Luk 22:1-71
-
Samworo kan koasoanehdi ni rir pwe ren kemehla Sises (1-6)
-
Kaunopadahng kaimwiseklahn Pahsohpa (7-13)
-
Sak en Soutik en Kauno (14-20)
-
“Me pangiehlao iang ie mi ni tehpelet” (21-23)
-
Akamai laudki ihs me lapalap (24-27)
-
Sapwellimen Sises inou lap ong wehi ehu (28-30)
-
En Piter eh kahmahm kokohpda (31-34)
-
Anahnepen onopada; kedlahs riapwoat (35-38)
-
Sapwellimen Sises loulou pohn Nahnahn Olip (39-46)
-
Sises poardi (47-53)
-
Piter kahmahmkihla Sises (54-62)
-
Sises wiahla mehn kapailok (63-65)
-
Kopwung mwohn tohn Sanedrin (66-71)
22 Eri Kasarawien Pilawa me Sohte Doal Ihs me adaneki Pahsohpa kerendohr.
2 Oh kaunen samworo ko oh sounkawehwehn Kosonnedo ko kin raparapahki ahl me keieu mwahu en kemehla ih, pwehki ar kin masak aramas akan.
3 Sehdan eri pedolong loalen Sudas, me adaneki Iskariot, emen me Ehk Riemeno,
4 e ahpw kohla oh koasoiaiong kaunen samworo ko oh sounapwalih kan en tehnpas sarawio duwen eh pahn pangohng irail Sises.
5 Irail eri perenkihda met oh pwungkihda ren kihong ih mwohni silper.
6 Eri e pwungki met oh tepida raparapahki ahnsou mwahu en pangala ih rehrail ni aramas ar sohte pahn ese.
7 Rahn en Pilawa me Sohte Doal Ihs eri leledohr, rahn me mahn en Pahsohpa anahne meirongala;
8 Sises ahpw poaronehla Piter oh Sohn oh mahsanih: “Kumwa kohwei oh kaunopada Pahsohpao pwe kitail en tungoale.”
9 Ira ahpw patohwanohng: “Ia wasa komw kupwurki sen kaunopada ie?”
10 E mahsanihong ira: “Kilang! Ni amwa pahn pedolong nan kahnimwo, ohl emen me weuwa sah en pihl ehu pahn tuhwong kumwa. Kumwa idawehnla ih nan ihmw me e pahn pedolong ie.
11 Oh ndaiong kaunen ihmwo, ‘Sounpadahko mahsanihong uhk: “Ia pere me ngehi oh nei tohnpadahk kan pahn konote Pahsohpa ie?”’
12 Oh ohlo pahn kasalehiong kumwa pere laud ehu powe me koasoansoandier. Kumwa kaunopada wasao.”
13 Ira eri kohkohla oh diarada mehkoaros nin duwen me e mahsanihong ira, oh ira kaunopada Pahsohpao.
14 Eri ni awao eh leledohr, e ahpw ketidiong nin tehpelo iangahki wahnpoaron ko.
15 E ahpw mahsanihong irail: “I uhdahn men iang kumwail tungoale Pahsohpa wet mwohn ei pahn lokolok;
16 pwe I ndaiong kumwail, I solahr pahn pwurehng tungoale lao soahng koaros pweida nan Wehin Koht.”
17 Oh ni eh ketikiher kep ehu, e ketin kalahngankihong Koht oh mahsanih: “Emenemen kumwail ale met oh iang nimasang,
18 pwe I ndaiong kumwail, sang met kohla, I solahr pahn pwurehng nim wain lao Wehin Koht pahn leledo.”
19 E pil ketikihda lopwon en pilawa ehu, ketin kalahngankihong Koht, pilitikihpeseng oh ketikihong irail, mahsanih: “Met wehwehki paliwereiet, me I pahn kihda ong kumwail. Kumwail en kin wia met ong ni katamanpei.”
20 Mwurin arail sak en soutik, e pil ketin wia soahngohte ong kepo oh mahsanih: “Kep wet wehwehki inou lap kapw me poahsoankihda ntahi me pahn kepwilipwilkihdi kumwail.
21 “Ahpw kilang! me pangiehlao iang ie mi ni tehpelet.
