KUYUUJI 7
Tan̈wɨkutɨʼɨyɨʼyiñ jempɨk tammayba Bibliajom
«¿Junɨmpa jém Dios iŋma̱t́i jém jayñewɨɨp? ¿T́i immay je̱m?» (LUC. 10:26).
WAAÑI 97 Nuestra vida depende de la Palabra de Dios
JEʼM JƗƗXI TAN̈KUYUJKAPAʼAP a
1. ¿Juutypɨk ikwiñkej Jesús iga ityeguedaap idyɨk jeʼm Dios In̈maatyi?
¿OYÑEʼ tan̈kujɨɨs juʼutssɨ idyɨk jesɨgam Jesús an̈kejayoʼyba? Jeʼ juchixkej idyɨk ijɨykiʼmpa jempɨk nɨmpa jeʼm Dios In̈maatyi. Jeempɨgam ikwiñkej kun jeʼm an̈matyiyaj nɨmwɨʼɨp okmɨ iga chin̈, y kun jeʼm an̈matyiyaj nɨmwɨʼɨp wiñtyi iga kaʼiñ (Deut. 8:3; Sal. 31:5; Luc. 4:4; 23:46). b Y jeʼm tukuteen amtyɨy y medio iga ikkupak jeʼm iyooxakuy, Jesús imayba idyɨk jeʼm Biblia, ijɨykiʼmpa idyɨk jesɨk in̈kejaʼyba tun̈gakyaj (Mat. 5:17, 18, 21, 22, 27, 28; Luc. 4:16-20).
Jesɨgam Jesús jaʼy ityi yɨʼp naxyukmɨ ikwiñkej iga ityoyba jeʼm Dios In̈maatyi y iaʼmchiʼ iga jeʼm an̈kiʼmayoʼoyiyaj iyooxpaʼdyiñ iityijom (aʼmɨ jeʼm párrafo 2).
2. Iganam mɨjaap idyɨk ixɨʼ Jesús, ¿tyi iyooxpaʼt iga iwɨixpɨguiñ jeʼm Dios In̈maatyi? (Aʼmɨ jeʼm dibujo itywɨʼɨp yɨʼp totjaayi iwiñjom).
2 Wiñtyi iga Jesús iktsukumiñ jeʼm iyooxakuy, imaybam idyɨk jeʼm Dios In̈maatyi y ikumaton̈ba idyɨk jesɨk tun̈gakyaj imayyajpa y in̈matyajpa. Wɨapsɨ iga ityɨkkɨʼɨm imaton̈ba idyɨk jesɨk María y José ijɨykimyajpa jeʼm Dios In̈maatyi jesɨk muruyajpa (Deut. 6:6, 7). c Jesús nɨkpa idyɨk tumtum sábado jeʼm sinagoga kun jeʼm ifamilia y iwɨkumaton̈ba idyɨk jesɨk maytyaap jeʼm Dios In̈maatyi (Luc. 4:16). Y maaj okmɨ iyaʼak moj imay. Jeʼyukmɨ dyaʼ numaaj ijoodon̈a tyi in̈kejpa jeʼm Dios In̈maatyi, ityoyba idyɨk jeʼm an̈kejayoʼoyiyaj y iaʼmchiʼ iga iyooxpaʼdyiñ jeʼm iityijom. Tuum akwiñkejoʼoyi jeʼ jempɨk nas en jeʼm templo jesɨgam iniity idyɨk 12 iamtyɨy. Jeʼm maestrojyaj iga tsaam idyɨk iixpɨkyajpa jeʼm Moisés In̈kiʼmayoʼoyi, aʼman̈jakyaj «iga tsa̱m jɨ̱xiɨ́y jém jaychɨ̱xi iga tsa̱m wɨa̱p icutsoŋ» (Luc. 2:46, 47, 52).
3. ¿Tyi tan̈kɨʼpin̈taʼmpa yɨʼp kuyujijom?
