Peʼm amtyɨy jeʼm organización iwat kukakiyaj iga iyooxpaʼt jeʼm Ikuyujkayajpaʼap jeʼm Biblia iga ikoosteñayyajiñ Jehová kun tumtyi jɨɨxi. Jeʼm totjaayi The Watch Tower moj iwɨan̈mat jeʼm texto bíblico kɨʼpin̈tapaʼap idyɨk tumtum semana en jeʼm Reunión de Oración, Alabanza y Testimonio. Iwatyaj tuum calendario iga iniity idyɨk jeʼm texto tumtum semana y tuum waañi tumtum jaamapɨk, yɨʼp wɨap iwanyaj idyɨk jesɨk wɨkuyujyajpa iyaʼak o kun ifamilia.

Jeʼm an̈tuʼumaajijom, jeʼm Ikuyujkayajpaʼap jeʼm Biblia in̈matyajpa idyɨk juʼuts iñɨgayñeyaj jeʼm an̈matkuyjom, ichiʼiyajpa gracias Jehová, wanyajpa o iwatyajpa tuum an̈wejpadoʼoyi. Eva Barney, chin̈ en 1923 jesɨk 15 idyɨk iamtyɨy, jeʼ nɨm: «Siiga algun i in̈mattoʼoba idyɨk teeñchukumpa y mojpa idyɨk nɨɨmi ‹Anchiʼiba gracias jeʼm tanOmi iga akwiñkejayñeʼ yaʼachan̈jamoʼoyi...›». Weeñi tɨwɨtam tsaam ikusuʼnɨyyajpa idyɨk in̈matyaj. Jeʼm yoomtɨwɨ Barney nɨmtyim: «Jeʼm tɨɨwɨ Godwin tsaamiam idyɨk y tsaam ikusuʼnɨʼyba idyɨk in̈mat. Pero, jesɨk jeʼm iyoomoʼ iaʼmpa iga jempɨk sɨʼ iknas jeʼm an̈tuʼumaaji dyam ikumaton̈toʼoba, jeʼ ichichaʼyba idyɨk jeʼm iyoʼotyi y jeʼm tɨɨwɨ Godwin kooñbam idyɨk».

Tumtum mes jeʼm kumun iwatpa idyɨk tuum Reunión de Oración, Alabanza y Testimonio. Jeʼm totjaayi The Watch Tower del 1 de abril de 1923 in̈mat jempɨk wattaap idyɨk: «Wɨɨ iga jeʼm an̈tuʼumaajijom an̈mattaiñ juʼuts iñɨgayñeyaj jeʼm an̈matkuyjom y anmajan̈chiʼiyajtaiñ jempɨk kuyooxaoyyajpa […]. Y an̈kupɨktaʼmpa iga ityumpɨyyaj majtyim nawɨnanɨgayyajtaap siiga iwatyajpa yɨʼɨmpɨk».

Yɨʼpyaj an̈tuʼumaajiyaj tsaam iyooxpaʼt Charles Martin, tuum an̈matkɨʼɨwiñ iga iniity idyɨk 19 iamtyɨy itywɨʼɨp Vancouver (Canadá). Nɨm: «Yɨʼp ayooxpaʼt an̈kutɨʼɨyɨy tyi anɨmpa jeʼm an̈matkuyjom. Jesɨk algun i in̈matpa idyɨk juʼuts iñɨgayñeʼ, ayooxpaʼt mu anjoodon̈a tyi jempɨk anɨʼmiñ, mex siiga dyaʼ akumaton̈yajtoʼoba idyɨk».

Iga jeʼm tɨwɨtam putyajpa idyɨk jeʼm an̈matkuyjom, yooxpadoy iga iniityyajiñ tumtyi jɨɨxi.  Jeʼm totjaayi The Watch Tower del 1 de abril de 1923 nɨm: «Iga tantumpɨytyam tan̈wattaʼmiñ tumtyi yooxakuy […], jeʼm martes 1 de mayo de 1923 tantumpɨytyam taputtaʼmpa jeʼm an̈matkuyjom. Y jeempɨgam tan̈wattaʼmpa tumtum mes jeʼm wiñtyipɨk martes […]. Ityumpɨy jeʼm an̈matkɨʼɨwiñyaj yooxpadoyyajiñ kun yɨʼp yooxakuy».

