KUYUUJI 10
¿Tyiʼiga wɨɨ iga michin̈iñ?
«Chiŋtaamɨ cada tu̱mtu̱m de mimicht́am» (HECH. 2:38).
WAAÑI 34 Caminaré en integridad
JEʼM JƗƗXI TAN̈KUYUJKAPAʼAP a
1, 2. a) ¿Tyi naspa jesɨk algun i chin̈ba? b) ¿Tyi tan̈kɨʼpin̈taʼmpa yɨʼp kuyujijom?
JEMPƗK chin̈yajpa, ikutson̈yajpa wɨsteen akwagoʼoyiyaj. Y kun jeʼm ikutson̈oʼoyiyaj, ikwiñkejyajpa iga iwɨpɨkneyaj ijɨɨxi. Jeʼm ifamiliajyaj y jeʼm iamigojyaj tsaam maymayyaj. Y jesɨk yajum ikchin̈yajta, tsaam maymayyaj y ityumpɨyyaj kɨʼan̈tojyajpa. Tumtum semana jaʼyan̈yaj chin̈yajpa. Jeempɨgam ikwiñkejyajpa iga ikɨan̈kodayñeyajum iityi Jehová y tsɨʼyyajpam juʼuts iTestigo.
2 Siiga mich iñjɨɨsneum iga michin̈ba, sɨʼ inikwiñkej iga sɨʼ in̈kuaʼm Jehová, y yɨʼp ikwiñkejpa iga impɨkneʼ tuum wɨbɨk jɨɨxi (Sal. 14:1, 2). Yɨʼp kuyuuji watneta iga miyooxpaʼdyiñ, dyaʼ tyi ijoo siiga michaamiam o mimañiñam. Yɨʼɨm impaʼtpa tukuteen jɨɨxiyaj iga tyiʼiga in̈kuyooxaiñ Jehová. Yɨʼp kuyuuji tayooxpaʼttaʼmpatyim jempɨk tachin̈netaʼmum iga juchixkej tan̈kuyooxataʼmiñ Jehová.
JESƗK IÑJOOYIXPA JEʼM MƗGOʼOYI Y IÑTYOYBA JEʼM WƗWADOʼOYI
Jeʼm Wookkɨʼɨwiñ dende wiñɨgam sɨʼ ityuʼudɨyay jeʼm Jehová iñɨɨyi. (Aʼmɨ jeʼm párrafojyaj 3 y 4).
3. ¿Tyiʼiga jempɨk tan̈kuyooxataʼmpa Jehová tanjooyixtyaʼmpa jeʼm mɨgoʼoyi y tantoytyaʼmpa jeʼm wɨwadoʼoyi? (Salmo 119:128, 163).
3 Jehová ichiʼ jeʼm an̈kiʼmayoʼoyi jeʼm iyooxakɨʼɨwiñyaj iga ijooyixyajiñ jeʼm mɨgoʼoyiyaj (Zac. 8:19). Jesús in̈kej tyiʼiga tanteguedaiñ jeʼm wɨwadoʼoyi (Mat. 5:6). Yɨʼp nɨmtoʼoba iga tanteguedaiñ iga tan̈watpa kun ityumpɨy tananmaj jempɨk Dios ikusuʼnɨʼyba. Siiga iñtyoyba jeʼm wɨwadoʼoyi y miñuuman̈matpa, jesɨk iñjooyixpa ityumpɨy jeʼm mɨgoʼoyiyaj y jeʼm malwadoʼoyiyaj (maayɨʼ Salmo 119:128, 163). b Jempɨk mɨgoyyajpa iwatkiʼpsyajpa jeʼm Wookkɨʼɨwiñ, jempɨk in̈jakneʼ yɨʼp nas (Juan 8:44; 12:31). Jeʼm jɨɨxi iniitywɨʼɨp jeʼm Wookkɨʼɨwiñ jeʼ iga ityuʼudɨyaʼyba jeʼm Jehová iñɨɨyi. Duroj sɨʼ ikumɨgoy juutypɨgam iwat en jeʼm Jardín de Edén, kun in̈matyiyaj nɨmtoʼoba idyɨk iga Dios dyaʼ jeʼ tuum wɨbɨk an̈jagoʼoyi y dyaʼ iaʼmchiʼiba iga tun̈gakyaj iwɨnɨgayyajiñ (Gén. 3:1, 4, 5). Iga tsaam ikumɨgoyñeʼ, jeʼyukmɨ jaʼyan̈yaj dyaʼ ikunuʼkyajtoʼoba Jehová. Y jempɨk ikupɨkneyaj jeʼm mɨgoʼoyiyaj, jeʼm Wookkɨʼɨwiñ iwatpa iga pɨɨmi imalwatyajiñ y odoy ityoyyajiñ jeʼm wɨwadoʼoyi (Rom. 1:25-31).
