1, 2. ¿Juutypɨk wɨap tammay y tan̈wɨkutɨʼɨyɨy jeʼm Biblia? An̈maatɨ tuum akwiñkejoʼoyi.

 KUJƗƗSƗ iga iñjuytyoʼoba tuum tɨk. ¿Tyi iñjoodon̈aiñ wiñtyi iga impɨkpa iñjɨɨxi? ¿Iñjuybasɨ numaaj iga iñaʼmaʼyba jeʼm tɨk ifoto? ¿Dyaʼ maaj wɨɨ iga nɨguiñ iñaʼm? Wɨapsɨ iga in̈kuwityxeetpa, in̈kɨʼpin̈aʼyba jeʼm icuarto y in̈wɨkɨʼpin̈ba jojmɨʼ. Y inikwaʼkpa algun i juutypɨk watneta. Wɨkejpa iga siiga iñjuytyoʼoba jeʼm tɨk in̈wɨkɨʼpin̈ba.

² Jeempɨktyim tan̈wadyiñ jesɨk tammayba y tan̈kuyujkaʼaba jeʼm Biblia. Tuum libro nɨmpa iga jeʼm Biblia jeex juʼuts «tuum mɨjpɨk y wɨtyipɨk edificio iga tsaam yukmɨ y jojmɨʼ pɨʼɨmaneʼ naskukɨʼɨm». ¿Tyi tayooxpaʼtpa iga tan̈kutɨʼɨyɨʼyiñ ityumpɨy jempɨk nɨmpa jeʼm Biblia? Siiga jikskɨy tammayba numaaj tan̈kutɨʼɨyɨʼyba jeʼm an̈kejayoʼoyi o «aŋquímayooyi d́apɨc táŋca» (Heb. 5:12). Juʼutstyim naspa kun jeʼm tɨk, tan̈wɨkɨʼpin̈iñ ityumpɨy. Iga tan̈wɨkutɨʼɨyɨʼyiñ jeʼm Biblia, tanaʼmiñ juutypɨk tuum texto iniity tumtyi jɨɨxi kun tun̈gak texto. Dyaʼ numaaj iga tanjoodon̈aiñ juʼptam an̈kejayoʼoyi tan̈kupɨknetaʼm, tanjoodon̈aiñtyim tyiʼiga tan̈kupɨknetaʼm.

3. ¿Tyi iñɨʼmay Pablo iga iwatyajiñ jeʼm ityɨwɨtam, y tyiʼiga? (Efesios 3:14-19).

³ Iga tan̈wɨkutɨʼɨyɨʼyiñ jeʼm Dios In̈maatyi y tan̈wɨkɨʼpin̈iñ, nasuntaap iga tan̈wɨkuyujkaiñ jeʼm an̈kejayoʼoyiyaj tan̈kapɨk tan̈kutɨʼɨyɨy. Jeʼm apóstol Pablo ianmajan̈chiʼ jeʼm cristianojyaj iga iwɨkuyujkayajiñ jeʼm Dios In̈maatyi y nɨm «jesɨc wɨa̱p iŋcutɨɨyɨyt́a con it́u̱mpɨy jém Dios ipɨxiñt́am iga [...] d́a cuyajpa, tsa̱m wɨ̱t́i, tsa̱m yagats, tsa̱m jojmɨ y tsa̱m yucmɨ». Jesɨk tsɨʼyyajpa idyɨk juʼuts tuum kuy iga «tsa̱m jojmɨ t́i̱chɨgɨ́y» y juʼuts tuum tɨk iga «tsa̱m wɨ̱watne»  (maayɨʼ Efesios 3:14-19). Taɨchtyam jeempɨktyim tan̈wattaʼmiñ. Tan̈kɨʼpin̈taʼmiñ juutypɨk wɨap tan̈wɨkuyujkataʼm y tan̈wɨkutɨʼɨyɨytyaʼm jempɨk in̈kejpa jeʼm Dios In̈maatyi.

