɨtampɨk jɨɨxiyaj, jeʼ tayooxpaʼtpa kun nasɨyoʼoyiyaj wiñɨk jaamapɨk, kun jeʼm jɨychagoʼoyiyaj y jeʼm an̈kiʼmayoʼoyiyaj iga tayooxpaʼttaʼmpa tañityijom. Yɨʼɨmpɨgam jeʼm Biblia tayooxpaʼtpa iga tantoʼyiñ Dios y tan̈kupɨguiñ kun ityumpɨy tananmaj.

15. a) ¿Juutypɨk in̈kejpa jeʼm Biblia iga Jehová tsaam tateguettam? b) ¿Juʼp nasɨyoʼoyi itywɨʼɨp Bibliajom sɨʼ ikujɨɨs jeʼm wooñi, jeʼm tɨɨwɨ mañipɨk y jeʼm yoomtɨwɨ tsaamipɨk kejyajpaʼap en jeʼm imagenyaj? (Gén. 39:1, 10-12; 2 Rey. 5:1-3; Luc. 2:25-38).

¹⁵ Jeʼm Biblia in̈kejpa iga Jehová tsaam tateguettam. Tanjoodon̈tam iga jeʼm In̈matyijom ity nasɨyoʼoyiyaj de pɨxiñtyam y yomtam iga ikwiñkejyaj juʼuts idyɨk in̈jaamyaj. Wɨap tanaʼmtaʼm iga jeextyim idyɨk in̈jaamyaj «juutst́im taɨcht́am» (Sant. 5:17). Y jesɨk tanaʼmtaʼmpa juutypɨk iyooxpaʼt jeʼm pɨxiñtyam y yomtam iga jeexyajtyim juʼuts taɨchtyam,  tan̈wɨkutɨʼɨyɨytyaʼmpa iga «tatoypa Dios y tayaachaŋja̱mpa» (Sant. 5:11).

16. Jesɨk jeʼm iyooxakɨʼɨwiñyaj jɨɨxtyogoyyaj, ¿tyi tan̈kejaʼyba de Jehová? (Isaías 55:7).

¹⁶ Jeʼm Biblia tan̈kejaʼyba juutypɨknam Jehová takwiñkejaʼyba jeʼm ityoyoʼoyi. Jeem tanɨʼmaʼyba iga Dios dyaʼ tatsakpa tan̈kutyum jesɨk tajɨɨxtyogoyba. Jeʼm israelitajyaj watykɨy tan̈kawatyaj, pero jesɨk ikakyajpa idyɨk ijɨɨxi Jehová iwadaʼyba idyɨk perdón (maayɨʼ Isaías 55:7). d Jeʼm cristianojyaj ityyajwɨʼɨp idyɨk en jeʼm wiñtyipɨk siglo, ijoodon̈yajtyim idyɨk iga Jehová tsaam ityoyyajpa. Juʼuts akwiñkejoʼoyi, jeʼ ichiʼ jɨɨxi jeʼm apóstol Pablo iga ianmajan̈chiʼiñ jeʼm ityɨwɨtam iga iwadayyajiñ perdón y ikpoʼksyajiñ tuum pɨɨxiñ iga ikak ijɨɨxi y ichakneum idyɨk iga tan̈kawatpa (1 Cor. 5:1-5; 2 Cor. 2:6, 7). Tsaam tagaʼman̈jakpa iga Jehová dyaʼ ichak ikutyum jeʼm iyooxakɨʼɨwiñyaj jesɨk jɨɨxtyogoyyaj. Kun toyoʼoyi in̈jɨyjakpa idyɨk y iyooxpaʼt iga eybɨk kuseettaiñ. Y jeempɨktyim iwatpa yɨʼp jaama jesɨk algun i tan̈kawatpa y ikakpa jeʼm ijɨɨxi (Sant. 4:8-10).

17. ¿Tyiʼiga jeʼm Biblia jeʼ tuum wɨbɨk xaaja?

¹⁷ Jehová tachiʼiñetaʼm tuum wɨbɨk xaaja. ¿Tyiʼiga jeʼm In̈maatyi jeʼ tuum wɨbɨk xaaja? Iga juʼuts tanaʼmnetaʼm, jeʼm Biblia tan̈kejaʼyba iga Dios tsaam iwɨwatpa, iniity joodon̈oʼoyi y agui tatoytyaʼmpa. Y yɨʼp libro in̈kejpa iga Jehová ixunba iga tañixpɨktaʼmiñ y tanamigojataʼmiñ.

18. ¿Juutypɨk tanakwiñkejtaʼmpa iga tantsoowaixtyaʼmpa jeʼm Biblia?

¹⁸ Wɨɨ iga tanteguedataʼmiñ jeʼm Dios In̈maatyi. Jeʼ tuum de jeʼm «wɨ̱tampɨc xaja» iga tachiʼiñetaʼm Jehová (Sant. 1:17). Jeʼyukmɨ juchixkej tanakwiñkejaytyaʼmiñ Jehová iga tantsoowaixtyaʼmpa yɨʼp xaaja. Jesɨk tammayaytyaʼmpa jeʼm In̈maatyi, wiñtyi tan̈wattaʼmiñ tuum an̈wejpadoʼoyi, y okmɨ tan̈kujɨɨstaʼmiñ jempɨk tammayñetaʼm. Wɨap tan̈kupɨktaʼm iga jempɨk imɨʼɨchiʼ jeʼm Biblia takumaykettaʼmpa jesɨk tanteguedaap iga tammayba, y jeempɨgam tampadaʼyba «jeʼm Dios iixpɨgoʼoyi» (Prov. 2:5).