4. ¿Juutypɨk ikwiñkejneʼ Jehová iga jeʼ tuum «Dios dyapɨk mɨgoʼyba»? (Aʼmɨtyim jeʼm imagen).
4 Jehová jeʼ tuum «Dios dyapɨk mɨgoʼyba» y in̈kejaʼyba kun toyoʼoyi jempɨk ityoyyajpa iga ijooyixyajiñ jeʼm mɨgoʼoyi (Sal. 31:5). Yɨʼɨmpɨgam iyooxpaʼtpa iga odom maaj ikupɨkyajiñ jeʼm mɨgoʼoyiyaj nɨmpaʼap jeʼm Wookkɨʼɨwiñ. Jehová in̈kejaʼyba jeʼm iyooxakɨʼɨwiñyaj iga odoy mɨgoyyajiñ y odoy imalwatyajiñ, yɨʼbam iyooxpaʼtyajpa iga iwatyajiñ jempɨk Jehová ikusuʼnɨʼyba y jesɨk iniityyajpa paz (Prov. 13:5, 6). ¿Jeʼam nasneʼ jeʼm iñityijom dende jesɨk moj in̈kuyujkaʼ jeʼm Biblia? In̈kuyujkaneum iga numaaj Jehová jempɨk wɨap tajɨɨxian̈chiʼ (Sal. 77:13). Jeʼyukmɨ mich in̈kupɨktoʼoba jeʼm wɨtampɨk an̈kiʼmayoʼoyiyaj chioypaʼap Jehová (Mat. 6:33). Y inikwiñkejtoʼobatyim iga Jehová dyaʼ jeex juʼuts nɨmpa jeʼm Wookkɨʼɨwiñ. ¿Juutypɨk in̈watpa?
5. ¿Juutypɨk inikwiñkejpa iga iñjooyixpa jeʼm mɨgoʼoyi y iñtyoyba jeʼm wɨwadoʼoyi?
5 Kun jeʼm jɨɨxiyaj impɨkpaʼap iñityijom inikwiñkejpa iga dyaʼ in̈kupɨkpa jeʼm mɨgoʼoyiyaj nɨmpaʼap jeʼm Wookkɨʼɨwiñ, inikwiñkejpatyim iga sɨʼ in̈kupuj jeʼm nuuman̈maatyi, iñxunba iga Jehová tsɨʼyiñ juʼuts inin̈jagoʼoyi y in̈kupɨktoʼobatyim jeʼm ian̈kiʼmayoʼoyiyaj. Iga jeempɨgam inikwiñkejiñ iñityijom, nasuntaap iga in̈wadyiñ tuum an̈wejpadoʼoyi juuty iñjɨykamaʼyba Jehová iga in̈kɨan̈kodaʼyba jeʼm iñityi. Y okmɨ jesɨk michin̈ba inikwiñkejpa iga in̈kɨan̈kodayñeum jeʼm iñityi. Juʼuts tan̈kɨʼpin̈netaʼm siiga tanjooyixpa jeʼm mɨgoʼoyi y tantoyba jeʼm wɨwadoʼoyi tayooxpaʼtpa iga tampɨguiñ tanjɨɨxi iga tachin̈iñ.
