1. ¿Tyi nɨmpa ixɨʼ tuum sɨn̈pɨɨxiñ, y tyi wɨɨ iga tan̈wattaʼmiñ?

 MEʼEGA tuum sɨn̈pɨɨxiñ mijɨʼyaʼyba, ¿in̈kumaton̈ba idyɨk? Yɨʼp jaama tuum sɨn̈pɨɨxiñ sɨʼ ijɨʼyay «it́u̱mpɨy clase de pɨxiñt́am, [...] jém jɨyyajpáppɨc tuŋgac aŋmat́i̱mɨ y it́u̱mpɨy jém it́yajwɨɨp jém tuŋgacpɨc naxyucmɨ». ¿Tyi sɨʼ iñɨʼmayyajta? «Cɨ̱ŋtaamɨ Dios, cujíptaamɨ. […] Jɨ̱staamɨ Dios jém iwatnewɨɨp jém sɨŋ, jém nas, jém lamar y jém nɨixcuy» (Apoc. 14:6, 7). Tantumpɨytyam tan̈koosteñaytyaʼmiñ Jehová; jeʼm nuntapɨk Dios. ¡Tsaam tamaymaytyam iga wɨap tan̈koosteñaytyaʼm en jeʼm itemplo espiritual!

2. ¿Tyiapaʼap jeʼm templo espiritual? (Aʼmɨtyim jeʼm recuadro « Jempɨk dyaʼ ikwiñkejpa»).

² ¿Tyiapaʼap jeʼm templo espiritual, y juuty jɨykimtaap? Jeʼm templo espiritual dyaʼ jeʼ tuum nuntapɨk edificio. Yɨʼp nɨmtoʼoba juutypɨk Jehová iwɨtsakneʼ jeʼm ikumun iga koosteñaytyaiñ juutypɨgam jeʼ ixunba, ikuyukmɨ jeʼm Jesús ikɨakpudoʼoyi. En jeʼm wiñtyipɨk siglo, jeʼm apóstol Pablo in̈mat juutypɨk koosteñaytyaiñ Dios. Tampaʼttaʼmpa en jeʼm carta ijaʼyaywɨʼɨp a jeʼm tɨwɨtam hebreos ityyajwɨʼɨp idyɨk en Judea. b

3, 4. ¿Tyiʼiga Pablo an̈yaʼkneʼ idyɨk por jeʼm tɨwɨtam hebreos, y juutypɨk iyooxpaʼt?

 ³ ¿Tyiʼiga ijaʼyay Pablo jeʼm tɨwɨtam ityyajwɨʼɨp idyɨk Judea? Wɨapsɨ iga jeʼm wiñtyipɨk jeʼ iga ianmajan̈chiʼityoʼoba idyɨk. Jaʼyan̈yaj an̈kejayñeyajta idyɨk jeʼm religión judía, y wɨapsɨ iga jeʼm líderes religiosos ikuxikkayajpa idyɨk iga tsɨʼyyaj juʼuts cristianojyaj. ¿Tyiʼiga? Iga dyaʼ iniiyaj idyɨk tuum wɨdyay templo juuty ikoosteñayyajpa Dios, ni jeʼm panijyaj, ni tuum altar juuty ikɨan̈kotyajpa animatyaj, juʼuts iwatyajpa idyɨk jeʼm judíos. Wɨapsɨ iga yɨʼp in̈yaʼkwatyaj jempɨk ityun̈ɨyyajpa Cristo y ikkupoʼnakedayyaj ife (Heb. 2:1; 3:12, 14). Y wɨapsɨ iga weeñiyaj eybɨk iwatyajtoʼoba idyɨk juʼuts in̈kejpa jeʼm religión judía.

