1, 2. Siiga dyanam wɨap iñchin̈, ¿tyiʼiga odoy min̈yaʼguiñ? (Aʼmɨ jeʼm fotojyaj itywɨʼɨp yɨʼp totjaayi iwiñjom).

 SIIGA mimich iñjɨɨsneum iga michin̈ba, tuum wɨbɨk jɨɨxi impɨkneʼ. ¿Miniwɨtsaknetawum iga inikkupakpa juʼuts iñjɨɨsneʼ? Siiga in̈wɨpɨkneum iñjɨɨxi y jeʼm ancianojyaj miñɨʼmayñeyajum iga wɨabam iñchin̈, odoy chokoyaajɨ. Yɨʼɨmpɨgam mimaymayaap jeʼm iñityijom iga in̈kuyooxaap Jehová.

² Pero ¿siiga miñɨʼmaytya iga dyanam wɨap iñchin̈? ¿O siiga iñjaampa iga dyanam wɨap iñchin̈? Odoy an̈yaʼakɨ, seguido waatɨ tyityam nasuntaap iga wɨaiñ inikkupak juʼutsam iñjɨɨsneʼ, dyaʼ tyi ijoo siiga mimañiñam o michaamiam.

3. ¿Tyi iñɨʼmay tuum Etiopíapɨk teguedɨʼɨyi a Felipe, y tyi wɨap tanjɨɨs? (Hechos 8:36, 38).

³ (Maayɨʼ Hechos 8:36, 38). Tuum Etiopíapɨk teguedɨʼɨyi ikwaʼk Felipe: «¿Que ɨch d́a wɨa̱p anacchiŋ?». Yɨʼp takkutɨʼɨyɨʼyba iga jeʼ chin̈toʼoba idyɨk. Pero ¿nawɨtsaknetawum idyɨk iga iwatpa jeempɨk?

4. ¿Juutypɨk ikwiñkej jeʼm etíope iga majnam idyɨk ijoodon̈atoʼoba jempɨk in̈kejpa jeʼm Dios In̈maatyi?

⁴ Jeʼm etíope «oy Jerusalén iga ijɨ̱spa Dios» (Hech. 8:27). Wɨapsɨ iga dyaʼ idyɨk jeʼ judío, pero iixpɨkpa idyɨk Jehová y jeʼm ian̈kiʼmayoʼoyiyaj. Jesɨgam Felipe ipaʼt tun̈jom, ¿tyi idyɨk sɨʼ iwat yɨʼp pɨɨxiñ? Iga ijoodon̈atoʼobanam sɨʼ  idyɨk imay tuum jaakaʼ jeʼm rollo ijaywɨʼɨp Isaías (Hech. 8:28). Jeʼm etíope dyaʼ numaaj ijoodon̈atoʼoba idyɨk jeʼm an̈kejayoʼoyiyaj dyapɨk tan̈kaʼ tan̈kutɨʼɨyɨy, iwɨkutɨʼɨyɨytyoʼoba idyɨk jeʼm an̈kejayoʼoyi sɨʼpaʼap imay.

5. ¿Tyi iwat jeʼm etíope kun jempɨk ijoodon̈ idyɨk?

⁵ Jeʼm pɨɨxiñ jeʼ tuum mɨjpɨk teguedɨʼɨyi iga ikuyooxaap idyɨk Candace, jeʼm reina de Etiopía. Jeʼm iyooxakuy jeʼ iga «iccáyáypa jém [...] it́umiñ» (Hech. 8:27). Wɨapsɨ iga tsaam idyɨk jaʼyan̈ yooxakuy iniity. Pero ityop tiempo iga wɨaiñ ikujiʼp Jehová. Dyaʼ numaaj ikuyujkaʼ jeʼm an̈kejayoʼoyiyaj, jempɨk ijoodon̈ idyɨk ipɨɨmchiʼ iga iwadyiñ juʼutsam ikuyujkaneʼ. Mex iga tsaam idyɨk juʼumjom y tsoʼowɨy mu ipuday, jeʼm pɨɨxiñ oy hasta Jerusalén iga ikoosteñaʼyba Jehová.

6, 7. ¿Tyi iwat jeʼm etíope iga majtyim mɨjaiñ jeʼm toyoʼoyi iniidyaywɨʼɨp idyɨk Jehová?

