Iga wɨaiñ tammaymaywat Jehová nasuntaap iga tanaidyiñ fe. Pero jeʼm Biblia nɨmpa iga «d́a it́u̱mpɨy pɨxiñt́am» iniityyaj fe (2 Tes. 3:2). Jesɨgam Pablo ijaykunuʼk yɨʼpyaj an̈matyiyaj sɨʼ idyɨk ijɨykiʼm «jém malopɨc pɨxiñt́am y de jém tamalwadaypáppɨc», y nasuntaap idyɨk iga kɨakputtaiñ. Pero jesɨgam nɨm iga dyaʼ ityumpɨyyaj wɨap iniityyaj fe sɨʼ idyɨk ijɨykiʼm jempɨk dyaʼ ikupɨkyaj iga ity Dios mex iga jeʼ iwatneʼ ityumpɨy jempɨk tanaʼmpa (Rom. 1:20). Weeñi nɨmyajpa iga ity algun i iga iniity jaʼyan̈ pɨɨmi. Pero dyaʼ nɨmtoʼoba iga iniityyaj jeʼm fe juʼuts jempɨk Jehová iwaʼkpa.

Iga tammaymaywadyiñ Jehová wɨɨ iga tan̈wɨkupɨktaʼmiñ iga jeʼ ity y iga ikumayketpa jempɨk iniityyaj fe (Heb. 11:6). Jeʼm fe tampɨktson̈ba ikuyukmɨ jeʼm espíritu santo. Siiga tampɨktson̈toʼoba, tan̈waʼgaʼyiñ Jehová (Luc. 11:​9, 10, 13). Nasuntaptyim iga tammayiñ jeʼm Biblia —jempɨk ichakneʼ ikuyukmɨ jeʼm iespíritu— okmɨ tan̈kujɨɨstaʼmiñ jempɨk sɨʼ tammay y tan̈watkiʼpstaʼmiñ jempɨk sɨʼ tan̈kuyujkaʼ. Jeempɨgam tampɨktson̈taʼmpa jeʼm espíritu santo y tayooxpaʼtpa iga tanaidyiñ jeʼm fe jempɨk Jehová imaymaywatpa.