1, 2. ¿Juʼuts tanan̈jaam jesɨk tachioytyaʼmpa, y tyiʼiga Jehová tawatnetaʼm kun yɨʼpyaj jɨɨxiyaj?

 TSAAM tamaymaywattaʼmpa jesɨk tachioʼyba iga jeempɨgam tawatnetaʼm Jehová (Hech. 20:35). Tsaam wɨɨ tanan̈jaam jesɨk algun i tachiʼiba tuum xaaja. Pero maaj tamaymaywatpa jesɨk tanyooxpaʼtpa algun i kun tyityam tanaity. ¿Tyiʼiga tawɨwadaʼyba iga Jehová tawatneʼ kun yɨʼp jɨɨxi?

² Siiga juchixkej tayooxpadoʼyba tsaam tamaymayaap. Jehová ixunba iga odoy tampatstogoytyaʼmiñ jeʼm maymayaaji. Jeʼyukmɨ tsaam tagaʼman̈jakpa iga Dios tawɨwatneʼ (Sal. 139:14).

 3. ¿Tyiʼiga jeʼm Biblia nɨmpa iga Jehová jeʼ jeʼm Dios maymaypɨk?

³ Jeʼm Biblia nɨmpa iga jempɨk chioyyajpa maaj maymayaap, jeʼyukmɨ dyaʼ tagaʼman̈jakpa iga Jehová jeʼ jeʼm Dios maymaypɨk (1 Tim. 1:11). Ni i dyaʼ jespɨy chioʼyba juʼuts Jehová, jeʼyukmɨ jeʼm apóstol Pablo nɨm iga jeʼ tachiʼiñetaʼm «tamvida y tampɨmi» (Hech. 17:28). «Jém tanJa̱tuŋ Dios tachiit́ámpa jém wɨ̱tampɨc xaja» (Sant. 1:17).

 4. ¿Tyi tayooxpaʼtpa iga maaj tamaymayataʼmiñ?

 ⁴ Jesɨk tachioytyaʼmpa, ¿tyi wɨap tan̈wattaʼm iga maaj tamaymayataʼmiñ? Yɨʼp kuyujijom tan̈kɨʼpin̈taʼmpa juutypɨk tan̈watkiʼpstaʼmpa Jehová iga juchixkej chioʼyba tyityam iniity (Efes. 5:1). Tan̈kɨʼpin̈taʼmpatyim tyi tan̈wattaʼmiñ jesɨk tanjaampa iga tun̈gakyaj dyaʼ ichoowaixyajpa jempɨk tan̈wattaʼmpa. Ityumpɨy jempɨk tan̈kɨʼpin̈taʼmpa tayooxpaʼtpa iga seguido tachioytyaʼmiñ kun maymayaaji.

TAN̈WATKIʼPSTAʼMIÑ JEHOVÁ IGA JUCHIXKEJ CHIOʼYBA TYITYAM INIITY

 5. ¿Tyityam tachiʼiba Jehová?

⁵ Tanaʼmiñ juutypɨk takwiñkejaʼyba Jehová iga chioʼyba kun maymayaaji. Jeʼ tachiʼiba jempɨk tatogoyaytyaʼm juʼuts jeʼm wiʼkkuy, jeʼm puʼktuuku y juuty wɨap tañitytyaʼm (Sal. 4:8; Mat. 6:​31-33; 1 Tim. 6:​6-8). Y dyaʼ iwatpa iga pɨʼɨmɨytyaap. Jesɨk, ¿tyiʼiga iwatpa jeempɨk?

 6. ¿Tyi tan̈kejaʼyba Mateo 6:​25, 26?

⁶ Jehová tachiʼiba tyityam tatogoyaytyaʼm iga tatoytyaʼmpa. Tan̈kɨʼpin̈taʼmiñ jeʼm an̈matyiyaj nɨmwɨʼɨp Jesús en Mateo 6:​25, 26 (maayɨʼ). En yɨʼpyaj versículos iga wɨaiñ tan̈kutɨʼɨyɨy juutypɨk iwatpa Jehová, Jesús in̈mat de jeʼm jonyaj, jeʼ nɨm: «D́a ñipyajpa, d́at́im ipiŋyajpa jém cosecha iga iccáypa tu̱m tɨcjo̱m. Pero icwícpa jém tanJa̱tuŋ Dios jém it́wɨɨp sɨŋyucmɨ. Mich, más miwɨ̱ que jém jonyaj». Yɨʼp tan̈kejaʼyba iga pɨɨmi tatsoowaixtyaʼmpa jempɨk tan̈kuyooxataʼmpa Jehová, iga jeex juʼuts tuum jaatun̈ iga pɨɨmi tatoytyaʼmpa y tachiʼiba jempɨk tatogoyaytyaʼm, juʼuts iwatpa kun jeʼm animatyaj (Sal. 145:16; Mat. 6:32).

