YOOXPADOʼOYI PARA JEʼM FAMILIAJYAJ | AN̈KOMƗʼƗYIYAJ
Juutypɨk wɨap iñchak jeʼm yooxakuy «jeʼm yooxakuyjom»
Sɨɨ iga tsaam pɨktaap jeʼm tecnología, iñjefe, jempɨk in̈waganayooxayajpa o jempɨk ixunyajpa iga in̈wadyiñ tuum yooxakuy wɨapsɨ iga in̈joʼkyajpa iga iñtyeguedayajiñ muuma jaama y ikumuuma semana. Jɨ, yɨʼɨmpɨk tsaam tan̈kaʼ iga tan̈wadyiñ jempɨk jeʼm kuyujneyajwɨʼɨp iñɨʼmayyajpa jeʼm wɨnanɨgoʼoyi iga iniitypa jeʼm yooxakuy kun jeʼm tañityi. Yɨʼp wɨnanɨgoʼoyi nɨmtoʼoba iga tan̈wɨpɨguiñ tanjɨɨxi y odoy tanaʼmchiʼiñ iga jeʼm yooxakuy tɨgɨykuʼmiñ kun tun̈gak tyidyin̈kej tañityijom, juʼuts jeʼm tanan̈komɨʼɨyi.
Jempɨk wɨɨ iga iñjoodon̈aiñ
Jeʼm tecnología wɨap imot jeʼm yooxakuy kun jeʼm an̈komɨʼɨyi. Jesɨk mijɨymiñaytyaap, mikutsadaytyaap tuum mensaje o correo electrónico jeex juʼuts jeʼm juktɨ iga wɨɨ iga jobity tanakpiʼchiñ.
«Tsaam tan̈kaʼ iga miidyiñ kun iñfamilia jesɨk mixeetum iñtyɨkkɨʼɨm iga oy miyooxaaji, iga duroj impɨktson̈ba correos y mijɨyñɨgaytyaap de iñyooxakuy, y jeʼyukmɨ, iñyoomoʼ o in̈wɨdyaaya dyam jespɨy iñtyeguedaap» (Jeanette).
Siiga iñxunba iga iñyooxakuy odoy namottaiñ kun iñfamilia, nasuntaap iga impɨguiñ iñjɨɨxi tyi in̈watpa, siiga dyaʼ in̈watpa yɨʼɨmpɨk, jeʼm yooxakuy mikkaʼyaʼyba jeʼm tiempo iga imɨʼɨchi iñan̈komɨʼɨyi.
«Numaaj sɨʼ ammalwaday an̈wɨdyaaya, iga anjɨɨspa: ‹Jeʼ akutɨʼɨyɨʼyba; awadaʼyba perdón. Anteguedaap maaj okmɨ›» (Holly).
Juutypɨk dyaʼ tammotpa jeʼm tanyooxakuy kun jeʼm tanfamilia
Maaj tanteguedaiñ tanan̈komɨʼɨyi. Jeʼm Biblia nɨmpa: «D́a wɨ̱ iga ichacpa iyo̱mo jém Diospɨc iŋtuuma̱watne» (Mateo 19:6, Jém Jomipɨc Trato, La Liga Bíblica). Siiga mimich dyaʼ iñaʼmchiʼiba iga algun i imɨswadyiñ iñan̈komɨʼɨyi, ¿tyiʼiga iñaʼmchiʼiba iga jeʼm yooxakuy imɨswadyiñ?
«Iga miyojyajpa, weeñiyaj jempɨk ixunyajpa iga iñyooxaayyajiñ, ijɨɨsyajpa iga wɨap mijɨymiñayyaj juchixam jeʼeyaj ixunyajpa. Iga aɨch maaj anteguet jeʼm anan̈komɨʼɨyi, annɨʼmayyajpa iga jeʼm jaamayaj iga ajejpa dyaʼ sɨʼ an̈kutson̈yaj, pero anjɨyñɨgayyajpa jesɨk an̈kupaʼtum» (Mark).
Nakwaʼktaajɨ: «Kun jempɨk an̈watpa, ¿sɨʼ anakwiñkej iga jeʼm anan̈komɨʼɨyi maaj anteguet y dyaʼ anyooxakuy?».
Kuyujkaʼɨʼ iññɨm iga dyaʼ. Jeʼm Biblia nɨmpa: «Jempɨk ijoodon̈yaj tyityam wɨap iwatyaj iniityyaj joodon̈oʼoyi» (Proverbios 11:2). Siiga iñjɨɨskupakneʼeba tyityam wɨap in̈wat jesɨk dyam impɨktson̈ba maaj yooxakuy o iññɨʼmaʼyba tun̈gakyaj iga miyooxpaʼtyajiñ.
«Anyooxakuy jeʼm plomería, jeʼyukmɨ jesɨk algun i ajɨymiñaʼyba iga nɨknaxiñ an̈wat tuum yooxakuy, y dyaʼ an̈kupaʼtneʼ, anchiʼiba tun̈gak número de teléfono iga ijɨyñɨgaʼyiñ algun i iga wɨap iyooxpaʼt» (Christopher).
Nakwaʼktaajɨ: «¿Dyaʼ ampɨktson̈ba tuum yooxakuy siiga yɨʼp iwatpa iga anyoomoʼ o an̈wɨdyaaya ijaamiñ iga dyaʼ anteguedaap? ¿Jeempɨktyim ijɨɨspa anyoomoʼ o an̈wɨdyaaya?».