⁴ Wɨstenpɨk, Pablo iyooxpaʼt jeʼm tɨwɨtam hebreos iga ityeguedayajiñ ikutɨʼɨyɨy jeʼm an̈kejayoʼoyi tan̈kapɨk iga jeex juʼuts «jém wíccuy para jém tsa̱mipɨc», itywɨʼɨp jeʼm Dios In̈matyijom (Heb. 5:11-14). Kejpa iga weeñiyaj ikupɨkyajpanam idyɨk jeʼm Moisés In̈kiʼmayoʼoyi. Pablo iñɨʼmay iga mex siiga ikɨan̈kotyajpa jeʼm animatyaj dyaʼ wɨap idyɨk iñunta aktogoyayyajta jeʼm ityan̈kaʼ. Jeʼyukmɨ jeʼm An̈kiʼmayoʼoyi kuyajneum idyɨk. Okmɨ jeʼm apóstol Pablo moj in̈mat an̈kejayoʼoyiyaj tan̈kapɨk ikutɨʼɨyɨytya. Ikjɨɨs iga ikuyukmɨ jeʼm Jesús ikɨakpudoʼoyi iniityyaj tuum wɨbɨk an̈jogoʼoyi iga iyooxpaʼtyajpa ikunuʼkyaj Dios (Heb. 7:18, 19).

5. ¿Tyi tan̈kutɨʼɨyɨytyaʼmiñ, y tyiʼiga?

⁵ Pablo in̈maday jeʼm tɨwɨtam hebreos iga maaj wɨɨ juutypɨk sɨʼ ikoosteñayyaj Jehová y dyaʼ juutypɨk jaʼy iwatyaj. Nɨm iga juutypɨk jeʼm religión judía ikoosteñayyajpa idyɨk Dios «jex juuts tu̱m cumuŋcɨ, taŋquejáypa t́i miñpa». Y okmɨ nɨm: «Pero jém mɨjta̱y je jém Cristo, d́a je cumuŋcɨ» (Col. 2:17). Tuum kumun̈kɨʼ dyaʼ taaʼmchiʼiba tan̈wɨaʼm tyiapaʼap jeʼ. Juutypɨk jeʼm judíojyaj jaʼy ikoosteñayyaj Dios jeex juʼuts tuum kumun̈kɨʼ iga ikwiñkej jempɨk miñbanam okmɨ. Nasuntaap iga tan̈wɨkutɨʼɨyɨʼyiñ jempɨk Jehová iwatneʼ iga wɨaiñ tan̈koosteñay en jeʼm itemplo espiritual. ¿Tyiʼiga? Iga jeempɨgam wɨap tan̈koosteñay juʼuts jeʼ ixunba y tawadaʼyiñ perdón jeʼm tantan̈kaʼ. Tan̈kukiʼpstaʼmiñ jeʼm «cumuŋcɨ» (juutypɨk jeʼm judíojyaj  ikoosteñayyajpa idyɨk Dios) kun jempɨk «d́a je cumuŋcɨ» (juutypɨk jeʼm cristianojyaj ikoosteñayyajpa Dios). Tan̈kɨʼpin̈taʼmiñ jempɨk nɨmpa jeʼm Carta a jeʼm Hebreos. Jeempɨgam tan̈kutɨʼɨyɨytyaʼmpa tyiapaʼap jeʼm templo espiritual y juutypɨk tɨgɨykuʼmpa kun taɨchtyam.

6. ¿Juutypɨk pɨktaap idyɨk jeʼm tabernáculo?

⁶ Jeʼm kumun̈kɨʼ. Pablo ikukiʼps jeʼm templo espiritual kun jeʼm tabernáculo iwatwɨʼɨp Moisés en jeʼm amtyɨy 1512 antes de nuestra era (aʼmɨ jeʼm gráfico «Jeʼm kumun̈kɨʼ y jempɨk ikwiñkejpa»). Jeʼm tabernáculo jeex idyɨk juʼuts tuum puʼktuktɨk, y jemum an̈tuʼumaayajpa idyɨk jeʼm israelitajyaj iga ikoosteñayyajpa Dios y ikɨan̈kodayyajpa animatyaj (Éx. 29:43-46). Jesɨk nɨkyajpa idyɨk tun̈gak an̈eymɨ juchixkej inisɨʼɨyajpa (Éx. 25:8, 9; Núm. 9:22). Y ipɨkyaj tuumtsam 500 amtyɨy hasta jesɨk watta jeʼm templo de Jerusalén. Yɨʼp tabernáculo ikwiñkej jempɨk naspa idyɨk okmɨ.

