Madiu 7:1-29
7 “Uhdihsang amwail kin kadeik meteikan pwe kumwail en dehr pakadeikda;
2 pwe kadeik me kumwail kin kadeingki meteikan, kumwail pahn pil pakadeingkihda, oh mehn sosohngohte me kumwail kin sohngki meteikan, irail pahn pil sohngkin kumwail.
3 Eri dahme ke kin kilangki diper me mi nan pwoaren mesen riomwo,* ke ahpw sohte kin tehk lepin tuhke me mi nan pwoaren mesomwen?
4 De ia duwen omw kak ndaiong riomwo, ‘Mweidohng ie I en kihsang diperen nan pwoaren mesomwen,’ a kilang! lepin tuhke pwoat mi nan pwoaren mesomwen?
5 Mwalaun ahmwen! Kihsang mahs lepin tuhkehn nan pwoaren mesomwen, ke ahpw pahn kilang mwahu duwen omw pahn kak kihsang diperen nan pwoaren mesen riomwo.
6 “Kumwail dehr kihong kidi kan mehkot sarawi de pil kesehdiong mwohn pwihk noumwail perl kan, pwe re de tiakpeseng oh sohpeiong kumwail oh tehrkumwailpeseng.
7 “Kumwail pousehlahte peki, kumwail ahpw pahn ale; kumwail pousehlahte rapahki, kumwail ahpw pahn diar; kumwail pousehlahte letelet, e ahpw pahn ritidahng kumwail;
8 pwe koaros me kin pekipeki pahn ale, oh koaros me kin raparapahki pahn diar oh ong koaros me pousehlahte letelet, e pahn ritidahng irail.
9 Ni mehlel, ihs rehmwail me ma nah pwutak peki pilawa, a e pahn kihong ih takai ehu?
10 De ma e peki mwahmw, e sohte pahn kihong ih serpent men, kaidehn?
11 Kahrehda, mehnda ma kumwail suwed ahpw kumwail kin ese kihong noumwail seri kan kisakis mwahu kan, ia uwen eh pahn laud me Samamwail me ketiket nanleng pahn kin ketikihong irail kan me peki reh soahng mwahu kan!
12 “Ihme kahrehda, soahng koaros me kumwail men aramas en wiahiong kumwail, kumwail pil anahne wiahiong irail. Ni mehlel, met iei wehwehn Kosonnedo oh padahk en Soukohp ako.
13 “Keid nan ewen kehl tehtik, pwehki ewen kehl oh ahl me kolahng kasohrala me tehlap, oh me tohto kin keid ie;
14 ahpw ewen kehl oh ahl me kohlahng mour me tehtik, oh malaulau me kin diar.
15 “Kumwail mwasahn soukohp likamw akan me kin kohdo rehmwail ni mwomwen sihpw, ahpw loalarail, irail kidien wel kei me uhdahn duhpek.
16 Kumwail pahn esehkin irail wahrail. Aramas sohte kin dolung kreip sang dihpw tekatek de pik sang tuhke tekatek, kaidehn?
17 Pil duwehte, tuhke mwahu koaros kin kapwarehda wah mwahu, ahpw tuhke sakanakan koaros kin kapwarehda wah suwed.
18 Tuhke mwahu sohte kak kapwarehda wah suwed, oh pil tuhke sakanakan sohte kak kapwarehda wah mwahu.
19 Tuhke koaros me sohte kapwarehda wah mwahu kin paldi oh lekdekiong nan kisiniei.
20 Eri ni mehlel, kumwail pahn ese aramas pwukat sang ni wahrail kan.
21 “Kaidehn aramas koaros me kin ndaiong ie, ‘Maing Kaun, maing Kaun,’ pahn pedolong nan Wehin nanleng, ahpw ihte me kin wia kupwuren Semei me kin ketiket nanleng.
22 Me tohto pahn ndaiong ie ni rahno: ‘Maing Kaun, maing Kaun, se sou kohpadahr ni mwaromwi, oh kausasang ngehn suwed ni mwaromwi, oh wiahda manaman tohto ni mwaromwi?’
23 I ahpw pahn ndaiong irail: ‘I sohte mwahn esei kumwail! Kumwail kohkohweisang ie, kumwail me kin wia me suwed!’
24 “Ihme kahrehda, koaros me kin rong ei mahsen oh kapwaiada pahn rasehng ohl loalokong men me kauwada imwe pohn paip.
25 Eri, keteu mweredi oh lapakehda oh kisinieng kehlail ipidohng ihmwo, ahpw e sohte ohla, pwe e kokouda pohn paip.
26 Oh pil koaros me kin rong ei mahsen ahpw sohte kapwaiada pahn rasehng ohl pweipwei men me kauwada imwe pohn pihk.
27 Oh keteu mweredi oh lapakehda oh kisinieng kehlail ipidohng ihmwo, e ahpw pwupwudi oh ohla douluhl.”
28 Ni Sises eh ketin kaimwisekala mahsen pwukat, pokono ahpw pwuriamweikihla mwomwen eh kin ketikihwei sapwellime padahk,
29 pwe e kin ketin padahkih irail nin duwen aramas emen me ahneki manaman, a kaidehn duwehte arail sounkawehwehn Kosonnedo kan.
Footnote kan
^ Met dokedoke ienge tohnkaudok en Koht.