Kujɨɨsɨ tyityam wɨap in̈wattaʼm an̈tuumjom. Jeʼm Biblia nɨmpa: «Para ityumpɨy ity tuum tiempo» (Eclesiastés 3:1). Jempɨk an̈koʼmɨyñeyaj ityogoyayyaj iga wagaityyajiñ. Y maaj siiga tsaam iniityyaj yooxakuy, jeʼyukmɨ ikujɨɨsyajiñ juchix wɨap iityyaj an̈tuumjom.
«Jesɨk anaitytyaʼm jaʼyan̈ yooxakuy anan̈mattaʼmpa tyi wɨap an̈wattaʼm iga wɨaiñ an̈wagaitytyaʼm an̈tuumjom y odoy i amoʼogɨytyaʼmiñ, dyaʼ tyi ijoo siiga numaaj awagawiʼkmon̈taʼmpa o nɨkpa ajooyityam playa» (Deborah).
Nakwaʼktaajɨ: «¿Ammeʼtspa y an̈kujɨɨsneʼebam juchix wɨap an̈waganaity anyoomoʼ o an̈wɨdyaaya? ¿Jeempɨktyim ijɨɨspa anyoomoʼ o an̈wɨdyaaya?».
Tsaakɨ jeʼm yooxakuy. Jeʼm Biblia nɨmpa iga meʼetsɨ juutypɨk «wɨa̱p iŋcupiŋ jém wɨbɨc cosa» (Filipenses 1:10, Jém Jomipɨc Trato, La Liga Bíblica). ¿Wɨap inikpiʼch inteléfono iga odoy i mijɨymiñaʼyiñ y odoy iñaʼmamneiñ jeʼm mensajes?
«An̈kupin̈neum juchix hora antsakpa anyooxakuy y sɨʼ an̈wat juʼtspɨyam awɨap iga anakkupaguiñ. Jesɨk nuʼkum jeʼm hora, anakpiʼchaʼyba anteléfono inotificaciones» (Jeremy).
Nakwaʼktaajɨ: «¿An̈kumaton̈neʼeba anteléfono siiga ajɨymiñaʼyba anjefe o algun i iga ixunba iga anyooxaaʼyiñ? ¿Jeempɨktyim ijɨɨspa anyoomoʼ o an̈wɨdyaaya?».
Kujɨɨsɨ iga dyaʼ tantumpɨytyam jeextyim tañityityam. Jeʼm Biblia nɨmpa: «Siempre wɨ̱wa̱tɨ iga miixyajiñ it́u̱mpɨy pɨxiñt́am iga d́a mimalo» (Filipenses 4:5, Jém Jomipɨc Trato, La Liga Bíblica). Siiga tan̈wɨjɨɨspa, jeʼm yooxakuy wɨap ityɨgɨykuʼm usan̈ tanan̈koʼmɨyoʼoyijom. Juʼuts akwiñkejoʼoyi, wɨapsɨ iga jeʼm iñyoomoʼ o in̈wɨdyaaya iyooxakuy ixunba iga ityeguedaiñ juʼptyin̈kej hora. Jeʼyukmɨ akwiñkeejɨ tuum wɨbɨk jɨɨxi y odoy waʼgaʼayɨ iga iwadyiñ algun tyi iga dyaʼ wɨap iwat.
«An̈wɨdyaaya iniity tuum yooxakuy y watykɨy kujɨymeʼtstaap iga nɨguiñ yooxaaji. Oyba anjoʼykaʼaba, pero iga aitytyaʼmpa jaʼyan̈ tiempo an̈tuumjom, dyaʼ tyi naspa» (Beverly).
Nakwaʼktaajɨ: «¿Anakwiñkejpa tuum wɨbɨk jɨɨxi y dyaʼ anteguedɨʼyba anyoomoʼ o an̈wɨdyaaya iga awaganaidyiñ maaj tiempo mex siiga dya ikutsɨʼyayñeʼ? ¿Jeempɨktyim ijɨɨspa anyoomoʼ o an̈wɨdyaaya?».
Jɨɨxiyaj iga wɨap in̈kɨʼpin̈taʼm an̈tuumjom
Wiñtyi, in̈kutyumtam kujɨɨstaʼamɨ yɨʼpyaj akwagoʼoyiyaj y okmɨ wagakɨʼpin̈taʼamɨ.
¿Oyñeʼ miñɨʼmay iñyoomoʼ o in̈wɨdyaaya iga ni dyam iñchakneʼeba iñyooxakuy? Siiga miñɨʼmayñeʼ, ¿jeempɨgamsɨ sɨʼ in̈wat?
¿Juʼpsɨ kukaki nasuntaap iga in̈wadyiñ siiga iñxunba iga jeʼm iñyooxakuy odoy tɨgɨykuʼmiñ kun tun̈gak tyidyin̈kej iñityijom?
¿Oyñeʼ iñjɨɨs iga jeʼm iñyoomoʼ o in̈wɨdyaaya dyaʼ ichakpa iyooxakuy «jeʼm yooxakuyjom»? Siiga jesaneum, ¿iñjɨɨspa juchix iñjɨɨs jeempɨk?
¿Iñxunba iga iñyoomoʼ o in̈wɨdyaaya iwadyiñ tuum kukaki iga jeʼm iyooxakuy odoy tɨgɨykuʼmiñ kun tun̈gak tyidyin̈kej iñityijom? ¿Juʼp kukaki?