KUYUUJI 20
WAAÑI 67 “Predica la palabra”
Taputtaʼmpa jeʼm an̈matkuyjom iga tatoyoytyaʼmpa
«Aŋmatta̱p jém wɨbɨc aŋma̱t́i icuwɨ̱t́i yɨ́p naxyucmɨ» (MAR. 13:10).
AN̈KEJAYOʼOYI
Jeʼm toyoʼoyi taanmajan̈chiʼiba iga taputtaʼmiñ kun maymayaaji y kun ityumpɨy tananmaj jeʼm an̈matkuyjom.
1. ¿Tyi tan̈kejaytyaʼm jeʼm an̈tuʼumaaji tumtum amtyɨypɨk 2023?
¡TSAAM taanmajan̈chiʼ jeʼm an̈tuʼumaaji tumtum amtyɨypɨk 2023! a Jeem an̈matta weeñi an̈kejayoʼoyiyaj iga kutɨʼɨyɨyñeta y chioyñɨmtyim weeñi anuncios iga tɨgɨykuʼmpa kun jeʼm an̈matkuy. An̈matta iga weeñiyaj wɨap iga ikupɨkyajpa Jehová okmɨ iga aktogoyñetawum jeʼm Mɨjpɨk Babilonia. An̈mattatyim iga en noviembre de 2023, dyam tan̈kɨan̈kottaʼmpa tuum informe juuty tanan̈mattaʼmpa ityumpɨy jempɨk tan̈wattaʼmpa jeʼm an̈matkuyjom. ¿Nɨmtoʼoba iga dyam jespɨy tanteguedaap taput jeʼm an̈matkuyjom juʼuts wiñtyi? ¡Dyaʼ jesaneʼ!
2. ¿Tyiʼiga tumtum jaama maaj tanteguedaiñ jeʼm an̈matkuy? (Marcos 13:10).
2 Tumtum jaama iga naspa majtyim tanteguedaiñ jeʼm an̈matkuy. ¿Tyiʼiga? Iga dyaʼ jaʼyñeʼ kuyajpa. Tan̈kujɨɨstaʼmiñ jempɨk Jesús nɨm en Marcos 13:10 (maayɨʼ). Kun jempɨk ijaykunuʼk Mateo, Jesús nɨm iga jeʼm wɨtampɨk an̈matyiyaj an̈mattaap ikuwɨtyi naxyukmɨ wiñtyi iga nuʼguiñ jeʼm aktogoyoʼoyi (Mat. 24:14). Yɨʼp nɨmtoʼoba iga aktogoytyaap jempɨk jeʼm Wookkɨʼɨwiñ in̈jakneʼ. Jehová ikupin̈neum «júp ja̱ma» y «juchɨs hora» ikkupakpa jempɨk ijɨykamneʼ (Mat. 24:36; 25:13; Hech. 1:7). Y dyam jaʼyñeʼ iwatpa (Rom. 13:11). Iganam nuʼkpa seguido taputtaʼmiñ jeʼm an̈matkuyjom.
3. ¿Tyiʼiga taputtaʼmpa jeʼm an̈matkuyjom?
3 Tanakwaʼktamtaiñ: ¿tyiʼiga taputtaʼmpa jeʼm an̈matkuyjom? Iga tatoyoytyaʼmpa. Jesɨk tan̈watpa yɨʼɨmpɨk, tanakwiñkejtaʼmpa iga tantoyba jeʼm nuntapɨk an̈kejayoʼoyiyaj, tantoyba tun̈gakyaj, y tantoybatyim Jehová y jeʼm iñɨɨyi. Tan̈kɨʼpin̈taʼmiñ tumtum de jeʼeyaj.
SIIGA TANTOYBA JEʼM NUNTAPƗK AN̈KEJAYOʼOYI TAPUTPA JEʼM AN̈MATKUYJOM
4. ¿Juʼuts tanan̈jaamtaʼm jesɨk tampɨktson̈taʼmpa tuum wɨbɨk noticia?
4 Kujɨɨsɨ jesɨk algun i miñɨʼmaʼyba iga tuum iñfamiliar nayum imaanɨk o iga chiʼitya tuum yooxakuy iga dende pekam sɨʼ idyɨk ikuaʼm. ¿Juʼuts inin̈jaam? Wɨapsɨ iga mimaymaya y in̈madaytyoʼoba tun̈gak iñfamiliares o iñamigojyaj. ¿Jeʼam iññaskaʼ jesɨgam min̈madaytya tyi iwatpa jeʼm Dios iAn̈jagoʼoyi?