3 Taɨchtyam wɨaptyim tañixpɨktaʼm y tantoytyaʼm jeʼm Dios In̈maatyi siiga juchixkej tammaytyaʼmpa. ¿Pero tyi wɨap tan̈wat iga tan̈wɨkutɨʼɨyɨʼyiñ jempɨk tammayba Bibliajom? Iga wɨaiñ tanjoodon̈a, tanaʼmiñ tyi iñɨʼmay Jesús jempɨk iixpɨkyajpa idyɨk jeʼm An̈kiʼmayoʼoyi, juʼuts jeʼm escribajyaj, jeʼm fariseojyaj y jeʼm saduceojyaj. Mex iga jeʼeyaj imayyajpa idyɨk jeʼm Dios In̈maatyi, dyaʼ idyɨk iwɨkutɨʼɨyɨyyajpa. Jesús ijɨykiʼm tukuteen jɨɨxiyaj iga wɨa idyɨk mu iyooxpaʼtyaj. Jeʼm an̈matyiyaj nɨmwɨʼɨp Jesús tayooxpaʼttaʼmpa iga 1) tan̈wɨkutɨʼɨyɨytyaʼmiñ jempɨk tammaytyaʼmpa, 2) tampaʼttaʼmiñ wɨtampɨk an̈kejayoʼoyiyaj y 3) tanaʼmchiʼiñ iga jeʼm Dios In̈maatyi majnam tayooxpaʼdyiñ tañityijom.
TAN̈KUTƗʼƗYƗYTYAʼMIÑ JEMPƗK TAMMAYTYAʼMPA
4. Kun jempɨk nɨmpa Lucas 10:25-29, ¿tyiʼiga wɨɨ iga tan̈kutɨʼɨyɨʼyiñ jempɨk tammayba Bibliajom?
4 Tan̈kutɨʼɨyɨytyamtoʼoba jempɨk tammayba Bibliajom, siiga dyaʼ tan̈kutɨʼɨyɨʼyba, dyaʼ wɨap takuyooxa. Tan̈kujɨɨstaʼmiñ jesɨgam Jesús inimuru tuum pɨɨxiñ iga tsaam idyɨk iixpɨkpa jeʼm Moisés In̈kiʼmayoʼoyi (maayɨʼ Lucas 10:25-29). Jeʼm pɨɨxiñ ijoodon̈atoʼoba idyɨk tyi wɨap iwat iga wɨaiñ ipɨktson̈ tuum ityi dyapɨk kuyajpa, wiñtyi iga Jesús ikutson̈iñ ikjɨɨs jempɨk nɨmpa jeʼm Dios In̈maatyi. Jeʼyukmɨ ikwaʼk: «¿Junɨmpa jém Dios iŋma̱t́i jém jayñewɨɨp? ¿T́i immay je̱m?». Jeʼm pɨɨxiñ iwɨkutson̈. Ijɨykiʼm jeʼm Dios In̈maatyi jesɨgam nɨm iga tantoʼyiñ Dios y jeʼm tantɨwɨtam (Lev. 19:18; Deut. 6:5). Pero okmɨ akwaʼgoy: «¿I̱apaap jém antɨ̱wɨ?». Kun yɨʼpyaj an̈matyiyaj ikwiñkej iga dyaʼ iwɨkutɨʼɨyɨyñeʼ idyɨk jempɨk imayñeʼ. Jeʼyukmɨ dyaʼ idyɨk wɨap ikkupak jeʼm iityijom.
Tantumpɨytyam wɨap tan̈kutɨʼɨyɨytyaʼm jempɨk tammaytyaʼmpa
5. ¿Tyiʼiga jeʼm an̈wejpadoʼoyi y jesɨk tanchokoymayba jeʼm Biblia tayooxpaʼtpa iga tan̈wɨkutɨʼɨyɨʼyiñ jeʼm an̈kejayoʼoyiyaj?