4. ¿Tyi wɨap tan̈wattaʼm iga majtyim tan̈kunuʼktaʼmiñ Jehová? An̈maatɨ weeñi akwiñkejoʼoyiyaj.

⁴ Dyaʼ numaaj tan̈kutɨʼɨyɨytyamtoʼoba jeʼm an̈kejayoʼoyiyaj dyapɨk tan̈kaʼ. Tan̈kutɨʼɨyɨytyoʼoba «it́u̱mpɨy jém Dios ijɨ̱xi jém más mɨjpɨc» y jeʼm iespíritu santo tayooxpaʼtpa (1 Cor. 2:9, 10). ¿Tyiʼiga dyaʼ in̈wɨkuyujkaʼaba tuum an̈kejayoʼoyi iga majtyim in̈kunuʼguiñ Jehová? Wɨap in̈kɨʼpin̈ juutypɨk Jehová wiñɨk ikwiñkejay toyoʼoyi jeʼm iyooxakɨʼɨwiñyaj y juutypɨk yɨʼp min̈kejaʼyba iga mityoybatyim. Wɨap in̈kuyujkaʼ juutypɨk Jehová ixunba idyɨk iga jeʼm israelitajyaj ikoosteñayyajiñ y kukiʼpsɨ juutypɨk ixunba yɨʼp jaama iga koosteñaytyaiñ. Wɨaptyim in̈wɨkɨʼpin̈ jeʼm jɨychagoʼoyiyaj ikkupakwɨʼɨp Jesús jesɨgam jaʼy ityi yɨʼp Naxyukmɨ.

5. ¿Juʼp an̈kejayoʼoyi in̈kɨʼpin̈toʼoba jesɨk miwɨkuyujpa iñyaʼak?

⁵ Weeñi tɨwɨtam iga iwɨkuyujkayajpa jeʼm Biblia akwaʼkyajta juʼptam an̈kejayoʼoyiyaj tan̈kapɨk tan̈kutɨʼɨyɨy ikuyujkayajtoʼoba. Jeʼm recuadro « Tyityam wɨap in̈kɨʼpin̈ jesɨk miwɨkuyujpa iñyaʼak» iniity tuum lista de an̈kejayoʼoyiyaj jempɨk ijɨykimyaj. Tsaam miyooxpaʼtpa in̈kutɨʼɨyɨy siiga impɨkpa jeʼm Índice de las publicaciones Watch Tower y jeʼm Guía de estudio para los testigos de Jehová. Siiga in̈wɨkɨʼpin̈ba, impɨɨmchiʼiba iñfe y impadaʼyba «jeʼm Dios iixpɨgoʼoyi» (Prov. 2:4, 5). Tan̈kɨʼpin̈taʼmiñ an̈kejayoʼoyiyaj tan̈kapɨk tan̈kutɨʼɨyɨy.

6. a) ¿Tyiʼiga dyaʼ tumtyi jɨɨxi iniity juutypɨk tan̈watpa algun tyi kun jempɨk tanjɨɨsneʼ iga tan̈watpa? b) ¿Tyiʼiga wɨap tannɨm iga jempɨk Jehová ijɨɨsneʼ iga iwatpa juchixkej kupakpa? (Efesios 3:11).

⁶ Juʼuts akwiñkejoʼoyi, tan̈kujɨɨxiñ tyi in̈kejpa jeʼm Biblia iga tyi ijɨɨsneʼ Dios iga iwatpa. Jempɨk tanjɨɨsneʼ iga tan̈watpa  kukakneʼ kun juutypɨk tan̈watpa. Juutypɨk tan̈watpa algun tyi jeex juʼuts tuum tun̈ iga tananuʼkpa jeʼm an̈eymɨ juuty tanɨktoʼoba. Pero siiga algun tyi min̈nuʼgaʼyba jeʼm tun̈, wɨapsɨ iga dyaʼ miñuʼkpa juuty miñɨktoʼoba. Pero jempɨk tanjɨɨsneʼ iga tan̈watpa jeex juʼuts tuum an̈eymɨ iga tan̈kupin̈neum. Tan̈wɨjoodon̈ juuty tanɨki y wɨapsɨ iga dyaʼ numaaj tuum tun̈ tananuʼkpa. Jehová iwatpa «juuts ijɨ̱s dende wiñɨgam», y tsaam tamaymaytyam iga tan̈kejayñeʼ Bibliajom jempɨk ijɨɨsneʼ iga iwatpa (Efes. 3:11). Jehová iwatpa tyityam nasuntaap iga wɨaiñ ikkupak juʼutsam ijɨɨsneʼ (Prov. 16:4). Y jempɨk jeʼ iwatpa jaʼyba juchixkej. Jesɨk, ¿tyi ijɨɨsneʼ iga iwatpa, y juʼptam kukaki iwatneʼ iga wɨaiñ ikkupak juʼuts ijɨɨsneʼ?