5. ¿Juʼuts inin̈jaam idyɨk jesɨk moj in̈kuyujkaʼ jeʼm Biblia? (Aʼmɨtyim jeʼm imagenyaj).
5 Kujɨɨsɨtyim juʼuts idyɨk inin̈jaam jesɨk moj in̈kuyujkaʼ jeʼm Biblia. In̈kutɨʼɨyɨy iga Jehová mityoyba, ixunba iga mityɨgɨʼyiñ jeʼm ifamiliajom, ijɨykamnetyim iga dyaʼ jaʼyñeʼ iktogoyba jeʼm yaʼachaajiyaj y jeʼm jomnaxyukmɨ iktsukumpa jempɨk maaj iñtyoyyajpa (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Tsaamsɨ mimaymaywat jempɨk iñjoodon̈a (Luc. 24:32). Jesɨgam moj iñtyoy yɨʼpyaj an̈kejayoʼoyiyaj inin̈madayyajtoʼoba idyɨk tun̈gakyaj (aʼmɨtyim Jeremías 20:9).
Tsaam tamaymaya jesɨgam tan̈kuyujkaʼ jeʼm an̈kejayoʼoyiyaj ityyajwɨʼɨp Bibliajom, jeʼyukmɨ tanan̈madayyajtoʼoba idyɨk tun̈gakyaj. (Aʼmɨ jeʼm párrafo 5).
6. ¿Tyi tan̈kejaʼyba jempɨk iñaskayaj Ernest y Rose?
6 Tanaʼmiñ jempɨk iñaskaʼ Ernest. b In̈matpa iga jesɨk iniity idyɨk 10 iamtyɨy jeʼm ijaatun̈ kaʼ. Nɨmpa: «Anakwaʼktaap idyɨk: ‹¿Nɨk sɨn̈yukmɨ, dyam anaʼmpa?›. An̈kunaɨʼyba idyɨk tun̈gak tsɨxtyam iga iniityyajnam ijaatun̈yaj». Jeʼ nɨkpa idyɨk tumtum jaama jeʼm tsuʼtskuumijom y koosteññeaktɨn̈ba idyɨk juuty kumneta jeʼm ijaatun̈ y nɨmpa: «Dios, anjoodon̈atoʼoba juuty ity anjaatun̈». Jesɨgam iniity idyɨk 27 iamtyɨy, akwaʼkta siiga ikuyujkatoʼoba idyɨk jeʼm Biblia y jobityi moj ikuyujkaʼ. Tsaam maymaya jesɨgam ijoodon̈a iga jempɨk kaʼaneyaj dyam tyi ijaamyajpa, keʼnam jesɨk mon̈yajpa, y iga dyaʼ jaʼyñeʼ itypa tuum aktsukumoʼoyi (Ecl. 9:5, 10; Hech. 24:15). Kutson̈aytya jeʼm iakwagoʼoyiyaj y tsaam maymay idyɨk kun jempɨk sɨʼ ikuyujkaʼ. Jeʼm iyoomoʼ Rose, mojtyim kuyuuji y tsaamtyim idyɨk maymay, y en 1978 ikwɨstɨkyaj chin̈yaj. Y moj in̈madayyaj jeʼm ifamilia, iamigos y tun̈gakyaj, jempɨk sɨʼ idyɨk ikuyujkayaj. Ernest y Rose iyooxpaʼtneyaj maaj de 70 iga iixpɨkyajiñ Jehová y chin̈yajiñ.
7. ¿Tyi naspa jesɨk tantoyba jeʼm an̈kejayoʼoyiyaj itywɨʼɨp Bibliajom? (Lucas 6:45).
7 Siiga tantoyba jeʼm an̈kejayoʼoyiyaj ityyajwɨʼɨp Bibliajom taputpa jeʼm an̈matkuyjom (maayɨʼ Lucas 6:45). Jeextyim tanan̈jaam juʼuts jeʼm discípulos ityyajwɨʼɨp idyɨk jeʼm wiñtyipɨk siglo jesɨgam nɨmyaj: «Aɨcht́am d́a wɨa̱p antsacta iga anaŋmattámpa t́i ánixñe y t́i ammatoŋne» (Hech. 4:20). Siiga tantoytyaʼmpa jeʼm nuntapɨk an̈kejayoʼoyi tanan̈madayyajtoʼoba tun̈gakyaj juʼtspɨyam tawɨap.