Jempɨk mañiyajnam putyajpatyim idyɨk jeʼm an̈matkuyjom. Tuum yoomtɨwɨ iñɨɨyipɨk Hazel Burford iga 16 idyɨk iamtyɨy en 1923, nɨm: «Jeʼm totjaayi Bulletin iniity idyɨk jɨɨxian̈chioʼoyiyaj iga wɨap ampɨktaʼm jeʼm an̈matkuyjom. a Tsaam amaymay idyɨk iga aputpa kun anjatun̈wewej». Pero Hazel in̈teeñkamok tuum kutɨʼɨchi: «Tuum tɨɨwɨ tsaamipɨgam dyaʼ iwɨan̈jaam idyɨk iga anan̈madayyajiñ tun̈gakyaj jempɨk an̈kupɨkneʼ. Peʼm tiempo, weeñiyaj dyaʼ ikutɨʼɨyɨyñeyaj idyɨk iga ityumpɨy jeʼm Ikuyujkayajpaʼap jeʼm Biblia ikujiʼpyajiñ jempɨk tawatnetaʼm, hasta jeʼm ‹traytyipɨxiñtyam y wooñyomtam›» (Sal. 148:​12, 13). Pero Hazel dyaʼ ichak jeʼm an̈matkuy. Maaj okmɨ oy jeʼm wɨstenpɨk clase de jeʼm Escuela de Galaad y tsɨʼy juʼuts misionera en Panamá. Yɨʼpyaj tɨwɨtam ikakyaj ijɨɨxi y ikutɨʼɨyɨyyaj iga jempɨk mañiyajnam wɨaptyim iputyaj jeʼm an̈matkuyjom.

Jeʼm mɨjtampɨk an̈tuʼumaajiyaj iyooxpaʼttyim jeʼm tɨwɨtam iga iniityyajiñ tumtyi jɨɨxi. Jesɨk itypa yɨʼpyaj an̈tuʼumaajiyaj tsaktaap idyɨk tuum jaama iga putyajpa jeʼm an̈matkuyjom, juʼuts akwiñkejoʼoyi jempɨk watta en Winnipeg (Canadá). Tɨʼpyajta ityumpɨy jempɨk nɨkneyaj idyɨk yɨʼp mɨjpɨk an̈tuʼumaaji iga jeʼm 31 de marzo putyajiñ jeʼm an̈matkuyjom. Y tsaam iwɨnɨgayyaj. Jeʼtyim amtyɨy jeʼm 5 de agosto watta tuum mɨjpɨk an̈tu’umaaji en Winnipeg y an̈tuʼumaayaj tuumtsam 7,000. Ni keman dyaʼ oyba an̈tuʼumaajiyaj tsaam jaʼyan̈.

En 1923 del 18 al 26 de agosto watta tuum mɨjpɨk an̈tuʼumaaji tsampɨk importante en Los Ángeles (California). Jesɨk dyam juʼchan̈  ityogoyay idyɨk iga wattaiñ, jeʼm periódicos in̈matyaj iga itypa yɨʼp mɨjpɨk an̈tuʼumaaji y jeʼm Ikuyujkayajpaʼap jeʼm Biblia ikɨan̈kotyaj maaj de 500,000 invitaciones. Y jeʼm icarros y jeʼm transporte público ikkaʼmayyajtyim letreros iga itypa idyɨk jeʼm mɨjpɨk an̈tuʼumaaji.

