KUYUUJI 43
WAAÑI 90 Animémonos unos a otros
Kupɨɨkɨ iga Jehová michoowaixpa
«Pero siempre ámcoñwɨɨyɨ it́u̱mpɨy jém jɨ̱xi iga wɨa̱iñ iŋcupiŋ jém wɨbɨc» (1 TES. 5:21).
AN̈KEJAYOʼOYI
Jehová michoowaixpa, mityoyba y wɨap in̈kuyooxa.
1, 2. a) ¿Tyityam tan̈kaʼ tan̈kupɨktaʼm? b) ¿Tyi tan̈kɨʼpin̈taʼmpa yɨʼp kuyujijom?
JAʼYAN̈YAJ tan̈kaʼ ipɨkyaj ijɨɨxi iga ikuyooxayajpa Jehová, jeempɨgam wɨap iñaskaʼ tuum traytyipɨxiñ. a Tan̈kaʼ ikɨan̈koday iityi Jehová y chin̈ba. Tan̈kujɨɨxiñ tuum tɨɨwɨ iga imañjom moj ikuyooxa Jehová, pero sɨɨ iniityum ifamilia y ijaampa iga dyam iktsɨʼyaʼyba jeʼm tumiñ, wɨapsɨ iga ijɨɨspa siiga iwɨpɨk ijɨɨxi. Tuum tɨɨwɨ jaʼamoyñewɨbam an̈yaʼkpa, iga sɨɨ dyam jespɨy wɨap ikuyooxa Jehová. Oybatyim iñjɨɨs yɨʼɨmpɨk: ¿Ityumpɨy jempɨk an̈watneʼ ichoowaixpasɨ Jehová? ¿Wɨapnamsɨ an̈wɨkuyooxa? ¿Ateguetsɨ?
2 Yɨkxpɨk jɨɨxi wɨap ikkupoʼnaket tanfe y wɨap iwat iga odom maaj tan̈kuyooxaiñ Jehová. Yɨʼp kuyujijom tan̈kɨʼpin̈taʼmpa juutypɨk jeʼm Biblia tayooxpaʼtpa tanaʼmtaʼm juutypɨk Jehová taguettam, tatsoowaixpa y wɨapnam tan̈kuyooxataʼm.
TYI TAN̈WADYIÑ SIIGA TANKAʼ TAN̈KUPƗK IGA JEHOVÁ TATEGUET
3. ¿Tyi tayooxpaʼtpa iga tannunta kupɨguiñ iga Jehová tateguet?
3 Jesɨk tan̈kaʼ tan̈kupɨk iga Jehová tateguet, jeʼm Biblia wɨap tayooxpaʼt iga tanaidyiñ tuum mɨjpɨk fe y tanaidyiñtyim tuum wɨbɨk nanɨgoʼoyi kun jeʼ (1 Cor. 16:13).
4. ¿Juutypɨk wɨap tan̈kɨʼpin̈taʼm tanjɨɨxi juʼuts nɨmpa 1 Tesalonicenses 5:21?
4 (Maayɨʼ 1 Tesalonicenses 5:21). Jeʼm Biblia tajɨɨxian̈chiʼiba iga tan̈kɨʼpin̈iñ ityumpɨy jeʼm jɨɨxi. ¿Y yɨʼp juutypɨk tan̈watpa? Tan̈kukiʼpxiñ jempɨk tan̈jɨɨspa kun jempɨk ijɨɨspa Jehová, wɨapsɨ iga tuum traytyipɨɨxiñ tan̈kaʼ ikupɨk iga Jehová ityeguet. Siiga jeempɨk iñaskaʼaba, jeʼm Biblia iyooxpaʼtpa iga ikaguiñ ijɨɨxi.
5. ¿Juutypɨk takutson̈ba Jehová?