JEʼM TOYOʼOYI INIIDYAYWƗʼƗP JESUCRISTO
6. Juʼuts nɨmpa Salmo 45:4, ¿tyiʼiga tantoytyaʼmpa Jesucristo?
6 ¿Tyiʼiga iñtyoyba Jesucristo? Tampadaʼyba ikutson̈oʼoyi en Salmo 45:4 (maayɨʼ). c Jesús ikupujpa y ixunba iga ixpɨktaiñ jeʼm nuuman̈maatyi, jeʼm humildad y jeʼm wɨwadoʼoyi. Jeʼyukmɨ siiga mich iñjooyixpa jeʼm mɨgoʼoyi y iñtyoyba jeʼm wɨwadoʼoyi, iñtyoybatyim Jesús. Kujɨɨsɨ juutypɨk Jesús dyaʼ kɨɨn̈ mu ikupuj jeʼm nuuman̈maatyi y jeʼm wɨwadoʼoyi (Juan 18:37). Pero ¿juutypɨk ixunba iga ixpɨktaiñ jeʼm humildad?
7. ¿Tyiʼiga in̈kusuʼnɨʼyba iga Jesús ikwiñkejpa humildad?
7 Jesús in̈kejpa jeʼm humildad kun jeʼm in̈maatyi y kun tyityam iwatpa. Juʼuts akwiñkejoʼoyi, jeʼ dyaʼ in̈joʼkpa iga kujiʼptaiñ, ixunba iga juchixkej kujiʼbaytyaiñ jeʼm iJaatun̈ (Mar. 10:17, 18; Juan 5:19). ¿Juʼuts iñaʼm mich jeʼm humildad iga ikwiñkejpa Jesús? ¿Wɨap miyooxpaʼt iga iñtyoʼyiñ Jesús y iwatkiʼpsaʼyiñ iakwiñkejoʼoyi? Jɨ. ¿Tyiʼiga Jesús agui humilde? Iga ityoyba jeʼm iJaatun̈ y iwatkiʼpsaʼyba jeʼm wɨtampɨk ijɨɨxiyaj y jaamoʼoyiyaj iga iniity Jehová, juʼuts jeʼm humildad (Sal. 18:35; Heb. 1:3). ¿Dyaʼ miyooxpaʼtpa yɨʼp iga in̈kunuʼguiñ Jesús?
8. ¿Tyiʼiga tsaam tamaymaytyam iga Jesús akkaʼmta juʼuts tanAn̈jagoʼoyi?
8 Tsaam wɨɨ iga tanaitytyaʼm jeʼm maaj wɨbɨk An̈jagoʼoyi, Jesús. Jehová in̈kejay juutypɨk ikkupaguiñ jeʼm iyooxakuy y ikkaʼm juʼuts An̈jagoʼoyi (Is. 50:4, 5). Y kujɨɨsɨ jeʼm toyoʼoyi takwiñkejaytyamwɨʼɨp Jesús (Juan 13:1). Iga jeʼam tanAn̈jagoʼoyi, jeʼyukmɨ tantoytyaʼmpa. Jeʼtyim nɨm iga jempɨk ityoyyajpa —jeʼm iamigojyaj— ikwiñkejyajpa jeʼm ityoyoʼoyi jesɨk ikupɨkyajpa jeʼm ian̈kiʼmayoʼoyiyaj (Juan 14:15; 15:14, 15). ¡Tuum wɨbɨk xaaja iga wɨap tanamigoja Jesús jeʼm Jehová iMaanɨk!
9. ¿Juʼp tumtyi jɨɨxi iniity jeʼm Jesús iakchin̈oʼoyi kun jeʼm ikuyujkɨʼɨwiñpɨkyaj?