7. ¿Juchix moj ityi jeʼm templo espiritual?

⁷ Jempɨk ikwiñkejpa. Jeʼm tabernáculo ikwiñkej jeʼm Jehová itemplo espiritual itywɨʼɨp sɨn̈yukmɨ. Pablo nɨm: «It́u̱mpɨy yɨ́pyaj cosa tsɨ́y juuts tu̱m ejemplo para sɨɨp» (Heb. 8:5; 9:9). Jeʼyukmɨ jesɨk Pablo ijay yɨʼp carta, jeʼm templo espiritual ityum idyɨk. Moj ityi jeʼm amtyɨy 29 de nuestra era. Jesɨgam Jesús chin̈, Dios ikupin̈ kun jeʼm iespíritu santo y moj kuyooxaoʼoyi juʼuts «co̱bacpɨc pa̱nij» en jeʼm Jehová itemplo espiritual (Heb. 4:14; Hech. 10:37, 38). c

8, 9. Juʼuts nɨmpa Hebreos 7:23-27, ¿tyiʼiga jeʼm Kobakpɨk Panij Jesucristo dyaʼ jeex juʼuts jeʼm kobakpɨk panij de Israel?

⁸ Jeʼm kumun̈kɨʼ. Jeʼm kobakpɨk panij iwatpa idyɨk tuum yooxakuy iga iyooxpaʼtpa jeʼm tɨgan̈juj. Jesɨgam kupak jeʼm tabernáculo Jehová ikupin̈ Aarón juʼuts jeʼm wiñtyipɨk kobakpɨk panij. Pero Pablo nɨm: «Jeeyaj caayajpa, d́a wɨa̱p ichɨ́y seguido juuts pa̱nij» (maayɨʼ Hebreos 7:23-27). d Y jeʼm panijyaj tan̈kaɨyyajtyim idyɨk, jeʼyukmɨ nasunta iga ikɨan̈kotyajiñ animatyaj iga iyojyajpa ityan̈kaʼ. Pero jeʼm Kobakpɨk Panij Jesucristo dyaʼ tan̈kaɨy y dyaʼ nasuntaap iga iwadyiñ jeempɨk.

⁹ Jempɨk ikwiñkejpa. Jeʼm Kobakpɨk Panij, Jesucristo, «icuyo̱xa̱p Dios jém wɨ̱co̱m ju̱t́ it́ jém [...] nunta ma̱stɨc […] iwatnewɨɨp Dios. D́a jém pɨxiñt́am iwa̱t́i» (Heb. 8:1, 2). Pablo nɨm iga «Jesús d́a caaba. D́a nunca putpa iga pa̱nij, d́a iccámpa tuŋgac». Nɨmtyim iga Jesús dyaʼ tan̈kaɨy, «d́a jex ijɨ̱xi juuts jém malopɨc pɨxiñt́am» y jeʼ dyaʼ «iccaaba cada ja̱ma jém ani̱mat» iga iyojpa ityan̈kaʼ juʼuts iwatyajpa idyɨk jeʼm kobakpɨk panijyaj de Israel. Sɨɨ tan̈kɨʼpin̈taʼmiñ juʼp kukaki iniity jeʼm altares y jeʼm sacrificios wattapaʼap idyɨk wiñɨk y jempɨk moj iwatyaj jeʼm cristianojyaj.

10. ¿Tyi ikwiñkej jeʼm sacrificios iga watyajtaap idyɨk en jeʼm altar de cobre?

¹⁰ Jeʼm kumun̈kɨʼ. Toomi juuty watneta jeʼm tabernáculo ity idyɨk tuum altar de cobre juuty ikɨan̈kotyajpa jeʼm animatyaj (Éx. 27:1, 2; 40:29). Pero yɨʼpyaj  sacrificios dyaʼ wɨap idyɨk iñunta aktogoyayyaj ityan̈kaʼ (Heb. 10:1-4). Iga juchixkej ikɨan̈kotyajpa idyɨk animatyaj ikwiñkej jeʼm kaʼiʼ iga iñunta aktogoyba jeʼm tan̈kaʼ.

11. ¿Juʼp altaryuk nakɨan̈kotta Jesús? (Hebreos 10:5-7, 10).