SIIGA TANTOYYAJPA TUN̈GAKYAJ TAPUTTAʼMPA JEʼM AN̈MATKUYJOM
8. ¿Tyiʼiga tanan̈madayyajiñ tun̈gakyaj jeʼm wɨtampɨk an̈matyiyaj? (Aʼmɨ jeʼm recuadro « Tooyɨʼ tun̈gakyaj: an̈kejayyaj ikuyooxayaj Dios»; aʼmɨtyim jeʼm imagen).
8 Tantoyyajpa tun̈gakyaj juʼutstyim Jehová y Jesús (Prov. 8:31; Juan 3:16). Tsaam tanyaʼachan̈jaampa jempɨk dyaʼ iniityyaj tuum an̈jogoʼoyi y dyaʼ iixpɨkyajpa «Dios» (Efes. 2:12). Jeʼeyaj pɨɨmi yaʼachayajpa y taɨchtyam tanaitytyaʼm tuum an̈jogoʼoyi: jeʼm wɨtampɨk an̈matyiyaj de jeʼm Dios iAn̈jagoʼoyi. Siiga tatoyoʼyba y tayaʼachan̈jamoʼyba tanan̈madayyajpa tun̈gakyaj juʼtspɨyam tawɨap. Y tanyooxpaʼtyaj iga iniityyajiñ tuum an̈jogoʼoyi y maymayayajiñ sɨɨ y wɨaiñtyim iniityyaj jeʼm ityi dyapɨk kuyajpa jeʼm jomnaxyukmɨ (1 Tim. 6:19).
Siiga tatoyoʼyba y tayaʼachan̈jamoʼyba tanan̈madayyajpa tun̈gakyaj juʼtspɨyam tawɨap. (Aʼmɨ jeʼm párrafo 8).
9. ¿Tyi tansunba iga ijoodon̈ayajiñ tun̈gakyaj, y tyiʼiga? (Ezequiel 33:7, 8).
9 Siiga tatoyoʼyba tanan̈madayyajpa tun̈gakyaj iga dyaʼ jaʼyñeʼ nuʼkpa jeʼm aktogoyoʼoyi (maayɨʼ Ezequiel 33:7, 8). c Tan̈yaʼkpa tanaʼm iga jempɨk ityyaj tantɨgan̈jom y jeʼm tanfamilia, iga dyaʼ jeʼ Testigojyaj, iwatyajpa jempɨk jeʼeyaj ikusuʼnɨyyajpa iga dyaʼ ikutɨʼɨyɨyñeyaj jempɨk dyaʼ jaʼyñeʼ nuʼkpa. Mateo 24:21 nɨmpa «pɨ̱mi miyaacha̱támpa» y «d́a nunca oypa tánix jexpɨc yaacha̱ji dende Dios iwat yɨ́p nas». Tansuntaʼmpa iga ijoodon̈ayajiñ tyityam iwatpa Jehová jesɨk kɨʼpin̈oʼyba, wiñtyi iktogoyba jeʼm religiónyaj mɨgoyyajpaʼap y en Armagedón, iktogoyba ityumpɨy (Apoc. 16:14, 16; 17:16, 17; 19:11, 19, 20). Tan̈waʼgaʼyba Jehová iga jaʼyan̈yaj mojiñtyim ikuyooxayaj. Pero ¿tyi naspa kun jeʼm tanfamiliares y tun̈gakyaj iga dyaʼ ikumaton̈yajpa?
10. ¿Tyiʼiga tsaam importante iga seguido tanan̈madayyajiñ tun̈gakyaj?
10 Jeʼm tun̈gak kuyujijom tan̈kɨʼpin̈taʼm iga Jehová wɨapsɨ ikɨakput jempɨk ikakyajpa ijɨɨxi jesɨk iaʼmyajpa iga sɨʼ iktogoytya jeʼm Mɨjpɨk Babilonia. Jeʼyukmɨ tanan̈kejayyajiñ tun̈gakyaj. ¿Tyiʼiga? Tan̈kujɨɨstaʼmiñ: wɨapsɨ iga jempɨk tanan̈kejayyajpa sɨɨ, jeʼam ikujɨɨsyajpa jeʼm iñɨgɨyoʼoyijom (aʼmɨtyim Ezequiel 33:33). Tuum carcelero itywɨʼɨp Filipos moj ikuyooxa Jehová jesɨk nas tuum mɨjpɨk nasyɨʼɨxi, wɨapsɨ iga weeñiyaj jeempɨktyim iwatyajpa, ipɨkyajpa ijɨɨxi iga ikuyooxayajpa jesɨk iaʼmyajpa iga sɨʼbam iktogoytya jeʼm Mɨjpɨk Babilonia (Hech. 16:25-34).