Jeʼm sábado 25 de agosto, jeʼm tɨɨwɨ Rutherford iknas jeʼm najɨʼyoʼoyi «Ovejas y cabras», iwɨan̈mat iga jeʼm «ovejas» jeʼ jempɨk ikakyajpa ijɨɨxi y ityyajpa yɨʼp Naxyukmɨ en tuum paraíso. Iknastyim jeʼm najɨʼyoʼoyi «Amonestación», juuty in̈mat juʼtspɨy sɨʼ imalwatyaj jeʼm religiónyaj mɨgoyyajpaʼap y in̈kiʼm jeʼm wɨtampɨk ianmajyaj iga putyajiñ de jeʼm Mɨjpɨk Babilonia (Apoc. 18:​2, 4). Maaj okmɨ topta tuum tratado iga iniity idyɨk yɨʼp jɨɨxi y jeʼm Ikuyujkayajpaʼap jeʼm Biblia ikusajyaj jaʼyan̈ copias ikuwɨtyi naxyukmɨ.

Jeʼm in̈an̈pɨgam jaama de yɨʼp mɨjpɨk an̈tuʼumaaji, maaj de 30,000 ikumaton̈yaj jeʼm najɨʼyoʼoyi iknaswɨʼɨp jeʼm tɨɨwɨ Rutherford iga iñɨɨyi «Ityumpɨy jeʼm naciónyaj ikunɨkiyaj Armagedón, pero jaʼyan̈yaj jempɨk sɨɨ ityyaj dyam keman kaʼayajpa». Jeʼm Ikuyujkayajpaʼap jeʼm Biblia ijɨɨsyaj iga jaʼyan̈yaj an̈tuʼumaayajpa, jeʼyukmɨ iñuʼksyaj jeʼm Coliseo de Los Ángeles, tuum estadio yaguiñpɨk watneta idyɨk. Y ipɨgayyajtyim jeʼm estadio isonido iga ityumpɨyyaj wɨaiñ ikumaton̈yaj jeʼm najɨʼyoʼoyiyaj. Y tsaam jaʼyan̈ ikumaton̈yaj por radio.

En 1923 moj in̈matta jeʼm Dios In̈maatyi en África, Europa, la India y Sudamérica. En la India, Adavimannathu Joseph, mex iga yoʼomɨy idyɨk y seis imaanɨk, yooxpadoy iga wattaiñ totjaayiyaj en hindi, tamil, telugu y urdu.

En Sierra Leona, Alfred Joseph y Leonard Blackman ijaʼyay jeʼm central mundial de Brooklyn (Nueva York) iga iwaʼgayyaj yooxpadoʼoyi. Y jeʼm 14 de abril de 1923, kutson̈yajta. Alfred nɨm: «Ajɨymiñaytya tuum sábado, piʼichkɨʼmum idyɨk». Jempɨk ijɨymiñay ikwaʼk: «¿Micham jempɨk iñjaʼyay jeʼm Sociedad Watch Tower iga in̈waʼgay an̈matkɨʼɨwiñyaj?». «Jɨ», nɨm Alfred. «Ɨcham jempɨk akutsatta». ¿Iapaʼap jempɨk sɨʼ inimuru idyɨk? William Brown. Yaguiñ nuʼkneyaj idyɨk en Sierra Leona kun jeʼm iyoomoʼ, Antonia, y wɨsteen jeʼm iyommanɨktam, Louise y Lucy. Dyaʼ maaj jaʼy jeʼm tɨwɨtam iixpɨkyaj.

 Alfred nɨmtyim: «Ikukejaama iganam Leonard y ɨch sɨʼ an̈kuyujkataʼm idyɨk jeʼm Biblia juʼuts an̈wattaʼmpa tumtum semana, nuʼk jeʼm puerta an̈naakaʼ William Brown. Tsaam ichoowaixpa idyɨk jeʼm nuumapɨk an̈kejayoʼoyi, jeʼyukmɨ ikukejaama iknastoʼoba idyɨk tuum najɨʼyoʼoyi para ityumpɨyyaj». Dyaʼ nuʼk ni tuum mes y yɨʼp tɨɨwɨ yajneum idyɨk ikɨan̈kot ityumpɨy jeʼm totjaayiyaj ininɨknewɨʼɨp. Dyaʼ maaj jaʼy kutsadaytya tun̈gak 5,000 libros, y yajtyim mu ikɨan̈kot. Brown tsaam iwɨkuyooxa Jehová y juchixkej ipɨk jeʼm Biblia jesɨk najɨʼyoʼyba, jeʼyukmɨ ixpɨktaap idyɨk juʼuts Brown jeʼm inisɨʼɨpaʼap jeʼm Biblia y dyaʼ iga imaʼyba libros.

