¿Tyiʼiga nɨm jeʼm ijuyputpaʼap idyɨk Rut iga ipatstogoyba iherencia siiga ipɨkpa? (Rut 4:1, 6).

Wiñɨk jaama, siiga tuum pɨɨxiñ an̈koʼmɨyñewɨʼɨp kaʼaba y dyaʼ ichakpa ni tuum imaanɨk, ¿iapaʼap initsɨʼyaʼyba idyɨk jeʼm iñas? ¿Togoyba idyɨk jeʼm iapellido? Jeʼm Moisés In̈kiʼmayoʼoyi ikutson̈ba yɨʼpyaj akwagoʼoyiyaj.

Siiga tuum pɨɨxiñ kaʼaba o imaʼyba idyɨk jeʼm iñas iga tumiñ kuyajneʼ, jeʼm ityɨɨwɨ o tun̈gak ifamiliar wɨap idyɨk ijuypuday jeʼm iñas. Jesɨk ifamiliajtyim idyɨk initsɨʼyba jeʼm nas (Lev. 25:23-28; Núm. 27:8-11).

¿Tyi idyɨk wattaap iga jeʼm pɨɨxiñ kaʼanewɨʼɨp odoy togoʼyiñ jeʼm iapellido? Jeʼm pɨɨxiñ ityɨɨwɨ ipɨkpa idyɨk jeʼm kunooya iga inimanɨkwadyiñ y jeempɨgam dyaʼ togoyba jeʼm pɨɨxiñ iapellido y itypa idyɨk iapaʼap initsɨʼyaʼyba jeʼm iñas. Rut ityun̈ɨy yɨʼp costumbre, jeʼyukmɨ an̈koʼmɨy kun jeʼm iwɨdyaaya ifamiliar. Yɨʼp an̈kiʼmayoʼoyi iyooxpaʼtpa idyɨk jeʼm kunooya iga wɨidyiñ (Deut. 25:5-7; Mat. 22:23-28).

Tan̈kujɨɨstaʼmiñ jempɨk iñaskaʼ Noemí. Jeʼ an̈koʼmɨyñeʼ idyɨk kun Elimélec. Pero jesɨgam Elimélec y jeʼm imanɨktam kaʼayaj, dyam idyɨk i wɨap amatspagay jeʼm ifamilia (Rut 1:1-5). Jeʼyukmɨ jesɨgam Noemí seedɨyɨy Judá, iñɨʼmay ixaakiʼ Rut iga iwaʼgaʼyiñ Boaz, tuum Elimélec ifamiliar iga ijuypudaʼyiñ jeʼm iñas (Rut 2:1, 19, 20; 3:1-4). Pero Boaz ijoodon̈ idyɨk iga Elimélec iniityñam tun̈gak ifamiliar, jeʼyukmɨ ikwaʼk jeʼm pɨɨxiñ siiga jeʼ wɨap ijuyput jeʼm nas (Rut 3:9, 12, 13).

Wiñtyi jeʼm pɨɨxiñ nɨm iga ijuyputpa idyɨk jeʼm nas (Rut 4:1-4). Ijoodon̈ idyɨk iga tsoʼowɨy ipudaʼyba, pero ijoodon̈tyim idyɨk iga Noemí tsaamiam y dyam wɨap idyɨk iniity tuum imaanɨk iga initsɨʼyaʼyiñ jeʼm Elimélec iñas. Jeʼyukmɨ yɨʼp pɨɨxiñ ijuyputtoʼoba idyɨk jeʼm nas, iga jeʼam idyɨk initsɨʼyba.

Pero jesɨk ikutɨʼɨyɨy iga ipɨguiñ idyɨk Rut, dyam napɨgaytya iga ijuyputpa jeʼm nas. Jeʼ nɨm: Dyaʼ wɨap anjuyput, iga jesɨk ampatstogoyba anherencia (Rut 4:5, 6). ¿Tyiʼiga dyam napɨgaytya iga ijuyputpa?

Siiga jeʼm pɨɨxiñ o juʼptyin̈kej Elimélec ifamiliar an̈koʼmɨʼyba idyɨk kun Rut y jeʼ manɨgɨʼyba, yɨʼbam idyɨk tsɨɨxiʼ initsɨʼyba jeʼm nas. Jesɨk ¿tyiʼiga nɨm jeʼm pɨɨxiñ iga ipatstogoyba idyɨk iherencia? Jeʼm Biblia dyaʼ in̈matpa tyiʼiga nɨm jeempɨk, pero tan̈kɨʼpin̈iñ weeñi jɨɨxiyaj.

• Wiñtyipɨk, wɨapsɨ iga ijɨɨs iga ixaaja juyputpa idyɨk jeʼm nas, siiga jeʼm Rut imaanɨk initsɨʼyba idyɨk.

• Wɨstenpɨk, imatspakpa idyɨk Noemí y Rut.

• Tukutenpɨk, siiga Rut y jeʼm pɨɨxiñ iniityyajpanam idyɨk tun̈gak imanɨktam, iweʼkyajpa idyɨk jeʼm herencia kun jeʼm pɨɨxiñ imanɨktam.

• Maktastenpɨk, siiga jeʼm pɨɨxiñ dyaʼ idyɨk iniity tun̈gak imanɨktam, jeʼm imaanɨk iniitypaʼap idyɨk kun Rut initsɨʼyaʼyba jeʼm iñas y initsɨʼyaʼybatyim idyɨk jeʼm Elimélec iñas. Jeempɨgam jeʼm iñas initsɨʼyaʼyba idyɨk tuum imaanɨk iga iniidyaʼyba idyɨk jeʼm Elimélec iapellido. Yɨʼp pɨɨxiñ dyaʼ idyɨk ipatstogoytyoʼoba iherencia, jeʼyukmɨ dyaʼ iyooxpaʼt Noemí. Y iñɨʼmay Boaz iga jeʼam ijuypudyiñ jeʼm nas y Boaz ijuyput. ¿Tyiʼiga? Iga juʼuts jeʼ nɨm: «Iga jeʼm pɨɨxiñ kaʼanewɨʼɨp odoy togoʼyiñ jeʼm iherencia» (Rut 4:10).

Kejpa iga jeʼm pɨɨxiñ ijuyputpaʼap idyɨk jeʼm nas, maaj idyɨk ityeguet iga odoy togoʼyiñ jeʼm iñɨɨyi y jeʼm iherencia. ¡Numaaj nakujɨɨsta iyaʼak! Pero ityumpɨy tyityam iwat dyaʼ ikuyooxa, iga jeʼm iñɨɨyi togoytyim. Ipatstogoy tuum wɨbɨk xaaja iga Boaz ipɨktson̈: iga akkaʼmayñeta iñɨɨyi jesɨk jɨykimtaap juuty miñ jeʼm Mesías, Jesucristo. Pɨɨmi dyaʼ wɨɨ iga jeʼm pɨɨxiñ numaaj nakujɨɨsta iyaʼak y dyaʼ iyooxpaʼt tun̈gakyaj (Mat. 1:5; Luc. 3:23, 32).