Jeʼm Sucursal de francia iwaʼgay Nicolas y Céline iga kuyooxaoyyajiñ tun̈gak kumunjom, jeʼeyaj in̈matyajpa juʼuts iñɨgayyaj: «Wiñtyi tsaam idyɨk amaymaytyam, pero okmɨ an̈yaʼktaʼm iga an̈jɨɨstaʼmpa idyɨk anamigojtam y dyanam pɨɨmi anan̈pɨʼtstaʼmpa idyɨk jeʼm tɨwɨtam ityyajwɨʼɨp jeʼm kumunjom». a ¿Tyi wɨap miyooxpaʼt iga jobity inin̈yujiñ jeʼm kumun? ¿Juutypɨk wɨap miyooxpaʼtyaj jeʼm tɨwɨtam? ¿Y juutypɨk wɨap tanaanmajan̈chiʼityamta?

MAKTASTEEN JƗƗXIYAJ MIYOOXPAʼTPAʼAP IGA TAMAYMAYATAʼMIÑ

1. Kupɨɨkɨ iga Jehová miyooxpaʼtpa (Sal. 37:5). Kazumi itywɨʼɨp Japón, nɨkiam idyɨk tuumtsam 20 amtyɨy iga sɨʼ ikuyooxaoy jeʼm ikumunjom, pero nɨk ityiyaj tun̈gak an̈eymɨ jesɨk jeʼm iwɨdyaaya kukagayaytya iyooxakuy. ¿Juutypɨk iaʼmchi iga Jehová iyooxpaʼdyiñ? Nɨmpa: «An̈anmaday Jehová juʼuts idyɨk anan̈jaam y jeʼ juchixkej ayooxpaʼt y apɨɨmchiʼ».

¿Tyi miyooxpaʼtpa iga iniidyaʼyiñ confianza Jehová? Jeʼm tanfe jeex juʼuts tuum planta, siiga tansunba iga wɨmɨjaiñ nasuntaap iga tammujiñ. Nicolas iwɨkupɨk iga Jehová juchixkej iyooxpaʼtpa jesɨk ikujɨɨs juutypɨk iyooxpaʼt Abrahán, Jesús y Pablo jesɨgam ikuyooxayaj. Siiga juchixkej miwɨkuyujpa iñyaʼak, dyaʼ numaaj miyooxpaʼtpa jesɨk kukakpa iñityi, wɨaptyim iñanmajan̈chiʼiyaj tun̈gakyaj kun jempɨk in̈kuyujkaneʼ.

 2. Odoy kukiʼpsyaajɨ (Ecl. 7:10). Jules in̈matpa iga jesɨk nɨk Estados Unidos, jeʼm iityi tsaam kukak: «An̈jaampa iga ityumpɨyyaj anan̈madayyajiñ idyɨk juʼuts jeʼm añityi». Iga dyaʼ in̈yujneʼ idyɨk uxtyam uxtyam dyam in̈pɨʼts jeʼm tɨwɨtam, pero jesɨk majtyim moj iixpɨk ikak ijɨɨxi: «Dyaʼ tyi ijoo juʼp an̈eymɨ taitytyaʼm tan̈tumpɨytyam tajeextyam, wɨapsɨ iga dyaʼ tumtyi jɨɨxi tanaitytyaʼm kun jeʼm tantɨwɨtam pero odoy tanneejaixyajiñ». Jeʼyukmɨ odoy kukiʼpsɨ jeʼm tɨwɨtam. Anne-Lise, nɨmpa: «Anɨk tun̈gak kumunjom iga an̈kuyujkaʼaba joomityampɨk tyidyin̈kej y dyaʼ iga an̈kukiʼpsyajpa jeʼm tɨwɨtam».

Jeʼm ancianojyaj odoytyim iwatyajiñ jeempɨk, wɨapsɨ iga dyaʼ jeempɨktyim watyajtaap weeñi yooxakuyyaj, pero yɨʼp dyaʼ nɨmtoʼoba iga sɨɨ imalwatyaj. Maaj wɨɨ iga tan̈wɨixpɨguiñ tyiʼiga tsaam kukakneʼ juutypɨk iwatyajpa weeñi tyidyin̈kej (Ecl. 3:​1, 7b). Wɨɨ iga takupɨgoʼyiñ y odoy tanjɨɨxiñ iga maaj wɨɨ siiga wattaap jempɨk tanjɨɨspa (2 Cor. 1:24).