22 Pwe ni mehlel, Nein-aramas pahn kohkohla nin duwen eh koasoandier, ahpw meid suwediong aramaso me pangala ih!”
23 Irail eri tepida koasoiapene nanpwungarail ihs rehrail me uhdahn pahn kak wia met.
24 Ahpw akamai laud ehu pil pwarada nanpwungarail duwen ihs rehrail me keieu lapalap.
25 E ahpw mahsanihong irail: “Nanmwarkien wehi kan kin men kaunda neirail aramas oh aramas akan kin kihong irail ko me ahneki manaman pohrail mwar tohrohr.*
26 A kumwail en dehr wia soahng wet. Ahpw mehmen me keieu lapalap nanpwungamwail en wiahla me keieu tikitik, oh mehmen me kin tiengla mwowe en kin papah kumwail.
27 Pwe ihs me lapalap rehn me kin mwenge* de me kin papah? Kaidehn me kin mwenge?* Ahpw ngehi, I kin mihmi rehmwail duwehte me kin papah.
28 “Ahpw kumwail me kin mihmihte rehi nan ei apwal akan;
29 oh duwehte Semei eh ketin wiahiong ie inou lap ehu, I pahn wiahiong kumwail inou lap ehu ong wehi ehu,
30 pwe kumwail en mwenge oh nim ni ei tehpel nan ei Wehi oh mwohd nan mwoalomwail pwe kumwail en kadeik keinek 12 en Israel.
31 “Saimon, Saimon, kilang! Sehdan nda me e men wiahiong kumwail dahme aramas kin wia ni eh kihsang kilin wihd.
32 Ahpw I kin kapakapkin uhk ni ngidingid pwe omw pwoson en dehr luwetala, a kowe, ni omw pahn pwurodo, kakehlahda riomw kan.”
33 E ahpw patohwanohng: “Maing Kaun, I onopadahr en iangkomwihla nan imweteng oh iang pwoula.”
34 E ahpw mahsanih: “Piter, I ndaiong uhk me malek sohte pahn kakorot rahnwet lao ke kahmahmkiniehla pahn pak silipak.”
35 E pil mahsanihong irail: “Ni ei kadarkumwailwei sohte wa edin mwohni, edin mwenge de suht, kumwail sohte apwalkihda mehkot, kaidehn?” Re patohwan: “Soh!”
36 Ih eri mahsanihong irail: “Ahpw ahnsou wet, mehmen me naineki edin mwohni en wahda, pil duwehte edin mwenge, oh mehmen me sohte nah kedlahs, a en netikihla eh likou puhp oh pwainda apwoat.
37 Pwe I ndaiong kumwail me dahme ntingdier anahne pweida rehi, me iei, ‘E wadawadohngehr me dipan akan.’ Pwe mahsen kan me pid duwen ngehi kin pweida.”
38 Irail eri patohwan: “Maing Kaun, iet! kedlahs riapwoat.” E ahpw mahsanihong irail: “E itarehr.”
39 Ni eh ketin mweselda, e ketilahng ni Nahnahn Olip duwen me e kin ketin epwehnki wia oh tohnpadahk ko pil idawehnla ih.
40 Ni arail lel wasao, e mahsanihong irail: “Kumwail pousehlahte kapakap pwe kumwail en dehr lohdiong nan songosong.”
41 Oh e ketila sang irail ni uwen doh en aramas eh kin koski takai ehu, e ahpw kelepwikihdi oh tepida loulou,
42 mahsanih: “Ipa, ma komw kupwurki, a komw ketikihweisang ie kep wet. Ahpw soh, kaidehkin nsenei pwe kupwuromwihte en pweida.”
43 Tohnleng men sang nanleng ahpw pwarohng ih oh kakehlahda.
44 E ahpw ketin pwunodada kowahlap me kahrehda e wie loulou ni ngidingid, oh pwudowe kerediong nanpwel duwehte dingiding en nta.
45 Ni eh ketida sang sapwellime loulou oh ketila rehn tohnpadahk ko, e mahsanihada ar wie memeir pwehki eh solahr angirailki ar nsensuwed.
46 E ahpw mahsanihong irail: “Dahme kumwail memeirki? Kumwail pwourda oh pousehlahte kapakap pwe kumwail en dehr lohdiong nan songosong.”