5 ¿Tyi tayooxpaʼtpa iga tan̈wɨkutɨʼɨyɨʼyiñ jesɨk tammayba jeʼm Dios In̈maatyi? Tanaity waatyi yooxpadoʼoyiyaj. Wiñtyi tanan̈wejpaʼdyiñ Jehová. Dyaʼ wɨap tan̈wɨkutɨʼɨyɨytyaʼm jempɨk tammayba Bibliajom siiga dyaʼ tan̈waʼgaʼyba jeʼm iyooxpadoʼoyi, jeʼyukmɨ tan̈waʼgaʼyba jeʼm iespíritu santo iga wɨaiñ tan̈kutɨʼɨyɨy. Okmɨ mojiñ tammay, pero odoy jikskɨy tan̈wadyiñ, tanchokoymayiñ iga wɨaiñ tan̈kutɨʼɨyɨy. Tayooxpaʼtpatyim iga jesɨk tammayba, waʼn̈iñ jeʼm tanjɨɨyi o tan̈kumaton̈iñtyim jeʼm grabación de jeʼm Biblia iganam tammayba. Yɨʼp tayooxpaʼtpa iga tan̈wɨkutɨʼɨyɨʼyiñ jeʼm nasɨyoʼoyi, yɨʼɨmpɨgam jeʼm an̈kejayoʼoyi tsɨʼyba tanjɨɨxian̈jom y tananmajom (Jos. 1:8). Jesɨk yajum tammay, eybɨk tanan̈wejpaʼdyiñ Jehová iga tanchiʼiba gracias por jeʼm In̈maatyi y tan̈waʼgaʼyba jeʼm iyooxpadoʼoyi iga wɨaiñ tan̈watkiʼps tañityijom jempɨk tammay.
¿Tyiʼiga jeʼm notas tayooxpaʼtyajpa iga tan̈wɨkutɨʼɨyɨʼyiñ y odoy tan̈kujaʼamaʼyiñ jempɨk tammayba? (Aʼmɨ jeʼm párrafo 6).
6. ¿Juutypɨk tayooxpaʼtpa jesɨk tanawadaytyaap akwagoʼoyiyaj y tan̈watpa notas jesɨk tammayba jeʼm Biblia? (Aʼmɨtyim jeʼm imagenyaj).
6 ¿Tyiñam maaj tayooxpaʼtpa iga tan̈wɨkutɨʼɨyɨʼyiñ jempɨk tammayba Bibliajom? Tanawadaytyamtaiñ akwagoʼoyiyaj. Juʼuts akwiñkejoʼoyi, ¿ityam sɨʼ ijɨykimyajta?, ¿i jɨyba ixɨʼ?, ¿iapaʼap sɨʼ ijɨʼyaytya y tyiʼiga?, ¿juuty y juchix naspa ixɨʼ ityumpɨy yɨʼp? Yɨʼpyaj akwagoʼoyiyaj tayooxpaʼtpa iga tan̈kujɨɨxiñ tyiapaʼap tan̈kejaytyoʼoba. Wɨaptyim tan̈wat notas. Jesɨk tan̈watpa yɨʼɨmpɨk, tayooxpaʼtpa iga tanjaykunuʼguiñ numaaj jempɨk tanjɨɨsaktsɨʼytyoʼoba. Yɨʼɨmpɨgam tan̈wɨkutɨʼɨyɨʼyba jempɨk tammayñeʼ y tsɨʼyba tanjɨɨxian̈jom. ¿Tyi wɨap tanjaykunuʼk? Jeʼm akwagoʼoyiyaj tanawadaytyawɨʼɨp, jeʼm información jempɨk tan̈kuaʼm, jempɨk tan̈kejaytyoʼoba, juutypɨk wɨap tayooxpaʼt jempɨk tammay o tyi tanjaam jesɨk tammay jeʼm nasɨyoʼoyi. Siiga tan̈watpa yɨʼɨmpɨk jesɨk tammayba jeʼm Biblia, tanjaampa iga Jehová sɨʼ tajɨʼyay.
7. ¿Tyi nasuntaap jesɨk tammayba jeʼm Biblia, y tyiʼiga? (Mateo 24:15).
