KUYUUJI 21
WAAÑI 107 Dios nos enseñó a amar
Tyi miyooxpaʼtpa in̈wɨkupin̈ kun i min̈koʼmɨʼyba
«¿Iapaʼap wɨap ipaʼt tuum wɨbɨk yoomoʼ? Maaj tsoowɨy que jeʼm corales» (PROV. 31:10).
AN̈KEJAYOʼOYI
Tan̈kɨʼpin̈taʼmpa jɨɨxian̈chioʼoyiyaj iga tayooxpaʼtyajpa tan̈wɨkupin̈ kun i tan̈koʼmɨʼyba, tanaʼmpatyim juutypɨk jeʼm tɨwɨtam wɨap iyooxpaʼtyaj jempɨk an̈koʼmɨyyajtoʼoba.
1, 2. a) Siiga tuum cristiano an̈koʼmɨytyoʼoba, ¿tyi iwadyiñ wiñtyi iga ipɨguiñ yɨʼp jɨɨxi? b) ¿Tyi nɨmtoʼoba jeʼm an̈maatyi noviazgo? (Aʼmɨ jeʼm jaakaʼ «Teguedaajɨ yɨʼp jɨɨxi»).
¿MIN̈KOʼMƗYTYOʼOBA? Mex iga dyaʼ nasuntaap iga algun i an̈koʼmɨʼyiñ iga maymayaiñ, jaʼyan̈ tɨwɨtam y yomtɨwɨtam an̈koʼmɨyyajtoʼoba. Wiñtyi iga impɨguiñ yɨʼp jɨɨxi, nasuntaap iga miniwɨtsaktaiñ espiritualmente, económicamente y emocionalmente (1 Cor. 7:36). a Jesɨk mimaymayaap jeʼm inin̈koʼmɨyoʼoyijom.
2 Wɨapsɨ iga uxan̈ tan̈kaʼ impaʼt kun i min̈koʼmɨʼyba (Prov. 31:10). Mex iga impaʼtneum, wɨapsɨ iga tan̈kaʼ iniktsukum tuum noviazgo. b Yɨʼp kuyujijom tanaʼmtaʼmpa tyi iyooxpaʼtyajpa iga iwɨkupin̈yajiñ kun i an̈koʼmɨyyajpa y iktsukumyajpa tuum noviazgo. Tan̈kɨʼpin̈taʼmpatyim juutypɨk jeʼm tɨwɨtam wɨap iyooxpaʼtyaj jempɨk an̈koʼmɨyyajtoʼoba.
TYI MIYOOXPAʼTPA IN̈WƗKUPIN̈IÑ KUN I MIN̈KOʼMƗʼYBA
3. ¿Tyi wɨɨ iga ikujɨɨsneiñ tuum cristiano wiñtyi iga ikstukumiñ tuum noviazgo?
3 Wiñtyi iga inin̈tsukumiñ tuum noviazgo, wɨɨ iga in̈kujɨɨsneiñ juʼutspɨk cualidades iñxunba iga ikwiñkejiñ. Siiga dyaʼ in̈watpa jeempɨk, wɨapsɨ iga dyaʼ in̈wɨpɨkpa iñjɨɨxi. Tanjoodon̈tam siiga tan̈koʼmɨytyoʼoba kun algun i, nasuntaap iga tsɨʼyñeiñam juʼuts Testigo (1 Cor. 7:39). Pero yɨʼp dyaʼ nɨmtoʼoba iga wɨap tanan̈koʼmɨy kun juʼptyin̈kej iga chin̈neum. Jeʼyukmɨ tanakwaʼktaiñ: «¿Juʼptam metas iniity? ¿Juʼptam cualidades ansunba iga iniidyiñ? ¿Tan̈kasɨ ikkupak jempɨk sɨʼ an̈waʼk?».
4. ¿Tyityam wɨap iwaʼgayyaj Jehová jempɨk dyanam an̈komɨʼyñeyaj?
