«Jeʼm yaʼachɨyoʼoyi iga iniity tuum pɨɨxiñ y tuum yoomoʼ iga an̈koʼmɨyñeyaj kutɨʼtstaap tumtum jaama. Algun i iga dyanam an̈koʼmɨyñeʼ, wɨapsɨ iga dyaʼ pɨɨmi ityeguedaap jeʼm yaʼachɨyoʼoyi, pero tsaam nasuntaap iga jeʼm an̈komɨʼɨyi iwɨnɨgaʼyiñ» (John).

•  ¿Tyiʼiga nasuntaap iga iñyaʼachɨʼyiñ?

•  ¿Tyi wɨap in̈wat iga majnam iñyaʼachɨʼyiñ?

•  Jeʼm yaʼachɨyoʼoyi tsaam pɨɨmi nasuntaap

•   Jeʼm an̈koʼmɨyoʼoyijom dyaʼ tan̈kaʼ miniaʼmaytyamta jeʼm iñtyan̈katam.

   «Jesɨk tanan̈yujtamtawum jeʼm an̈koʼmɨyoʼoyijom, majtyim tanteguedaap jempɨk dyaʼ tan̈kusuʼnɨʼyba. Jesɨk mojpa tanaity yɨʼp malojpɨk jɨɨxi, dyam jespɨy tanyaʼachɨʼyba» (Jessena).

•   Siiga dyaʼ tanyaʼachɨʼyba dyaʼ tan̈kujɨɨspa tyi tanɨmpa.

   «Jikskɨy anan̈matpa juʼuts anan̈jaam, dyaʼ an̈wɨjɨɨspa tyi anɨmpa. Meʼega anyaʼachɨʼyba, wɨap idyɨk anaknuʼk anjɨɨxi, y jesɨk dyaʼ anteguedaap y dyaʼ tyi anɨmpa» (Carmen).

   Jeʼm Biblia nɨmpa: «Jém tóyoypáppɨc iyaachɨ́ypa siiga malwadayt́ap, d́a malo» (1 Corintios 13:4, Jém Jomipɨc Trato, La Liga Bíblica). Wɨap tanjɨɨs iga wɨstenyaj iga natoyyajtaap nayaʼachɨyyajtaap. Pero dyaʼ juchixkej naspa jeempɨk. John, iga tanjɨykiʼm dende wiñtyityim, nɨmpa: «Juʼuts naspa kun tun̈gak jaamoʼoyiyaj, jeʼm yaʼachɨyoʼoyi tan̈kaʼ iga tanaitypa y dyaʼ jikskɨy tampatstogoyba. Siiga tansunba iga majnam tanyaʼachɨʼyiñ nasuntaap iga tanateguedɨytyaiñ».

•   Jesɨk naspa algun tyi iga dyaʼ idyɨk iñjɨɨsneʼ.

   Akwiñkejoʼoyi: Iñyoomoʼ o in̈wɨdyaaya miñɨʼmaʼyba algun tyi iga iñtyoʼyan̈jaampa, y mimich iñjɨpkutson̈toʼobatyim.

   Jeʼm Dios In̈maatyi ijɨɨxian̈chioʼoyi: «Odoy jobity joʼykaʼɨʼ, numaaj jeʼm kuɨɨxiyaj ikusuʼnɨyyajpa ijoʼyyaj» (Eclesiastés 7:9, nota).

   Tyi wɨap in̈wat: Teeñan̈jaakɨʼ. Wiñtyi iga in̈kutson̈ba, kujɨɨsɨ iga jeʼm iñyoomoʼ o jeʼm in̈wɨdyaaya dyaʼ idyɨk mimalwadaytyoʼoba. «Jaʼyan̈ de taɨchtyam takutson̈oytyaʼmpa y tanan̈jɨɨsjakpa tyi tanɨʼmaytyɨʼp y dyaʼ iga tan̈wɨkumaton̈ba jempɨk tanɨʼmay tanyoomoʼ o tan̈wɨdyaaya», nɨmpa jeʼm libro Fighting for Your Marriage (Kɨakputɨ jeʼm iñan̈komɨʼɨyi).

   Pero, siiga jeʼm iñyoomoʼ o jeʼm in̈wɨdyaaya miñɨʼmay jeempɨk kun tuum malojpɨk jɨɨxi, yaʼachɨʼɨyɨ y odoy kɨan̈seedaʼayɨʼ; inikwiñkejpa iga dyaʼ min̈atoʼoba. Jeʼm Biblia nɨmpa: «Juuty dyaʼ i kɨɨpiʼ, piʼchpa jeʼm juktɨ» (Proverbios 26:20).

   «Siiga mojneum iñaʼm iñyoomoʼ juʼuts tuum enemigo, teeñan̈jaakɨʼ y kujɨɨsɨ tyiʼiga iñtyoyba, y jikskɨy waatɨ algun tyi iga jeʼ ikusuʼnɨʼyba» (Ethan).

   Kujɨɨsɨ yɨʼp:

  •  ¿Tyi in̈watpa jesɨk iñyoomoʼ o in̈wɨdyaaya nɨmpa o iwatpa algun tyi iga dyaʼ in̈kusuʼnɨʼyba?

  •  ¿Juutypɨk inikwiñkejpa iga iñyaʼachɨʼyba jesɨk eybɨk iwatpa jeempɨk?

•   Jesɨk dyaʼ kukaktoʼoba.

   Akwiñkejoʼoyi: Iñyoomoʼ o in̈wɨdyaaya agui kutsuʼuyaap, i mich juchixkej inin̈joʼkneʼeba y tsaam michɨkkujoʼyba.

   Jeʼm Dios In̈maatyi ijɨɨxian̈chioʼoyi: «Nawɨ̱nanɨgayt́amta̱jɨ [...]. Nawadayt́amta̱jɨ perdón con jém iñt́ɨ̱wɨtam siiga minimalwadayt́amta̱p» (Colosenses 3:13, Jém Jomipɨc Trato, La Liga Bíblica).

   Tyi wɨap in̈wat: Teguedaajɨ maaj jeʼm iñan̈komɨʼɨyi y dyaʼ jeʼm michpɨk in̈kusuʼnɨyoʼoyi. Nakwaʼktaajɨ: «Siiga pɨɨmi anteguedaap, ¿ammalwadaʼyba anan̈komɨʼɨyi?». Y kujɨɨsɨ iga jeʼm Biblia nɨmpa iga «Tantu̱mpɨyt́am wa̱t́cɨy tammalwatpa» (Santiago 3:2, Jém Jomipɨc Trato, La Liga Bíblica). Yɨʼp nɨmtoʼoba iga nasuntaptyim iga mimich in̈wadyiñtyim kukakiyaj.

   «Maaj anyaʼachɨyyajpa jeʼm anamigojyaj, y an̈wɨdyaaya dyaʼ jespɨy. Iga jeʼ an̈waganaity, jeʼyukmɨ maaj anaʼmpa tyityam dyaʼ iwɨwatpa. Jeʼm yaʼachɨyoʼoyi tɨgɨykuʼmpa kun jeʼm toyoʼoyi; siiga tanakwiñkejpa, sɨʼ tanakwiñkej respeto. Jeʼyukmɨ pɨɨmi nasuntaap jeʼm an̈koʼmɨyoʼoyijom» (Nia).

   Kujɨɨsɨ yɨʼp:

  •  ¿Iñyaʼachɨʼyba jesɨk iñyoomoʼ o in̈wɨdyaaya jɨɨxtyogoyba?

  •  ¿Tyi wɨap in̈wat iga in̈kuyujkaiñ iñyaʼachɨy?