5 Jesɨk tammayba jeʼm Biblia keʼnam iga Jehová sɨʼ tajɨʼyay, siiga tansunba iga Jehová tayooxpaʼdyiñ, tan̈kɨʼpin̈iñ weeñi textos itywɨʼɨp Bibliajom iga in̈matpa jempɨk takkobakpijpa y tampɨktaʼmiñ ityumpɨy jeʼm yooxpadoʼoyiyaj tachiʼiñewɨʼɨp jeʼm iorganizacion iga maaj wɨaiñ tan̈kuyujtaʼm (Prov. 2:3-6). Jesɨk takuyujtaʼmpa tan̈wagaytyaʼmiñ Jehová iga tampaʼttaʼmiñ jeʼm yooxpadoʼoyi iga tatogoyaytyaʼm. Tan̈kuaʼmtamiñ jeʼm jɨɨxian̈chioʼoyiyaj iga wɨap tayooxpaʼttaʼm y tan̈kɨʼpin̈taʼmiñ jempɨk iñaskayaj jeʼm Jehová iyooxakɨʼɨwiñyaj.
6. ¿Juutypɨk tayooxpaʼtpa jeʼm an̈tuʼumaaji?
6 Jehová tayooxpaʼttaʼmpa ikuyukmɨ jeʼm an̈tuʼumaaji, jeʼyukmɨ odoy tan̈togoytyaʼmiñ. Ikuyukmɨ jeʼm najɨʼyoʼoyiyaj o jeʼm kutson̈oʼoyiyaj iga chioyyajpa jeʼm tɨwɨtam, jemum tampaʼttaʼmpa jempɨk nunta tatogoyaytyaʼm (Prov. 27:17). Sɨɨ tan̈kɨʼpin̈taʼmiñ jempɨk tan̈kaʼ tan̈kupɨk y tyi wɨɨ iga tan̈wattaʼmiñ.
«¿ATEGUETSƗ JEHOVÁ?»
7. ¿Tyisɨ wɨap iga tanakwaʼktamtaap?
7 Oyñeʼ in̈jɨɨs yɨʼɨmpɨk: ¿ateguetsɨ Jehová? Iga Jehová tsaam yukmɨ ity wɨapsɨ iñjɨɨs iga dyaʼ wɨap iñamigoja. Jeʼm an̈jagoʼoyi David jeempɨktyim ijɨɨs, jeʼyukmɨ tun̈kɨy nakwaʼkta: «Oh Jehová, ¿tyiapaʼap jeʼm pɨɨxiñ iga iñjɨɨskupakneiñ y jeʼm pɨɨxiñ imaanɨk iga iñtyeguedaap siiga kaʼabatyim?» (Sal. 144:3). Tanaʼmtaʼmiñ juuty ipaʼt jeʼm kutson̈oʼoyi.
8. Juʼuts nɨmpa 1 Samuel 16:6, 7, 10-12, ¿tyi jempɨk iaʼmpa Jehová?
8 Jeʼm Biblia nɨmpa iga Jehová ikupin̈ba jempɨk dyaʼ nakujiʼptaap. Jeʼyukmɨ ikutsat Samuel iga nɨguiñ Jesé ityɨkkɨʼɨm iga ikupin̈aʼyiñ tuum de jeʼm imaanɨk iga tsɨʼyiñ juʼuts an̈jagoʼoyi en Israel. Jesé in̈wejay siete de jeʼm imaanɨktam iga miñyajiñ juuty ity Samuel, pero dyaʼ in̈wejay jeʼm maaj jayukpɨk, David. Y jeʼam jempɨk Jehová ikupin̈neʼ idyɨk (maayɨʼ 1 Samuel 16:6, 7, 10-12). b David tsaam idyɨk ichoowaixpa jeʼm iwɨnanɨgoʼoyi kun Jehová. c
9. ¿Tyiʼiga in̈kupɨkpa iga Jehová mityeguet? (Aʼmɨtyim jeʼm imagen).
9 Jɨɨsɨ juutypɨk Jehová ikwiñkejneʼ iga mityeguet. Michiʼiñeʼ an̈kimayoʼoyiyaj iga miyooxpaʼtpa jesɨk mityogoyay (Sal. 32:8). Jeʼyukmɨ nasuntaap iga in̈wɨixpɨguiñ (Sal. 139:1). Jesɨk in̈kupɨkpa jeʼm an̈kiʼmayoʼoyiyaj y in̈watkiʼpspa, iñaʼmpa juʼutspɨy mityeguet Jehová (1 Crón. 28:9; Hech. 17:26, 27). Jeʼ iaʼmpa juʼutspɨy sɨʼ in̈kuyooxa y tyiʼiga in̈watpa (Jer. 17:10). Ixunba iga iñamigojaiñ (1 Juan 4:19).