7. Jesɨgam Adán y Eva dyaʼ kupɨgoyyaj, ¿tyi iwat Jehová iga kupaguiñ jempɨk ijɨɨsneʼ iga iwatpa? (Mateo 25:34).

⁷ Dios dende wiñtyityim iñɨʼɨyɨyay Adán y Eva jempɨk ijɨɨsneʼ iga iwatpa, iñɨʼmay: «An̈pɨktaʼamɨ y jaʼyan̈ataʼamɨ, y komtaʼamɨ yɨʼp nas y wɨʼɨdyataʼamɨ, kuixtyaʼamɨ [...] ityumpɨy jeʼm animat ityyajwɨʼɨp naxyukmɨ» (Gén. 1:28). Mex iga Adán y Eva tan̈kawatyaj y taknasayyaj jeʼm tan̈kaʼ, yɨʼp dyaʼ imɨswat iga ikupaguiñ jempɨk Jehová ijɨɨsneʼ iga iwatpa. Ikukagay juutypɨk ikkupakpa. Jeʼyukmɨ ijɨɨs iga ikkaʼmpa sɨn̈yukmɨ tuum An̈jagoʼoyi iga ikkupaguiñ jempɨk ijɨɨsneʼ iga iwatpa (maayɨʼ Mateo 25:34). Maaj okmɨ, Jehová ikutsat iMaanɨk yɨʼp Naxyukmɨ iga tsaam toyoʼyba. Jesús in̈maday tun̈gakyaj yɨʼp An̈jagoʼoyi y ikɨan̈kot jeʼm iityi iga tayojaytyaʼm tantan̈kaʼ. Okmɨ aktsukumta iga nɨguiñ ityi sɨn̈yukmɨ y tsɨʼyiñ juʼuts jeʼm an̈jagoʼoyi ikupin̈newɨʼɨp Dios. Pero ityñam tun̈gak an̈kejayoʼoyi iga maaj tayooxpaʼtpa tan̈kutɨʼɨyɨy jempɨk Dios ijɨɨsneʼ iga iwatpa.

8. a) ¿Tyi in̈kejpa jeʼm Biblia? b) Juʼuts nɨmpa Efesios 1:8-11, ¿tyiñam iwatpa Jehová? (Aʼmɨ jeʼm dibujo itywɨʼɨp yɨʼp totjaayi iwiñjom).

⁸ Jeʼm Biblia in̈kejpa tyi ijɨɨsneʼ Jehová iga iwatpa: ikuyukmɨ jeʼm An̈jagoʼoyi ikɨan̈kodayñewɨʼɨp Cristo ikupujpa iñɨɨyi jesɨk kupakpa jempɨk ijɨɨsneʼ iga iwatpa yɨʼp Naxyukmɨ. Dyaʼ i wɨap ikteeñan̈jak Jehová iga ikkupaguiñ jempɨk ijɨɨsneʼ iga iwatpa. Iyaʼak tanɨʼmaʼyba iga ikkupakpa (Is. 46:10, 11, notas; Heb. 6:17, 18). Dyam jaʼyñeʼ yɨʼp Nas tsɨʼyba juʼuts tuum paraíso, y tantumpɨytyam dyam tatan̈kaɨytyaʼmpa y wɨap tañitytyaʼm juchixkej (Sal. 22:26). Juʼuts in̈an̈pɨgam: iwatpa iga jempɨk ityyaj sɨn̈yukmɨ y Naxyukmɨ tsɨʼyyajiñ juʼuts tumtyi familia y ikupɨkyajiñ Jehová juʼuts An̈jagoʼoyi (maayɨʼ Efesios 1:8-11). Tsaam wɨɨ iga Jehová ikkupakpa juutypɨgam ijɨɨsneʼ iga iwatpa.