4 Wɨapsɨ iga inin̈madayñeum Jehová siiga min̈koʼmɨytoʼoba (Filip. 4:6). Pero tanjoodon̈tam iga jeʼ dyaʼ ijɨykamayñeʼ jeʼm iyooxakɨʼɨwiñyaj iga ichiʼiba kun i an̈koʼmɨʼyba. Jeʼ ityeget jempɨk iñjaampa y jempɨk mityogoyay y wɨap miyooxpaʼt. Jeʼyukmɨ seguido an̈madaʼayɨ jempɨk iñxunba y jempɨk iñjaampa (Sal. 62:8). Waʼgaʼayɨ iga michiʼiñ paciencia y joodon̈oʼoyi (Sant. 1:5). Tuum tɨɨwɨ itywɨʼɨp Estados Unidos iñɨɨyipɨk John c iga dyanam an̈koʼmɨyñeʼ in̈matpa tyi iwaʼgaʼyba Jehová: «Annɨʼmaʼyba juʼutspɨk cualidades iniidyiñ jeʼm yoomtɨwɨ. An̈waʼgaʼybatyim iga ayooxpaʼdyiñ añixpɨk y wɨaiñ anakwiñkej wɨtampɨk cualidades». Tuum yoomtɨwɨ itywɨʼɨp Sri Lanka iñɨɨyipɨk Tanya nɨmpa: «An̈waʼgaʼyba Jehová iga akupɨgoʼyiñ, anaidyiñ tuum wɨbɨk jɨɨxi iganam dyaʼ ampaʼtneʼ kun i an̈koʼmɨʼyba». ¿Y siiga dyanam impaʼtneʼ? Jehová ijɨykamneʼ iga michiʼiba tyityam mityogoyay (Sal. 55:22).
5. ¿Tyi iyooxpaʼtyajpa jempɨk dyanam an̈koʼmɨyñeyaj iga iixpɨkyajiñ tun̈gakyaj? (1 Corintios 15:58; aʼmɨtyim jeʼm imagen).
5 Jeʼm Biblia tanɨʼmaʼyba iga seguido tan̈wadyiñ «jém Dios iyo̱xacuy» (maayɨʼ 1 Corintios 15:58). Siiga tan̈kupɨkpa yɨʼp an̈kiʼmayoʼoyi, tanaitypa jaʼyan̈ tiempo iga tanan̈pɨʼtspa jeʼm tɨwɨtam y yomtɨwɨtam. Jesɨk dyaʼ numaaj tanaitypa amigojyaj, wɨaptyim tañixpɨkyaj tun̈gakyaj iga sɨʼtyim ikuyooxayaj Jehová y dyanam an̈koʼmɨyñeyaj. Siiga in̈wɨkuyooxaap Jehová, juchixkej mimaymayaap.
Siiga juchixkej in̈kuyooxaap Jehová, iñixpɨkpa jaʼyan̈ tɨwɨtam y wɨapsɨ iga weeñiyaj an̈koʼmɨyyajtoʼobatyim. (Aʼmɨ jeʼm párrafo 5).
6. ¿Tyi ijɨɨskupakneyajiñ jempɨk dyanam an̈koʼmɨyñeyaj?
6 Pero nakuixtyaajɨ, odoy aʼmchiɨʼ iga maaj iñtyeguedaiñ impaʼt kun i min̈koʼmɨʼyba (Filip. 1:10). Jempɨk maaj tamaymaywatpa jeʼ iga tanamigojaiñ Jehová (Mat. 5:3). Iganam dyanam min̈koʼmɨyñeʼ wɨapsɨ iga majnam wɨap in̈wɨkuyooxa (1 Cor. 7:32, 33). Jeʼyukmɨ wɨpɨɨkɨ iñjɨɨxi. Jessica, iga ity Estados Unidos y jaʼayɨy jesɨgam iniity idyɨk toomi 40 iamtyɨy, nɨmpa: «Mex iga ajaʼayɨytyoʼoba idyɨk, jeʼm an̈matkuy ayooxpaʼt iga juchixkej amaymayaiñ».