⁶ Felipe iwɨan̈maday jeʼm etíope jeʼm an̈kejayoʼoyiyaj jempɨk jeʼ dyaʼ idyɨk ijoodon̈, in̈maday iga Jesús jeʼam jeʼm Mesías (Hech. 8:34, 35). Jeʼm etíope pɨɨmi maymaya jesɨgam ijoodon̈a ityumpɨy jempɨk Jesús iwatneʼ idyɨk por jeʼ. ¿Tyisɨ idyɨk iwatpa? Jeʼ wɨa idyɨk mu ijɨɨs iga dyam tyi maaj nasuntaap. Pero iga jeʼm toyoʼoyi iniidyaywɨʼɨp idyɨk Jehová y Jesús majtyim mɨjaneum, jeʼyukmɨ ipɨk jeʼm ijɨɨxi iga chin̈ba y tsɨʼy juʼuts tuum Jesús ikuyujkɨʼɨwiñ. Felipe iaʼm iga wɨabam idyɨk ichin̈, jeʼyukmɨ ikchin̈.

⁷ Jeʼm etíope iakwiñkejoʼoyi miyooxpaʼtpa iga miniwɨtsaktaiñ iga wɨaiñ iñchin̈. Jesɨk wɨaptyim iññɨm: «¿Que ɨch d́a wɨa̱p anacchiŋ?». Sɨɨ tan̈kɨʼpin̈taʼmpa tyi miyooxpaʼtpa iga in̈wadyiñtyim juutypɨk jeʼ iwat: seguido kuyujkaɨʼ jeʼm Dios In̈maatyi, waatɨ juutypɨgam in̈kuyujkaneʼ y pɨɨmchiɨʼ jeʼm toyoʼoyi iniidyaywɨʼɨp Jehová.

8. Juʼuts nɨmpa Juan 17:3, ¿tyi wɨɨ iga in̈wadyiñ?

⁸ (Maayɨʼ Juan 17:3). ¿Mianmajan̈chiʼ yɨʼpyaj an̈matyiyaj nɨmwɨʼɨp Jesús iga mojiñ in̈kuyujkaʼ jeʼm Biblia? Jaʼyan̈yaj jeempɨgam iwatyaj. Pero yɨʼpyaj an̈matyiyaj taanmajan̈chiʼibatyim iga seguido tan̈wattaʼmiñ jeempɨk. Dyaʼ keman yajpa tañixpɨk jeʼm «nuntapɨk Dios» (Ecl. 3:11). Seguido tañixpɨktaʼmpa jesɨk tanaitytyaʼmum jeʼm ityi dyapɨk kuyajpa. Y jesɨk maaj tañixpɨktaʼmpa Jehová, majtyim tan̈kunuʼktaʼmpa (Sal. 73:28).

9. ¿Tyi nasuntaap iga tan̈wadyiñ okmɨ iga tan̈kutɨʼɨyɨyñeum jeʼm an̈kejayoʼoyiyaj dyapɨk tan̈kaʼ?

⁹ Jesɨk algun i mojpa iixpɨk Jehová, mojpa ikuyujkaʼ jeʼm an̈kejayoʼoyiyaj dyapɨk tan̈kaʼ tan̈kutɨʼɨyɨy, en jeʼm carta ijaʼyaywɨʼɨp  a jeʼm hebreos jeʼm apóstol Pablo iknɨʼɨyakaʼ «jém aŋquímayooyi d́apɨc táŋca». Dyaʼ idyɨk nɨmtoʼoba iga dyaʼ tyi kumeskuy jeʼm an̈kejayoʼoyi «mojwɨɨp taŋcuyujca», nɨmpa idyɨk ixɨʼ iga yɨʼpyaj an̈kejayoʼoyiyaj jeex juʼuts jeʼm leche iukpaʼap tuum xutyu tsɨɨxiʼ (Heb. 5:12; 6:1). Ianmajan̈chiʼityim jeʼm cristianojyaj iga iwɨkuyujkayajiñ jeʼm Dios In̈maatyi y dyaʼ numaaj ikuyujkayajiñ jeʼm an̈kejayoʼoyiyaj dyapɨk tan̈kaʼ ikutɨʼɨyɨytya. ¿Tsaam in̈kuyujkatoʼoba mich yɨʼpyaj an̈kejayoʼoyiyaj? ¿Impɨkneʼ iñjɨɨxi iga majnam iñixpɨktoʼoba Jehová y in̈kutɨʼɨyɨytyoʼoba jempɨk jeʼ iwatpa?