 7. Juʼutstyim Jehová, ¿juutypɨk wɨap iñyooxpaʼtyaj jeʼm tɨwɨtam? (Aʼmɨtyim jeʼm imagenyaj).

⁷ Juʼutstyim Jehová, iga tantoytyaʼmpa tun̈gakyaj tanchiʼityaʼmpa tyityam tanaitytyaʼm. Y mich, ¿iñixpɨkpa tuum tɨɨwɨ iga ityogoyay wiʼkkuy y puʼktuuku? Jehová wɨap mianmajan̈chiʼ iga miyooxpadoʼyiñ. Jesɨk tuum tɨɨwɨ imalnaskaʼaba, jeʼm Jehová iyooxakɨʼɨwiñyaj iyooxpaʼtyajpa. Tan̈kujɨɨstaʼmiñ jesɨk jaʼy ityi jeʼm pandemia del COVID-19. Jaʼyan̈ tɨwɨtam chioyyaj  wiʼkkuy, puʼktuuku y tyityam nasuntaap idyɨk. Tun̈gakyaj iwatyajtyim donaciones iga wɨaiñ iyooxpaʼtyajta jeʼm tantɨwɨtam ityyajwɨʼɨp tun̈gak an̈eymɨyaj. Kupak jeʼm an̈maatyi itywɨʼɨp Hebreos 13:16: «Odoy ja̱mnootɨ iga iŋwɨ̱wadáypa jém iñt́ɨ̱wɨtam iga iñyo̱xpátyajpa con t́it́am iniit́. Siiga iŋwatpa así jex juuts tu̱m sacrificio jém iwɨ̱aŋja̱mpáppɨc Dios».

 8. ¿Juutypɨk tayooxpaʼtpa jeʼm Jehová ipɨɨmi? (Filipenses 2:13).

⁸ Jehová tachiʼiba jeʼm ipɨɨmi. Ni keman kuyajpa jeʼm ipɨɨmi jeʼyukmɨ ichiʼiba jempɨk ikuyooxayajpa (maayɨʼ Filipenses 2:13). ¿Oyñeʼ inin̈wejpaʼt Jehová iga wɨaiñ iñyaʼachɨy tuum kutɨʼɨchi o iga mipɨɨmchiʼiñ iga wɨaiñ in̈wat jeʼm yooxakuy tumtum jaamapɨk? Jesɨk Jehová mipɨɨmchiʼ wɨapsɨ iga iñjaam juʼuts jeʼm apóstol Pablo iga nɨm: «Ɨch wɨa̱p aŋwat it́u̱mpɨy cosa» iga Jehová achiʼiba ipɨɨmi (Filip. 4:13).

 9. ¿Juutypɨk tan̈watkiʼpstaʼmpa Jehová? (Aʼmɨtyim jeʼm imagen).

⁹ Taɨchtyam dyaʼ jeex tampɨɨmi juʼuts Jehová iga wɨap tanchiʼiyaj tun̈gakyaj. Pero wɨap tanyooxpaʼtyaj iga tanchiʼityaʼmpa tyityam tanaitytyaʼm. Siiga tuum tɨɨwɨ tsaamiam o mɨmneaktɨn̈neʼ, wɨap iñyooxpaʼt kun tyityam iwatpa ityɨkkɨʼɨm. Wɨaptyim iñyooxpadoy jesɨk wɨtsakseettaap y akkuaʼytyaap jeʼm An̈tuʼumayoʼytyɨk. Jesɨk tan̈wattaʼm yɨʼɨmpɨk pɨɨmi tanyooxpaʼtyajpa jeʼm tantɨwɨtam.

10. ¿Juutypɨk wɨap iñanmajan̈chiʼ tun̈gakyaj?