9. ¿Tyi tan̈madaʼyba jeʼm Biblia iga naspa jeʼm tannɨgɨyoʼoyijom?

⁹ Tan̈kujɨɨstaʼmiñ jempɨk ijɨychak Jehová en Génesis 3:15 en jeʼm jardín de Edén. b Ijɨykiʼmpa nasɨyoʼoyiyaj iga ikkupakyajpa jempɨk Jehová ijɨɨsneʼ, pero yɨʼpyaj kupakyajpa idyɨk jaʼyan̈ amtyɨy okmɨ. Juʼuts akwiñkejoʼoyi Jehová iñɨʼmay Abrahán iga de ifamilia miñba idyɨk jempɨk tsɨʼyba juʼuts Mesías (Gén. 22:15-18). En jeʼm amtyɨy 33 de nuestra era, Jesús akkoʼowaaytya ichɨjtsɨʼ, juutypɨgam jɨychakneta idyɨk (Hech. 3:13-15). Ityogoyayñam maaj de 1,000 amtyɨy iga kupaguiñ yɨʼp jɨychagoʼoyi juuty nɨmpa iga neptedaytyaap jeʼm Wookkɨʼɨwiñ ikoobak (Apoc. 20:7-10). Jeʼm Biblia in̈matpanam  tyi naspa wiñtyi iga kuyajiñ jeʼm an̈aaji iniitywɨʼɨp jeʼm Wookkɨʼɨwiñ kun jeʼm Jehová ikumun.

10. a) ¿Tyityam naspa dyaʼ jaʼyñeʼ? b) ¿Juutypɨk wɨap tan̈wɨtsak tanjɨɨxi y tananmaj? (Aʼmɨ jeʼm nota).

¹⁰ Tan̈kujɨɨstaʼmiñ jeʼm nasɨyoʼoyiyaj in̈matpaʼap jeʼm Biblia. Wiñtyi, jeʼm naciónyaj nɨmyajpa «d́a t́i id́ɨ́yɨ́y. D́a i̱ jém tamalwadaypáppɨc» (1 Tes. 5:2, 3). Jeʼm mɨjpɨk yaʼachaaji jobity tsukumpa jesɨk jeʼm naciónyaj ijɨɨsyajpa iga iktogoyyajpa jeʼm religiónyaj mɨgoyyajpaʼap (Apoc. 17:16). Wɨapsɨ iga itypa nasɨyoʼoyiyaj dyapɨk oyba tanaʼm jesɨk «iixyajpa iga miñgacpa jém Miññewɨɨp Sɨŋyucmɨ jém ucsaŋjo̱m con jém Dios ipɨ̱mi juuts tu̱m mɨjpɨc aŋjagooyi» (Mat. 24:30). Jesús ikɨʼpin̈ba ityumpɨy jempɨk ityyaj yɨʼp naxyukmɨ y ichakpa tuum an̈eymɨ jempɨk jeexyaj juʼuts oveja y tun̈gak an̈eymɨ jempɨk jeexyaj juʼuts cabra (Mat. 25:31-33, 46). Peʼm tiempo jeʼm Wookkɨʼɨwiñ seguido in̈teeñkamokpa Jehová, ijɨɨxian̈chiʼiba waatyi naciónyaj iga jeʼm Biblia iknɨʼɨyaap Gog de jeʼm naxyukmɨ de Magog, iga in̈teeñkamoguiñ jeʼm Jehová ikumun (Ezeq. 38:2, 10, 11). Wɨapsɨ iga jesɨk itypanam jeʼm mɨjpɨk yaʼachaaji, nanɨkyajtaap sɨn̈yukmɨ jempɨk kupin̈neyajta iga an̈tuumjom kun Cristo y jeʼm sɨn̈pɨxiñtyam nɨguiñ an̈aajiyaj jesɨk tsukumpa Armagedón, yɨʼbam ikkuyajpa jeʼm mɨjpɨk yaʼachaaji (Mat. 24:31; Apoc. 16:14, 16). c Okmɨ tsukumpam jeʼm Mil Amtyɨy iga In̈jakpa Cristo yɨʼp Naxyukmɨ (Apoc. 20:6).