¹¹ Jempɨk ikwiñkejpa. Jesús ijoodon̈am idyɨk iga Jehová ikutsatneʼ yɨʼp Naxyukmɨ iga takɨakputtaʼmiñ (Mat. 20:28). Jeʼyukmɨ jesɨk chin̈, nakwiñkejta iga iwatpa idyɨk jempɨk Jehová ixunba (Juan 6:38; Gál. 1:4). Keʼnam jesɨk nakɨan̈kotta jeʼm altaryukmɨ. Yɨʼp nɨmtoʼoba iga iwatpa juʼuts Dios iwɨan̈jaam, y Jehová ixunba idyɨk iga jeʼm iMaanɨk ikɨan̈kodyiñ jeʼm iityi iga tayojaytyaʼmiñ tantan̈kaʼ. Jesús ikɨan̈kot tun̈kɨy jeʼm iityi iga iyojay ityan̈kaʼ ityumpɨy jempɨk ikwiñkejyajpa fe (maayɨʼ Hebreos 10:5-7, 10). Sɨɨ, tan̈kɨʼpin̈taʼmpa tyityam iniity idyɨk jeʼm tabernáculo ijojmɨʼ y tyityam ikwiñkej.

12. ¿Iapaʼap wɨap ityɨgɨy idyɨk en jeʼm Santo y jeʼm Santísimo?

¹² Jeʼm kumun̈kɨʼ. Jeʼm tabernáculo ijojmɨʼ jeextyim idyɨk juʼuts jeʼm templo watyajtawɨʼɨp okmɨ en Jerusalén. Iniity idyɨk wɨsteen cuarto: «jeʼm Santo» y «jeʼm Santísimo», an̈tɨɨmjakneʼ idyɨk kun tuum puʼktuuku (Heb. 9:2-5; Éx. 26:31-33). En jeʼm Santo ity idyɨk tuum candelabro de oro, tuum altar juuty noʼokettaap incienso y tuum mesa juuty tsaktaap jeʼm kaxtyañaañi. Numaaj jeʼm panijyaj kupin̈neyajtawɨʼɨp tɨgɨyyajpa idyɨk en jeʼm Santo iga iwatyajpa jeʼm yooxakuy  chiʼiñeyajtawɨʼɨp (Núm. 3:3, 7, 10). Juuty ity jeʼm Santísimo ity idyɨk jeʼm arca del pacto iga watneta kun oro y ikwiñkejpa idyɨk iga jemum ity Jehová (Éx. 25:21, 22). Numaaj jeʼm kobakpɨk panij wɨap idyɨk ityɨgɨy juuty ity jeʼm Santísimo. Y initɨgɨyba idyɨk jeʼm animatyaj iñɨʼɨpiñ, yɨʼɨmpɨgam iyojyajpa jeʼm ityan̈kaʼ y ityumpɨy jempɨk ityyaj ityɨgan̈jom. Yɨʼp ixpɨktaap idyɨk juʼuts jeʼm Jaama jesɨk Wadayyajtaap Perdón jeʼm Ityan̈kaʼ (Lev. 16:2, 17). Maaj okmɨ, Jehová ipɨk jeʼm iespíritu santo iga in̈mat tyi ikwiñkejpa idyɨk ityumpɨy jempɨk ity en jeʼm tabernáculo (Heb. 9:6-8). e

13. ¿Tyi ikwiñkejpa jeʼm Santo y jeʼm Santísimo?

