KUYUUJI 25
WAAÑI 7 Jehová es mi fuerza y mi salvación
Tan̈kujɨɨstaʼmiñ iga Jehová nunta ity
«¡Jehová nunta ity!» (SAL. 18:46).
AN̈KEJAYOʼOYI
Juutypɨk tawɨwadaʼyba tan̈kujɨɨs iga Jehová nunta ity.
1. ¿Tyi tayooxpaʼtpa iga seguido tan̈koosteñaytyaʼmiñ Jehová mex iga tanaitypa yaʼachaajiyaj?
JEʼM Biblia nɨmpa iga yɨʼp in̈an̈pɨgam jaama tsaam tayaʼachataʼmpa (2 Tim. 3:1). Pero jeʼm Dios iyooxakɨʼɨwiñyaj dyaʼ numaaj yaʼachayajpa, an̈teeñkamokyajtaptyim. ¿Tyi tayooxpaʼtpa iga seguido tan̈koosteñaytyaʼmiñ Jehová mex iga tayaʼachataʼmpa? Siiga juchixkej tan̈kujɨɨspa iga Jehová jeʼam jeʼm «Dios vivoj» (Jer. 10:10; 2 Tim. 1:12).
2. ¿Juutypɨk tanjoodon̈tam iga Jehová nunta ity?
2 Jehová nunta ity y juchixkej tayooxpaʼtpa jesɨk iaʼmpa jempɨk sɨʼ tannaskataʼm (2 Crón. 16:9; Sal. 23:4). Siiga tanjɨɨspa iga Jehová tsaam tateguet, tayooxpaʼtpa iga wɨaiñ tanyaʼachɨy juʼptyin̈kej kutɨʼɨchi. Tanaʼmiñ juutypɨk yooxpaʼtta David.
3. ¿Tyi idyɨk nɨmtoʼoba David jesɨk nɨm: «¡Jehová nunta ity!»?
3 David iwɨixpɨkpa y iniidyay idyɨk confianza Jehová. Jeʼyukmɨ iwaʼgay iyooxpadoʼoyi jesɨgam Saúl ikkaʼatoʼoba idyɨk (Sal. 18:6). David iaʼm juutypɨk Jehová ikutson̈ y ikɨakput, jeʼyukmɨ nɨm: «¡Jehová nunta ity!» (Sal. 18:46). Kun yɨʼpyaj an̈matyiyaj dyaʼ numaaj nɨm iga Dios nunta ity. Tuum obra de consulta nɨmpa iga sɨʼ idyɨk ikwiñkej iga iniidyay confianza «juʼuts tuum Dios vivojpɨk iga juchixkej iyooxpaʼtpa jeʼm ikumun». David iaʼm juutypɨk Jehová iyooxpaʼt y yɨʼp ikkupɨk iga nunta ity, ipɨɨmchiʼ iga seguido ikuyooxaiñ y ikujiʼbiñ (Sal. 18:28, 29, 49).
4. ¿Juutypɨk tayooxpaʼtpa siiga tan̈kupɨkpa iga Dios nunta ity?
4 Siiga tan̈kupɨkpa iga Dios nunta ity, tayooxpaʼtpa iga tan̈kuyooxaiñ kun maymayaaji. Tayooxpaʼtpatyim iga tanyaʼachɨʼyiñ juʼptyin̈kej kutɨʼɨchiyaj, taanmajan̈chiʼiba iga seguido tan̈wɨkuyooxaiñ y odoy tanjagan̈tsaguiñ.
JEʼM DIOS IGA NUNTA ITY MIPƗƗMCHIʼIBA
5. ¿Tyi tayooxpaʼtpa tanan̈an̈kamok jeʼm kutɨʼɨchiyaj? (Filipenses 4:13).
5 Wɨap tanyaʼachɨy juʼptyin̈kej kutɨʼɨchiyaj siiga tan̈kujɨɨspa iga Jehová nunta ity y jeʼ juchixkej tayooxpaʼtpa. Jeʼ tsaam pɨɨmiɨy, dyaʼ tyi ijoo juʼutspɨk yaʼachaaji sɨʼ tannaskaʼ, tayooxpaʼtpa iga wɨaiñ tanyaʼachɨy (maayɨʼ Filipenses 4:13). Jeʼyukmɨ wɨap tanaidyay confianza. Jesɨk tanaʼmpa juutypɨk Jehová tayooxpaʼtneʼ tanyaʼachɨy jeʼm kutɨʼɨchiyaj, dyaʼ takɨɨn̈ba, y tan̈kupɨkpa iga jesɨk pɨɨmi tayaʼachaap jeʼ wɨaptyim tayooxpaʼt.