SIIGA TANTOYBA JEHOVÁ Y JEʼM IÑƗƗYI TAPUTPA JEʼM AN̈MATKUYKOM
11. ¿Juutypɨk tan̈kujiʼppa Jehová? (Apocalipsis 4:11; aʼmɨtyim jeʼm imagenyaj).
11 Siiga tantoyba Jehová y jeʼm iñɨɨyi, taputpa jeʼm amatkuyjom y tan̈kujiʼppa. Tanaitytyaʼm tumtyi jɨɨxi kun jempɨk ityyaj sɨn̈yukmɨ y nɨmyajpa: «Maŋcujíppa iga tsa̱m miwɨa̱p y tsa̱m iniit́ impɨ̱mi» (maayɨʼ Apocalipsis 4:11). ¿Juutypɨk tan̈kujiʼppa Jehová? Jesɨk tanan̈kejayyajpa tun̈gakyaj iga Jehová iwatneʼ ityumpɨy y jeʼam jempɨk tachiʼiba jeʼm ityi. Tampɨkpatyim tantiempo, tampɨɨmi y tyityam tanaity iga taputpa jeʼm an̈matkuyjom juʼtspɨyam tawɨap (Mat. 6:33; Luc.13:24; Col. 3:23). Tsaam tamaymaytyam jesɨk tanan̈kejayyajpa tun̈gakyaj iga tantoyba Dios. Pero tanan̈kejaytyamtoʼobatyim jempɨk nɨmtoʼoba jeʼm iñɨɨyi. ¿Tyiʼiga?
Tanchiʼiba Jehová tantiempo, tampɨɨmi y tyityam tanaity iga taputpa jeʼm an̈matkuyjom juʼtspɨyam tawɨap. (Aʼmɨ jeʼm párrafo 11).
12. ¿Juutypɨk tanakkuaʼyaytyaʼmpa jeʼm Jehová iñɨɨyi?
12 Iga tantoyba Jehová tanakkuaʼyaytyoʼoba jeʼm iñɨɨyi (Mat. 6:9). Jeʼm Wookkɨʼɨwiñ pɨɨmi ityuʼudɨyayñeʼ (Gén. 3:1-5; Job 2:4; Juan 8:44). Jeʼyukmɨ jeʼm an̈matkuyjom tan̈kupujtoʼoba y tanan̈kejayyajtoʼoba tun̈gakyaj iga jeʼ tsaam toyoʼyba, tuum wɨbɨk an̈jagoʼoyi y iga dyaʼ jaʼyñeʼ iktogoyba jeʼm yaʼachaaji, inimiñba paz y maymayaaji yɨʼp naxyukmɨ (Sal. 37:10, 11, 29; 1 Juan 4:8). Jesɨk tan̈watpa ityumpɨy yɨʼp sɨʼ tanakkuaʼyay jeʼm Jehová iñɨɨyi y tsaam tamaymaytyam iga sɨʼ tanakkupaktaʼm tanyooxakuytyam juʼuts Testigo. ¿Tyiʼiga tanɨmpa jeempɨk?
13. ¿Tyiʼiga tsaam tamaymaytyam iga taixpɨktamtaap juʼuts Jehová itestigojyaj? (Isaías 43:10-12).
13 Jehová takupin̈neʼ juʼuts itestigo (maayɨʼ Isaías 43:10-12). d Jeʼm Kumun Nayooxaoyyajpaʼap en tuum carta nɨm: «Tanaitytyaʼm tuum wɨbɨk xaaja iga taixpɨktamtaap juʼuts Jehová itestigo». e Tan̈kujɨɨstaʼmiñ, wɨapsɨ iga algun i nɨmpa iga mich immalwadayñeʼ tun̈gak, y iñxunba iga mikupujtaiñ. Jeʼyukmɨ in̈kupin̈ba algun i iga miwɨixpɨkpa y iniidyay confianza, y jeʼ mikupujpa. Jeempɨktyim naspa kun Jehová, takupin̈neʼ iga tawɨixpɨkpa y tanaidyay confianza, jeʼ ijoodon̈ iga wɨap tan̈kupuj. Tsaam tamaymaytyam iga takupin̈neʼ juʼuts iTestigo, jeʼyukmɨ tanan̈kejayyajtoʼoba tun̈gakyaj jeʼm iñɨɨyi y tan̈kupujaytyoʼoba iga tsaam kumɨgoyñeta. Jeempɨgam tanakkupakpa jeʼm tanyooxakuy juʼuts Jehová itestigo (Sal. 83:18; Rom. 10:13-15).