¹⁰ Odoy kujaʼamaʼayɨ iga kun jempɨk miñɨmpa wɨap impɨɨmchiʼ o iñanmajan̈chiʼ tun̈gakyaj. ¿Iñixpɨkpa algun i iga nasuntaap iga iñanmajan̈chiʼiñ? ¿Tyiʼiga dyaʼ impɨkpa iñjɨɨxi iga iñyooxpaʼtpa? Nɨgɨ jooyaayɨ, jɨyñɨgaʼayɨ, kutsadaʼayɨ tuum tarjeta o tuum mensaje. Odoy pɨɨmi jɨɨsɨ tyityam iññɨʼmaʼyba, maaj wɨɨ iñjaam siiga jeʼm an̈matyiyaj putpa dende iñanmajom. Wɨapsɨ iga jeʼam ityogoyay iga wɨaiñ iñanmajan̈chiʼ iga iyaʼachɨʼyiñ tumtum jaama (Prov. 12:25; Efes. 4:29).

11. ¿Tyi iwatpa Jehová kun jeʼm ijoodon̈oʼoyi?

¹¹ Jehová tachiʼiba joodon̈oʼoyi. Santiago ijaykunuʼk: «Siiga algunos de mimicht́am mit́ogóyáy jém wɨbɨc jɨ̱xi, wágayt́aamɨ tanJa̱tuŋ Dios. Je michiiba jáyaŋ jém wɨbɨc jɨ̱xi. D́a nɨmpa iga d́a manchiiba» (Sant. 1:5; nota).  Juʼuts nɨmpa yɨʼp versículo Jehová dyaʼ initsɨʼyba jeʼm ijoodon̈oʼoyi ichiʼiba tun̈gakyaj. Y jeʼ, «d́a nɨmpa iga d́a manchiiba», dyaʼ juchixkej tajɨykimaʼyba iga tayooxpaʼtneʼ, taanmajan̈chiʼiba iga tan̈waʼgaʼyiñ joodon̈oʼoyi (Prov. 2:​1-6).

12. ¿Juutypɨk wɨap tanan̈kejayyaj tun̈gakyaj?

¹² Taɨchtyam wɨaptyim tan̈watkiʼpstaʼm Jehová jesɨk tanan̈kejayyajpa tun̈gakyaj (Sal. 32:8). Wɨap tanyooxpaʼtyaj tun̈gakyaj. Wɨapsɨ iga jempɨk yaguiñ putyajpa jeʼm an̈matkuyjom tanan̈kejayyajpa juutypɨk iwatyajiñ. Jeʼm ancianojyaj jeempɨktyim sɨʼ iwatyaj kun jeʼm siervos ministeriales y jempɨk yaguiñ chin̈neyaj iga wɨaiñ iwatyaj jeʼm yooxakuyyaj jeʼm kumunjom. Jaʼyan̈ tɨwɨtam y yomtɨwɨtam in̈kejayyajpatyim tun̈gakyaj iga wɨaiñ iyooxpadoyyaj jesɨk wattaap y wɨtsakseettaap jeʼm An̈tuʼumayoʼytyɨkyaj o tun̈gak instalaciones.

13. ¿Juutypɨk wɨap tan̈watkiʼpstaʼm Jehová jesɨk tanan̈kejayyajpa tun̈gakyaj?

¹³ Juʼutstyim Jehová iga ichiʼiba jeʼm ijoodon̈oʼoyi jempɨk ikuyooxayajpa, taɨchtyam odoy tanatsɨʼyiñ jempɨk tanjoodon̈tam, tanan̈kejayyajiñtyim jempɨk yaguiñ sɨʼ ikuyujkayaj. Odoy tanjɨɨstaʼmiñ iga jesɨk tanan̈kejayyajpa tun̈gakyaj wɨap takkaʼyay tanyooxakuy. Odoytyim tanɨmtaʼmiñ: «Iyaʼak ikuyujkaiñ, ¡ɨch dyaʼ i an̈kejay!». Jempɨk tan̈kuyooxataʼmpa Jehová dyaʼ tanaitytyaʼmpa yɨkxpɨk jɨɨxiyaj. Tanyooxpaʼtyajpa tun̈gakyaj iga ijoodon̈ayajiñtyim juutypɨk iwatyajpa tuum yooxakuy (1 Tes. 2:8). Tan̈wɨkupɨktaʼmpa iga jeʼeyaj wɨap in̈kejayyaj tun̈gakyaj (2 Tim. 2:​1, 2). Siiga tan̈wattaʼmpa jeempɨk, taɨchtyam y jempɨk tanan̈kejayyajpa majtyim tamaymayataʼmpa.