6. ¿Tyi iyooxpaʼt David iga majnam iniidyaʼyiñ confianza Jehová?
6 Tanaʼmiñ jempɨk iñaskaʼ David y tyi iyooxpaʼt iga majnam iniidyaʼyiñ confianza Jehová. Jesɨgam mañiñam ikuixaʼyba idyɨk jeʼm ijaatun̈ iovejajyaj, tun̈kɨy tuum tenat ikɨʼɨstɨʼp tuum oveja, tun̈gak jaama tuum oso jeʼtyim iwattɨʼp. Pero David dyaʼ kɨɨn̈ i ikkaʼ yɨʼp wɨsteen animatyaj. Ijoodon̈ idyɨk iga Jehová jempɨk sɨʼ idyɨk iyooxpaʼt, jeʼyukmɨ dyaʼ nakujiʼpta (1 Sam. 17:34-37). David dyaʼ keman ikujaʼamay jempɨk iñaskaʼ y yɨʼbam iyooxpaʼt iga majnam iniidyaʼyiñ confianza Jehová.
7. ¿Tyi iyooxpaʼt David iga wɨaiñ ikooñwɨy Goliat?
7 Maaj okmɨ David mex iga mañiñam idyɨk, oy juuty nɨkneʼ an̈aajiyaj jeʼm israelitajyaj. Iaʼm iga tsaam ikɨɨn̈neyaj idyɨk tuum filisteo iñɨɨyipɨk Goliat y nɨmpa idyɨk ixɨʼ: «¡Yɨʼp jaama sɨʼ anan̈teeñkamok jeʼm Israel iejército!» (1 Sam. 17:10, 11). Jeʼeyaj tsaam ikɨɨn̈neyaj idyɨk iga pɨɨmi yon̈neʼ y sɨʼ idyɨk iotyɨʼmayyajta (1 Sam. 17:24, 25). Pero David dyaʼ kɨɨn̈, iaʼm iga Goliat sɨʼ idyɨk in̈teeñkamok jeʼm nuntapɨk Dios y dyaʼ jeʼm ejército itywɨʼɨp Israel (1 Sam. 17:26). Jeʼ ikujɨɨspa idyɨk juutypɨk Jehová iyooxpaʼt iga ikuixiñ jeʼm ovejajyaj, jeʼyukmɨ ikupɨk iga sɨɨ iyooxpaʼtpatyim idyɨk. Y kun jeʼm iyooxpadoʼoyi inin̈a Goliat y ikkaʼ (1 Sam. 17:45-51).
8. ¿Tyi tayooxpaʼtpa tampɨɨmchiʼ jeʼm confianza tanaidyaywɨʼɨp Jehová jesɨk tanan̈an̈kamokpa tan̈kapɨk kutɨʼɨchiyaj? (Aʼmɨtyim jeʼm imagen).
8 Juʼutstyim David, wɨap tanyaʼachɨytyaʼm juʼptyin̈kej kutɨʼɨchiyaj siiga tan̈kujɨɨspa iga Jehová juchixkej tayooxpaʼtpa (Sal. 118:6). Wɨap tampɨɨmchiʼ yɨʼp confianza jesɨk tan̈kujɨɨspa juutypɨk Jehová ikɨakput wiñɨk jaama jeʼm iyooxakɨʼɨwiñyaj (Is. 37:17, 33-37). Wɨaptyim in̈kɨʼpin̈ nasɨyoʼoyiyaj putneyajwɨʼɨp en jw.org, juuty in̈kejpa juutypɨk Jehová iyooxpaʼtneʼ weeñi tɨwɨtam. Kujɨɨsɨtyim juʼtspɨy miyooxpaʼtneʼ iñityijom. Tsaam mityeguet y mityɨʼpneʼ iga iñamigojaiñ (Juan 6:44). Jeʼ miyooxpaʼtneʼ iga seguido in̈kuyooxaiñ. ¿Tyiʼiga dyaʼ in̈waʼgaʼyba Jehová iga miyooxpaʼdyiñ in̈kujɨɨs juutypɨk mikutson̈ayñeʼ inin̈wejpadoʼoyi, y juutypɨk miyooxpaʼtneʼ jesɨk inin̈an̈kamokneʼ tan̈kapɨk kutɨʼɨchiyaj? Siiga in̈watpa yɨʼɨmpɨk maaj in̈kupɨkpa iga jeʼ juchixkej miyooxpaʼtpa.