Siiga mich in̈kuaʼmpa Jehová, jeʼ iwatpa iga impaʼdyiñ (1 Crón. 28:9). (Aʼmɨ jeʼm párrafo 9). f
«¿AMPƗKNESƗ WƗTAMPƗK JƗƗXIYAJ?»
10. Iga pekam sɨʼ tan̈kuyooxa Jehová, ¿tyisɨ wɨap tanjɨɨs?
10 Weeñi ijɨɨsyajpa siiga iwɨpɨkyaj ijɨɨxi jesɨk ichakyaj iyooxakuy o tun̈gak tyiyaj iga majnam wɨaiñ ikuyooxayaj Jehová. Jesɨk iaʼmyajpa iga tun̈gakyaj maaj iwɨnɨgayñeyaj, wɨapsɨ iga nakwatyajtaap: «¿An̈wɨpɨksɨ anjɨɨxi iga sɨʼ an̈kuyooxa Jehová? ¿O maaj awɨnɨgayñeʼ idyɨk meʼega an̈kooñwɨʼyba jaʼyan̈ tumiñ?».
11. ¿Tyiʼiga jempɨk ijaykaʼm jeʼm Salmo 73 agui idyɨk ikkobakpijpa?
11 Siiga oyñeʼ iñjaam yɨʼɨmpɨk, jɨɨsɨ juʼuts idyɨk in̈jaam jempɨk ijay jeʼm Salmo 73, jeʼ iaʼmpa idyɨk iga jempɨk dyaʼ ikuyooxayajpa Jehová maaj iwɨnɨgayñeyaj, tumiñɨyyaj y dyaʼ idyɨk mɨmneyajpa, keʼnam iga maaj wɨityyaj (Sal. 73:3-5, 12). Jeʼyukmɨ ijɨɨs iga dyaʼ tyi kumeskuy jeʼm yooxakuy iwatnewɨʼɨp idyɨk, yɨʼbam jɨɨxiyaj tsaam idyɨk ikkobakpijpa (Sal. 73:13, 14). ¿Tyi iyooxpaʼt?
12. Juʼuts nɨmpa Salmo 73:16-18, ¿tyi iyooxpaʼt jeʼm salmista iga kunajiñ ijɨɨxi?
12 (Maayɨʼ Salmo 73:16-18). d Jeʼm salmista nɨk jeʼm templojom. Jeem itypa idyɨk ikutyum y wɨap idyɨk ikkunaj ijɨɨxi. Ikutɨʼɨyɨy iga jempɨk tsaam idyɨk iwɨnɨgayñeyaj maaj okmɨ imalnaskayajpa. Ikutɨʼɨyɨy iga maaj wɨɨ siiga ikuyooxaap Jehová. Yɨʼbam iyooxpaʼt iga odom kobakpijiñ (Sal. 73:23-28).
13. ¿Juutypɨk wɨap inikkunaj iñjɨɨxi? (Aʼmɨtyim jeʼm imagenyaj)
13 Wɨaptyim inikkunaj iñjɨɨxi juʼuts jeʼm salmista. ¿Juutypɨk? Jesɨk in̈kujɨɨspa ityumpɨy jeʼm kumaykedoʼoyiyaj iga Jehová michiʼiñeʼ. Jempɨk dyaʼ ikuyooxayajpa Jehová, dyaʼ jaʼyneʼ ipastogoyyajpa ityumpɨy tyityam iniityyaj. Pero Jehová tajɨykamayñetaʼm iga jeʼm tannɨgɨyoʼoyijomtam maaj tawɨitytyaʼmpa (Sal. 145:16). Dyaʼ wɨap iñjoodon̈a juʼuts miñɨgayñeʼ idyɨk meʼega impɨk tun̈gak jɨɨxi. Pero tanjoodon̈tam iga jempɨk ipɨkyajpa ijɨɨxi iga ikuyooxayajpa Jehová, ni keʼman dyaʼ tyi ityogoyayyajpa.
Odoy tan̈kujaʼamaʼyiñ jempɨk Jehová ijɨykamneʼ. (Aʼmɨ jeʼm párrafo 13). g
«¿WƗAPNAM AN̈KUYOOXA JEHOVÁ?»