7 Jesús nɨm iga jeʼm kutɨʼɨyɨyoʼoyi tayooxpaʼtpa jesɨk tammayba jeʼm Biblia (maayɨʼ Mateo 24:15). Yɨʼp nɨmtoʼoba iga tanaʼmiñ juutypɨk jeʼm an̈kejayoʼoyiyaj iniityyaj tumtyi jɨɨxi o juʼp kukaki iniityyaj. Nɨmtoʼobatyim iga dyaʼ numaaj tan̈kuyujkaʼaba jempɨk dyaʼ tan̈kaʼ tan̈kutɨʼɨyɨy. Y juʼuts nɨm Jesús, jeʼm kutɨʼɨyɨyoʼoyi tayooxpaʼtpa iga tanaʼmiñ juutypɨk weeñi nasɨyoʼoyiyaj ikkupakyajpa jɨychagoʼoyiyaj. Y jeʼm kutɨʼɨyɨyoʼoyi pɨɨmi nasuntaap iga wɨaiñ tan̈wɨkuyujkaʼ ityumpɨy jempɨk tammayba Bibliajom.
8. ¿Tyi tayooxpaʼtpa iga wɨaiñ tanaity kutɨʼɨyɨyoʼoyi jesɨk tammayba jeʼm Biblia?
8 Jehová jempɨk ichiʼiba kutɨʼɨyɨyoʼoyi jeʼm iyooxakɨʼɨwiñyaj. Jeʼyukmɨ wɨɨ iga tanan̈wejpaʼdyiñ y tan̈waʼgaʼyiñ iga tayooxpaʼdyiñ tanaity jeʼm kutɨʼɨyɨyoʼoyi (Prov. 2:6). Pero odoy numaaj tanan̈wejpaʼdyiñ. Tanchokoykɨʼpin̈iñ jempɨk tammayñeʼ y tanaʼmiñ juutypɨk tɨgɨykuʼmpa kun jempɨk tanjoodon̈tam. Ity jaʼyan̈ totjaayiyaj iga wɨap tayooxpaʼttaʼm iga wɨaiñ tan̈wat yɨʼɨmpɨk, juʼuts jeʼm Guía de estudio para los testigos de Jehová. Siiga tampɨktaʼmpa yɨʼp yooxpadoʼoyi, wɨap tan̈kutɨʼɨyɨytyaʼm jeʼm nasɨyoʼoyiyaj ityyajwɨʼɨp Bibliajom y tayooxpaʼtpa tanaʼm juutypɨk wɨap tan̈watkiʼps tañityijom (Heb. 5:14). Siiga yɨʼɨmpɨgam tammayba jeʼm Dios In̈maatyi, majtyim tan̈wɨkutɨʼɨyɨʼyba.
TAN̈KUAʼMTAʼMIÑ WƗTAMPƗK AN̈KEJAYOʼOYIYAJ
9. ¿Juʼp an̈kejayoʼoyi dyaʼ idyɨk ikutɨʼɨyɨyñeyaj jeʼm saduceojyaj?
9 Mex iga jeʼm saduceojyaj iwɨixpɨkyajpa idyɨk jeʼm wiñtyipɨk cinco librojyaj de jeʼm Escrituras Hebreas, dyaʼ idyɨk ikupɨkyajpa weeñi an̈kejayoʼoyiyaj iga ityyaj jeʼm Dios In̈matyijom. Kujɨɨsɨ jempɨk Jesús iñɨʼmay jeʼm saduceojyaj jesɨk ikutɨʼtsyajtɨʼp kun jeʼm an̈kejayoʼoyi de jeʼm aktsukumoʼoyi. Nɨʼmayyajta: «Micht́am immayñeta jém libro jém ijayñewɨɨp jém Moisés ju̱t́ iŋmatpa [...] de jém xut́u cuy jém jípspáppɨc id́ɨc [...]. Nɨmpa así Dios: ‹Ɨch jém [Abrahán] aDios, y jém Isaac aDios, y jém Jacob aDios›» (Mar. 12:18, 26). Wɨapsɨ iga jeʼm saduceojyaj watykɨy idyɨk imayñeyaj yɨʼp nasɨyoʼoyi, pero kun jempɨk nɨm Jesús, wiñkej iga dyaʼ idyɨk ikutɨʼɨyɨyñeyaj tuum an̈kejayoʼoyi itywɨʼɨp jeʼm Dios In̈matyijom: jeʼm aktsukumoʼoyi (Mar. 12:27; Luc. 20:38). d
10. ¿Tyi wɨɨ iga tan̈wadyiñ jesɨk tammayba jeʼm Biblia?
