Luk 5:1-39
5 Ehu ahnsou me pokono koaitonla ih oh wie rongorong mahsen en Koht, e ketin kesikesihnen ni oaroahr en lehn Kenesaret.*
2 E ahpw mahsanihada pwoht riapwoat me peipei ni oaroahr en leho, a soused ko keredihsangehr powe oh widewiden ar uhk ko.
3 E ahpw ketida pohn apwoat pwoht ko, weren Saimon oh ketin peki en kaieila ekis sang sahpwo. Ih eri ketidi powe oh ketin tapihada padahk ong pokono sang nan pwohto.
4 Ni sapwellime mahsen eh eralahr, e ahpw mahsanihong Saimon: “Kaieila wasa me loal oh kesehdi amwail uhk kan.”
5 A Saimon sapeng patohwan: “Maing Sounpadahk, se nannantiher pwohng pwon, ahpw sohte seikat. Ahpw I pahn patohwan kihdi uhk kat pwehki komwi me mahsanih.”
6 Eri ni arail wia met, re ahpw koledi* kiden mwahmw. Ni mehlel, arail uhk ko tepida teipeseng.
7 Irail eri oalehdo iangarail ko me mi nan pwoht teio ren kohdo oh sewese irail, re ahpw kohdo oh kadirehla pwoht ko koaros kahrehda pwoht ko tepida mwowihdi.
8 Ni Saimon Piter eh kilangada met, e ahpw kelepwikihdi mwohn Sises patohwanohng: “Maing Kaun, komw ketiweisang ie pwe ngehi aramas dipan emen.”
9 Ih oh ienge ko koaros inenen pwuriamweikihla soangen laid mwomwin wet me re wiahdahr,
10 pil duwehte Seims oh Sohn, nein Sepedi pwutak ko me kin iang Saimon. Ahpw Sises mahsanihong Saimon: “Ke dehr masepwehk. Sang met kohla, ke pahn kin laidih aramas.”*
11 Irail ahpw kapwurehdo pwoht ko ni sahpwo oh pwilikihdi soahng koaros oh idawehnla.
12 Pil ehu ahnsou ni eh ketiket nan ehu kahnimw ko, a iet! ohl emen me direkihla tokutok! Ni eh kilangada Sises, e ahpw poaridiong nanpwel oh peki reh patohwan: “Maing Kaun, ma komw kupwurki, komw kak ketin kamwakeleiehda.”
13 Eri, e ketin kapahla nin limeo oh doahke oh mahsanih: “I men! Nna, mwakelekelda.” Ni ahnsowohte tokutoko pa sarasang ih.
14 E ahpw kehkehlingkihong ohlo en dehr ndaiong emen: “Ahpw kohla kasalehiong samworo pein kowe oh wiahda meirong ehu en omw mwakelekelda nin duwen me Moses kileledier pwehn wia kadehde ehu ong irail.”
15 Ronge ahpw kin lolohkseli oh pokon laud ehu kin kohpene pwe ren rong oh kamwahula sang arail soumwahu kan.
16 Ahpw e kin kalapw ketila wasa me sohte towe pwe en loulou.
17 Ehu rahno ni eh ketin padapadahk, Parisi* oh sounpadahk en Kosonnedo kan me kohsang nan kisin kahnimw koaros en Kalili oh Sudia oh Serusalem iang mwomwohd wasao; oh sapwellimen Siohwa* roson kin ieiang ih pwe en ketin kamwahwihala aramas akan.
18 A kilang! aramas akan weuwa ohl mwoator emen pohn roh ehu oh irail nannanti ren wahdo pwilikihdi mwohn Sises.
19 Eri ni ar sohte kak wahdo ih pwehki pokono, re doukihda pohn ihmwo oh kakihredi roh me ohlo mi powe nanpwungen aramas ako mwohn Sises nan pwoahr me re wiahda pohn ihmwo.
