Weeñiyaj akwaʼgoyyajpa
¿Ikɨʼɨsyaj jeʼm israelitajyaj tun̈gak wiʼkkuy jeʼm tɨtsɨnaxyukmɨ y dyaʼ numaaj jeʼm maná y jeʼm codornices?
Jeʼm 40 amtyɨy iga jeʼm israelitajyaj jaʼy ityiyaj jeʼm tɨtsɨnaxyukmɨ, jeʼm wiʼkkuy majpɨk ikɨʼɨsyaj jeʼ jeʼm maná (Éx. 16:35). Y wɨsna veces Jehová ichiʼ jeʼm codornices (Éx. 16:12, 13; Núm. 11:31). Pero ikɨʼɨsyajtyim tun̈gak wiʼkkuy, mex iga uxtyam idyɨk.
Juʼuts akwiñkejoʼoyi, a veces Jehová ininɨkyaj tuum an̈eymɨ «juuty wɨap idyɨk ijejyaj», y jemum ipaʼtyajpa idyɨk nɨʼ y wiʼkkuy (Núm. 10:33). Tuum de jeʼm an̈eymɨ jeʼ jeʼm nɨʼixkuy de Elim, «juuty ity idyɨk 12 nɨʼixkuy y 70 palmeras», wɨapsɨ iga jeʼ jeʼm palmeras datileras (Éx. 15:27). Jeʼm libro Plants of the Bible nɨmpa iga yɨʼp palmera mɨjaap jeʼm tɨtsɨnaxyukmɨ en jaʼyan̈ an̈eymɨ. Y jaʼyan̈yaj ikɨʼɨsyajpa, ipɨgayyajpa iaceite y iyamkayajpa.
Wɨapsɨ iga jeʼm israelitajyaj jejyajtyim en tuum nɨʼixkuy iga sɨɨ iñɨɨyi Farán, yɨʼp ity jeʼm kunon̈jom de Farán. a Jeʼm libro Discovering the World of the Bible, nɨmpa iga yɨʼp kunon̈jom iniity 130 km, maaj wɨtyi, maaj wɨɨ ikeeji y maaj ixpɨktaap en Sinaí. Yɨʼp libro nɨmpatyim iga en tuumtsam 45 km ity jeʼm nɨʼixkuy de Farán, juuty tsaam ity jeʼm palmeras. Y yɨʼp nɨʼixkuy iwɨtyi 4,8 km y iyukmɨ tuumtsam 610 m de jeʼm lamar. Iga yɨʼp an̈eymɨ iniity jaʼyan̈ palmeras, kukiʼpstaap juʼuts jeʼm jardín de Edén. Y dende wiñɨgam jaʼyan̈yaj nɨkpa jooyiyaj peʼm an̈eymɨ.
Palmeras datileras iga ity en jeʼm nɨʼixkuy de Farán
Jesɨk putyaj de Egipto, jeʼm israelitajyaj ininɨkyaj harina, aceite y juuty ikutyajpa. Pero dyaʼ juʼchan̈ iyaʼachɨyayyaj. Ininɨkyajtyim ovejajyaj, vacajyaj y jaʼyan̈ animatyaj (Éx. 12:34-39). Pero iga nɨkiyaj idyɨk jeʼm tɨtsɨnaxyukmɨ, jaʼyan̈ yɨʼpyaj animatyaj wɨapsɨ iga kaʼayaj. Y wɨapsɨ iga weeñiyaj ikɨʼɨsyaj, ikɨan̈kodayyaj Jehová y hasta iwadayyaj sacrificio jeʼm dios watyñaxyaj (Hech. 7:39-43). b Jeʼm israelitajyaj ikmɨjayaj ovejajyaj y vacajyaj. Tanjoodon̈ kun jempɨk Jehová iñɨʼmay jeʼm israelitajyaj jesɨk dyaʼ kupɨgoyyaj: «Immanɨktam tsɨʼyyajpa juʼuts pastoryaj 40 amtyɨy en jeʼm tɨtsɨnaxyukmɨ» (Núm. 14:33). Jeʼyukmɨ wɨapsɨ iga iniityyaj idyɨk uxan̈ maayi y leche, pero yɨʼp dyaʼ iktsɨʼyyajpa idyɨk ityumpɨyyaj. c
¿Tyi ikkɨʼɨsyaj jeʼm animatyaj y juuty ipɨgayyaj nɨʼ? d Peʼm tiempo maaj chijoʼyba idyɨk tuj, jeʼyukmɨ maaj ity idyɨk soʼk. Jeʼm obra Perspicacia para comprender las Escrituras in̈matpa iga 3,500 amtyɨy wiñtyi, en Arabia dyaʼ jespɨy idyɨk tɨtspa jeʼm nɨʼ juʼuts sɨɨ. Y nɨmtyim iga juuty kunon̈jom ity idyɨk nɨʼixkuyyaj, pero sɨɨ tɨtsneyajum, yɨʼp ikwiñkejpa iga wiñɨk maaj chijoʼybanam tuj y maaj poyba idyɨk jeʼm nɨʼ. Mex iga jeexkom, tan̈kaʼ idyɨk tañity y tansɨʼ jeʼm tɨtsɨnaxyukmɨ (Deut. 8:14-16). Meʼega Jehová dyaʼ iknɨʼk jeʼm israelitajyaj y jeʼm animatyaj, kukaayyaj idyɨk (Éx. 15:22-25; 17:1-6; Núm. 20:2, 11).
Moisés iñɨʼmay jeʼm israelitajyaj iga Jehová ichiʼ jeʼm maná iga ijoodon̈ayajiñ «iga jeʼm pɨɨxiñ dyaʼ numaaj wɨap iity kun jempɨk ikɨʼɨspa, wɨaptyim iity kun ityumpɨy jempɨk putpa Jehová ijɨpjom» (Deut. 8:3).
a Aʼmɨ jeʼm Totjaayi Takjoodon̈apaʼap del 1 de mayo de 1992, páginas 24 y 25, en español.
b Jeʼm Biblia ijɨykiʼmpa iga jeʼm israelitajyaj wɨskɨy iwadayyaj sacrificios Jehová jeʼm tɨtsɨnaxyukmɨ. Wiñtyi, jesɨk kupin̈yajta jeʼm panijyaj, y tun̈gak jesɨgam iwatyaj jeʼm Pascua. Ikwɨstɨk watyajta jeʼm amtyɨy 1512 antes de nuestra era, tuum amtyɨy okmɨ iga jeʼm israelitajyaj putyaj de Egipto (Lev. 8:14–9:24; Núm. 9:1-5).
c Jesɨk kuyaajiam idyɨk jeʼm 40 amtyɨy iga jaʼy ityiyaj jeʼm tɨtsɨnaxyukmɨ, jeʼm israelitajyaj initsɨʼyayyaj jeʼm ienemigojyaj ianimatyaj jesɨk ikooñwɨyyajpa idyɨk jeʼm guerra (Núm. 31:32-34). Seguido ikɨʼɨsyaj jeʼm maná hasta jesɨk iitykayajum jeʼm Nas juuty Jɨykamayñeyajta idyɨk (Jos. 5:10-12).
d Ni tyi dyaʼ in̈kejpa iga jeʼm animatyaj ikɨʼɨsyajtyim jeʼm maná, Jehová iñɨʼmay jeʼm israelitajyaj iga numaaj ipin̈yajiñ idyɨk jeʼm maná juʼtsan̈am ikɨʼɨsyajpa (Éx. 16:15, 16).