11. ¿Tyiʼiga miitytyoʼoba juchixkej? (Aʼmɨtyim jeʼm imagenyaj).

¹¹ Kujɨɨsɨ juʼutsam iñityi jesɨk kuyajum jeʼm mil amtyɨy. Jeʼm Biblia nɨmpa iga Jehová «ikkaʼmayñeʼ ianmajom jeʼm jɨɨxi iga ityyajtoʼoba juchixkej» (Ecl. 3:11). Kujɨɨsɨ juutypɨk miwɨwadaʼyba mich y jeʼm in̈wɨnanɨgoʼoyi kun Jehová. Jeʼm libro Acerquémonos a Jehová, página 319, nɨmpa yɨʼɨmpɨk: «Jesɨk taitytyaʼmum cientos, miles, millones o billones de amtyɨy, majtyim tañixpɨkpa Jehová. Pero tumtum jaama iga naspa itypa tyidyin̈kej  iga tayooxpaʼtpa iga majnam tañixpɨguiñ. […] Dyaʼ yajpa tanan̈jɨɨsak juʼtspɨy wɨɨ jeʼm tañityityam en jeʼm Paraíso. Pero, jempɨk maaj tamaymaywatpa jeʼ iga tumtum jaama majtyim tan̈kunuʼkpa Jehová». Iganam tanan̈joʼkpa, ¿tyityamnam wɨap tan̈kɨʼpin̈taʼm jeʼm Dios In̈matyijom?

12. ¿Tyi nɨmtoʼoba iga taaʼmkiʼmiñ sɨn̈yukmɨ? An̈maatɨ tuum akwiñkejoʼoyi.

¹² Jeʼm Dios In̈maatyi tayooxpaʼtpa tanan̈jɨɨsak juʼutskom ity Jehová sɨn̈yukmɨ (Is. 33:5). Jeʼm Biblia tayooxpaʼtpa tañixpɨk Jehová y jeʼm iorganización itywɨʼɨp sɨn̈yukmɨ (Is. 6:1-4; Dan. 7:9, 10; Apoc. 4:1-6). Juʼuts akwiñkejoʼoyi, wɨap tammaytyaʼm jempɨk iaʼm Ezequiel jesɨk «an̈aʼy jeʼm sɨn̈» y Dios moj in̈kejay jeʼm pooñyaj (Ezeq. 1:1).

13. ¿Juʼuts inin̈jaam jesɨk in̈kujɨɨspa jeʼm yooxakuy sɨʼpaʼap iwat Jesús sɨn̈yukmɨ? (Hebreos 4:14-16).

¹³ Tan̈kujɨɨstaʼmiñtyim jeʼm yooxakuy iwatpaʼap Jesús sɨn̈yukmɨ juʼuts An̈jagoʼoyi y juʼuts Kobakpɨk Panij. Jeʼyukmɨ wɨap tan̈kunuʼktaʼm jesɨk tanan̈wejpaʼttaʼmpa «sin cɨ̱ŋi ju̱t́ co̱ñ jém tanJa̱tuŋ Dios, [...]. Je tsa̱m tayaachaŋja̱mpa [...] y wɨa̱p tayo̱xpát» juchixkej (maayɨʼ Hebreos 4:14-16). Tumtum jaama tan̈kujɨɨxiñ juʼtspɨy Jehová y Jesús tayooxpaʼtnetaʼm y jempɨk sɨʼ iwatyaj jemɨk sɨn̈yukmɨ por taɨchtyam. Iga tsaam tatoyyajpa, yɨʼp tayooxpaʼdyiñ iga tan̈kuyooxaiñ Jehová kun maymayaaji (2 Cor. 5:14, 15).