20 Ni eh mahsanihada arail pwoson, e ahpw mahsanih: “Ohl, dipomw kan lapwadahr.”
21 Sounkawehwehn Kosonnedo oh Parisi ko eri tepida medemedewe, ndinda: “Ihs memenet me lokolokaiahn lahlahwe? Ihs me kak lapwahda dihp, kaidehn Koht kelehpw?
22 Ahpw ni Sises eh mwahngihada arail madamadau, e ketin sapeng irail mahsanih: “Dahme kumwail medemedewe nan mohngiongimwail?
23 Mehnia me mengei en nda, ‘Dipomw kan lapwadahr,’ de nda, ‘Uhda oh alu’?
24 Ahpw pwe kumwail en ese me Nein-aramas ahneki manaman en lapwahda dihp nin sampah—” e mahsanihong ohl mwoatoro: “I ndaiong uhk, Uhda, ale omw mehn roh, oh kohwei ni imwomwo.”
25 E ahpw uhda mwohrail, ale kieo me e kin wonohn powe oh kohkohla ni imweo, kapikapinga Koht.
26 Irail koaros ahpw pwuriamweikihla oh direkihla masak oh tepida kalinganahda Koht, ndinda: “Rahnwet, kitail kilangehr soahng kapwuriamwei kan!”
27 Eri mwurin met, e ketieila oh mahsanihada sounrik daksis men me ede Lipai me wie mwomwohd nan ohpis en daksis, oh e mahsanihong: “Idawehniehla.”
28 E ahpw pwilikihdi mehkoaros, uhda oh tepida idawehn ih.
29 Lipai eri wiahda lapalahn kamadipw ehu ong ih ni imweo oh lapalahn pokon en sounrik daksis ehu oh pil meteikan iang irail mwengemwenge.*
30 Parisi ko oh neirail sounkawehwehn Kosonnedo ko ahpw tepida lipahned ong sapwellime tohnpadahk ko, nda: “Dahme kumwail kin iangki sounrik daksis oh me dipan akan mwengemwenge oh niminim?”
31 Sises ketin sapeng irail mahsanih: “Irail kan me roson sohte anahne toahkte, ahpw irail me soumwahu me anahne.
32 Kaidehn me pwung kan me I kohdohng luke, ahpw me dipan akan pwe ren koluhla.”
33 Irail ahpw patohwanohng ih: “Nein Sohn tohnpadahk kan kin kalapw kaisihsol oh kapakap ni ngidingid oh pil irail nein Parisi kan, ahpw sapwellimomwi kan kin tungoal oh nim.”
34 Sises mahsanihong irail: “Kumwail sohte kak kaisihsolih kompoakepah kan en ohl kamwohdo nindoken ohl kamwohdo eh mihmi rehrail, kaidehn?
35 Ahpw rahn akan pahn kohdo me ohl kamwohdo pahn pehdsang irail; ih ahnsowo me re pahn kaisihsol.”
36 E pil ketikihong irail ehu karasaras: “Sohte me kin tipwahsang mweinlikou ehu sang ni likou kapw oh deipinahiong ni likou mering. Ma e wia met, eri mweinlikou kapwo pahn teisang oh mweinlikou me kohsang likou kapwo sohte pahn pahrekiong me meringo.
37 Pil sohte me kin kihong wain kapw nan edin kilin mahn mering. Ma e pahn wia met, wain kapwo pahn kaposepeseng edin kilin mahno oh waino pahn wudekla oh edin kilin mahno pahn ohla.
38 Ahpw wain kapw uhdahn pahn kin kohieng nan edin kilin mahn kapw.
39 Sohte me kin mwahuki wain kapw mwurin eh nimada wain mering, pwe e kin nda: ‘Me meringo me mwahu.’”
Footnote kan
^ Me iei, Sehd en Kalili.
^ LK, “kelehdi.”
^ De “aramas me momour.”
^ Kilang KLL.
^ Kilang KLL.
^ De “mwohd oh irekek ni tehpel.”
