1. ¿Tyi nɨmtoʼoba iga tammeʼtstaʼmiñ juutypɨk tan̈kunuʼkpa Dios, y juutypɨk tɨgɨykuʼmpa kun jeʼm tammaymayaaji?

 JEʼM nuntapɨk maymayaaji dyaʼ jobity togoyba, wɨap tanaity juchixkej. Jesɨgam Jesús an̈kiʼmoy jeʼm kotsɨkyukmɨ, in̈mat juutypɨk wɨap tanaitytyaʼm. Jeʼ nɨm: «Maymayyaj jempɨk imeʼtsyajpa juutypɨk ikunuʼkyajpa Dios» (Mat. 5:3). Jeʼ ijoodon̈ idyɨk iga tantumpɨytyam tawatnetamta kun jeʼm jɨɨxi iga tañixpɨguiñ y tan̈koosteñaʼyiñ Jehová. Yɨʼbam nɨmtoʼoba jeʼm Biblia jesɨk ipɨkpa jeʼm an̈maatyi «imeʼtsyajpa juutypɨk ikunuʼkyajpa Dios». Jehová jeʼ tuum Dios maymaypɨk, jeʼyukmɨ iga taɨchtyam tan̈kuyooxataʼmpa wɨaptyim tammaymayataʼm (1 Tim. 1:11).

2, 3. a) Juʼuts nɨm Jesús, ¿ityamnam wɨap imaymayayaj? b) ¿Tyi tan̈kɨʼpin̈taʼmpa yɨʼp kuyujijom, y tyiʼiga nasuntaap iga tan̈kɨʼpin̈taʼmiñ?

² ¿Nasuntaap iga juchixkej tawɨitytyaʼmiñ iga wɨaiñ tammaymayataʼm? Dyaʼ. Jesɨgam an̈kiʼmoy jeʼm kotsɨkyukmɨ, Jesús nɨm iga «agui maymay jém aŋyácneyajwɨɨp», mex iga ityoyan̈jaamyajpa jempɨk iwatneyaj o sɨʼ iñaskayaj tan̈kapɨk nasɨyoʼoyiyaj. Nɨmtyim iga «agui maymay jém tsa̱mpɨc yaachwatta̱p» o malnɨʼmaytyaap iga ikuyooxaap Dios (Mat. 5:4, 10, 11). Pero, ¿juutypɨk wɨap tammaymayataʼm jesɨk sɨʼ tannaskataʼm yɨʼɨmpɨk?

³ Jesús in̈kej iga jeʼm nuntapɨk maymayaaji tanaitypa jesɨk tammeʼtspa juutypɨk tan̈kunuʼkpa Dios, mex siiga jeʼm  tañityijom tawɨnɨgayñeʼ o dyaʼ tawɨnɨgayñeʼ (Sant. 4:8). ¿Tyi tayooxpaʼtpa? Yɨʼp kuyujijom tan̈kɨʼpin̈taʼmpa tukuteen an̈kiʼmayoʼoyiyaj iga tayooxpaʼttaʼmpa tanaitytyaʼm nuntapɨk maymayaaji.

4. ¿Juʼp jeʼ jeʼm wiñtyipɨk an̈kiʼmayoʼoyi tayooxpaʼtpaʼap iga tanaidyiñ nuntapɨk maymayaaji? (Salmo 1:1-3).

⁴ WIÑTYIPƗK AN̈KIʼMAYOʼOYI: Siiga tanaitytyoʼoba nuntapɨk maymayaaji, tanakwiʼiktaiñ espiritualmente. Taɨchtyam y jeʼm animatyaj tansuntaʼmpa wiʼkkuy iga wɨaiñ tañitytyaʼm. Pero numaaj taɨchtyam wɨap tanakwiʼikta espiritualmente, y wɨɨ iga jeempɨgam tan̈wadyiñ. Jeʼyukmɨ Jesús nɨm: «Jém pɨxiñt́am d́a it́pa no más con jém caxt́ána̱ñi iga icútpa. Wɨ̱it́pa jém pɨ̱xiñ siiga iwatpa it́u̱mpɨy juuts iñɨ́máy Dios» (Mat. 4:4). Jeʼyukmɨ tumtum jaama wɨɨ iga tammaytyaʼmiñ jeʼm Dios In̈maatyi. Jeʼm salmista nɨm: «Maymay jempɨk [...] ikusuʼnɨʼyba jeʼm Jehová in̈kiʼimiyaj, tumtum jaama ichokoymayba» (maayɨʼ Salmo 1:1-3).