9 Tuum jeʼm an̈kiʼmayoʼoyi chioywɨʼɨp Jesús jeʼ iga jeʼm ityun̈ɨyyajpaʼap chin̈yajiñ (Mat. 28:19, 20). Y jeʼ chin̈tyim. Mex iga jeʼm Jesús iakchin̈oʼoyi dyaʼ jeex juʼuts jeʼm ikuyujkɨʼɨwiñyaj iakchin̈oʼoyi, iniity tumtyi jɨɨxi (aʼmɨ jeʼm recuadro « Juʼptam kukakiyaj iniity jeʼm Jesús iakchin̈oʼoyi kun jeʼm ityun̈ɨyyajpaʼap iakchin̈oʼoyi»). Juʼuts akwiñkejoʼoyi, jesɨgam Jesús chin̈, ikwiñkej iga iwattoʼoba jempɨk Jehová ixunba (Heb. 10:7). Jeempɨktyim iwatyajpa jeʼm ikuyujkɨʼɨwiñyaj. Jesɨk chin̈yajpa ikwiñkejyajpa iga ikɨan̈kodayñeyajum iityi Jehová y dende peʼm jaama jempɨk maaj ityeguedayajpa jeʼ iga ikuyooxayajpa Jehová. Yɨʼɨmpɨgam iwatkiʼpsyajpa Jesús.
10. ¿Tyiʼiga iñtyoyba Jesús, y juutypɨk inikwiñkejpa?
10 Mich in̈kupɨkpa iga Jesús jeʼ jeʼm Jehová iMaanɨk y jeʼam ikupin̈neʼ iga tsɨʼyiñ juʼuts An̈jagoʼoyi. Iñjoodon̈tyim iga Jesús agui humilde y iwatkiʼpsaʼyba jeʼm iJaatun̈ ijɨɨxiyaj y ijaamoʼoyiyaj. In̈kuyujkaneʼ iga Jesús ikwiʼk tun̈gakyaj, ikpoʼks jempɨk an̈yaʼkneyaj idyɨk y ikpɨs jeʼm mɨmneyajwɨʼɨp (Mat. 14:14-21). Mich iñaʼmneʼ iga jeʼtyim ikuixpa jeʼm kumun yɨʼp jaama (Mat. 23:10). Y iñjoodon̈tyim iga juʼuts Anjagoʼoyi kupin̈netawɨʼɨp iwatpa wɨtampɨk tyidyin̈kej jeʼm tannɨgɨyoʼoyijom. ¿Juutypɨk wɨap inikwiñkej iga iñtyoyba? Jesɨk in̈watkiʼpsaʼyba jeʼm iakwiñkejoʼoyi (Juan 14:21). Jeʼyukmɨ, nasuntaap iga in̈kɨan̈kodaʼyiñ iñityi Jehová y michin̈iñ.
JEʼM TOYOʼOYI INIIDYAYWƗʼƗP JEHOVÁ
11. ¿Tyi miyooxpaʼtpa iga wɨaiñ iñchin̈?
11 ¿Tyi miyooxpaʼtpa iga wɨaiñ iñchin̈? Jeʼm kutson̈oʼoyi tampaʼtpa kun jeʼm an̈matyiyaj nɨmwɨʼɨp Jesús. Jeʼ nɨm: «To̱yɨ jém tanJa̱tuŋ Dios con it́u̱mpɨy [iñanmaj], con it́u̱mpɨy iñjɨ̱xi y con it́u̱mpɨy impɨ̱mi» (Mar. 12:30). ¿Yɨkxpɨgam toyoʼoyi iniidyay Jehová?
Ityumpɨy jempɨk iniity sɨɨ y jempɨk iniitypa jeʼm iññɨgɨyoʼoyijom Jehová mixajchiñeʼ. (Aʼmɨ jeʼm párrafojyaj 12 y 13).
12. ¿Tyiʼiga iñtyoyba Jehová? (Aʼmɨtyim jeʼm imagenyaj).
12 Tanaity wɨtampɨk jɨɨxiyaj iga tantoyba Jehová. Juʼuts akwiñkejoʼoyi, in̈kuyujkaneʼ iga jeʼam jempɨk chioʼyba «jeʼm ityi» y iga tachiʼiba «it́u̱mpɨy jém wɨ̱tampɨc cosa» y ityumpɨy «jém wɨ̱tampɨc xaja» (Sal. 36:9; Sant. 1:17). Ityumpɨy jempɨk mich iniity Jehová michiʼiñeʼ, jeʼ tsaam toyoʼyba y ikusuʼnɨʼyba iniweʼgoy jempɨk iniity.