¹³ Jempɨk ikwiñkejpa. Jeʼm 144,000 cristianojyaj iga kupin̈neyajta kun espíritu santo iniityyaj tuum wɨbɨk nanɨgoʼoyi kun Jehová. Jeʼeyaj kuyooxaoyyajpa sɨn̈yukmɨ juʼuts panijyaj kun Jesús (Apoc. 1:6; 14:1). Iganam ityyaj yɨʼp Naxyukmɨ, Dios ikupin̈ba kun jeʼm iespíritu y jeempɨgam tsɨʼyyajpa juʼuts imanɨktam. Jeʼm Santo ikwiñkejpa jeʼm wɨnanɨgoʼoyi iga iniityyaj (Rom. 8:15-17). Jeʼm Santísimo ikwiñkejpa jeʼm sɨn̈, juuty ity Jehová. Iga jeʼm Santo y jeʼm Santísimo an̈tɨɨmjakneta idyɨk kun tuum puʼktuuku, ikwiñkejpa jeʼm Jesús imɨjtaay. Jeʼm imɨjtaay dyaʼ iaʼmchiʼiba idyɨk iga nɨguiñ sɨn̈yukmɨ iga kuyooxaoʼyiñ juʼuts Kobakpɨk Panij en jeʼm templo espiritual. Jesɨgam ikɨan̈kot iityi iga takɨakputtaʼm, Jesús in̈aʼy jeʼm tun̈ iga jempɨk kupin̈neyajta nɨguiñ ityiyaj sɨn̈yukmɨ. Iga wɨaiñ ipɨktson̈yaj yɨʼp xaaja, jeʼm kupin̈neyajtawɨʼɨp ichakyajpa jeʼm imɨjtaay (Heb. 10:19, 20; 1 Cor. 15:50). Okmɨ iga aktsukumta, Jesús tɨgɨy en jeʼm Santísimo iniitywɨʼɨp jeʼm templo espiritual, juuty tɨgɨyyajpatyim ityumpɨy jeʼm kupin̈neyajtawɨʼɨp.

14. Juʼuts nɨmpa Hebreos 9:12, 24-26, ¿tyiʼiga maaj wɨɨ jeʼm Jehová itemplo espiritual?

¹⁴ Juutypɨk Jehová ixunba iga koosteñaytyaiñ maaj wɨɨ, ixunba iga wattaiñ ikuyukmɨ jeʼm kɨakpudoʼoyi y ikupin̈netyim Jesús juʼuts kobakpɨk panij. Jeʼm pɨxiñtyam iwatneyaj idyɨk jeʼm Santísimo juuty jaʼy tɨgɨɨyi jeʼm kobakpɨk panij de Israel, y initɨgɨyba idyɨk jeʼm animatyaj iñɨʼɨpiñ. Pero Jesús tɨgɨy jeʼm Jehová iwiñjom, jemɨk sɨn̈yukmɨ. Jemum ikwiñkej juʼtspɨy tsoʼowɨy jeʼm iityi ikɨan̈kotwɨʼɨp «iga iccáyáypa jém pɨxiñt́am it́áŋca» (maayɨʼ Hebreos 9:12, 24-26). Jempɨk iwat Jesús taktogoyaytyaʼmpa tantan̈kaʼ. Sɨɨ, tan̈kɨʼpin̈taʼmpa iga tantumpɨytyam wɨap tan̈koosteñaytyaʼm Jehová en jeʼm itemplo espiritual, mex siiga tanɨkpa sɨn̈yukmɨ o tatsɨʼyba yɨʼɨm Naxyukmɨ.

15. ¿Ityam kuyooxaoyyajpa idyɨk en jeʼm tabernáculo ian̈kɨʼɨm?

¹⁵ Jeʼm kumun̈kɨʼ. Jeʼm tabernáculo iniity idyɨk jeʼm ian̈kɨ y kutaʼnseetneʼ, jemum jeʼm panijyaj kuyooxaoyyajpa idyɨk. Jemtyim ity idyɨk jeʼm altar de cobre juuty noʼoketyajtaap jempɨk ikɨan̈kotyajpa idyɨk. Itytyim juuty aktuʼmtaap idyɨk jeʼm nɨʼ iga jeʼm panijyaj wɨaiñ inikutseʼayyajta wiñtyi iga ikkupakyajpa jeʼm iyooxakuy (Éx. 30:17-20; 40:6-8). Jeʼm templo iga watyajta maaj okmɨ iniitytyim idyɨk tuum an̈kɨ an̈naakyukmɨpɨk, y jempɨk dyaʼ jeʼ panijyaj wɨap idyɨk ityɨgɨyyaj jeem.

16. ¿Ityam kuyooxaoyyajpa en jeʼm templo espiritual ian̈kɨʼɨm?