TOOPƗ TIEMPO IGA IÑIXPƗGUIÑ
7. ¿Tyiʼiga jempɨk an̈koʼmɨytyoʼoba odoy jobity iññɨʼmaʼyiñ iga in̈kusuʼnɨyñeʼ? (Proverbios 13:16).
7 ¿Y siiga impaʼtneum kun jempɨk min̈koʼmɨytoʼoba? ¿Jobitytyi inin̈madaʼyiñ iga in̈kusuʼnɨyñeʼ? Jeʼm Biblia nɨmpa iga jempɨk iniity joodon̈oʼoyi wiñtyi ipɨktson̈ba ixpɨgoʼoyi y okmɨ iwatpa (maayɨʼ Proverbios 13:16). d Jeʼyukmɨ siiga mijɨɨxiɨy toopɨ tiempo iga in̈wɨixpɨkpa. Tuum tɨɨwɨ iga iñɨɨyi Albert itywɨʼɨp en jeʼm Países Bajos nɨmpa: «Jempɨk iñjaampa jobitytyi wɨap ikuyaj, jeʼyukmɨ toopɨ tiempo iga in̈wɨixpɨkpa y odoy jobity nɨʼmaʼayɨ iga in̈kusuʼnɨyñeʼ». Y wɨapsɨ iga jesɨk in̈wɨixpɨkpa, iñjoodon̈aap siiga miwɨnɨgaʼyba jeʼm inin̈koʼmɨyoʼoyijom.
8. ¿Juutypɨk wɨap iixpɨk jempɨk an̈koʼmɨytyoʼoba algun i iga ikusuʼnɨyñeʼ? (Aʼmɨtyim jeʼm imagen).
8 Wɨapsɨ iga minikwaʼktaap: «¿Y juutypɨk añixpɨkpa?». Jeʼm An̈tuʼumayoʼytɨkjom o en tuum reunión social wɨap iñaʼm tyityam iwatpa, juʼuts jeʼm imuruuji, ityam jeʼ iamigojyaj y siiga espiritual (Luc. 6:45). ¿Jeʼtyim meta iniity juʼuts michpɨk? Iñjoodon̈aap juʼuts siiga inikwaʼkyajpa jeʼm ancianojyaj o tun̈gak tɨwɨtam iga iixpɨkyajpa (Prov. 20:18). Akwaʼkyaajɨ juʼutspɨk cualidades iniity (Rut 2:11). Mex iga iñixpɨktoʼoba, akwiñkejaʼayɨ respeto y odoy juchixkej jodon̈aajɨ juuty sɨʼɨba.
Wiñtyi iga iññɨʼmaʼyiñ algun i iga in̈kusuʼnɨyñeʼ toopɨ tiempo iga iñixpɨguiñ. (Aʼmɨ jeʼm párrafojyaj 7 y 8).
9. Wiñtyi iga iññɨʼmaʼyiñ algun i iga in̈kusuʼnɨyñeʼ, ¿tyi wɨɨ iga in̈wadyiñ?
9 Jesɨk, ¿juʼtsan̈ tiempo iñixpɨguiñ jempɨk in̈kusuʼnɨyñeʼ? Siiga tsaam jobity iññɨʼmaʼyba, wɨapsɨ ikujɨɨs iga dyaʼ miwɨjɨɨxiɨy (Prov. 29:20). Pero, siiga ikutɨʼɨyɨyum iga in̈kusuʼnɨyñeʼ, odoy tsaakɨ jaʼyan̈ tiempo (Ecl. 11:4). Kujɨɨsɨ iga jesɨk iññɨʼmaʼyba algun i iga in̈kusuʼnɨyñeʼ, dyaʼ nɨmtoʼoba iga kun jeʼam min̈koʼmɨʼyba. Pero wɨɨ iga miniwɨtsaknetaiñ mex siiga min̈koʼmɨʼyba kun jeʼ o dyaʼ.