13. ¿Tyiʼiga jeʼm kɨakpudoʼoyi jeʼ tuum wɨbɨk xaaja?
13 Jeʼm kɨakpudoʼoyi jeʼ tuum wɨbɨk xaaja iga tachiʼiñetaʼm Jehová. ¿Tyiʼiga tanɨmtaʼmpa jeempɨk? Tan̈kujɨɨstaʼmiñ juʼtspɨy natoyyajtaap Jehová kun jeʼm iMaanɨk. Jesús nɨm: «Jém anJa̱tuŋ Dios tsa̱m atoypa» y «tsa̱m antoypa jém anJa̱tuŋ Dios» (Juan 10:17; 14:31). Jaʼy wagaityiyaj miles de millones de amtyɨy jeʼyukmɨ tsaam natoyyajtaap (Prov. 8:22, 23, 30). Tan̈kujɨɨstaʼmiñ juʼtspɨy ityoʼyan̈jaam Jehová jesɨgam iaʼmchiʼ iga iMaanɨk yaʼachaiñ y akkaʼataiñ. Pero iga Jehová tsaam toyoʼyba, y mityoybatyim mimich, ikɨan̈kot jeʼm iMaanɨk iga mich y tun̈gakyaj wɨaiñ iniitytyaʼm tuum ityi dyapɨk kuyajpa (Juan 3:16; Gál. 2:20). Tuum wɨbɨk jɨɨxi iga tantoytyaʼmiñ Dios.
14. ¿Juʼp jeʼ jeʼm maaj wɨbɨk jɨɨxi iga wɨap impɨk?
14 Jeʼm toyoʼoyi iniidyaywɨʼɨp Jehová mɨjaneʼ iga majtyim iñixpɨkpa. Iñxunbatyim iga jeʼm in̈wɨnanɨgoʼoyi kun Jehová majtyim mɨjaiñ sɨɨ y jeʼm iññɨgɨyoʼoyijom, y wɨap in̈wat jeempɨk. Kun jeʼm inin̈maatyi y kun tyityam in̈watpa wɨap immaymaywaday ianmaj. Y Jehová kun toyoʼoyi mianmajan̈chiʼiba iga jeempɨgam in̈wadyiñ (Prov. 23:15, 16). Jeʼm jɨɨxi impɨkpaʼap jeʼm iñityijom ikwiñkejpa siiga nuuma iñtyoyba Jehová (1 Juan 5:3). Jeʼyukmɨ siiga in̈kupɨkpa Jehová jeʼam jeʼm maaj wɨbɨk jɨɨxi iga wɨap impɨk iñityijom.
15. ¿Juutypɨknam wɨap inikwiñkej iga iñtyoyba Jehová?
15 ¿Juutypɨknam wɨap inikwiñkej iga iñtyoyba Jehová? Wiñtyi, waatɨ tuum an̈wejpadoʼoyi juuty iñjɨykamaʼyba iga in̈kɨan̈kodaʼyba iñityi jeʼm nuntapɨk Dios (Sal. 40:8). Y okmɨ michin̈ba iga inikwiñkejiñ iga in̈kɨan̈kodayñeum iñityi. Juʼuts tanan̈matnetaʼmum yɨʼp kuyujijom, jesɨk michin̈ba itypa jaʼyan̈ maymayaaji iga kukakneum jeʼm iñityi. Dende peʼm jaama jeʼm iñityi dyam immɨʼɨchiʼ, imɨʼɨchiam Jehová (Rom. 14:8; 1 Ped. 4:1, 2). Impɨkneʼ tuum wɨbɨk jɨɨxi iga wɨap miaʼmchiʼ iga impɨktson̈iñ tuum wɨbɨk ityi. Tan̈kɨʼpin̈iñ tyiʼiga.
