•   Mich in̈kujɨɨskiʼmpa juutypɨk in̈watpa ityumpɨy; iñyoomoʼ o in̈wɨdyaaya ikusuʼnɨʼyba iga wiñjɨɨsnetaiñ juutypɨk wattaap algun tyi.

•   Mimich dyaʼ mijɨyjɨyñeʼeba; iñyoomoʼ o in̈wɨdyaaya tsaam jɨytyero y iwatpa iga idyiñ maymayaaji jesɨk itypa sɨn̈aajiyaj.

 ¿Ity algun tyi iga michɨkkujoʼyba de iñyoomoʼ o in̈wɨdyaaya? Siiga pɨɨmi iñtyeguedaap wɨap imalwaday iñan̈komɨʼɨyi. Tanjɨɨxiñ iga jeʼm Biblia nɨmpa: «Jempɨk ijɨykiʼmpa watykɨy algun tyi iweʼkpa jempɨk tsaam nawɨnanɨgayyajtaap» (Proverbios 17:9).

 Odoy aʼmchiɨʼ iga jempɨk michɨkkujoʼyba iktsukumiñ waatyi an̈aajiyaj, wɨap in̈kuyujkaʼ iga iñaʼmiñ yɨʼp kun tuum wɨbɨk jɨɨxi.

Tanaʼmtaʼmiñ yɨʼpyaj an̈kejayoʼoyiyaj:

•  Aʼmɨ kun tuum wɨbɨk jɨɨxi jempɨk michɨkkujoʼyba

•  Jempɨk nɨmyajpa tun̈gak an̈komɨʼɨyiyaj

•  Jɨɨxiyaj iga wɨap in̈kɨʼpin̈taʼm an̈tuumjom

 Mex iga ity tyidyin̈kej iga michɨkkujoʼyba de iñyoomoʼ o in̈wɨdyaaya wɨapsɨ iga ity algun tyi iga mimich tsaam in̈kusuʼnɨyaʼyba. Tanaʼmiñ tukuteen akwiñkejoʼoyi:

 «An̈wɨdyaaya tsaam chokoyaap jesɨk iwatpa algun tyi o iga nawɨtsaktaap iga nɨkpa algun juuty. Pero jeʼ tuum pɨɨxiñ iga dyaʼ jobity joʼyba, y tsaam ayaʼachɨʼyba. Oyba atsɨkkujoʼyba iga chokoyaap, pero aguityim an̈kusuʼnɨʼyba iga jeex» (Chelsea).

 «Anyoomoʼ ityumpɨy iwɨkujɨɨspa y iwɨkɨʼpin̈ba juutypɨk iwatpa; ixunba iga ityumpɨy wɨpudyiñ, y oyba dyaʼ an̈kusuʼnɨʼyba iga jeex. Pero iga ityumpɨy iwɨkujɨɨspa, ijoodon̈am juutypɨk iwatpa ityumpɨy, dyaʼ ikujɨɨskiʼmpa» (Christopher).

 «Oyba, an̈wɨdyaaya keʼnam dyaʼ ityeguet weeñi tyidyin̈kej, y yɨʼp atsɨkkujoʼyba. Pero iga tyidyin̈kej iwatpa chokoymɨ, ichokoyjɨɨspa juutypɨk iwatpa, jeʼam jempɨk tsaam an̈kusuʼnɨy dende wiñtyityim. An̈kusuʼnɨʼyba iga dyaʼ jobity joʼyba y iwɨjɨɨspa tyi iwatpa jesɨk itypa tan̈kapɨk nasɨyoʼoyiyaj» (Danielle).

 Juʼuts ikuyujkayaj Chelsea, Christopher y Danielle, wɨapsɨ iga jempɨk michɨkkujoʼyba de iñyoomoʼ o in̈wɨdyaaya jeʼtyim jempɨk tsaam in̈kusuʼnɨʼyba jesɨk iwatpa tun̈gak tyidyin̈kej. Dyaʼ wɨap tannɨm iga tan̈watpa tuum kukaki y duroj tanakwiñkejpa jeʼtyim jɨɨxi; jeex juʼuts tuum moneda iga ikuwɨsna lado pɨkpa y dyaʼ wɨap inikkaʼyay tuum lado.

 Jɨ, weeñi jɨɨxiyaj nasuntaap iga kukagayyajtaiñ. Juʼuts akwiñkejoʼoyi, jeʼm Biblia nɨmpa iga weeñiyaj «agui joʼytyerojyaj» (Proverbios 29:22). Siiga algun i jeex, wɨɨ iga ichaguiñ «jém jɨ̱xi aguipɨc ta̱m. [...] it́u̱mpɨy jém jooya. Odoy jóyi̱xɨ jém iñt́ɨ̱wɨtam. Tsa̱cɨ iga agui mijɨypa iga mijóyñe. Odoy malnɨ́maayɨ jém iñt́ɨ̱wɨtam» a (Efesios 4:31).

 ¿Y siiga numaaj jeʼ algun tyi iga michɨkkujoʼyba? Jeʼm Biblia chioʼyba yɨʼp an̈kiʼmayoʼoyi: «Mimicht́am nawɨ̱nanɨgayt́amta̱jɨ [...]. Nawadayt́amta̱jɨ perdón» (Colosenses 3:13).

 Y aʼmɨ kun tuum wɨbɨk jɨɨxi jempɨk michɨkkujoʼyba. Wɨapsɨ iga iñjɨɨspa iga jeʼm jɨɨxi ikwiñkejpaʼap iñyoomoʼ o in̈wɨdyaaya jeʼam jempɨk in̈kusuʼnɨyay jesɨgam iñixpɨk. Joseph, iga an̈koʼmɨyñeʼ, nɨmpa: «Siiga numaaj iñtyeguet tyityam michɨkkujoʼyba de iñyoomoʼ jeex keʼnam jesɨk iniity tuum diamante y numaaj iñaʼmaʼyba juutytyam tsuupa y dyaʼ iñaʼmpa iga tsaam wɨɨ ikeeji ikumɨj».

 Wiñtyi, in̈kutyumtam kujɨɨstaʼamɨ yɨʼpyaj akwagoʼoyiyaj y okmɨ wagakɨʼpin̈taʼamɨ.

•   ¿In̈jɨɨspa iga iñyoomoʼ o in̈wɨdyaaya ikwiñkejpa tuum jɨɨxi o iwatpa algun tyi iga iktsukumpa an̈aaji iñan̈koʼmɨyoʼoyijom? Siiga jeempɨgam naspa ixɨʼ, ¿tyiapaʼap jempɨk michɨkkujoʼyba?

•   ¿Pɨɨmi dyaʼ wɨɨ jeʼm jɨɨxi ikwiñkejpaʼap o numaaj mimich dyaʼ in̈kusuʼnɨʼyba?

•   ¿Oyba in̈kusuʼnɨʼyba yɨʼp jɨɨxi ikwiñkejpaʼap? Siiga jesaneum, ¿juchix in̈kusuʼnɨʼyba iga ikwiñkejiñ y tyiʼiga in̈kusuʼnɨʼyba?