10. ¿Tyi wɨap in̈wat siiga in̈kutɨʼɨyɨyum iga algun i mikusuʼnɨyñeʼ y mich dyaʼ?
10 ¿Y mich tyi wɨap in̈wat siiga in̈kutɨʼɨyɨyum iga algun i mikusuʼnɨyñeʼ? Siiga dyaʼ in̈kusuʼnɨyñeʼ akwiñkejaʼayɨ kun tyityam in̈watpa iga dyaʼ in̈kusuʼnɨyñeʼ. Siiga iñaʼmchiʼiba iga majtyim mikusuʼnɨʼyiñ, dyaʼ inikwiñkejpa toyoʼoyi (1 Cor. 10:24; Efes. 4:25).
11. ¿Tyi ijɨɨskupakneyajiñ jempɨk iyooxpaʼtyajpa ikuaʼmayyaj kun i an̈koʼmɨʼyba jempɨk an̈koʼmɨytyoʼoba?
11 Weeñi an̈eymɨyaj jeʼm jaatun̈yaj o jempɨk maaj jaʼamoyñeyajum ikupin̈ayyajpa kun i an̈koʼmɨʼyba. Tun̈gak an̈eymɨyaj jeʼm ifamilia o iamigojyaj ikuaʼmayyajpa y okmɨ iwatyajpa iga naixpɨkyajtaiñ. Siiga tawaʼgaytyaap iga tan̈wadyiñ jeempɨk, tan̈kujɨɨxiñ tyityam ikusuʼnɨʼyba y tyityam ityogoyyayaj iwɨstɨkyaj. Siiga tanjɨɨspa iga keʼnam tampaʼdayñeum algun i, tan̈wadyiñ juʼtspɨyam awɨap iga tañixpɨguiñ, juʼptam cualidades iniity y siiga espiritual. Maaj wɨɨ iga iniidyiñ tuum wɨnanɨgoʼoyi kun Jehová y dyaʼ iga iniidyiñ tumiñ y wɨkuyujneiñ. Pero odoy tan̈kujaʼamaʼyiñ iga jempɨk ipɨkpa ijɨɨxi siiga an̈koʼmɨʼyba o dyaʼ jeʼ jempɨk an̈koʼmɨytyoʼoba (Gál. 6:5).
JUUTYPƗK INIKTSUKUMPA TUUM NOVIAZGO
12. Siiga iniktsukumtoʼoba tuum noviazgo kun algun i, ¿juutypɨk wɨap iññɨʼmay?
12 Siiga iniktsukumtoʼoba tuum noviazgo kun algun i, ¿juutypɨk wɨap iññɨʼmay? e Wɨap inimuru o iñjɨyñɨgay, an̈madaʼayɨ iga in̈kusuʼnɨyñeʼ y in̈wɨixpɨktoʼoba (1 Cor. 14:9). Siiga miñɨʼmaʼyba iga iwɨjɨɨsaʼyba chiɨʼ tiempo (Prov. 15:28). Y siiga miñɨʼmaʼyba iga dyaʼ mikusuʼnɨyñeʼ akwiñkejaʼayɨ respeto.
13. ¿Tyi wɨap in̈wat siiga miñɨʼmaʼyba algun i iga mikusuʼnɨyñeʼ? (Colosenses 4:6).