16. Juʼuts nɨmpa Salmo 41:12, ¿juʼp kumaykedoʼoyi ichiʼiba Jehová jempɨk ikuyooxayajpa?
16 Jehová juchixkej iweʼkpa tyityam iniity. Dyaʼ tyi ijoo tyityam iñchiʼiba, jeʼ juchixkej michiʼiba jaʼyan̈ kumaykedoʼoyiyaj (Mar. 10:29, 30). Yɨʼp jaama, mex iga dyanam i iktogoyñeʼ jeʼm imalwatyajpaʼap, miyooxpaʼtpa iga jeʼm iñityijom mimaymayaiñ. Impɨkneʼ tuum wɨbɨk jɨɨxi iga michin̈ba, pero dyaʼ jeem kuyajpa jeʼm iñyooxakuy, wɨap in̈kuyooxa Jehová juchixkej. Jeʼm toyoʼoyi iniidyaywɨʼɨp y jempɨk jeʼ miniidyay seguido mɨjaap, y mich iniitypa tuum ityi dyapɨk kuyajpa juʼutstyim jeʼ (maayɨʼ Salmo 41:12). d
17. ¿Tyiapaʼap jempɨk mich wɨap iñxajchiʼ Jehová?
17 Jesɨk in̈kɨan̈kodaʼyba iñityi Jehová y michin̈ba, wɨap iñchiʼ tuum wɨbɨk xaaja. Jeʼm maymayaaji iniitywɨʼɨp y ityumpɨy jeʼm wɨtampɨk xaaja iga iniity, Jehová michiʼiñeʼ. Y mich wɨap iñchiʼ tuum wɨbɨk xaaja jempɨk imɨʼɨchiʼ jeʼm sɨn̈ y jeʼm Nas: jeʼm in̈kupɨgoʼoyi y iga juchixkej in̈kuyooxaap (Job 1:8; 41:11; Prov. 27:11). Yɨʼbam jeʼm maaj wɨbɨk jɨɨxi iga impɨkneʼ jeʼm iñityijom. Jeʼm toyoʼoyi iniidyaywɨʼɨp Jehová miyooxpaʼtpa iga impɨguiñ iñjɨɨxi iga michin̈iñ.
¿IMPƗKNEUM IÑJƗƗXI IGA MICHIN̈BA?
18. ¿Juʼptam akwagoʼoyiyaj miniwadaytyaiñ?
18 Kun ityumpɨy jempɨk tan̈kɨʼpin̈netaʼmum, ¿impɨkneum iñjɨɨxi iga michin̈ba? Numaaj mich wɨap in̈kutson̈. Jempɨk wɨap miyooxpaʼt jeʼ iga miniwadaytyaiñ yɨʼp akwagoʼoyi: «¿Tyiñam atogoyay iga an̈wadyiñ?» (Hech. 8:36). Kujɨɨsɨ jeʼm tukuteen jɨɨxi nasuntapaʼap iga wɨaiñ iñchin̈. Jeʼm wiñtyipɨk, iga iñjooyixiñ jeʼm mɨgoʼoyi y iñtyoʼyiñ jeʼm wɨwadoʼoyi. Nakwaʼktaajɨ: «¿Sɨʼ anan̈joʼk jeʼm jaama jesɨk ityumpɨyyaj dyam mɨgoyyajpa y iwɨwatyajpa?». Jeʼm wɨstenpɨk, jeʼm toyoʼoyi iniidyaywɨʼɨp Jesucristo. Nakwaʼktaajɨ: «¿Ansunba iga jeʼm Dios iMaanɨk tsɨʼyiñ juʼuts anAn̈jagoʼoyi y sɨʼ an̈watkiʼpsay jeʼm iakwiñkejoʼoyi?». Y jeʼm tukutenpɨk, jeʼm toyoʼoyi iniidyaywɨʼɨp Jehová y yɨʼbam jeʼm majpɨk importante. Nakwaʼktaajɨ: «¿An̈kuyooxatoʼoba Jehová iga maymayaiñ?». Siiga in̈wɨkutson̈neʼ yɨʼpyaj akwagoʼoyiyaj, ¿tyiʼiga dyaʼ impɨkpa iñjɨɨxi iga michin̈ba? ¿Tyi dyaʼ miaʼmchiʼiba iga in̈wadyiñ? (Hech. 16:33).