JESƗK KEʼNAM IGA DYAʼ I ICHOOWAIXPA TYITYAM TAN̈WATTAʼMPA

14. ¿Tyi iwatyajpa weeñiyaj jesɨk tanyooxpaʼtyajpa?

¹⁴ Jesɨk tanyooxpaʼtyajpa tun̈gakyaj, y maaj jeʼm tantɨwɨtam, wɨapsɨ iga tawadayyajpa tuum nota juuty tanɨʼmayyajpa wɨtampɨk an̈matyiyaj iga tanyooxpaʼtneyaj (Col. 3:15). Tsaam tamaymaywattaʼmpa jesɨk iwatyajpa yɨʼɨmpɨk.

15. ¿Tyi wɨɨ iga tanjɨɨskupaknetaʼmiñ jesɨk algun i dyaʼ ichoowaixpa jempɨk tan̈watpa?

¹⁵ Jesɨk tanyooxpaʼtyajpa dyaʼ ityumpɨyyaj ichoowaixyajpa jempɨk tan̈watpa. Wɨapsɨ iga dyaʼ ityeguedayajpa jesɨk tanchiʼiba tantiempo, tampɨɨmi o tyityam tanaity. ¿Tyi tayooxpaʼtpa iga odoy tan̈yaʼguiñ y wɨaiñ tamaymaya? Tanjɨɨskupaknetaʼmiñ jeʼm texto juuty topta yɨʼp kuyuuji Hechos 20:35. Tamaymaytyaʼm por jempɨk tan̈wattaʼmpa, jeʼyukmɨ dyaʼ tan̈yaʼkpa siiga tun̈gakyaj ichoowaixyajpa jempɨk tan̈watpa o dyaʼ. Tan̈kɨʼpin̈taʼmiñ weeñi jɨɨxiyaj iga wɨap tayooxpaʼttaʼm.

16. ¿Tyi tanjɨɨskupaknetaʼmiñ?

¹⁶ Kujɨɨsɨ iga jesɨk michioʼyba sɨʼ in̈watkiʼps Jehová. Jeʼ ichiʼiba ityumpɨy wɨtampɨk tyidyin̈kej dyaʼ tyi ijoo siiga ichoowaixyajpa o dyaʼ (Mat. 5:​43-48). Jehová ijɨykamayñeʼ jeʼm iyooxakɨʼɨwiñyaj iga siiga chioyyajpa y dyaʼ in̈joʼkyajpa iga akseedaytyaiñ, kumayketyajtaap (Luc. 6:35). Jeʼyukmɨ odoy an̈yaʼakɨ siiga tun̈gakyaj  dyaʼ ichoowaixpa por jempɨk iwatpa. Jɨɨskupakneɨʼ iga Jehová juchixkej mikumayketpa jesɨk iñyooxpaʼtyajpa tun̈gakyaj y siiga michioʼyba kun maymayaaji (2 Cor. 9:7; Prov. 19:17).

17. ¿Tyi tayooxpaʼtpa iga wɨaiñ tan̈watkiʼps Jehová? (Lucas 14:​12-14).

¹⁷ Miyooxpaʼtpatyim iwatkiʼps Jehová jesɨk in̈watpa jempɨk nɨmpa Lucas 14:​12-14 (maayɨʼ). Dyaʼ tyi naspa siiga michioʼyba tyityam iniity kun jempɨk wɨap mikseedayyaj. Pero siiga sɨʼ tanchioʼy tyityam tanaity numaaj iga takseedaytyaiñ, jesɨk tan̈wadyiñ jempɨk nɨm Jesús, tanchiʼiyajiñ tyityam tanaity jempɨk dyaʼ wɨap takseedayyaj. Siiga jeempɨgam tan̈watpa, tamaymayaap iga sɨʼ tan̈watkiʼps Jehová. Jesɨk tachioytyaʼmpa y dyaʼ tanan̈joʼkpa iga takkseedaytyaiñ, tachioʼyba kun maymayaaji mex iga tun̈gakyaj dyaʼ ichoowaixyajpa.

18. ¿Tyi tayooxpaʼtpa iga odoy tammalkujɨɨsyajiñ jeʼm tantɨwɨtam?