3. An̈pɨʼtsyaajɨ (Filip. 1:27). Wɨapsɨ iga jesɨk tanɨkpa tun̈gak an̈eymɨ tan̈kaʼap tan̈wɨtsak ityumpɨy, pero wɨɨ iga dende wiñtyityim iñtyobiñ tiempo iga miñɨguiñ jeʼm an̈tuʼumaaji. Siiga dyaʼ miñɨkpa, jeʼeyaj dyaʼ miixpɨkyajpa y dyatyim wɨap miyooxpaʼtyaj. Lucinda, y jeʼm wɨsteen iyommanɨktam in̈matyajpa tyi iwatyaj jesɨk nɨk ityiyaj Sudáfrica, nɨmpa: «An̈wattaʼm juʼtspɨyam awɨataʼm iga aputtaʼmpa jeʼm an̈matkuyjom kun juʼptyin̈kej tɨwɨtam y achioytyaʼmiñ an̈kutson̈oʼoyityam jeʼm antuʼumaajijom. Annɨʼmayyajtyim jeʼm tɨwɨtam iga wɨaptyim iwatyaj jeʼm an̈tuʼumaaji para jeʼm an̈matkuy antɨkkɨʼɨm».

Siiga in̈watpa juʼtspɨyam miwɨap iga mikuyooxaoʼyba jeʼm kumunjom, sɨʼ in̈wagakuyooxaoytyaʼm kun jeʼm tɨwɨtam iga inin̈mattaʼmpa jeʼm «wɨtampɨk an̈matyiyaj». Jeʼm ancianojyaj iñɨʼmayyaj Anne-Lise iga iwaganapudyiñ ityumpɨy jeʼm tɨwɨtam jeʼm an̈matkuyjom, jeʼ nɨmpa: «An̈kutɨʼɨyɨy iga jeempɨgam maaj wɨap añixpɨkyaj jeʼm tɨwɨtam y maaj jobity anan̈yujpa jeʼm kumun». Jesɨk miyooxpadoʼyba iga wɨtsaktaap y akkuaʼytyaap jeʼm An̈tuʼumayoʼytɨk, jeʼm tɨwɨtam iaʼmyajpa iga agui mimaymay jeʼm kumunjom. Siiga jeempɨgam in̈watpa, maaj jobity inin̈yujpa y iñaʼmyajpa jeʼm tɨwɨtam juʼuts iñfamilia espiritual.

4. Naityɨ joomityampɨk amigojyaj (2 Cor. 6:​11-13). Jesɨk miñɨkpa jeʼm an̈tuʼumaaji teguedaajɨ jeʼm tɨwɨtam. Toopɨ tiempo iga inimuruyajiñ y iñixpɨkyajiñ wiñtyi iga tsukumpa jeʼm an̈tuʼumaaji y jesɨk kuyajpa. Teguedaajɨ iñjɨɨsayyaj iñɨɨyi. Siiga jeempɨgam  in̈watpa, jeʼm tɨwɨtam maymayayajpa y miamigojayajpa.

Akwiñkeejɨ mijuʼuts y odoy mɨgoʼoyɨ numaaj iga in̈wɨnanɨgaʼyba ityumpɨyyaj. Waatɨ juʼuts iwat Lucinda: «Antɨʼptaʼm jeʼm tɨwɨtam antɨkkɨʼɨm, jeʼyukmɨ anaity wɨtampɨk amigojyaj».

«NAWƗ̱PƗCTSOŊTAMTA̱JƗ»

Weeñiyaj tsaʼayajpa ityɨgɨyyaj tuum An̈tuʼumayoʼytyɨkjom juuty dyaʼ ixpɨkyajtaap. Siiga algun i nuʼkpa jeʼm in̈kumunjom, ¿juutypɨk wɨap iñyooxpaʼtyaj? Jeʼm apóstol Pablo nɨm: «Nawɨ̱pɨctsoŋtamta̱jɨ mimicht́am juutst́im taɨch tawɨ̱pɨctsoŋ jém Cristo» (Rom. 15:7). Jeʼm ancianojyaj iwatkiʼpsyajiñ Cristo y iyooxpaʼtyajiñ jempɨk yaguiñ nuʼkyajpa jeʼm kumunjom (aʼmɨ jeʼm recuadro « Tyi in̈wadyiñ siiga minikukagaytyaap»). Tantumpɨytyam wɨap tanyooxpadoytyam iga jempɨk yaguiñ nuʼkneyaj jeʼm kumunjom maymayayajiñ.