19. ¿Tyiʼiga wɨɨ iga impɨguiñ iñjɨɨxi iga michin̈iñ? An̈maatɨ tuum akwiñkejoʼoyi (Juan 4:34).
19 Siiga dyanam in̈wɨpɨkneʼ iñjɨɨxi iga michin̈ba, kujɨɨsɨ tuum akwiñkejoʼoyi in̈matwɨʼɨp Jesús (maayɨʼ Juan 4:34). Jesús nɨm iga jesɨk iwatpa jeʼm Dios iyooxakuy jeex juʼuts jeʼm iwiʼkkuy. ¿Tyiʼiga? Iga jempɨk tan̈kɨʼɨspa tayooxpaʼtpa. Jesús ijoodon̈ idyɨk iga ityumpɨy jempɨk tawaʼgaʼyba Jehová tawɨwadaʼyba. Dyaʼ tawaʼgaʼyba iga tan̈wadyiñ algun tyi iga tamalwadaʼyba. Jehová ixunba iga michin̈iñ (Hech. 2:38). Siiga in̈kupɨkpa yɨʼp an̈kiʼmayoʼoyi, tsaam miwɨwadaʼyba. Kujɨɨsɨ, siiga mityobaytyaap tuum wiʼkkuy tsampɨk kɨɨnba, dyaʼ miñɨmpa iga dyaʼ in̈kɨʼɨspa. Jesɨk pɨɨkɨtyim iñjɨɨxi iga michin̈ba.
20. ¿Tyi tan̈kɨʼpin̈taʼmpa jeʼm tun̈gak kuyujijom?
20 ¿Tyiʼiga weeñiyaj dyanam ipɨkneyaj ijɨɨxi iga chin̈yajpa? Wɨapsɨ iga ijɨɨsyajpa iga dyanam ikkupakyajpa tyityam nasuntaap iga wɨaiñ ichin̈yaj. Jeʼm jɨɨxi majpɨk importante iga impɨkpa jeʼm iñityijom jeʼ iga in̈kɨan̈kodaʼyba iñityi Jehová y michin̈ba. Jeʼyukmɨ wɨpɨɨkɨ iñjɨɨxi, y waatɨ tyityam nasuntaap iga wɨaiñ iñchin̈. Pero siiga mich michin̈toʼobam, ¿tyi miyooxpaʼtpa iga wɨaiñ in̈wat? Tan̈kɨʼpin̈taʼmpa jeʼm tun̈gak kuyujijom.
WAAÑI 28 Cómo hacernos amigos de Jehová
a Tsaam importante iga jeʼm kuyujkɨʼɨwiñyaj chin̈yajiñ. ¿Tyi iyooxpaʼtyajpa iga wɨaiñ ipɨkyaj yɨʼp jɨɨxi? Jeʼm toyoʼoyi. Yɨʼp kuyujijom tan̈kɨʼpin̈taʼmpa tyityam wɨɨ iga ityoyyajiñ y aityam. Tan̈kɨʼpin̈taʼmpatyim juʼuts iityiyaj jeʼm cristianojyaj chin̈neyajwɨʼbam.
b Salmo 119:128, 163: 128 Jeʼyukmɨ an̈kupɨkpa iga ityumpɨy jempɨk mipɨʼɨmɨyoʼyba tsaam wɨtam; anjooyixpa ityumpɨy jeʼm mɨgoʼoyiyaj. 163 Anjooyixpa jeʼm mɨgoʼoyiyaj, pɨɨmi anjooyixpa. Pero antoyba jeʼm inin̈kiʼmayoʼoyi.
c Salmo 45:4: Kun jeʼm teguedɨʼɨyi iga iniity, in̈kooñwɨyyajpa; in̈kupujpa jeʼm nuuman̈maatyi, jeʼm humildad y jeʼm wɨwadoʼoyi, y kun jeʼm inin̈wɨɨkɨʼ in̈watpa tyidyin̈kej.
d Salmo 41:12: Iga juchixkej awɨsɨsɨoyñeʼ, mich anyooxpaʼtpa; anaʼmchiʼiba iga man̈kuyooxaiñ juchixkej.