10 ¿Tyi tan̈kejaytyaʼmpa jempɨk nɨʼmayyajta jeʼm saduceojyaj? Iga jesɨk tammayba jeʼm Biblia, tan̈wɨkɨʼpin̈iñ tyi wɨap tan̈kejay tuum versículo o tuum nasɨyoʼoyi. Odoy numaaj tammayiñ; tan̈kuaʼmiñtyim wɨtampɨk an̈kejayoʼoyiyaj y jɨɨxian̈chioʼoyiyaj itywɨʼɨp Bibliajom iga dyaʼ jobity kejpa tanaʼm.
11. Juʼuts nɨmpa 2 Timoteo 3:16, 17, ¿juutypɨk wɨap tampaʼttaʼm wɨtampɨk an̈kejayoʼoyiyaj ityyajwɨʼɨp Bibliajom?
11 ¿Juutypɨk wɨap tampaʼt jeʼm wɨtampɨk an̈kejayoʼoyiyaj ityyajwɨʼɨp jeʼm Bibliajom? Tan̈kɨʼpin̈taʼmiñ 2 Timoteo 3:16, 17 (maayɨʼ). Jeem nɨmpa iga «jém Dios iŋma̱t́i» tan̈kejaʼyba, tan̈jɨyjakpa, tanuumtsakpa y tawɨan̈kejaʼyba. Y weeñi librojyaj ityyajwɨʼɨp Bibliajom iga dyaʼ jaya jɨykimyajtaap, takuyooxayajpatyim. Jesɨk tammayba tan̈kɨʼpin̈iñ tyi tan̈kejaʼyba de Jehová, jempɨk ijɨɨsneʼ iga iwatpa o jeʼm ijɨɨxian̈chioʼoyiyaj. Siiga tansunba iga tuum nasɨyoʼoyi itywɨʼɨp Bibliajom wɨaiñ tan̈jɨyjak, ¿tyi wɨɨ iga tan̈kuaʼmiñ? Tan̈kuaʼmiñ an̈kejayoʼoyiyaj iga tayooxpaʼdyiñ tanjooyix jeʼm malojpɨk jɨɨxiyaj, y wɨaiñtyim tayooxpaʼt tan̈wɨkuyooxa Jehová. Tan̈kujɨɨstaʼmiñ juutypɨk jempɨk tammay wɨap iñuumtsak tuum an̈kejayoʼoyi dyapɨk wɨkutɨʼɨyɨyñeta iga tanɨʼmaytya jeʼm an̈matkuyjom. ¿Y tyi wɨap tan̈wat siiga tansunba iga tuum nasɨyoʼoyi itywɨʼɨp Bibliajom tawɨan̈kejaʼyiñ? Tan̈kuaʼmiñ ityumpɨy jempɨk tayooxpaʼtpa iga wɨaiñ tanjɨɨs juʼutstyim ijɨɨspa Jehová. Jesɨk tammayba jeʼm Biblia tanjɨɨskupakneiñ yɨʼpyaj maktasteen jɨɨxiyaj, iga wɨaiñ tampaʼttaʼm wɨtampɨk an̈kejayoʼoyiyaj.