10. ¿Tyiʼiga weeñiyaj ityan̈kaʼ an̈jaamyajpa jeʼm kuyuuji?

¹⁰ Weeñiyaj ityan̈kaʼ an̈jaamyajpa jeʼm kuyuuji. ¿Y mimich? ¿Min̈kejaytya en jeʼm escuela iga in̈wɨkuyujkaiñ jeʼm librojyaj y dyaʼ numaaj iga immayiñ? ¿In̈kusuʼnɨʼyba idyɨk in̈wat? ¿O dyaʼ idyɨk in̈kusuʼnɨʼyba immay jeʼm librojyaj? Dyaʼ numaaj mich iññaskaʼ jeempɨk. Pero sɨɨ, siiga jeexñam inin̈jaam, Jehová miyooxpaʼtpa iga miwɨkuyujiñ. Jeʼam jeʼm maaj wɨbɨk maestro.

11. ¿Tyiʼiga Jehová jeʼam jeʼm «Maaj Wɨbɨk An̈kejayoypaʼap»?

¹¹ Jehová nɨmpa iga jeʼam jeʼm «Maaj Wɨbɨk An̈kejayoypaʼap» (Is. 30:20, 21). Tan̈kejaʼyba kun toyoʼoyi, takutɨʼɨyɨʼyba y juchixkej iaʼmpa jeʼm wɨtampɨk jɨɨxiyaj iga iniity jeʼm ikuyujkɨʼɨwiñyaj (Sal. 130:3). Jeʼ dyaʼ keman tawaʼgaʼyba iga tan̈wadyiñ algun tyi iga dyaʼ wɨap tanakkupak. Odoy tan̈kujaʼamaʼyiñ iga jeʼam iwat jeʼm tan̈kutyootyi, tuum wɨbɨk xaaja (Sal. 139:14). Tawat kun jeʼm jɨɨxi iga tañixpɨguiñ jaʼyan̈ tyidyin̈kej, y ixunba iga seguido tan̈wadyiñ jeempɨk y tamaymaywadyiñ. Jeʼyukmɨ dende sɨɨ tan̈kusuʼnɨʼyiñ tan̈kuyujkaʼ jeʼm an̈kejayoʼoyiyaj itywɨʼɨp Bibliajom (1 Ped. 2:2). ¿Tyi wɨap miyooxpaʼt? Nakkaʼmaytyaajɨ metas iga wɨap inikkupak, maayɨʼ y kuyujkaɨʼ jeʼm Biblia tumtum jaama (Jos. 1:8). Siiga jeempɨgam in̈watpa, Jehová miyooxpaʼtpa iga majnam iñixpɨguiñ y majtyim in̈kusuʼnɨʼyiñ immay.

12. ¿Tyiʼiga tan̈kuyujkaaʼyiñ jeʼm Jesús iityi y juutypɨk ikkupak jeʼm an̈matkuy?

¹² Toopɨ tiempo iga in̈kujɨɨspa jeʼm Jesús iityi y juutypɨk ikkupak jeʼm an̈matkuy. Iga wɨaiñ tan̈kuyooxa Jehová nasuntaap iga tan̈watkiʼpxiñ Jesús, y maaj yɨʼp jaama iga tsaam tan̈kaʼ jeʼm tañityityam (1 Ped. 2:21). Jesús in̈maday jeʼm ityun̈ɨyyajpaʼap iga iñaskayajpa idyɨk tan̈kapɨk kutɨʼɨchiyaj (Luc. 14:27, 28). Pero ijoodon̈ idyɨk iga jeʼeyaj ikupɨkyajpatyim Jehová juʼutstyim jeʼ iwat (Juan 16:33). Kuyujkaɨʼ jeʼm Jesús iityi y kujɨɨsɨ juutypɨk wɨap in̈watkiʼps tumtum jaama.

13. ¿Tyi in̈waʼgaʼyiñ Jehová, y tyiʼiga?

