Madiu 27:1-66
27 Ni eh rahnpeseng, koaros kaunen samworo ko oh ohl mah ko en tohnwehio ahpw kapwungada ren kemehla Sises.
2 Mwurin arail salihedi, re kahrehla oh pangala ih rehn Pailet me iei kepina.
3 Ni Sudas, me pangala ih, eh kilangada me e pakadeikadahr, e ahpw koluhkihla oh kapwurehla silper 30 ko rehn kaunen samworo oh ohl mah ko,
4 oh nda: “I dipadahr ni ei pangala nta mwakelekel.” Irail ahpw nda: “Mehnda reht? Pein omw pwukoa men!”
5 Ih eri koskihdi silper ko nan tehnpas sarawio oh kohkohla. E ahpw kohlahte lusiamala.
6 Kaunen samworo ko ahpw ale silper ko oh nda: “E sohte pwung en kihong met nan wasahn nek mwohni en tehnpas sarawi, pwehki met iei pweinen nta.”
7 Mwurin arail pwungkipene, irail ahpw doadoahngki mwohnio en pwainda mwaht en sounwia dahl pwehn wiahla wasahn seridi en mehn keiru kan.
8 Ihme kahrehda mwahto adaneki Mwaht en Nta leledo rahnwet.
9 E pweidahr dahme soukohp Seremaia nda: “Oh re ale silper 30, pweinen ohl emen, ohlo me ekei mehn Israel ko koasoanediong uwen pweine,
10 oh re pwainkihda mwaht en sounwia dahl, nin duwen me Siohwa* ketin kehkehlingkihong ie.”
11 Sises eri ket mwohn kepinao oh kepinao idek reh: “Kowe me Nanmwarkien mehn Suhs akan?” Sises ahpw ketin sapeng: “Kowe me pein nda men.”
12 Ahpw ni kaunen samworo ko oh ohl mah ko ar wie kedikedipa ih, e sohte ketin sapeng.
13 Pailet eri ndaiong: “Ke sohte rong soahng tohto kan me re kedikedipahkin uhk?”
14 Ahpw e sohte mwahn ketin sapengki lepin mahsen ehu, kepinao eri uhdahn pwuriamweikihla.
15 Eri ni ehuehu kasarawien pahsohpa, kepina kin epwehnki lapwadahng pokono emen tohnimweteng ko, mehmen me re mwahuki.
16 Ni ahnsowo, ohl adsuwed emen me adaneki Parapas wie sensel.
17 Eri ni arail pokonpene, Pailet ahpw ndaiong irail: “Ihs me kumwail men I en lapwadahng kumwail, Parapas de Sises me aramas kin ekerki Krais?”
18 Pwe Pailet ese me re pangohng ih Sises pwehki arail peirin.
19 Oh ni eh mwomwohd nan mwoalen kadeik, eh pwoudo ileklahng, nda: “Dehr wia mehkot ong ohl pwungen, pwe I lokolongki laud rahnwet pwehki ei ouraman duwen ih ni pwohngo.”
20 Ahpw kaunen samworo ko oh ohl mah ko kamwakid pokono ren peki me Parapas en lapwada, a Sises en kamakamala.
21 Kepinao ahpw sapeng irail nda: “Ihs rehra me kumwail men I en lapwadahng kumwail?” A irail nda: “Parapas.”
22 Pailet ahpw ndaiong irail: “Eri, dahme I pahn wiahiong Sises, me aramas kin ekerki Krais?” Irail koaros ahpw nda: “Kidahng ih nin tuhke!”*
23 E nda: “Pwekida? Soahng suwed dah me e wiahda?” A irail ahpwte kalaudehla arail weriwer, ndinda: “Kidahng ih nin tuhke!”
24 Ni Pailet eh kilang me e sohte kak wia mehkot, ahpw moromorete me wiawi, ih eri ale pihl oh omwiomw mwohrail, nda: “I mwakelekel sang ntahn ohl menet. Pein kumwail me pahn pwukoahki.”
25 Aramas ako koaros ahpw sapeng nda: “Ntahn ohlen en kohdi poht oh pohn nait seri kan.”
26 Ih eri lapwadahng irail Parapas, ahpw e ruwese Sises en wowoki oh e pangalahng sounpei ko pwe ren kemehla ih nin tuhke.
27 Nein kepina sounpei ko ahpw ale Sises oh kahluwalahng nan imwen kepinao oh kapokonepene pwihnen sounpei ko koaros, irail ahpw kapilpene ih.
28 Oh irail kapwuhrasang sapwellime likou oh uhd kalikawihkihda likou puhp weitahta maramer ehu,
29 oh pidada elin tek ehu oh kidahng pohn tapwi oh kihong ih ahlek pwoat nin lime maun. Irail ahpw kelepwikihdi mwowe oh kepikepitki, ndinda: “Rahn kaselel, komwi Nanmwarkien mehn Suhs akan!”
30 Oh re kendipih oh ale ahleko oh tepida wokih tapwi.
31 Eri mwurin arail kapailoke ih, re kapwuhrasang likou puhpo oh kapwuhrohng nan sapwellime likou puhp oh kahrehla ih pwe ren pasurdiong nin tuhke.
32 Ni arail kohkohieila, re tuhwong ohlen Sairihni men, me adaneki Saimon. Irail ahpw itonehng ohl menet en wahda sapwellimen Sises tuhkehn kalokoloko.*
33 Oh ni arail lel wasa ehu me adaneki Kolkoda, me iei, Wasahn Tihn Moang,
34 irail ahpw kihong ih wain me doal mehkot katik* pwe en urahk; ahpw mwurin eh ketin song, e sohte urahk.