TANAKKUPAGUIÑ TAÑITYIJOM JEMPƗK TAMMAYBA BIBLIAJOM
12. ¿Tyiʼiga Jesús ikwaʼk jeʼm fariseojyaj siiga dyaʼ idyɨk imayñeyaj jempɨk nɨmpa jeʼm Dios In̈maatyi?
12 Jeʼm fariseojyaj dyaʼ idyɨk ikkupakyajpa iityijom jempɨk imayyajpa jeʼm Dios In̈matyijom. Jeempɨgam ikwiñkej Jesús jesɨgam ikwaʼk siiga dyaʼ idyɨk imayñeyaj jempɨk nɨmpa jeʼm Dios In̈maatyi (Mat. 12:1-7). e Peʼm jaama, jeʼm fariseojyaj nɨmyaj iga jeʼm Jesús ikuyujkɨʼɨwiñyaj dyaʼ idyɨk sɨʼ ikupɨkyaj jeʼm Moisés In̈kiʼmayoʼoyi chioyñewɨʼɨp idyɨk para jeʼm jaama sábado. Iga wɨaiñ ikutson̈, Jesús ijɨykiʼm wɨsteen akwiñkejoʼoyiyaj itywɨʼɨp jeʼm Dios In̈matyijom y ijɨykiʼm tuum versículo de Oseas. Yɨʼɨmpɨgam ikwiñkej iga jeʼm fariseojyaj dyaʼ idyɨk ikutɨʼɨyɨyyajpa tyiʼiga chiʼiñeyajta jeʼm An̈kiʼmayoʼoyi y dyaʼ idyɨk sɨʼ ikwiñkejyaj yaʼachan̈jamoʼoyi. Yɨʼpyaj pɨxiñtyam, mex iga imayyajpa idyɨk jeʼm Dios In̈maatyi, dyaʼ idyɨk ikkupakyajpa jeʼm iityijom. ¿Tyiʼiga? Iga tsaam idyɨk nakujiʼpyajtaap y numaaj idyɨk imayyajpa iga wɨaiñ ikujɨyyaj tun̈gakyaj. Iga dyaʼ idyɨk iniityyaj tuum wɨbɨk jɨɨxi, dyaʼ idyɨk ikutɨʼɨyɨyyajpa jempɨk imayyajpa (Mat. 23:23; Juan 5:39, 40).
13. ¿Kun juʼp jɨɨxi wɨɨ iga tammaytyaʼmiñ jeʼm Biblia, y tyiʼiga?
13 Jeʼm an̈matyiyaj nɨmwɨʼɨp Jesús tan̈kejaʼyba iga jesɨk tammayba jeʼm Biblia, tammayiñ kun tuum wɨbɨk jɨɨxi. Odoy tan̈watkiʼpstaʼmiñ jeʼm fariseojyaj. Maaj wɨɨ iga tanakwiñkejiñ humildad y tanaʼmchiʼiñ iga Jehová tan̈kejaʼyiñ. Juʼuts nɨmpa Santiago 1:21, «wɨ̱pɨctso̱ŋɨ jém Dios iŋma̱t́i jém ñipnewɨɨp [iñanmajom]». Siiga tan̈wɨpɨktson̈ba jeʼm Dios In̈maatyi, jesɨk jempɨk tammayba tsɨʼyba tananmajom. Jesɨk tammayba jeʼm Biblia odoy tanakujiʼptamtaiñ y odoytyim tammayiñ numaaj iga tan̈kujɨyyajpa tun̈gakyaj. Numaaj yɨʼɨmpɨgam tanaʼmchiʼiba iga tan̈kejaʼyiñ juutypɨk wɨap tanyooxpaʼtyaj tun̈gakyaj, tanakwiñkejiñ yaʼachan̈jamoʼoyi y jeʼm toyoʼoyi.
¿Juutypɨk wɨap tanjoodon̈a siiga sɨʼ tanaʼmchiʼ iga jeʼm Dios In̈maatyi tayooxpaʼdyiñ jeʼm tañityijom? (Aʼmɨ jeʼm párrafo 14). f
14. ¿Juutypɨk wɨap tanjoodon̈a siiga sɨʼ tanaʼmchiʼ iga jeʼm Biblia tayooxpaʼdyiñ jeʼm tañityijom? (Aʼmɨtyim jeʼm imagenyaj).