¹⁶ Jempɨk ikwiñkejpa. Wiñtyi iga  tsɨʼyyajpa juʼuts panijyaj jemɨk sɨn̈yukmɨ, jeʼm kupin̈neyajtawɨʼɨp iga ityyajnam yɨʼp Naxyukmɨ sɨʼ iwɨkuyooxayaj Jehová en jeʼm an̈kɨ jojmɨpɨk de jeʼm templo espiritual. Iga jeʼm tabernáculo y jeʼm templo iniity juuty aktuʼmtaap idyɨk nɨʼ, ikjɨɨspa jeʼm kupin̈neyajtawɨʼɨp y ityumpɨy jempɨk tsɨʼyyajpa yɨʼp naxyukmɨ iga kuaʼyñeyajiñ moralmente y espiritualmente. ¿Y juuty sɨʼ ikoosteñayyaj Dios jempɨk tsɨʼyyajpa yɨʼp naxyukmɨ iga iyooxpaʼtyajpa jeʼm Cristo ityɨwɨtam kupin̈neyajtawɨʼɨp? Jeʼm apóstol Juan iix iga «te̱ñyaj jém trono iwiñjo̱m» y ikuyooxayajpa Dios «tsuucɨɨm y sɨŋñi». Jeʼam sɨʼ iwatyaj yɨʼp Naxyukmɨ, jeʼm an̈kɨ an̈naakyukmɨpɨk de jeʼm templo espiritual (Apoc. 7:9, 13-15). ¡Tsaam tamaymaytyam iga tantumpɨytyam wɨap tankoosteñaytyaʼm Jehová en jeʼm itemplo espiritual!

17. ¿Juʼutspɨk xaaja wɨap tanchiʼ Jehová?

¹⁷ Tsaam tamaymaytyam iga wɨap tan̈kuyooxataʼm Jehová y wɨap tan̈kɨan̈kodaytyaʼm xaajayaj. ¿Juutypɨk? Jesɨk tampɨktaʼmpa tantiempo, tampɨɨmi y tyityam tanaity iga tan̈kuyaʼgɨyaytyaʼmpa jeʼm iAn̈jagoʼoyi. Juʼuts iñɨʼmay Pablo jeʼm cristianojyaj, jesɨk «taŋcujíppa Dios jex juuts tanchiiba tu̱m sacrificio» (Heb. 13:15). Siiga tan̈watpa ityumpɨy yɨʼp tanakwiñkejpa iga tantsoowaixpa jeʼm xaaja tachiʼiñewɨʼɨp.

18. Juʼuts nɨmpa Hebreos 10:22-25, ¿tyi wɨɨ iga tan̈wattaʼmiñ, y tyi odoy tan̈kujaʼamaytyaʼmiñ?

¹⁸ (Maayɨʼ Hebreos 10:22-25). En jeʼm carta a jeʼm hebreos jeʼm in̈an̈pɨgam jaakaʼ, Pablo ijɨykiʼm tyityam wɨɨ iga tan̈wattaʼmiñ. Juʼuts akwiñkejoʼoyi, nɨm iga tsaam importante iga tanan̈wejpaʼdyiñ Jehová, tanan̈madaʼyiñ tun̈gakyaj jeʼm tanan̈jogoʼoyi, tan̈tuʼumaiñ kun jeʼm tantɨwɨtam y tanaanmajan̈chiʼityamtaiñ y maaj sɨɨ iga taitytyaʼmum jeʼm in̈an̈pɨgam jaama. Jeʼm in̈an̈pɨgam capítulos iniitywɨʼɨp Apocalipsis, tuum sɨn̈pɨɨxiñ nɨmpa: «Jɨ̱sɨ Dios». Iga wɨskɨy nɨm ikwiñkej iga tsaam importante iga tan̈wadyiñ jeempɨk (Apoc. 19:10; 22:9). Odoy tan̈kujaʼamaytyaʼmiñ jeʼm wɨtampɨk an̈kejayoʼoyiyaj tan̈kɨʼpin̈netamwɨʼɨp de jeʼm Jehová itemplo espiritual y jeʼm xaaja iga tanaitytyaʼm iga wɨap tan̈kuyooxataʼm tanDios.