35 Ni arail pasurdiong ih nin tuhkeo, irail eri nehkpeseng sapwellime likou puhp ko sang ni arail usuhski,
36 oh re mwohndiong wasao oh sinsile ih.
37 Re pil kidahng nting ehu pohnangin tapwi kahrepen eh kalokolok me ketihtihki: “Ih Sises met, Nanmwarkien mehn Suhs akan.”
38 Lipirap riemen pil iang kodahng nin tuhke limwah, emen ni palimauni, a emen ni palimeing.
39 A irail kan me keid wasao ahpw kin lahlahwe ih oh tuhtuwelek
40 oh ndinda: “Ih kowe me pahn kamwerehdi tehnpas sarawio oh kauwada erein rahn siluh, doareiukala! Ma kowe sapwellimen Koht, keredihsang nin tuhkehn kalokoloken!”*
41 Pil duwehte, kaunen samworo ko iangahki sounkawehwehn Kosonnedo ko oh ohl mah ko tepida kepikepitki, ndinda:
42 “E kin komourala meteikan; ahpw e sohte kak komourala pein ih! Ih me Nanmwarkien Israel; en keredihsang nin tuhkehn kalokoloken* met, kitail ahpw pahn kamehlele.
43 E kin likih Koht; eri Koht en ketin doarehla ih met ma E kin ketin kupwurperenki ih, pwe e kin nda, ‘Ngehi me Sapwellimen Koht.’”
44 Pil duwehte, lipirap ko me iang kodahng nin tuhke limwah kepikepitki ih.
45 Sang ni awa keweneu* kohla, rotorot ehu ahpw kipehdi sahpwo pwon lao lel awa keduwau.*
46 A mpen awa keduwau, Sises kapitie laudida, mahsanih: “Eli, Eli, lama sapakdani?” me iei, “Ei Koht, ei Koht, dahme komw ketin likidmeliekiniehla?”
47 Ni arail rongada met, ekei me kesikesihnen wasao ahpw tepida nda: “Ohl menet liklikwerih Elaisa.”
48 A emen irail pitipitte tangala, ale lihmw ehu, kaduh nan wain me karer oh kihong ni ahlek pwoat oh kidahng ih pwe en urahk.
49 A meteiko nda: “Mweidohng! Kitail kilang ma Elaisa pahn pwarodo oh doarehla ih.”
50 Sises ahpw pwurehng kapitie laudida, ih eri imwisekla.*
51 A kilang! kahdeng en wasa sarawio ahpw teipeseng sang powe lel pah. Sampah rerada oh paipalap akan pwalpeseng.
52 Oh sousou kan* ahpw sarapeseng, oh paliwar en aramas sarawi tohto me meirlahr ahpw pwupwusang arail sousou
53 oh re sansalda ong aramas tohto. (Mwurin eh ketin iasada, aramas akan me kohieido sang nanpwungen sousou kan ahpw pedolong nan kahnimw sarawio.)
54 Ahpw ni ahnsou me kaunen sounpeio oh irail me iang sinsile Sises kilangada rerrer en sahpwo oh soahng kan me wiewiawi, irail inenen masepwehkada oh nda: “Mehlelete memenet Sapwellimen Koht.”
55 Lih tohto pil mi wasao me kilikilang sang wasa me ekis doh, irail ko me idawehndo Sises sang Kalili pwe ren papah ih;
56 Mery mehn Makdala oh Mery inen Seims oh Soses oh inen nein Sepedi pwutak ko me iang mi rehrail.
57 Ni eh kohkohlahng ni soutik, ohl kepwehpwe en Arimadea men me ede Sosep ahpw kohdo, e pil wiahla emen sapwellimen Sises tohnpadahk.
58 Ohl menet kohla rehn Pailet oh pekihda kahlap en Siseso. Pailet eri ruwese pwe kahlepeo en kohieng ih.
59 Sosep eri ale kahlapo, kidimkipene linen mwakelekel oh kaselel,
60 oh nekidedi nan eh sousou* kapw me e wiahda nan paip ehu. Mwurin eh katapwurehiong takai lapala ehu ni ewen sousowo,* e ahpw kohkohla.
61 Ahpw Mery mehn Makdala oh Mery teio mihmihte wasao, mwomwohd mwohn sousowo.
62 Mandahn rahno, me iei mwurin rahnen kaunopada, kaunen samworo ko oh Parisi ko pokonpene mwohn Pailet,
63 oh ndaiong: “Maing, se tamanda dahme ohl mwersuwed meno nda ni eh momouro, ‘I pahn iasada mwurin rahn siluh.’
64 Eri, komw ruwese pwe sousowo en silasildi lao lel kesiluhwen rahn, pwe nah tohnpadahk ko en dehr kohla pirapahsang oh ndaiong aramas akan, ‘E iasadasangehr rehn me melahr akan!’ Pwe likamw pwoatet pahn suwedsang mehn mahso.”
65 Pailet ahpw ndaiong irail: “Kumwail ale sounsilasil kan oh kohwei silehdi mwahu sousowo ni uwen amwail kak.”
66 Irail eri kohla oh katengehdi takaio ni sousowo oh kihdiong sounsilasil.
Footnote kan
^ Kilang KLL.
^ De “Kemehla ih nin tuhke!”
^ Kilang KLL.
^ Pihl katik.
^ Kilang KLL.
^ Kilang KLL.
^ Me iei, mpen 12:00 ni souwas.
^ Me iei, mpen 3:00 pm.
^ De “kadarala eh esingek.” LK, pneuʹma. Kilang KLL.
^ De “sousoun kataman kan.”
^ De “sousoun kataman.”
^ De “sousoun kataman.”