5, 6. a) ¿Tyityam tan̈kejaʼyba jeʼm Biblia? b) ¿Juutypɨk tayooxpaʼtpa jesɨk tammayba jeʼm Biblia?

⁵ Jehová tsaam tatoyba, jeʼyukmɨ jeʼm Bibliajom tanɨʼmaʼyba tyi wɨap tan̈wat iga tamaymayataʼmiñ. Juʼuts akwiñkejoʼoyi, tan̈kejaʼyba tyiʼiga tachiʼiñeʼ jeʼm tañityi, juutypɨk wɨap tanamigoja y tyi wɨap tan̈wat iga tawadaʼyiñ perdón jeʼm tantan̈kaʼ. Tan̈madaʼybatyim tuum wɨbɨk nɨgɨyoʼoyi (Jer. 29:11). Jesɨk tammayba jeʼm Biblia tañixpɨkpa yɨʼpyaj an̈kejayoʼoyiyaj y yɨʼp tsaam tamaymaywatpa.

⁶ Juʼuts tanjoodon̈tam, jeʼm Bibliajom tampaʼtpa jaʼyan̈ an̈kiʼmayoʼoyiyaj iga tayooxpaʼttaʼmpa  tañityijom. Jesɨk tan̈kupɨktaʼmpa, tsaam tamaymaytyam. Jeʼyukmɨ, siiga tan̈yaʼknetaʼm iga tanaitytyaʼm kobakpiijiyaj, majnam tammaytyaʼmiñ jeʼm Dios In̈maatyi y tan̈kujɨɨstaʼmiñ jempɨk tammayñetaʼm. Jesús nɨm: «¡Más wɨ̱it́pa jém imatoŋpáppɨc jém Dios iŋmadayooyi y iwatpa juuts iñɨ́máypa!» (Luc. 11:28).

7. ¿Juutypɨk wɨap tan̈wɨpɨk jeʼm tiempo tantopnewɨʼɨp iga tammayba jeʼm Dios In̈maatyi?

⁷ Jesɨk tammayba jeʼm Dios In̈maatyi, wɨɨ iga «tanakkɨʼɨñiñ». ¿Tyi nɨmtoʼoba yɨʼp? Tan̈kujɨɨstaʼmiñ tuum akwiñkejoʼoyi. Algun i tawadaʼyba jeʼm wiʼkkuy tsampɨk tan̈kusuʼnɨʼyba. Pero wɨapsɨ iga dyaʼ tanchokoykɨʼɨspa iga jikskɨy tasɨʼɨba o tanaity jaʼyan̈ kobakpiijiyaj. Y jesɨk yajum tawiʼiki, okmɨnam tan̈kujɨɨspa tyiʼiga dyaʼ tanchokoykɨʼɨs jeʼm wiʼkkuy. Jeempɨktyim wɨap tannaskaʼ jesɨk tammayba jeʼm Biblia, wɨapsɨ iga dyaʼ «tanakkɨɨnba» jempɨk Jehová sɨʼ tan̈kejay siiga tsaam jikskɨy tammayba. Jeʼyukmɨ jesɨk tammayba jeʼm Biblia tanan̈jɨɨsjaguiñ tyi naspa ixɨʼ, juʼuts jeʼm jɨɨyiyaj y tanchokoykujɨɨxiñ jempɨk tammayñetaʼm. Siiga tan̈watpa yɨʼɨmpɨk majtyim tamaymayataʼmpa.