14 Jeʼm trato tanchiʼiyajpaʼap tun̈gakyaj ikwiñkejpa siiga sɨʼ tanaʼmchiʼ iga jeʼm Biblia tayooxpaʼdyiñ tañityijom. Iga jeʼm fariseojyaj dyaʼ idyɨk imayyajpa kun tuum wɨbɨk jɨɨxi jeʼm Dios In̈maatyi, ikumɨgoyyajpa idyɨk tun̈gakyaj mex iga dyaʼ tan̈kawatneyaj (Mat. 12:7). Jeʼyukmɨ tan̈kuixiñ juʼutspɨk trato tanchiʼiyajpa tun̈gakyaj y tyi tanjɨɨspa de jeʼeyaj. Juʼuts akwiñkejoʼoyi, ¿tanjɨykimayyajpa jeʼm wɨtampɨk ijɨɨxiyaj y tyityam iwɨwatyajpa, o numaaj tanjɨɨskupakneʼeba tyi dyaʼ iwɨwatyajpa? ¿Juchixkej tampɨkneʼ tanjɨɨxi iga tan̈wadayyajpa perdón, o tan̈kujɨyyajpa y tajoʼyan̈jakpa? Jeʼm kutson̈oʼoyi ikwiñkejpa siiga sɨʼ tanaʼmchiʼ iga jeʼm Biblia tayooxpaʼdyiñ kun tyityam tanjɨɨspa, tanjaampa y tan̈watpa (1 Tim. 4:12, 15; Heb. 4:12).
JESƗK TAMMAYBA JEʼM BIBLIA TAYOOXPAʼTPA IGA TAMAYMAYAIÑ
15. ¿Tyi idyɨk ijaampa Jesús por jeʼm Dios In̈maatyi?
15 Jesús ityoyba idyɨk jeʼm Dios In̈maatyi. Jeempɨgam jɨychakta en Salmo 40:8: «Iga an̈watpa jempɨk mich iñxunba, oh, manDios, tsaam amaymaywatpa, y jeʼm inin̈kiʼmayoʼoyi ity ananmajom». Iga tsaam idyɨk ityoyba, iyooxpaʼt iga maymayaiñ y ikuyooxaiñ Jehová. Jeempɨktyim naspa kun taɨchtyam, siiga tanteguedataʼmpa iga tammaytyaʼmpa jeʼm Dios In̈maatyi y tantoytyaʼmpa (Sal. 1:1-3).
16. ¿Tyi iñjɨɨsneʼ iga in̈watpa iga in̈wɨkutɨʼɨyɨʼyiñ jempɨk immayba Bibliajom? (Aʼmɨ jeʼm recuadro « Jeʼm an̈matyiyaj nɨmwɨʼɨp Jesús tayooxpaʼtpa iga tan̈kutɨʼɨyɨʼyiñ jempɨk tammayba»).
16 Jeʼm an̈matyiyaj nɨmwɨʼɨp Jesús y jeʼm iakwiñkejoʼoyi, taanmajan̈chiʼiba iga tan̈wɨkuyujkaiñ jeʼm Dios In̈maatyi. Siiga tan̈wɨkutɨʼɨyɨytyoʼoba jempɨk tammayba, tanan̈wejpaʼdyiñ Jehová, tanchokoymayiñ, tanawadaytyamtaiñ akwagoʼoyiyaj y tan̈wattaʼmiñ notas. Iga wɨaiñ tanaity kutɨʼɨyɨyoʼoyi, tanchokoykɨʼpin̈iñ jeʼm nasɨyoʼoyi y tan̈kuaʼmiñ información tun̈gak totjaayijomyaj. Iga tan̈wɨixpɨguiñ jeʼm Dios In̈maatyi, tan̈kuaʼmtaʼmiñ jeʼm wɨtampɨk an̈kejayoʼoyiyaj ityyajwɨʼɨp jeem, y tan̈kɨʼpin̈iñ jeʼm nasɨyoʼoyiyaj dyapɨk jaya jɨykimyajtaap. Y siiga tansuntoʼoba iga jeʼm Dios In̈maatyi tayooxpaʼdyiñ tañityijom, juchixkej tammayiñ kun tuum wɨbɨk jɨɨxi. Siiga yɨʼɨmpɨgam tan̈watpa, tanaʼmpa juutypɨk tayooxpaʼtpa jeʼm Biblia y majtyim tan̈kunuʼkpa Jehová (Sal. 119:17, 18; Sant. 4:8).