¹³ Jesɨk takuyujpa dyaʼ numaaj iga tanaitytyoʼoba ixpɨgoʼoyi. Tan̈watpa yɨʼɨmpɨk iga tañixpɨguiñ Jehová, tantoʼyiñ y tanaidyaʼyiñ fe (1 Cor. 8:1-3). Seguido ixpɨɨkɨ Jehová, y duroj waʼgaʼayɨ iga michiʼiñ maaj fe (Luc. 17:5). Jeʼ mikutson̈aʼyba jeʼm inin̈wejpadoʼoyiyaj. Siiga mimich iñixpɨkpa jeʼm tanDios, iniitypa tuum fe pɨɨmipɨk y wɨap immɨja espiritualmente (Sant. 2:26).

14. ¿Juutypɨk in̈kej Pedro iga tsaam importante iga tan̈wadyiñ juʼutsam tan̈kuyujkaneʼ? (Aʼmɨtyim jeʼm imagen).

¹⁴ Jeʼm apóstol Pedro nɨm iga tsaam importante iga jempɨk ityun̈ɨyyajpa Cristo iwatyajiñ juutypɨgam ikuyujkaneyaj. Jesɨgam in̈mat, ipɨk jeʼm Noé iakwiñkejoʼoyi. Jehová iñɨʼmay a Noé iga ikmiñba idyɨk tuum wɨdyay kutujkɨʼ iga ikkutogoyaʼyba ityumpɨy jempɨk tsaam idyɨk imalwatyajpa peʼm tiempo. Noé y jeʼm ifamilia nawɨtsakyajtaiñ idyɨk iga wɨaiñ  inikɨakputyajta y dyaʼ numaaj iga ijoodon̈ayajiñ idyɨk iga miñba jeʼm wɨdyay kutujkɨʼ. Pedro ipɨk jeʼm an̈maatyi «Noé iwat jém mɨjpɨc [arca]» (1 Ped. 3:20). Yɨʼp takkutɨʼɨyɨʼyba iga wiñtyi iga nuʼguiñ jeʼm Wɨdyay Kutujkɨʼ, Noé y jeʼm ifamilia ikupɨkyaj jempɨk nɨm Jehová y iwatyaj tuum mɨjpɨk arca (Heb. 11:7). Okmɨ Pedro ikukiʼps jempɨk iwat Noé kun jeʼm akchin̈oʼoyi. Nɨm: «Jesanet́im sɨɨp jém nɨ tayo̱xpátpa iga tacɨacputtámiñ cuando tacchiŋtamta̱ nɨɨcɨɨm» (1 Ped. 3:21). Ityumpɨy jempɨk mimich sɨʼ in̈wat iga wɨaiñ iniwɨtsakta iga michin̈ba, jeextyim ken jempɨk Noé y jeʼm ifamilia iwatyaj jaʼyan̈ amtyɨy iga wɨaiñ ikkupakyaj jeʼm arca. Jesɨk, ¿juutypɨk wɨap iniwɨtsakta iga wɨaiñ iñchin̈?

15. ¿Juutypɨk tanakwiñkejpa iga nunta tantoʼyan̈jaampa jeʼm tan̈kaʼ tan̈watnewɨʼɨp?

¹⁵ Tantoʼyan̈jaamiñ kun ityumpɨy tananmaj jeʼm tan̈kaʼ tan̈watnewɨʼɨp (Hech. 2:37, 38). Yɨʼp nɨmtoʼoba iga tan̈wadyiñ kukakiyaj tañityijom. ¿Iñchakneum iga in̈watpa jempɨk Jehová dyaʼ ikusuʼnɨʼyba, iga odoy iniidyiñ tuum ityi inmoral, iga mijukpa, iga mimalan̈matpa o iga impɨkpa an̈matyiyaj dyapɨk wɨtam? (1 Cor. 6:9, 10; 2 Cor. 7:1; Efes. 4:29). Siiga dyanam in̈watneʼ, seguido teguedaajɨ iga iñchakpa. Namuruujɨ jempɨk sɨʼ miyooxpaʼt in̈kuyujkaʼ jeʼm Biblia o namuruujɨ jeʼm ancianojyaj siiga iñxunba yooxpadoʼoyi y an̈kiʼmayoʼoyi. Siiga mimañiñam y miityñam kun iñjaatun̈yaj, wɨap iññɨʼmayyaj iga miyooxpaʼtyajiñ iga wɨaiñ iñchak jempɨk dyaʼ miaʼmchiʼiba iñchin̈.