8. ¿Juutypɨk sɨʼ iwɨakkupak jeʼm iyooxakuy jeʼm «esclavo fiel y prudente»? (Aʼmɨtyim jeʼm nota).

⁸ Jesús ichiʼiñeʼ jeʼm yooxakuy jeʼm «esclavo fiel y prudente» iga takwiʼktaʼmiñ espiritualmente, y tsaam iwɨakkupakneyaj yɨʼp yooxakuy (Mat. 24:45). b Ityumpɨy jeʼm wiʼkkuy espiritual chioypaʼap jeʼm esclavo fiel ityoppa jeʼm Dios In̈matyijom (1 Tes. 2:13). Yɨʼp wiʼkkuy tayooxpaʼtpa iga tañixpɨgaʼyiñ jeʼm Jehová ijɨɨxi, juʼuts in̈kejpa jeʼm Biblia. Jeʼyukmɨ tammaytyaʼmiñ jeʼm Totjaayi Takjoodon̈apaʼap y jeʼm ¡Despertad!, y ityumpɨy jempɨk tampaʼtpa en jw.org. Tan̈kuyujkataʼmpatyim jempɨk kɨʼpin̈yajtaap jeʼm an̈tuʼumaajiyaj de entre semana y fin de semana, y tanaʼmtaʼmpatyim tumtum mes jeʼm JW Broadcasting^®. Siiga tan̈wɨpɨkpa ityumpɨy jeʼm wiʼkkuy espiritual, tayooxpaʼtpa iga tanakkupaguiñ jeʼm wɨstenpɨk an̈kiʼmayoʼoyi iga tachiʼiba nuntapɨk maymayaaji.

9. ¿Juʼp jeʼ jeʼm wɨstenpɨk an̈kiʼmayoʼoyi tayooxpaʼtpaʼap iga tanaidyiñ nuntapɨk maymayaaji?

⁹ WƗSTENPƗK AN̈KIʼMAYOʼOYI: Iga wɨaiñ tanaitytyaʼm nuntapɨk maymayaaji, tan̈kupɨgaytyaʼmiñ jeʼm Jehová in̈kiʼmayoʼoyiyaj. Jeʼm ijaywɨʼɨp tuum jaakaʼ jeʼm salmo nɨm: «Maymay ityumpɨy jempɨk ikɨɨn̈ba Jehová, y jempɨk sɨʼɨba ityun̈jom» (Sal. 128:1). Iga tan̈kɨɨn̈ba Jehová nɨmtoʼoba iga tanaidyay jaʼyan̈ respeto y dyaʼ tan̈wattoʼoba jempɨk dyaʼ ikusuʼnɨʼyba (Prov. 16:6). Jeʼyukmɨ tan̈kupɨgaʼyba jeʼm in̈kiʼmayoʼoyiyaj itywɨʼɨp Bibliajom iga tan̈madaʼyba tyi wɨɨ y tyi dyaʼ wɨɨ tan̈wat (2 Cor. 7:1). Siiga tan̈watpa jempɨk Jehová ikusuʼnɨʼyba y dyaʼ tan̈watpa jempɨk jeʼ ijooyixpa, tamaymayaap (Sal. 37:27; 97:10; Rom. 12:9).