Jeʼm tɨwɨtam dyam kutɨgɨyyajpa idyɨk en jeʼm sucursal itywɨʼɨp Barmen (Alemania), y dyam jaʼyñeʼ idyɨk jeʼm ejército francés ikutɨgɨyyajpa peʼm tɨgan̈juj. Jeʼm Ikuyujkayajpaʼap jeʼm Biblia ipaʼtyaj weeñi edificios en Magdeburgo juuty wɨap idyɨk iwatyaj jeʼm totjaayiyaj. Jeʼm 19 de junio yaj ikkaʼyyaj ityumpɨy y ipin̈yaj jeʼm equipo de imprenta, y nɨkyaj jeʼm joomipɨk Betel de Magdeburgo. Tuum jaama okmɨ iga akjoodon̈ata jeʼm central mundial iga putneyajum idyɨk de jeem, jeʼm periódicos in̈matyaj iga Francia ikutɨgɨyñeum jeʼm tɨgan̈juj Barmen. Jeʼm tɨwɨtam ijaamyaj iga Jehová sɨʼ ikuixyaj idyɨk y sɨʼ ikumayketyaj.

En Brasil, George Young in̈mat jeʼm wɨtampɨk an̈maatyi ikuwɨtyi jeʼm país. Jeem iktsukum tuum sucursal y moj iwat jeʼm totjaayi The Watch Tower jeʼm an̈matyiimɨ portugués. Mex iga dyanam waatyña meses nuʼkneʼ idyɨk, ikɨan̈kot maaj de 7,000 totjaayiyaj. Iga nuʼk jeem tsaam iyooxpaʼt Sarah Ferguson. Dende 1899 mojneʼ imay jeʼm totjaayi The Watch Tower, pero dyaʼ wɨaneʼ idyɨk ichin̈. Dyaʼ maaj jaʼy iga nuʼkneʼ idyɨk George Young, jeʼ y cuatro jeʼm imanɨktam chin̈yaj.

Jesɨk kuyajiam idyɨk peʼm amtyɨy, jeʼm totjaayi The Watch Tower del 15 de diciembre de 1923 in̈mat juutypɨk yooxpadoyñeʼ jeʼm kukakiyaj watyajtawɨʼɨp jeʼm an̈tuʼumaajijom, jeʼm an̈matkuyjom y jeʼm mɨjtampɨk an̈tuʼumaajiyaj. Nɨm: «Wɨkejpa iga jeʼm kumunyaj […] pɨɨmianeʼ espiritualmente […]. Tanawɨtsaktamtaiñ iga tan̈wattaʼmpa maaj yooxakuy y seguido tan̈kuyooxataʼmiñ Dios kun maymayaaji jeʼm amtyɨy miñpaʼap».

Jempɨk nas jeʼm amtyɨy 1924, tsaam igaʼman̈jakyaj jeʼm Ikuyujkayajpaʼap jeʼm Biblia. Jeʼm tɨwɨtam de jeʼm central mundial, itywɨʼɨp Brooklyn, waatyña meses nɨki idyɨk iga sɨʼ iwatyaj jeʼm edificios en Staten Island. Yaj mu iwatyaj jeʼm edificios jeʼm amtyɨy 1924. Yɨʼpyaj, yooxpadoyyaj iga maaj nawɨnanɨgayyajtaiñ jeʼm tɨwɨtam y an̈mattaiñ jeʼm wɨtampɨk an̈matyiyaj.