SEGUIDO TAPUTTAʼMPA HASTA JESƗK NUʼKPA JEʼM AKTOGOYOʼOYI
14. ¿Tyi jempɨk sɨʼ tanan̈joʼktaʼm?
14 ¡Tsaam tanan̈joʼknetaʼm jempɨk naspa jeʼm tannɨgɨyoʼoyijom! Kun jeʼm Jehová ikumaykedoʼoyi tanan̈joʼktaʼmpa iga jaʼyan̈yaj mojiñtyim ikuyooxayaj wiñtyi iga tsukumiñ jeʼm mɨjpɨk yaʼachaaji. Pero tamaymaywatpatyim iga jesɨk itypa jeʼm mɨjpɨk yaʼachaaji wɨapsɨ iga jaʼyan̈yaj ikakyajpa ijɨɨxi y mojpatyim ikuyooxayaj Jehová kun taɨchtyam (Hech. 13:48).
15, 16. ¿Tyi duroj tan̈wattaʼmiñ y juchix kuyajpa?
15 Iganam tanan̈joʼktaʼmpa tanaitytyaʼm tuum yooxakuy iga nikemannam wattaap, tanan̈madayyajiñ tun̈gakyaj jeʼm Dios iAn̈jagoʼoyi ikuwɨtyi naxyukmɨ. Tanan̈madayyajiñtyim iga dyam jaʼyñeʼ nuʼkpa jeʼm aktogoyoʼoyi. Y jesɨk nuʼkpa, ikutɨʼɨyɨyyajpa iga Jehová jempɨk takutsatneʼ idyɨk (Ezeq. 38:23).
16 Jeʼyukmɨ, ¿juʼp jɨɨxi tampɨknetaʼmiñ? Siiga tantoyba Jehová, jeʼm iñɨɨyi, jeʼm nuntapɨk an̈kejayoʼoyiyaj y tun̈gakyaj, taputtaʼmpá jeʼm an̈matkuyjom kun maymayaaji tan̈watpa hasta jesɨk Jehová nɨʼmiñ: «¡Odom wattaʼamɨ!».
WAAÑI 54 “Este es el camino”
a Jeʼm an̈tuʼumaaji tumtum amtyɨypɨk watta jeʼm 7 de octubre de 2023 en jeʼm Salón de Asambleas de Newburgh, en Nueva York (Estados Unidos). Okmɨ yɨʼp an̈tuʼumaaji topta en JW Broadcasting wɨsna jaakaʼ, jeʼm wiñtyipɨk put en noviembre de 2023 y jeʼm wɨstenpɨk en enero de 2024.
b Aʼmɨ jeʼm an̈kejayoʼoyi «Jeʼm Biblia ikagayyaj jeʼm iityi: Me impresionaron las respuestas claras y lógicas de la Biblia» iga put en jeʼm Totjaayi Takjoodon̈apaʼap del 1 de febrero de 2015.
c Ezequiel 33:7-8: 7 Mich, pɨɨxiñ mimaanɨk, mantsakneʼ juʼuts centinela jeʼm Israel ityɨkjom; jesɨk mich immaton̈ba tuum an̈maatyi iga putpa anjɨpjom inin̈madaʼyba tun̈gakyaj. 8 Siiga ɨch annɨmaʼyba algun i iga imalwatpa ‹Mimalojpɨk, ¡mikaʼaba!› pero siiga mich dyaʼ tyi iññɨʼmayñeʼ iga wɨaiñ ikak ijɨɨxi, jeʼ kaʼaba iga tsaam imalwatneʼ, pero man̈waʼgaʼyba cuenta por jeʼm iñɨʼɨpiñ
d Isaías 43:10-12: 10 Michtyam an̈kujɨytyampa juʼuts mantestigojtam —nɨmpa Jehová—, jɨ, micham manyooxakɨʼɨwiñ, jempɨk man̈kupin̈neʼ, iga anixpɨktaʼmiñ, an̈kupɨktaʼmiñ y in̈kutɨʼɨyɨytyaʼmiñ iga dyaʼ akakneʼ. Wiñtyi iga aidyiñ dyaʼ idyɨk i ni tuum Dios, y okmɨ dyatyim i ni tuum. 11 Dyaʼ i ni tuum juʼuts ɨch iga kɨakpudoʼyba. 12 Ɨch jempɨk anɨm, akɨakpudoy y manakjoodon̈ataʼm jesɨk dyaʼ idyɨk i tun̈gak diosyaj. Jeʼyukmɨ mimichtyam mantestigojtam —nɨmpa Jehová—, ɨch iñDios.