WAAÑI 95 La luz brilla más cada día
a Jempɨk tan̈kuyooxataʼmpa Jehová tanteguedataʼmpa iga tammaytyaʼmpa jeʼm Biblia tumtum jaama. Jaʼyan̈yaj imayyajpatyim, pero dyaʼ iwɨkutɨʼɨyɨyyajpa. Jeempɨktyim idyɨk naspa jesɨk Jesús jaʼy ityi yɨʼp naxyukmɨ. Tanaʼmtaʼmiñ tyi iñɨʼmay jempɨk imayyajpa idyɨk jeʼm Dios In̈maatyi y tan̈kɨʼpin̈taʼmiñ tyi wɨap tayooxpaʼttaʼm iga tan̈kutɨʼɨyɨytyaʼmiñ jesɨk tammaytyaʼmpa.
b Jesɨgam Jesús chin̈ y ipɨktson̈ jeʼm espíritu santo, wɨapsɨ iga jesɨgam moj ikujɨɨsɨy iga jaʼy ityi sɨn̈yukmɨ wiñtyi iga miʼñiñ yɨʼp Naxyukmɨ (Mat. 3:16).
c María iwɨixpɨkpa idyɨk jeʼm Dios In̈maatyi y watykɨy ijɨykiʼm (Luc. 1:46-55). Wɨapsɨ iga jeʼeyaj dyaʼ idyɨk iktsɨʼyayyajpa jeʼm tumiñ iga ijuyyajpa tuum copia de jeʼm Dios In̈maatyi. Jeʼyukmɨ jesɨk nɨkyajpa idyɨk en jeʼm sinagoga wɨapsɨ iga iwɨkumaton̈yajpa jesɨk maytyaap jeʼm Dios In̈maatyi iga odoy ikujaʼamayyajiñ.
d Aʼmɨ jeʼm an̈kejayoʼoyi «Acérquese a Dios: ‹Él es el Dios [...] de los vivos›», iga impaʼtpa en jeʼm Totjaayi Takjoodon̈apaʼap del 1 de febrero de 2013, en español.
e En Mateo 19:4-6 impaʼtpa tun̈gak nasɨyoʼoyi juuty in̈kejpa iga Jesús ikwaʼk jeʼm fariseojyaj siiga dyaʼ idyɨk imayñeyaj jempɨk nɨmpa jeʼm Dios In̈maatyi. Mex iga imayñeyaj idyɨk juuty in̈matpa ityumpɨy jempɨk Dios iwatneʼ, dyaʼ idyɨk ikupɨkyajpa jempɨk Dios ijɨɨspa de jeʼm an̈komɨʼɨyi.
f JEMPƗK NASPA IXƗʼ EN JEʼM IMAGENYAJ: Jeʼm An̈tuʼumayoʼytyɨkjom, tuum tɨɨwɨ iga yooxpadoʼyba kun jeʼm audio y video, watykɨy dyaʼ iwɨpudaʼyba. Pero jesɨk kuyajum jeʼm an̈tuʼumaaji jeʼm tɨwɨtam ianmajan̈chiʼiyajpa por jeʼm iyooxakuy, y dyaʼ ijɨɨskupakneyajpa tyi dyaʼ iwɨpuday.