¹⁸ Odoy malkujɨɨsyaajɨ (1 Cor. 13:7). Jesɨk tanyooxpaʼtpa algun i y dyaʼ tyi tanɨʼmaʼyba tanakwaʼktamtaiñ: «¿Nunta dyaʼ ichoowaix jempɨk an̈wat o ikujaʼamay anɨʼmay yukwɨpdius?». Wɨapsɨ iga dyaʼ ikutɨʼɨyɨy tyi tanɨʼmaʼyba, o iga tsaam ichoowaix jempɨk tan̈wat tan̈kaʼa mu ikwiñkej juʼuts in̈jaam. Wɨaptyim iga tsaʼayajpa iga yooxpaʼtyajtaiñ iga sɨʼ jeʼeyaj dyam wɨap iyooxpadoyyaj. Jeʼm toyoʼoyi tayooxpaʼtpa iga odoy tammalkujɨɨsyajiñ jeʼm tantɨwɨtam y seguido tanyooxpaʼtyajiñ kun maymayaaji (Efes. 4:2).

19, 20. ¿Tyi tan̈wadyiñ jesɨk algun i dyaʼ jobity ikwiñkejpa iga ichoowaixpa jempɨk tan̈watneʼ? (Aʼmɨtyim jeʼm imagenyaj).

¹⁹ Odoy an̈joʼokɨ iga jobitytyi mikwiñkejaʼyiñ iga ichoowaixpa jempɨk in̈watneʼ. Jeʼm an̈jagoʼoyi Salomón nɨm yɨʼpyaj an̈matyiyaj: «Kukoomɨ jeʼm impan  nɨʼkɨʼɨm weeñi jaama okmɨ jeʼmtyim impaʼtpa» (Ecl. 11:1). Yɨʼpyaj an̈matyiyaj tan̈kejayyajpa iga wɨap iñas weeñi jaama iga algun tanɨʼmaʼyiñ yukwɨpdius. Tan̈kɨʼpin̈iñ tuum nasɨyoʼoyi.

²⁰ Tuum circuito iyoomoʼ ijaʼyay tuum yoomtɨwɨ iga yaguiñ chin̈neʼ idyɨk y ianmajan̈chiʼ. Ocho amtyɨy okmɨ jeʼm yoomtɨwɨ ikutson̈ jeʼm carta juuty nɨmpa: «Manan̈madaytyoʼoba iga tsaam anyooxpaʼtneʼ mex iga dyaʼ idyɨk iñjoodon̈». Nɨmpatyim: «Jempɨk anjaʼyay tsaam an̈kusuʼnɨy, pero maaj ayooxpaʼt jeʼm texto iñjaykunuʼkwɨʼɨp, y dyaʼ keman an̈kujaʼamay». a Okmɨ iga in̈maday tyityam sɨʼ iñaskaʼ idyɨk nɨm: «A veces dyam tyi an̈wattoʼoba idyɨk, dyam an̈kuyooxatoʼoba Jehová, antsaktoʼoba idyɨk ityumpɨy. Pero yɨʼpyaj ocho naamtyɨy tsaam ayooxpaʼt jeʼm texto iñjaykunuʼkwɨʼɨp». ¡Tan̈kujɨɨxiñ juʼtspɨy maymaya jeʼm yoomtɨwɨ jesɨk ipɨktson̈ yɨʼp carta! Siiga iñyooxpaʼtneʼ algun i wɨapsɨ iga naspa jaʼyan̈ amtyɨy iga ikwiñkejpa iga ichoowaixpa jempɨk in̈watneʼ.

21. ¿Tyiʼiga juchixkej tanteguedaiñ tan̈watkiʼps Jehová?

²¹ Juʼuts tan̈kɨʼpin̈netaʼm Jehová tawatneʼ kun yɨʼp jɨɨxi, maaj tamaymaytyam jesɨk tachioʼytyaʼmpa y dyaʼ jesɨk tachiʼityamtaap. Tsaam wɨɨ tanan̈jaam jesɨk tanyooxpaʼtyajpa tun̈gakyaj y tan̈kusuʼnɨytyaʼmpatyim jesɨk ichoowaixyajpa. Pero dyaʼ tyi ijoo siiga iwatyajpa o dyaʼ, tamaymaytyam iga tan̈wɨwatneʼ y tan̈kujɨɨstaʼmiñ jempɨk nɨmpa 2 Crónicas 25:9: «Jehová michiʼiba maaj jaʼyan̈». ¡Dyaʼ i jespɨy chioʼyba juʼuts Jehova! Y tsaam tamaymaywatpa iga jeʼ takumayketpa. Jeʼyukmɨ juchixkej tanteguedataʼmiñ iga tan̈watkiʼpstaʼmiñ tanJaatun̈ sɨn̈yukmɨpɨk.