Madiu 11:1-30
11 Ni Sises eh ketin kaimwisekala sapwellime kaweid ong tohnpadahk 12 ko, e ahpw ketila sang wasao pwe en ketin padahk oh kalohk nan arail kahnimw kan.
2 Ahpw ni Sohn eh rongada nan imweteng duwen wiewia kan en Krais, e ahpw kadarala nah tohnpadahk kan
3 pwe ira en patohwan idek reh: “Ih komwi me pahn ketido, de sen kasik emen tohrohr?”
4 Sises ketin sapeng ira, mahsanih: “Kohwei oh kairehki Sohn dahme kumwa rong oh kilang:
5 Met me maskun kan kilangadahr wasa, me dangepel kan alialu mwahu, me tokutok kan mwakelekeldahr, me salengepon kan rongadahr wasa, me melahr akan mourdahr oh me semwehmwe kan rongadahr rongamwahwo.
6 Meid pai emen me sohte kin diar kahrepen eh pahn dipekelekelkin ie.”
7 Ni ara kohkohla, Sises tepida mahsanihong pokono duwen Sohn: “Dahme kumwail kilang ni amwail kohla nan sapwtehn? Ahlek pwoat me kin tutuwelengkiseli kisinieng?
8 Eri, dahme kumwail kohieilahng kilang? Ohl emen me kin likawih likou kansenamwahu?* Irail me kin likawih likou kansenamwahu kin mi nan imwen nanmwarki kan.
9 Eri ni mehlel, dahme kahrehda kumwail kohieila? Pwe kumwail en kilang soukohp men? Ei, I ndaiong kumwail, e lapalapasang mehlel soukohp emen.
10 Ih menet me ntingdier duwe: ‘Kilang! I pahn kadarewei nei meninkeder men me pahn tiengla mwohmw* oh e pahn kaunopada alomw!’
11 I ndaiong kumwail ni mehlel, sohte emen me ipwidi sang rehn lih akan me lapalapasang Sohn Sounpapidais, ahpw me keieu tikitik nan Wehin nanleng pil lapalapasang ih.
12 Sang ni mwehin Sohn Sounpapidais leledo ahnsou wet, Wehin nanleng iei mehn akadei me aramas kin nannanti ren alehdi oh irail me kin nannanti kin alehdi.
13 Pwe koaros mahsen en Soukohp ako oh Kosonnedo kin kohpada dahme pahn wiawi lel ni mwehin Sohn;
14 eri, mehnda ma kumwail men kamehlele de soh, ih me ‘Elaisa me pahn kohdo.’
15 Mehmen me mie salenge, a en rong.
16 “Ihs me I pahn karasahiong dih wet? E rasehng kisin seri kan me kin mwomwohd nan wasahn netinet kan oh kin liklikwerih seri teikan,
17 ndinda: ‘Se kesengki keseng pepeuk ong kumwail, ahpw kumwail sohte kin kahlek; se kin mwahiei, ahpw kumwail sohte kin pikipikir nan mwaremwaramwail kan ni amwail nsensuwed.’
18 Pil duwehte, ni Sohn eh pwarodo oh sohte kin mwengemwenge de niminim, aramas kin nda, ‘Ngehn suwed kin mi reh.’
19 A ni Nein-aramas eh pwarodo sakasak oh niminim, aramas kin nda, ‘Kilang! Ohl mehwo oh kin mwahuki nim wain, kompoakepahn sounrik daksis oh me dipan akan.’ Ahpw, erpit kin dehdehda sang ni wiewia.”
20 Ih eri ketin tepida kadeik kahnimw kan me e ketin wiadahr pali laud en sapwellime manaman kan ie, pwehki re sohte koluhla:
21 “Meid suwediong uhk, Korasin! Meid suwediong uhk, Pedsaida! pwe ma manaman kan me wiawihong kumwa wiawihong Dair oh Saidon, ira pahn koluhlahte mahsie ni ara pwuhriong nan likoun nsensuwed oh mwohndi nan pehs.
22 Ahpw I ndaiong kumwa, kalokolok ong Dair oh Saidon pahn marahra sang kalokolok ong kumwa ni Rahnen Kadeiko.
23 Oh kowe, Kapernaum, ke pahn sepwilida nanleng? Soh! Ke pahn sepwilidi nan Sousou;* pwe ma manaman kan me wiawihong uhk wiawihong Sodom, ele Sodom pahn mihmi leledo rahnwet.
24 Ahpw I ndaiong uhk, kalokolok ong Sodom pahn marahra sang kalokolok ong uhk ni Rahnen Kadeiko.”
25 Sises eri mahsanih ni ahnsowo: “Maing Semei, Kaunen nanleng oh sampah, I kapinga komwi mwohn aramas koaros, pwehki omwi ketin ekihla mepwukat sang aramas koahiek oh loalokong kan ahpw ketin kasalehiong kisin seri kan.
26 Ei maing Semei, pwehki iei met me komw ketin kupwurki.
27 Mehkoaros kohiengieier sang rehn Semei, oh sohte me uhdahn ese Sapwellimeo pwe Sahmohte; oh sohte me uhdahn ese Sahmo pwe Sapwellimeo oh mehmen me Sapwellimeo kupwurki en kasalehiong.
28 Kohdo rehi, kumwail koaros me pwangadahr oh toutoulahr, I ahpw pahn kansenamwahwihkumwailla.
29 Ale ei mehn wisik oh padahngki sang ie, pwe I me opampap oh mohngiong karakarahk, kumwail ahpw pahn diar nsenamwahu.
30 Pwe ei mehn wisik me kansenamwahu* oh dahme I peki kumwail en wahda me marahra.”
Footnote kan
^ De “likou kaselel?”
^ LK, “mwohn mesomw.”
^ LK, haiʹdes. Kilang KLL.
^ De “mengei en wisik.”