14. ¿Juutypɨk wɨap tanakwiñkej iga tantsoowaixpa jempɨk iwatneyaj por taɨchtyam Jehová y Jesús? (Aʼmɨtyim jeʼm imagenyaj).

¹⁴ Tanteguedaiñ iga tanyooxpaʼtyajiñ tun̈gakyaj iga tsɨʼyyajiñ juʼuts Jehová itestigo y ityun̈ɨyyajiñ Jesús, yɨʼɨmpɨgam tanakwiñkejtaʼmpa iga tantsoowaixtyaʼmpa jempɨk Dios y Jesús iwatneyaj por taɨchtyam (Mat. 28:19, 20). Jeʼyukmɨ jeʼm apóstol Pablo iyooxpaʼt tun̈gakyaj y jeʼ  ijoodon̈ idyɨk iga «ixunpa Dios iga cɨacputyajta̱iñ it́u̱mpɨy jém pɨxiñt́am y iga acjo̱dóŋa̱yajta̱iñ jém nu̱mapɨc aŋquímayooyi» (1 Tim. 2:3, 4). Jeʼyukmɨ ityegueda jeʼm an̈matkuy iga wɨaiñ iyooxpaʼt «it́u̱mpɨy jém pɨxiñt́am iga icupɨcyajiñ jém tánO̱mi Cristo» (1 Cor. 9:22, 23).

15. Juʼuts nɨmpa Salmo 1:2, ¿tyi tamaymaywatpa?

¹⁵ Dyaʼ tagaʼman̈jakpa iga jeʼm salmista nɨm iga tsaam maymay y tsaam iwɨnɨgaʼyba jesɨk algun i «tsaam ikusuʼnɨʼyba jeʼm Jehová in̈kiʼimiyaj; y tumtum jaama ichokoymayba y ikujɨɨspa» (Sal. 1:1-3). Iga sɨʼ ijɨykiʼm idyɨk yɨʼpyaj versículos, tuum traductor bíblico nɨmpa iga jempɨk imayba jeʼm Biblia «wɨɨ iga ikuaʼmiñ jeʼm Dios ian̈kiʼmayoʼoyiyaj iga pɨɨmi ikusuʼnɨʼyba, ikuyujkaiñ y ikujɨɨxiñ». Y nɨmpatyim: «Ikujɨɨspa iga dyaʼ tyi kumeskuyyaj jeʼm jaama jesɨk dyaʼ iwɨkutɨʼɨyɨy jempɨk imay» (Studies in the Psalms, Joseph Rotherham). Mich in̈kusuʼnɨʼybatyim in̈kɨʼpin̈ jeʼm Biblia siiga iñtyeguedaap iga iñaʼmpa iga tumtyi jɨɨxi iniity. ¡Tsaam tamaymayaap jesɨk tan̈wɨkɨʼpin̈ba jeʼm Dios In̈maatyi!

16. ¿Tyi tan̈kɨʼpin̈taʼmpa jeʼm tun̈gak kuyujijom?

¹⁶ Tantumpɨytyam wɨap tan̈kutɨʼɨyɨytyaʼm jempɨk Jehová tan̈kejaytyaʼmpa In̈matyijom. Jeʼm tun̈gak kuyujijom, tan̈kɨʼpin̈taʼmpa tun̈gak an̈kejayoʼoyi iga tan̈kaʼ tan̈kutɨʼɨyɨy: jeʼm Jehová itemplo espiritual. Pablo ijɨykiʼm yɨʼp an̈kejayoʼoyi jesɨgam ijaʼyay jeʼm carta a jeʼm hebreos. Tsaam tamaymayataʼmpa jesɨk tan̈kɨʼpin̈taʼmpa.