Juutypɨk tanan̈an̈kamokpa jeʼm kutɨʼɨchiyaj ikwiñkejpa siiga tan̈kupɨkpa Jehová. (Aʼmɨ jeʼm párrafojyaj 8 y 9).
9. ¿Tyi tan̈wadyiñ jesɨk tanan̈an̈kamokpa kutɨʼɨchiyaj? (Proverbios 27:11).
9 Jesɨk tanjoodon̈tam iga Dios nunta ity, tayooxpaʼtpa tanaity tuum wɨbɨk jɨɨxi siiga tanan̈an̈kamokpa tan̈kapɨk kutɨʼɨchiyaj. Jeʼm Wookkɨʼɨwiñ nɨmpa iga jesɨk tayaʼachataʼmpa, dyam tan̈kupɨkpa Jehová y tanjagan̈tsakpa (Job 1:10, 11; maayɨʼ Proverbios 27:11). a Jeʼyukmɨ siiga takupɨgoʼyba, tanakwiñkejpa iga tantoyba Jehová y iga jeʼm Wookkɨʼɨwiñ mɨgoʼyba. Siiga sɨʼ miyaʼachwat jeʼm An̈jagoʼoyi, dyam mikutumiñ, dyaʼ mikumaton̈taap jeʼm an̈matkuyjom, odoy an̈yaʼakɨ. Kujɨɨsɨ iga jesɨk mikupɨgoʼyba wɨap immaymaywat Jehová. Odoy kujaʼamaʼayɨ iga jeʼ dyaʼ michakpa in̈kutyum, miyooxpaʼt iga iñyaʼachɨʼyiñ (1 Cor. 10:13).
JEʼM DIOS IGA NUNTA MIKUMAYKETPA
10. ¿Tyi ichiʼiba jeʼm Dios iga nunta ity jempɨk ikoosteñayyajpa?
10 Jehová ikumayketpa jempɨk ikoosteñayyajpa (Heb. 11:6). Sɨɨ tachiʼiba paz y maymayaaji y jeʼm tannɨgɨyoʼoyijom tuum ityi dyapɨk kuyajpa. Tan̈wɨkupɨknetaʼm iga jeʼ takumaykettoʼoba y wɨap iwat. Yɨʼp tayooxpaʼtpa iga seguido tan̈kuyooxaiñ juutypɨktyim iwatyaj jeʼm iyooxakɨʼɨwiñyaj wiñɨk jaama. Tan̈kɨʼpin̈taʼmiñ jempɨk Timoteo iwat (Heb. 6:10-12).
11. ¿Tyi iyooxpaʼt Timoteo iga wɨkuyooxaoʼyiñ jeʼm kumunjom? (1 Timoteo 4:10).
11 (Maayɨʼ 1 Timoteo 4:10). Timoteo ikupɨk iga Jehová nunta ity, ikupɨkpatyim idyɨk iga jeʼ ikumayketpa. Jeʼyukmɨ ikuyooxa y ikuyooxatyim tun̈gakyaj ¿Juutypɨk iwat? Jeʼm apóstol Pablo ianmajan̈chiʼ iga wɨan̈kejayoʼyiñ y wɨnajɨʼyoʼyiñ, y tsɨʼyiñ juʼuts tuum wɨbɨk akwiñkejoʼoyi para jeʼm tɨwɨtam. Chiʼitya tan̈kapɨk yooxakuy, in̈jɨyjaguiñ idyɨk kun toyoʼoyi jempɨk ityogoyayyaj jɨɨxian̈chioʼoyi mex siiga mañiyajnam o tsaamiyajam (1 Tim. 4:11-16; 2 Tim. 4:1-5). Timoteo iwɨkupɨkneʼ idyɨk iga Jehová ikumayketpa kun jeʼm yooxakuy iwatwɨʼɨp, mex iga tun̈gakyaj dyaʼ ichoowaixyajpa idyɨk (Rom. 2:6, 7).
12. ¿Tyi iyooxpaʼtyajpa jeʼm ancianojyaj iga wɨkuyooxaoyyajiñ? (Aʼmɨtyim jeʼm imagen).