13 ¿Tyi wɨap in̈wat siiga miñɨʼmaʼyba algun i iga mikusuʼnɨyñeʼ? Jɨɨsɨ iga kɨɨn̈neʼ idyɨk miñɨʼmay, jeʼyukmɨ akwiñkejaʼayɨ yaʼachan̈jamoʼoyi y respeto (maayɨʼ Colosenses 4:6). Nɨʼmaʼayɨ siiga iñxunba tiempo iga in̈kutson̈iñ. Pero wɨɨ iga jobity in̈kutson̈iñ (Prov. 13:12). Siiga dyaʼ in̈kusuʼnɨyñeʼ an̈madaʼayɨ tyiʼiga. Tuum tɨɨwɨ iñɨɨyipɨk Hans itywɨʼɨp Austria in̈matpa tyi iwat jesɨgam tuum yoomtɨwɨ iñɨʼmay iga iwɨixpɨktoʼoba idyɨk: «An̈wɨnamuru y jobitytyi annɨʼmay iga dyaʼ an̈kusuʼnɨyñeʼ, dende jesɨgam moj anakuixtya iga odoy iñejakutɨʼɨyɨʼyiñ». Pero siiga in̈kusuʼnɨyñeʼ y in̈wɨixpɨktoʼoba nɨʼmaʼayɨ juutypɨk iñxunba iga miniixpɨktamtaiñ. Iga dyaʼ tumtyi an̈eymɨ mimɨjanetam wɨapsɨ iga dyaʼ tumtyi jɨɨxi iniitytyaʼm.
¿JUUTYPƗK WƗAP TANYOOXPAʼTYAJ JEMPƗK DYANAM AN̈KOʼMƗYÑEYAJ?
14. Siiga tanyooxpaʼtyajtoʼoba jempɨk dyanam an̈koʼmɨyñeyaj, ¿tyi tan̈wadyiñ?
14 ¿Jutypɨk wɨap tanyooxpaʼtyaj jempɨk an̈koʼmɨyyajtoʼoba? Wiñtyi, tan̈kuixiñ tyityam tanɨmpa (Efes. 4:29). Tanakwaʼktamtaiñ: «¿Anajɨymɨchyajpa? Jesɨk anaʼmpa iga tuum tɨɨwɨ y tuum yoomtɨwɨ murupa ixɨʼyaj y dyanam an̈koʼmɨyñeyaj, ¿anjɨɨspa iga nakusuʼnɨyñeyajta?» (1 Tim. 5:13). Dyaʼ tansuntaʼmpa iga jeʼm tɨɨwɨ ijaamiñ iga ityogoyay algun tyi numaaj iga dyaʼ an̈koʼmɨyñeʼ. Hans, jɨykimtawɨʼɨp jeʼm tun̈gak párrafo, nɨmpa: «Weeñi tɨwɨtam mikwaʼkyajpa: ‹¿Tyiʼiga dyanam min̈koʼmɨyñeʼ? Mijaʼamoyñeum, okmɨ dyam i mipɨkpa›. Yɨʼpyaj an̈matyiyaj dyaʼ yooxpadoʼyba, keʼnam jesɨk sɨʼ ityeguedɨyyajta iga an̈koʼmɨyyajiñ». Maaj wɨɨ iga tananmajan̈chiʼiyajiñ (1 Tes. 5:11).
15. a) Juʼuts nɨmpa Romanos 15:2, ¿tyi tanjɨɨskupakneiñ siiga tanyooxpaʼtpa algun i iga naixpɨkyajtaiñ? (Aʼmɨtyim jeʼm imagen). b) ¿Juʼptam jɨɨxi in̈kusuʼnɨyñeʼ de jeʼm video? (Aʼmɨ jeʼm nota).
15 ¿Y tyi tan̈wadyiñ siiga tanjɨɨspa iga tuum yoomtɨwɨ y tuum tɨɨwɨ keʼnam nakusuʼnɨyñeyajta? Jeʼm Biblia tan̈kejaʼyba iga tanjɨɨxiñ tyi ijaamyajpa tun̈gakyaj (maayɨʼ Romanos 15:2). Jaʼyan̈yaj jempɨk dyanam an̈koʼmɨyñeyaj dyaʼ ixunyajpa iga kuaʼmayyajtaiñ algun i y tanakwiñkejayyajiñ respeto (2 Tes. 3:11). Tun̈gakyaj wɨapsɨ iga tawaʼgayyajpa iga tanyooxpaʼtyajiñ y wɨap tan̈wat (Prov. 3:27). f Y mex siiga tawaʼgayyajpa yooxpadoʼoyi, wɨapsɨ iga dyaʼ ixunyajpa iga tun̈gakyaj ijoodon̈ayajiñ. Tuum yoomtɨwɨ itywɨʼɨp Alemania iñɨɨyipɨk Lydia nɨmpa: «Wɨap iñtyɨʼp jeʼm tɨɨwɨ y jeʼm yoomtɨwɨ juuty jaʼyan̈ ityyajpa y yooxpaʼtyaajɨ iga naixpɨkyajtaiñ».