16. ¿Tyi nasuntaap iga in̈wadyiñ siiga majnam in̈kunuʼktoʼoba Dios?

¹⁶ Nasuntaptyim iga in̈wadyiñ jempɨk miyooxpaʼtpa iga in̈kunuʼguiñ Dios. Yɨʼp nɨmtoʼoba iga miñɨguiñ jeʼm an̈tuʼumaajiyaj y miniwɨtsaknetaiñ iga wɨaiñ iñchioy jeʼm kutson̈oʼoyiyaj (Heb. 10:24, 25). Y, jesɨk michɨʼyum juʼuts an̈matkɨʼɨwiñ dyapɨknam chin̈neʼ, puutɨ jeʼm an̈matkuy. Iñaʼmpa iga jesɨk maaj miputpa jeʼm an̈matkuy maaj mimaymayaap (2 Tim. 4:5). Siiga mimañiñam y miityñam kun iñjaatun̈yaj, nakwaʼktaajɨ: «¿Juchixkej akjɨɨsjɨsneyajpa iga anɨguiñ jeʼm an̈tuʼumaajiyaj y apudyiñ jeʼm an̈matkuy? ¿O an̈watpa anjɨɨximɨ?». Jesɨk iñjɨɨximɨ in̈watpa  ityumpɨy yɨʼp, inikwiñkejpa iga iniity fe, iga iñtyoyba Jehová y mimaymay kun ityumpɨy jempɨk jeʼ michiʼiñeʼ. Jesɨk in̈watpa ityumpɨy jempɨk miyooxpaʼtpa iga in̈kunuʼguiñ Dios, sɨʼ in̈wat «juuts ixunpa Dios» keʼnam jesɨk sɨʼ iñchiʼ xaajayaj a Jehová (2 Ped. 3:11; Heb. 13:15). Jeʼ ixunba iga tanchiʼiñ xaajayaj kun ityumpɨy tananmaj dyaʼ iga tateguedɨytyaap (aʼmɨtyim 2 Corintios 9:7). Y taɨchtyam tamaymaywatpa jesɨk tan̈kuyooxaap juʼtspɨyam tawɨap.

17, 18. ¿Tyi miyooxpaʼtpa iga wɨaiñ iñchin̈, y tyiʼiga? (Proverbios 3:3-6).

¹⁷ Jesɨk miniwɨtsaktaap iga wɨaiñ iñchin̈, inin̈an̈kamokpa kutɨʼɨchiyaj. Wɨapsɨ iga mikuxikkataap o miyaachwattaap iga in̈kupɨktoʼoba Dios (2 Tim. 3:12). O wɨapsɨ iga sɨʼ inin̈an̈kamok tuum malojpɨk jɨɨxi y tsaam tan̈kaʼaneʼ iñchak. O wɨapsɨ iga min̈yaʼkpa jesɨk iñjɨɨspa iga dyanam wɨap iñchin̈. ¿Tyi wɨap miyooxpaʼt iga inikkupaguiñ juʼutsam iñjɨɨsneʼ? Jeʼm toyoʼoyi iniidyaywɨʼɨp Jehová.

¹⁸ Jeʼm maaj wɨbɨk jaamoʼoyi iga iniity, jeʼ jeʼm toyoʼoyi iniidyaywɨʼɨp Jehová (maayɨʼ Proverbios 3:3-6). b Siiga mimich iñtyoyba Jehová kun ityumpɨy iñanmaj, wɨap iñyaʼachɨy juʼptyin̈kej nasɨyoʼoyiyaj. Jeʼm Biblia watykɨy nɨmpa iga Jehová ikwiñkejaʼyba nuntapɨk toyoʼoyi jeʼm iyooxakɨʼɨwiñyaj. Yɨʼp nɨmtoʼoba iga dyaʼ ichakpa ikutyum y juchixkej ikwiñkejaʼyba toyoʼoyi (Sal. 100:5). Mich wɨaptyim inikwiñkej yɨʼp toyoʼoyi (Gén. 1:26). Pero, ¿juutypɨk wɨap inikwiñkej?

19. ¿Juutypɨk wɨap inikwiñkej iga iñchoowaixpa jempɨk Jehová iwatpa por mimich? (Gálatas 2:20).