12 Juʼutstyim Timoteo, jeʼm ancianojyaj iwɨkupɨkneyaj iga Jehová ichoowaixpa jeʼm yooxakuy iwatyajpaʼap. Dyaʼ numaaj ikuixyajpa jeʼm kumun, an̈kejayoyyajpa y putyajpa jeʼm an̈matkuyjom, jaʼyan̈yaj yooxpadoyyajpatyim en jeʼm proyectos de construcción y labores de socorro. Tun̈gakyaj kuyooxaoyyajpa en jeʼm Grupos de Visita a Pacientes o en jeʼm Comités de Enlace con los Hospitales. Jeʼm ancianojyaj ijoodon̈yaj iga Jehová imɨʼɨchiʼ jeʼm kumun. Jeʼyukmɨ iwatyajpa iyooxakuy kun ityumpɨy ianmaj y iwɨkupɨkneyaj iga Dios ikumayketyajpa (Col. 3:23, 24).
Jeʼm nuntapɨk Dios ikumayketpa jeʼm yooxakuy in̈watpaʼap jeʼm kumunjom. (Aʼmɨ jeʼm párrafojyaj 12 y 13).
13. ¿Juʼuts in̈jaam Jehová jesɨk in̈kuyooxaap kun ityumpɨy iñanmaj?
13 Dyaʼ tantumpɨytyam wɨap tantsɨʼytyaʼm juʼuts anciano, pero tantumpɨytyam wɨap tankuyooxataʼm Jehová. Jeʼ tsaam ichoowaixpa jesɨk tan̈watpa kun ityumpɨy tananmaj, ichoowaixpatyim jesɨk tachioytyaʼmpa tandonación mex iga dyaʼ juʼchan̈. Tsaam maymay jesɨk takutson̈oytyaʼmpa jeʼm an̈tuʼumaajijom mex iga tatsaʼap. Maymaytyim jesɨk iaʼmpa iga tan̈wadaʼyba perdón tun̈gakyaj. Mex siiga iñjaampa iga dyaʼ juʼchan̈ in̈kuyooxaap Jehová, kujɨɨsɨ iga jeʼ tsaam ichoowaixpa jempɨk in̈watpa. Mityoyba y mikumayketpa (Luc. 21:1-4).
ODOY TANJAGAN̈TSAKTAʼMIÑ JEʼM DIOS IGA NUNTA ITY
14. ¿Juutypɨk tayooxpaʼtpa jesɨk tampɨɨmchiʼiba jeʼm tan̈wɨnanɨgoʼoyi kun Jehová? (Aʼmɨtyim jeʼm imagen).
14 Siiga tan̈kupɨkpa iga Jehová nunta ity maaj dyaʼ tan̈kaʼap tan̈kupɨgoy. Jeʼam iwat José, dyaʼ tan̈kawat sexualmente iga ijoodon̈ idyɨk iga Dios nunta ity y dyaʼ iwattoʼoba idyɨk jempɨk jeʼ dyaʼ ikusuʼnɨʼyba (Gén. 39:9). Iga wɨaiñ tan̈kupɨk Jehová, tantoptaʼmiñ tiempo iga tanan̈wejpaʼdyiñ y tuum jaama tan̈kuyujkaaʼyiñ jeʼm In̈maatyi. Jeempɨgam jeʼm tan̈wɨnanɨgoʼoyi kun jeʼ majtyim mɨjaap. Juʼutstyim José siiga tanaity tuum wɨnanɨgoʼoyi kun Jehová, dyaʼ tan̈watpa jempɨk jeʼ dyaʼ ikusuʼnɨʼyba (Sant. 4:8).
Siiga dyaʼ iñjagan̈tsakpa jeʼm Dios iga nunta ity miyooxpaʼtpa iga mikupɨgoʼyiñ. (Aʼmɨ jeʼm párrafojyaj 14 y 15).
15. ¿Tyi tan̈kejaytyaʼmpa jempɨk iwatyaj jeʼm israelitajyaj jesɨgam jaʼy ityiyaj jeʼm tɨtsɨnaxyukmɨ? (Hebreos 3:12).