14. ¿Tyi sɨʼ iñaskayaj weeñi tɨwɨtam y juʼutspɨk jɨɨxiyaj wɨap iniityyaj?
14 Weeñi tɨwɨtam majnam ikuyooxayajtoʼoba Jehová, pero dyam wɨayajpa iga mɨmneyaj, tsaamiyajam o iniityyaj tuum discapacidad. Jeʼyukmɨ naʼkwakyajtaap: «¿Wɨapnamsɨ an̈wɨkuyooxa Jehová?».
15. ¿Tyi iwɨkupɨkneʼ idyɨk jempɨk ijay jeʼm Salmo 71?
15 Yɨkxpɨktyim jɨɨxi iniity idyɨk jempɨk ijay jeʼm Salmo 71, jeʼyukmɨ iñɨʼmay Jehová: «Jesɨk dyam awɨap ayooxpaatɨ» (Sal. 71:9, 18). Jeʼ iwɨkupɨkneʼ idyɨk iga siiga dyaʼ ichakpa iga ikuyooxaap Jehová, jeʼ ijɨɨxian̈chiʼiba y iyooxpaʼtpa. Ikutɨʼɨyɨy iga Jehová tsaam maymay kun jempɨk ikuyooxayajpa juʼtsan̈am wɨayajpa (Sal. 37:23-25).
16. ¿Tyiʼiga jeʼm tɨwɨtam tsaamipɨkyaj wɨapnam iwɨkuyooxayaj Jehová? (Salmo 92:12-15)
16 Siiga michamiam naityɨ jeexpɨktyim jɨɨxi juʼutspɨk iniity Jehová. Siiga iñjaampa iga dyam wɨap in̈wat juʼuts pekam, Jehová wɨap miyooxpaʼt iga mikuyooxaoyiñ espiritualmente (maayɨʼ Salmo 92:12-15). e Kujɨɨsɨ jempɨk wɨap in̈wat sɨɨ, iga iñanmajan̈chiʼiyajiñ tun̈gakyaj an̈madayyaajɨ juutypɨk miyooxpaʼtneʼ Jehová y juʼtspɨy mimaymay iga sɨʼ inin̈joʼk jempɨk Jehová tajɨykamayñeʼ, an̈wejpaatɨtyim Jehová por jeʼm tɨwɨtam (1 Ped. 3:12). Dyaʼ tyi ijoo juuts jeʼm tañityityam, tantumpɨytyam wɨap tan̈kuyooxataʼm Jehová y tanyooxpaʼtyaj tun̈gakyaj.
17. ¿Tyiʼiga odoy tanakukiʼpstamtaiñ kun tun̈gakyaj?
17 Siiga min̈yaʼkneʼ iga dyam jespɨy wɨap in̈kuyooxa Jehová, odoy kujaʼamaʼayɨ iga jeʼ tsaam michoowaixpa. Odoytyim nakukiʼpstaajɨ kun tun̈gakyaj iga Jehová ni keman dyaʼ iwatpa jeempɨk (Gál. 6:4). Tan̈kujɨɨstaʼmiñ iga María ityekkamay Jesús ipuyyukmɨ tuum aceite iga tsaam idyɨk kɨɨnba y tsaam tsoowɨy (Juan 12:3-5). Y jeʼm kunooyaʼ ikukom wɨsteen xutyu tumiñ jeʼm cajajom (Luc. 21:1-4). Jesús ichoowaix jempɨk iwat María y jeʼm kunooya. Y Jehová tsaam ichoowaixpatyim jempɨk in̈watpa, mex iga dyaʼ juʼchan̈ siiga in̈watpa kun toyooyi.
18. ¿Tyi miyooxpatʼpa iga odoy iñjɨɨxiñ iga Jehová dyaʼ mityoyba? (Aʼmɨtyim jeʼm recuadro « jeʼm Dios In̈maatyi miyooxpaʼtpa iga inikkunajiñ iñjɨɨxi»)
18 Tantumpɨytyam tan̈kaʼ tan̈wɨkupɨktaʼm iga Jehová tatoytyaʼmpa. Siiga jeempɨgam sɨʼ tannaskataʼm, jeʼm Biblia tayooxpaʼttaʼmpa iga tanakkunajtaʼmiñ tanjɨɨxityam. Jeʼyukmɨ kuaʼmɨ jeʼm yooxpadoʼoyi mityogoyaywɨʼɨp. Jehová sɨʼ iaʼm juʼtspɨy sɨʼ in̈kuyooxa y tsaam mityeguet, jeʼyukmɨ mikumayketpa. Odoy kujaʼamaʼayɨ iga Jehová ityoyba y ikuixpa jempɨk dyaʼ ichakyajpa iga ikuyooxayajpa.