¹⁹ Tumtum jaama tanchiʼiñ gracias Jehová (1 Tes. 5:18). Juchixkej nakwaʼktaajɨ: «¿Juutypɨk akwiñkejay Jehová yɨʼp jaama iga atoyba?». Y jesɨk inin̈wejpaʼtpa chiɨʼ gracias por juutypɨk mikwiñkejay ityoyoʼoyi peʼm jaama. Juʼutstyim jeʼm apóstol Pablo tsoowaiixɨ jeʼm toyoʼoyi mikwiñkejaypaʼap (maayɨʼ Gálatas 2:20). Y nakwaʼktaajɨ: «¿Anakwiñkejaytyoʼoba Jehová iga antoybatyim?». Jeʼm toyoʼoyi iniidyaywɨʼɨp miyooxpaʼtpa  iga wɨaiñ inin̈an̈kamok juʼptyin̈kej kutɨʼɨchiyaj, wɨaiñ iñyaʼachɨy jeʼm kobakpiijiyaj y seguido in̈wadyiñ tyityam miyooxpaʼtpa iga in̈kunuʼguiñ Dios. Yɨʼɨmpɨgam inikwiñkejpa tumtum jaama iga iñtyoyba jeʼm iñJaatun̈ sɨn̈yukmɨpɨk.

20. ¿Tyi nɨmtoʼoba iga tan̈kɨan̈kodaʼyiñ tañityi Jehová, y tyiʼiga tsaam importante?

²⁰ Maaj okmɨ, jeʼm toyoʼoyi iniidyaywɨʼɨp Jehová miyooxpaʼtpa iga in̈wadaʼyiñ tuum an̈wejpadoʼoyi juuty iññɨʼmaʼyba iga in̈kɨan̈kodaʼyba iñityi. Y jesɨk in̈kɨan̈kodayñeum iñityi, iniitypa tuum wɨbɨk an̈jogoʼoyi iga wɨap in̈kuyooxa juchixkej. Jesɨk in̈kɨan̈kodaʼyba iñityi, iñjɨykamaʼyba iga juchixkej in̈kuyooxaap naxin tyi naspa. Yɨʼp jɨykamoʼoyi numaaj tun̈kɨy in̈watpa y dyaʼ jeʼ juʼptyin̈kej jɨɨxi. Pero jɨɨskupakneɨʼ iga yɨʼbam jeʼm maaj wɨbɨk jɨɨxi iga wɨap impɨk jeʼm iñityijom (Sal. 50:14). Jeʼm Wookkɨʼɨwiñ iktogoytyoʼoba jeʼm toyoʼoyi iniidyaywɨʼɨp Jehová, iga iñchaguiñ iga in̈kuyooxaap. Pero odoy aʼmchiɨʼ iga iwɨpudaʼyiñ ijɨɨxi (Job 27:5). Jeʼm toyoʼoyi iga iniidyay jeʼm iñJaatun̈ sɨn̈yukmɨpɨk miyooxpaʼtpa iga inikkupaguiñ jempɨk iñjɨykamayñeʼ y majtyim in̈kunuʼguiñ.

21. ¿Tyiʼiga tanɨmpa iga jesɨk tachin̈um dyaʼ jeem kuyajpa?

²¹ Okmɨ iga in̈kɨan̈kodayñeum iñityi Jehová, namuruujɨ jeʼm ancianojyaj y an̈madayyaajɨ iga michin̈toʼobam. Pero kujɨɨsɨ iga jesɨk michin̈um, dyaʼ jeem kuyajpa, yaguiñ iniktsukumpa tuum wɨbɨk ityi iga in̈kuyooxaap Jehová. Jeʼyukmɨ dende sɨɨ, pɨɨmchiɨʼ jeʼm toyoʼoyi iniidyaywɨʼɨp iñJaatun̈ sɨn̈yukmɨpɨk y nakkaʼmaytyaajɨ metas miyooxpaʼtpaʼap iga jeʼm iñtyoyoʼoyi tumtum jaama mɨjaiñ. Jeʼam miyooxpaʼtpa iga wɨaiñ iñchin̈. Dyaʼ keman in̈kujaʼamaʼyba peʼm jaama. Pero dyaʼ jeem kuyajpa. Jeʼm toyoʼoyi iniidyaywɨʼɨp Jehová y jeʼm iMaanɨk juchixkej mɨjaiñ.