47 Ni eh mahmahsente, a kilang! pokon ehu oh ohl me adaneki Sudas, emen me Ehk Riemeno tieng mwohrail oh keiong mpen Sises oh metik ih.
48 Sises ahpw mahsanihong: “Sudas, ke pangkilahr Nein-aramas metik ehu?”
49 Ni irail ko me kapilpene kilangada dahme pahn wiawi, re ahpw patohwan: “Maing Kaun, sen doadoahngki nait kedlahs kat?”
50 Emen irail ahpw pelehte nein samworo lapalap laduwo, kihsang salenge palimaun.
51 Sises ahpw ketin sapeng mahsanih: “Itarehr.” E ahpw ketin doahke salengen laduwo oh kamwahwihala.
52 Sises eri mahsanihong kaunen samworo ko oh sounapwalih kan en tehnpas sarawio oh ohl mah ko me kodohng reh wasao: “Ia duwe, kumwail kohdo wisik kedlahs oh mehn wowoki duwehte amwail kin uhwong lipirap men?
53 Ni ei kin mihmi rehmwail nan tehnpas sarawio ehuehu rahn, kumwail sohte koliehdi. Ahpw met iei amwail ahnsou oh ahnsoun manaman en rotorot.”
54 Irail eri salihedi oh kahreieila oh walahng ni imwen samworo lapalapo; a Piter ideidawehn ih, ahpw ekis dohlahsang.
55 Ni arail saunda kisiniei ehu nanwerengen wasa me ihmwo kelepene, re ahpw mwohdpene, Piter mwomwohd nanpwungarail.
56 Ahpw lidu serepein men kilang eh wie mwomwohd ni marain en kisinieio, e ahpw kangkakil oh nda: “Ohl menet pil kin iang ih.”
57 Ahpw e kahmahmki oh nda: “Lih, I sehse ihs ih.”
58 Mwurin ahnsou kis, emen pil kilangada ih oh nda: “Kowe pil emen irail.” Piter ahpw nda: “Soh, kaidehn ngehi emen irail.”
59 A mwurin mpen awa ehu, pil emen ohl tepida ngihtehtehki ni kehlail: “Uhdahn ohl menet pil kin iang ih, pwe ni mehlel, ih mehn Kalili men!”
60 Piter ahpw nda: “I sehse dahme ke ndindahn.” A ni ahnsowohte, nindoken eh koasoakoasoi, malek emen ahpw kakorot.
61 Kauno ahpw ketin pirekek oh sohpeidohng Piter, oh Piter tamanda mahsen en Kauno ni eh mahsanihong ih: “Mwohn malek eh pahn kakorot rahnwet, ke pahn kahmahmkin ie pahn pak silipak.”
62 E ahpw kohieila likio oh sengiseng kowahlap.
63 Eri ohl ako me sinsile Sises ahpw tepida kapailoke oh kin wokih;
64 oh mwurin arail perehla silangi, re kin ndinda: “Kohpada! Ihs me poakih uhko?”
65 Oh re kin ndaiong ih soangen lahlahwe tohto teikan.
66 Oh ni eh rahnpeseng, pwihnen ohl mah en tohnwehio me iei kaunen samworo kan oh sounkawehwehn Kosonnedo kan ahpw pokonpene oh re kahrelahng ih nan Sanedrino* oh nda:
67 “Ma kowe me Krais, ndaiong kiht.” Ahpw e mahsanihong irail: “Mehnda ma I pil ndaiong kumwail, kumwail sohte mwahn pahn kamehlele.
68 Oh pil ma I kalelapak rehmwail, kumwail sohte pahn sapeng.
69 Ahpw sang met kohla, Nein-aramas pahn ketidiong ni palimaun en Koht me kehlail.”
70 Irail koaros eri nda: “Eri, kowe me Sapwellimen Kohto?” E mahsanihong irail: “Pein kumwail me ndinda me ngehi iei ih.”
71 Irail nda: “Ia kahrepen atail anahne mehn kadehde teikan? Pwe pein kitail rongasangehr pein nan auwe.”
Footnote kan
^ Mwar tohrohr wet iei mwar wahu ehu ong aramas akan me kin sewese meteikan, me duwehte kihong irail mwohni.
^ De “mwohd oh irekek ni tehpel.”
^ De “mwohd oh irekek ni tehpel.”
^ Kilang KLL.