10. Siiga tanjoodon̈am tyi ixunba Dios, ¿tyi wɨɨ iga tan̈wattaʼmiñ? (Romanos 12:2).

¹⁰ (Maayɨʼ Romanos 12:2). Wɨapsɨ iga algun i ijoodon̈ iga numaaj Jehová wɨap tanɨʼmay tyi wɨɨ y tyi dyaʼ wɨɨ, pero nasuntaptyim iga ikupɨguiñ jeʼm Dios in̈kiʼmayoʼoyiyaj. Tan̈kujɨɨstaʼmiñ tuum akwiñkejoʼoyi. Algun i ijoodon̈am iga numaaj jeʼm an̈jagoʼoyiyaj wɨap iñɨmyaj juʼtspɨy jikskɨy sɨʼɨnɨmiñ jeʼm carreteras, pero wɨapsɨ iga dyaʼ ikupɨkpa yɨʼpyaj an̈kiʼimiyaj. Y jeʼyukmɨ wɨapsɨ iga sɨʼɨba maaj jikskɨy. Y taɨchtyam, kun tyityam tan̈watpa  tumtum jaama tañityijom tanakwiñkejpa siiga tan̈kupɨkpa iga tawɨwadaʼyba jeʼm Jehová in̈kiʼmayoʼoyiyaj (Prov. 12:28). Jeʼam idyɨk ikupɨkpa David, jeʼyukmɨ iñɨʼmay a Jehová: «Mich anan̈kejaʼyba juutypɨk awɨitypa. Juuty miity ity jaʼyan̈ maymayaaji; jeʼm inin̈wɨɨmɨʼ dyaʼ keman kuyajpa jeʼm maymayaaji» (Sal. 16:11).

11, 12. a) ¿Tyiʼiga tanakuixtyamtaiñ jesɨk tanaitytyaʼm kobakpiijiyaj o tan̈yaʼknetaʼm? b) ¿Juutypɨk tayooxpaʼtpa jeʼm an̈matyiyaj de Filipenses 4:8 iga tan̈wɨkupin̈iñ jeʼm entretenimiento?

¹¹ Jesɨk tanaitytyaʼm kobakpiijiyaj o tan̈yaʼknetaʼm, wɨapsɨ iga tan̈kuaʼmpa tyi wɨap takkujaamay jempɨk sɨʼ tannaskaʼ, y wɨapsɨ iga tayooxpaʼtpa. Pero wɨɨ iga tanakuixtyaiñ iga odoy tan̈wadyiñ jempɨk Jehová ijooyixpa (Efes. 5:10-12, 15-17).

¹² En jeʼm carta iga jeʼm apóstol Pablo ijaʼyay jeʼm tɨwɨtam de Filipos, nɨʼmayyajta iga ijɨɨsyajiñ jeʼm nuumapɨk cosa, jeʼm wɨbɨk jɨɨxi, jeʼm dyapɨk malo y jeʼm wɨtampɨk cosa (maayɨʼ Filipenses 4:8). Mex iga dyaʼ idyɨk sɨʼ ijɨykiʼm jeʼm entretenimiento, jempɨk nɨm tayooxpaʼtpa iga tan̈wɨkupin̈iñ. ¿Tyiʼiga dyaʼ tan̈watpa yɨʼɨmpɨk? Juuty jeʼm versículo ijɨykiʼmpa «cosa», tyiʼiga dyaʼ tanakkaʼmpa «waañiyaj», «películas», «libros» o «videojuegos». Yɨʼp tayooxpaʼtpa tan̈kujɨɨs juʼptam ikusuʼnɨʼyba Dios y juʼptam dyaʼ. Tan̈kupɨktamtoʼoba jeʼm Jehová in̈kiʼmayoʼoyiyaj tañityijom (Sal. 119:1-3). Jesɨk kun tuum jɨɨxi kuaʼyñewɨʼɨp, wɨap tan̈watkiʼps jeʼm tun̈gak an̈kiʼmayoʼoyi iga tachiʼiba nuntapɨk maymayaaji (Hech. 23:1).

13. ¿Juʼp jeʼ jeʼm tukutenpɨk an̈kiʼmayoʼoyi tayooxpaʼtpaʼap iga tanaidyiñ nuntapɨk maymayaaji? (Juan 4:23, 24).