WAAÑI 111 Los motivos de nuestro gozo
a TEGUEDAAJƗ YƗʼP JƗƗXI: Yɨʼp kuyujijom dyasɨ tanjɨykiʼmtaʼm jempɨk dyaʼ iwɨkupɨkneyaj jeʼm Jehová ijɨykamoʼoyiyaj, sɨʼ tanjɨykiʼmtaʼm jempɨk tan̈kaʼ ikupɨkyaj iga Jehová ichoowaixpa o siiga ipɨkyaj tuum wɨbɨk jɨɨxi.
b 1 Samuel 16:6, 7, 10-12. 6 Jesɨk nuʼkyaj, Samuel iix Eliab y jikskɨy ijɨɨs: «Yɨʼbam jempɨk ikupin̈neʼ Jehová». 7 Pero Jehová inɨʼmay Samuel: «Odoy aʼmaayɨ iamoʼoyi y juʼtspɨy yon̈neʼ, dyaʼ an̈kupin̈neʼ. Anjɨɨxi dyaʼ jeex juʼuts jeʼm pɨxiñtyam ijɨɨxi. Iga jeʼm pɨxiñtyam numaaj wɨap iaʼmyaj jempɨk kejpa, pero Jehová ijoodon̈ tyi ijɨɨspa ianmajom». 10 Jeʼyukmɨ Jesé ininɨgay siete jeʼm imanɨktam Samuel iwiñjom, okmɨ Samuel inɨʼmay Jesé: «Jehová dyaʼ ikupin̈neʼ ni tuum» 11 Samuel ikwaʼk Jesé: «¿ikuyɨkxan̈am immanɨktam?». Jeʼ nɨm: «Jeʼm maaj jaʼyukpɨk dyaʼ yɨʼɨm ity. Sɨʼ ikuix jeʼm ovejas». Jeʼyukmɨ Samuel inɨʼmay Jesé: «an̈wejaayɨ, dyaʼ tawiʼktaʼmpa siiga jeʼ dyaʼ i» 12 Jeʼyukmɨ pɨɨmɨyoy iga namiñtyaiñ. Jeʼm traytyi poopnagɨy idyɨk, tsaam wɨɨ ikeeji. Okmɨ Jehová nɨm: «¡Yɨʼbam jempɨk an̈kupin̈neʼ!»
c Jeʼm Biblia dyaʼ nɨmpa juʼtsan̈ idyɨk iamtyɨy David pero wɨap tan̈kutɨʼɨyɨytyaʼm iga dyanam idyɨk jaʼamoyñeʼ. (Aʼmɨ jeʼm Totjaayi Takjoodon̈apaʼap del 1 de Septiembre del 2011, página 29, párrafo 2 en español)
d Salmo 73:16-18. 16 Jesɨk an̈kutɨʼɨyɨytyoʼoba idyɨk, pɨɨmi akkobakpijpa, 17 pero jesɨk atɨgɨy jeʼm templojom an̈kutɨʼɨyɨy tyityam iñaskayajpa idyɨk. 18 Mich iñaʼmchiʼiba iga yaʼachayajiñ kun jeʼm imalwadoʼoyiyaj.
e Salmo 92:12-15. 12 Pero jempɨk iwɨwatyajpa moyyajpa juʼuts jeʼm palmeras y mɨjayajpa juʼuts tuum wɨdyaykuy. 13 Ityyaj jeʼm Jehová ityɨkkɨʼɨm y moyyajpa jeʼm Dios ian̈kɨʼɨm.14 Mex iga tsaamiyajam duroj iwɨnɨgayyajpa, pɨɨmiɨyyajpa y maymayayajpa. 15 In̈matyajpa iga Jehová tsaam iwɨwatpa. Y jeʼam jeʼm wɨdyaychaʼ, ni keman imalwatpa.