Jeʼm reuniones sociales wɨap iyooxpaʼtyaj jempɨk dyanam an̈koʼmɨyñeyaj iga naixpɨkyajtaiñ. (Aʼmɨ jeʼm párrafo 15).
16. ¿Tyi ijɨɨskupakneyajiñ jempɨk dyanam an̈koʼmɨyñeyaj?
16 Dyaʼ tyi ijoo siiga tan̈koʼmɨyñeʼ o dyanam, tantumpɨytyam wɨap tammaymayataʼm (Sal. 128:1). Jeʼyukmɨ, siiga min̈koʼmɨytyoʼoba y dyanam impaʼtneʼ, seguido kuyooxaajɨ Jehová. Tuum yoomtɨwɨ iñɨɨyipɨk Sin Yi itywɨʼɨp Macao nɨmpa: «Wɨpɨɨkɨ iñtiempo sɨɨ iganam dyaʼ min̈koʼmɨyñeʼ, iga en jeʼm Paraíso maaj jaʼyan̈ amtyɨy in̈waganaitypa in̈wɨdyaaya o iñyoomoʼ». Pero, ¿y siiga impaʼtneum algun i iga in̈kusuʼnɨyñeʼ y iniktsukumneʼ tuum noviazgo? Jeʼm tun̈gak kuyujijom tan̈kɨʼpin̈ba tyi wɨap in̈wat iga miwɨnɨgaʼyiñ.
WAAÑI 137 Fieles, valiosas, amadas
a Tsaam miwɨwadaʼyba siiga immayba jeʼm an̈kejayoʼoyi itywɨʼɨp en jw.org iñɨɨyipɨk «Ser novios. Parte 1: ¿Estoy listo para salir con alguien?».
b TEGUEDAAJƗ YƗʼP JƗƗXI: Yɨʼp kuyujijom y jeʼm tun̈gak, jeʼm an̈maatyi noviazgo, nɨmtoʼoba jesɨk tuum pɨɨxiñ y tuum yoomoʼ naixpɨkyajtaap iga wɨaiñ ipɨkyaj ijɨɨxi siiga an̈koʼmɨyyajpa o dyaʼ. Jeʼm noviazgo tsukumpa jesɨk nakwiñkejyajtaap iga nakusunɨʼyñeyajta y kuyajpa hasta jesɨk ipɨkyajpa ijɨɨxi siiga natsakyajtaap o an̈koʼmɨyyajpa. Weeñi an̈eymɨyaj pɨkyajtaap jeʼm an̈matyiyaj sɨʼ iniixpɨkyajta y noviojyaj.
c Weeñi nɨɨyiyaj kukagayñeyajta.
d Proverbios 13:16: Jempɨk wɨjɨɨxiɨy ikwiñkejpa ixpɨgoʼoyi, pero jempɨk kuɨɨxiʼ dyaʼ iwɨpɨkpa ijɨɨxi.
e Weeñi an̈eymɨyaj jeʼm tɨɨwɨ ipɨkpa ijɨɨxi iga iñɨʼmaʼyba jeʼm yoomtɨwɨ iga ikusuʼnɨyñeʼ. Pero dyaʼ tyi naspa siiga jeʼm yoomtɨwɨ iwatpa jeempɨk (Rut 3:1-13). Impaʼtpa maaj información en jeʼm ¡Despertad! del 22 de octubre de 2004 juuty nɨmpa «Los jóvenes preguntan... ¿Cómo le digo lo que siento por él?».
f Aʼmɨ en jw.org jeʼm video Duroj iwɨwatyajpa iga iniityyaj fe. Jempɨk dyanam an̈koʼmɨyñeyaj.