¹³ TUKUTENPƗK AN̈KIʼMAYOʼOYI: Jempɨk maaj tanteguedaiñ tañityijom jeʼ iga tan̈kuyooxaiñ Jehová. Iga Jehová jempɨk tawatnetaʼm, numaaj jeʼ tan̈kuyooxataʼmiñ y tan̈kujiʼptaʼmiñ (Apoc. 4:11; 14:6, 7). Jeʼyukmɨ jeʼm tañityijom tanteguedaiñ iga tan̈kuyooxaap juʼutsam jeʼ ixunba kun «jém nu̱mapɨc aŋquímayooyi» (maayɨʼ Juan 4:23, 24). Tansunba iga jeʼm Dios ipɨɨmi tajɨɨxian̈chiʼiñ iga wɨaiñ tan̈kuyooxa juʼutsam in̈kejpa jeʼm Biblia. Iga tan̈kuyooxaap jeʼam jempɨk maaj tanteguedaap, mex iga taitytyaʼm tuum an̈eymɨ juuty dyaʼ taaʼmchityamtaap iga tanan̈kejtaʼmpa jeʼm Dios In̈maatyi. Yɨʼp jaama ity maaj de 100 tɨwɨtam y yoomtɨwɨtam iga pajneyajta numaaj iga kuyooxaoyyajpa juʼuts Jehová itestigojyaj. c Pero maymayyaj iga iwatyajpa juʼtspɨyam wɨayajpa iga in̈wejpaʼtyajpa Dios, kuyujyajpa y in̈kejayyajpa tun̈gakyaj de jeʼm Dios iAn̈jagoʼoyi. Mex iga tamalnɨʼmaytyamtaap o tayaʼachwattamtaap, tamaymaytyam iga Jehová tayooxpaʼttaʼmpa y takumaykettaʼmpa siiga tanyaʼachɨytyaʼmpa (Sant. 1:12; 1 Ped. 4:14).

14. ¿Tyi iñaskaʼ tuum traytyipɨxiñ de Tayikistán, y tyiʼiga?

¹⁴ Ity nasɨyoʼoyiyaj yɨʼp jaamapɨk iga ikwiñkejyajpa iga yɨʼp tukuteen an̈kiʼmayoʼoyi tayooxpaʼtpa iga tanaidyiñ nuntapɨk maymayaaji, dyaʼ tyi ijoo tyi sɨʼ tannaskataʼm. Tanaʼmtaʼmiñ jempɨk iñaskaʼ tuum traytyipɨxiñ iniitywɨʼɨp idyɨk 19 iamtyɨy, iñɨɨyipɨk Yovidón Boboyónov, itywɨʼɨp Tayikistán. Iga dyaʼ iwat jeʼm servicio militar, jeʼm amtyɨy 2019 jeʼm 4 de octubre oy imatsta ityɨkkɨʼɨm. Pajta waatyña meses juʼuts algun i iga tsaam imalwatneʼ. Waatyi medios de comunicación in̈matyaj iga tsaam yaʼachwatta yɨʼp tɨɨwɨ. In̈matyajtyim iga koʼtsta iga iwadyiñ  idyɨk tuum juramento militar y ikkaʼmiñ jeʼm uniforme. Okmɨ nanɨkta tuum an̈eymɨ juuty teguedɨyyajtaap iga yooxayajiñ y jemum jaʼy ityi hasta jesɨk jeʼm an̈jagoʼoyi ikujɨyñas y pɨʼɨmɨyoy iga kutsɨgaytyaiñ. Mex iga iñaskaʼ yɨʼp kutɨʼɨchi Yovidón ikupɨk Jehová y tsaam maymay idyɨk. ¿Tyi iyooxpaʼt? Iga juchixkej nakuiixtya espiritualmente.

15. ¿Juutypɨk nakwiʼikta espiritualmente Yovidón iganam pajneta idyɨk?