15 Jempɨk ikujaʼamayyajpa iga Jehová nunta ity, maaj dyaʼ tan̈kaʼap ijagan̈tsakyaj. Jeʼam iñaskayaj jeʼm israelitajyaj jesɨgam jaʼy ityiyaj jeʼm tɨtsɨnaxyukmɨ. Ijoodon̈yaj idyɨk iga Jehová nunta ity, pero dyam ikupɨkyaj iga yooxpaʼtyajtaap idyɨk. Jeʼyukmɨ akwaʼgoyyaj: «¿Ity o dyaʼ ity Jehová kun taɨchtyam?» (Éx. 17:2, 7). Maaj okmɨ dyam kupɨgoyyaj. Taɨchtyam dyaʼ tan̈wattamtoʼoba juʼuts jeʼeyaj (maayɨʼ Hebreos 3:12).
16. ¿Tyi wɨap ikutɨʼts jeʼm tanfe?
16 Yɨʼp in̈an̈pɨgam jaama uxan̈ tan̈kaʼ tan̈kupɨk Jehová. Jaʼyan̈yaj nɨmyajpa iga Dios dyaʼ ity, y keʼnam maaj iwɨnɨgayyajpa jempɨk dyaʼ ikupɨkyajpa. Ityumpɨy yɨʼp ikutɨʼtspa jeʼm tan fe. Mex iga dyaʼ tantsakpa tan̈kupɨk iga ity Dios, wɨapsɨ iga mojpa tanjɨɨs iga jeʼ dyam tayooxpaʼtpa. Wɨap tannaskaʼ juʼuts iñaskaʼ jempɨk ijay jeʼm Salmo 73. Jeʼ iaʼm iga jempɨk dyaʼ ikupɨgayyajpa jeʼm ian̈kiʼmayoʼoyiyaj keʼnam maaj iwɨnɨgayyajpa, jeʼyukmɨ moj ijɨɨs iga ken dyaʼ sɨʼ iwɨnɨgay iga ikuyooxaap Jehová (Sal. 73:11-13).
17. ¿Tyi tayooxpaʼtpa iga majtyim tan̈kunuʼguiñ Jehová?
17 ¿Tyi iyooxpaʼt jeʼm salmista iga odoy jɨɨxtyogoʼyiñ? Ikujɨɨs tyi iñaskayajpa jempɨk dyaʼ ikupɨkyajpa Jehová (Sal. 73:18, 19, 27). Ikujɨɨstyim jeʼm kumaykedoʼoyiyaj ipɨktson̈paʼap iga sɨʼ ikuyooxa Jehová (Sal. 73:24). Taɨchtyam tan̈kujɨɨxiñtyim jeʼm kumaykedoʼoyiyaj tachiʼiñetamwɨʼɨp Jehová y tan̈kukiʼpxiñ juʼuts idyɨk tañityityam wiñtyi iga mojiñ tan̈kuyooxa. Siiga tan̈watpa yɨʼɨmpɨk, tayooxpaʼtpa tan̈kupɨk Jehová y tanɨmpatyim juʼuts nɨm jeʼm salmista: «Maaj awɨnɨgaʼyba siiga an̈kunuʼkpa Dios» (Sal. 73:28).
18. ¿Tyiʼiga dyaʼ tan̈kɨɨn̈ba jeʼm tannɨgɨyoʼoyi?
18 Yɨʼp in̈an̈pɨgam jaama tanan̈an̈kamokpa juʼptyin̈kej kutɨʼɨchiyaj iga tan̈kuyooxataʼmpa «jém nu̱mapɨc Dios, jém d́apɨc caane» (1 Tes. 1:9). Jeʼ nunta ity y tsaam tateguet, y juchixkej tayooxpaʼtpa. Jeʼam iwat kun jeʼm iyooxakɨʼɨwiñyaj wiñɨk jaama y sɨɨ jeempɨktyim iwatpa. Dyaʼ jaʼyñeʼ miñba jeʼm mɨjpɨk yaʼachaaji, pero dyaʼ taitytyaʼmpa tan̈kutyum (Is. 41:10). «Wɨa̱p tanɨm: Aŋwɨ̱jo̱doŋ iga Dios ayo̱xpátpa. D́a t́i aŋcɨ̱ŋpa» (Heb. 13:5, 6).
WAAÑI 3 Tú me das fuerza, confianza y valor
a Proverbios 27:11: Akwiñkeejɨ joodon̈oʼoyi, mammaanɨk, y maymaywaatɨ ananmaj iga wɨaiñ an̈kutson̈ jempɨk sɨʼ akujɨy.