Wɨap tantɨʼpyaj jeʼm tantɨkkɨʼɨm y tanyooxpaʼtyaj kun tyityam ityogoyayyaj. Tuum yoomtɨwɨ ityop tiempo iga iyooxpaʼtpa tuum yoomtɨwɨ yaguiñpɨk nuʼkneʼ iga iixpɨguiñ jeʼm ciudad y juutypɨk wɨap ixɨsɨoy. Jeʼm yoomtɨwɨ nɨmpa iga tsaam maymaya iga kun toyoʼoyi yooxpaʼtta.

MƗJAAJƗ ESPIRITUALMENTE

Wɨapsɨ iga jesɨk miñɨkpa tuum joomipɨk kumunjom, mikɨɨn̈ba y mikobakpijpa. Kujɨɨsɨ, juʼutstyim tuum tsuʼukiñ kukakpa iñɨk iga tsɨʼyiñ juʼuts tuum meemeʼ, tan̈wadyiñ tyityam nasuntaap iga odoy pɨɨmi takobakpijtyaʼmiñ iga wɨaiñ tammɨja espiritualmente y tan̈wɨkuyooxaiñ Jehová. Nicolas y Céline nɨmyajpa: «Jesɨk miñɨkpa tun̈gak an̈eymɨ tsaam miyooxpaʼtpa, iñixpɨkpa tun̈gakyaj y miyooxpaʼtpa iniity wɨtampɨk cualidades». Jean-Charles in̈matpa juutypɨk iwɨwaday  jeʼm ifamilia jesɨgam nɨkyaj tun̈gak kumunjom: «Jeʼm ammanɨktam majtyim mɨjayaj espiritualmente. Jeʼm anyommaanɨk moj iknas iasignación jeʼm an̈tuʼumaaji de entre semana y jeʼm anjaymanɨk tsɨʼy juʼuts an̈matkɨʼɨwiñ».

Siiga dyaʼ wɨaneʼ iñyooxpadoy tun̈gak kumunjom, odoy an̈yaʼakɨ. Wɨap inikkupak weeñi jɨɨxian̈chioʼoyiyaj ijɨykimpaʼap yɨʼp an̈kejayoʼoyi, keʼnam jesɨk sɨʼ iniktsukum tuum joomipɨk yooxakuy jeʼm kumunjom. Kupɨɨkɨ iga Jehová miyooxpaʼtpa, puutɨ jeʼm an̈matkuyjom kun jeʼm tɨwɨtam y wɨixpɨkyaajɨ iga iniity wɨtampɨk amigojyaj. ¿Oyñeʼ iñjɨɨs juutypɨk wɨap iñyooxpaʼtyaj jempɨk yaguiñ nuʼkyajpa jeʼm in̈kumunjom? Siiga in̈watpa, mɨjaap jeʼm iñtyoyoʼoyi y mimɨjaptyim espiritualmente (Juan 13:35). Y kupɨɨkɨ iga jempɨk in̈watpa, «jex juuts tu̱m sacrificio jém iwɨ̱aŋja̱mpáppɨc Dios» (Heb. 13:16).

Mex iga uxan̈ tan̈kaʼ, jaʼyan̈ tɨwɨtam in̈yujneyaj y maymayyaj jesɨk nɨkyajpa tun̈gak kumunjom. ¡Y jeempɨktyim wɨap in̈wat! Anne-Lise nɨmpa: «Iga anɨk tun̈gak kumunjom ayooxpaʼtneʼ iga añixpɨguiñ tun̈gakyaj». Kazumi nɨmpa: «Jesɨk miñɨkpa tun̈gak kumunjom in̈wɨkupɨkpa iga Jehová dyaʼ michakpa in̈kutyum, miyooxpaʼtpa juʼuts dyaʼ oyba in̈kujɨɨs». ¿Y tyi nɨmpa Jules? Jeʼ nɨmpa: «Anaity jaʼyan̈ anamigojyaj y tsaam wɨɨ anan̈jaam. Anjaampa iga anaity tuum joomipɨk familia iga dyaʼ antsaktoʼoba».