¹⁵ Jesɨgam pajneta idyɨk, Yovidón nakwiʼikta espiritualmente, mex iga dyaʼ idyɨk inii ni tuum Biblia ni jeʼm totjaayiyaj. ¿Jesɨk juutypɨk iwat? Jesɨgam jeʼm tɨwɨtam ininɨgayyajpa wiʼkkuy ijaykunuʼgayyajpa idyɨk jeʼm bolsayuk jeʼm texto maytyapaʼap tumtum jaama. Jeempɨgam Yovidón imayba idyɨk jeʼm Biblia y tumtum jaama ikujɨɨspa idyɨk jempɨk imayñeʼ. Jesɨgam put de jeʼm cárcel, ichiʼ yɨʼp an̈kiʼmayoʼoyi jempɨk dyanam idyɨk iñaskaneyaj yɨkxpɨk kutɨʼɨchi: «Iganam miwɨataʼmpa kunuʼktaʼamɨ Jehová. Y, iga wɨaiñ in̈wattaʼm yɨʼɨmpɨk, maytyaʼamɨ jeʼm Biblia y jeʼm totjaayiyaj».

16. ¿Tyiapaʼap jempɨk Yovidón ityeguedaap idyɨk?

¹⁶ Tantɨɨwɨ Yovidón ikupɨk jeʼm Jehová in̈kiʼmayoʼoyiyaj. Dyaʼ iaʼmchiʼ iga jeʼm malojpɨk kusuʼnɨyoʼoyiyaj ikmalwadyiñ, jeʼ juchixkej  ijɨɨskupak jempɨk Jehová ikusuʼnɨʼyba. Juchixkej ityegueda ityumpɨy jempɨk Jehová iwatneʼ. Tumtum kukeja imaton̈ba idyɨk juutypɨk wanyajpa jeʼm jonyaj, y tsuʼukɨʼɨm iaʼmpa idyɨk jeʼm Pooyaʼ y jeʼm maatsayaj. Nɨm: «Yɨʼpyaj xaajayaj iga Jehová tachiʼiñeʼ amaymaywatpa idyɨk y jesɨk wɨam idyɨk anan̈jaam». Jesɨk tanteguedaap jeʼm xaajayaj espirituales y tyityam tachiʼiba Jehová, tamaymaywatpa y yɨʼbam maymayaaji tayooxpaʼtpa iga tanyaʼachɨʼyiñ.

17. ¿Juutypɨk wɨap iyooxpaʼt jeʼm an̈matyiyaj de 1 Pedro 1:6, 7 algun i siiga sɨʼ iñaskaʼ juʼutstyim Yovidón?

¹⁷ Yovidón ityegueda iityijom iga ikuyooxaap Jehová. Ijoodon̈ idyɨk iga maaj wɨɨ siiga kupɨgoʼyba. Jesús nɨm: «Wɨ̱ iga tanjɨ̱spa tanJa̱tuŋ Dios, je icut́um taŋcuyo̱xa̱p» (Luc. 4:8). Jeʼm comandantes y soldados ixunyajpa idyɨk iga Yovidón odoy ikuyooxaiñ Dios. Pero jeʼ tumtum jaama pɨɨmi in̈wejpaʼt Jehová, iwagaʼyba idyɨk iga iyooxpaʼdyiñ iyaʼachɨy. Mex iga pɨɨmi yaʼachwatta Yovidón juchixkej ikupɨk Jehová. Sɨɨ tsaam maymay, ¿tyiʼiga?, iga jeʼm ife majtyim mɨjaneʼ, mex iga matsta, koʼtsta y pajta (maayɨʼ 1 Pedro 1:6, 7).

18. ¿Tyi tayooxpaʼttaʼmpa iga odoy tampatstogoytyaʼmiñ jeʼm nuntapɨk maymayaaji?

¹⁸ Jehová ijoodon̈ jempɨk tatogoyaytyaʼm iga wɨaiñ tanaitytyaʼm jeʼm nuntapɨk maymayaaji. Siiga tantun̈ɨytyaʼmpa jeʼm tukuteen an̈kiʼmayoʼoyiyaj tan̈kɨʼpin̈netamwɨʼɨp yɨʼp kuyujijom, dyaʼ togoyba tammaymayaaji mex iga tannaskataʼmpa yaʼachaajiyaj. Jesɨk wɨap tannɨmtaʼm: «¡Maymay jeʼm kumun iga iDios jeʼ Jehová!» (Sal. 144:15).