Rom 3:1-31
3 Eri, dahme kahrehiong mehn Suhs en mwahusang meteikan, de ia kamwahupen sirkumsais?
2 Kamwahu tohto mie. Keieu, Koht ketikihong irail sapwellime mahsen sarawi kan.
3 Eri, ia duwen ma ekei mehn Suhs sohte kin kasalehda pwoson? Arail seupwoson pahn kak wiahiong Koht en sohla lelepek?
4 Soh kowahlap! Ahpw Koht me mehlel, mehnda ma aramas koaros me likamw, nin duwen me ntingdier: “Pwe omwi pwung pahn sansalda ni omwi pahn mahsen oh komw pahn ketin kana ni ahnsoun omwi ale kadeikpomwi.”
5 Ahpw ma atail sapwung kin kasalehda sapwellimen Koht pwung, dahme kitail pahn nda? Ia duwe, Koht ketin sapwung ni eh ketin kasalehda sapwellime engieng? (Met iei madamadau en ekei aramas.)
6 Soh kowahlap! Ma Koht ketin sapwung, ia duwen eh pahn ketin kadeikada sampah?
7 Ahpw ma I likamw oh ei likamw kadehdehda me dahme Koht mahsanih me mehlel oh kahrehiong aramas en kapinga ih, eri dahme kahrehda I pahn pakadeikda nin duwen me dipan men?
8 Oh dahme se sou kin ndahki: “Se wiahda me suwed pwe soahng mwahu kan en pwarada”? Ih duwen ekei aramas ar karaunlikamwihkin kiht me dene se nda met. Aramas pwukat warohng ale kadeik.
9 Eri, dah? Kitail mwahu sang meteikan? Uhdahn soh! Nin duwen atail koasoiaier me mehn Suhs akan oh pil mehn Krihs kan, irail koaros mi pahn manaman en dihp,
10 nin duwen me ntingdier: “Sohte aramas pwung men mie, sohte mwahn emen;
11 sohte emen me ahneki koahiek en dehdehkihla mwahu, sohte emen me kin rapahki Koht.
12 Aramas koaros sohpeisang, irail koaros solahr katepe; sohte emen mie me kin kasalehda kadek, sohte mwahn emen.”
13 “Kepinwararail iei sousou ehu me sansara; lowarail kan me diren piht.” “Pwoisin en sineik mi ni kilin awarail.”
14 “Oh awarail kan me diren keria oh kailok.”
15 “Re kin mwadang kakerehdi nta.”
16 “Ahnsou koaros re kin kahrehda kahpwal laud oh lokolok ong aramas akan,
17 oh re sohte kin ese elen popohl.”
18 “Re sohte kin lemmwiki Koht.”
19 Eri, kitail ese me soahng koaros me Kosonnedo mahsanih kin dokedoke irail me mi pahn Kosonnedo, pwe sohte emen rehrail kak nda me sohte dipe oh sampah pwon mihla pahn sapwellimen Koht kadeik.
20 Kahrehda, sohte emen* pahn pwungla reh sang ni eh idawehn audepen kosonned, pwe kosonnedo kin sewese kitail en esehla dahkot dihp.
21 Ahpw met, sapwellimen Koht pwung sansaldahr likin kosonned nin duwen me Kosonnedo oh pwuhken Soukohp ako kadehdedahr,
22 ei, sapwellimen Koht pwung me kin sansalda sang ni pwoson Sises Krais oh met wiawi pwe en sewese irail koaros me pwoson. Pwe sohte wekpeseng nanpwungarail.
23 Pwe aramas koaros dipadahr oh sohte kak kasalehda sapwellimen Koht lingan.
24 Irail ahpw pwungla rehn Koht pwehki pweinen pweipwei sapahl me Krais Sises ketin pwainla pwe en doareirailla. Met kisakis ehu* me Koht ketikihda pwehki sapwellime kadek sapan.
25 Koht ketikihda Krais nin duwen meirong ehu pwe aramas akan en wiahda popohl reh sang ni arail pwoson ntahn Krais. Met wiawi pwe en kasalehda sapwellime pwung, pwehki Koht ketin kanengamah oh ketin mahkohng dihp kan me aramas akan wiadahr mahso,
26 oh pil kasalehda sapwellime pwung ahnsou wet, pwe e ketin pwung ni eh ketin wiahki aramas me kin pwoson Sises me pwung men.
27 Eri ia duwe, aramas kak suwei? Uhdahn soh. Mehnia kosonned me irehdihsang ih en suwei? Kosonned me pid wiewia kan? Uhdahn soh, ahpw kosonnedo me pid pwoson.
28 Pwe kitail kin medewe me aramas men kin pwungkihla rehn Koht eh pwoson a kaidehn eh idawehn audepen kosonnedo.
29 De ia duwe, ih Koht en mehn Suhs akante? Kaidehn ih pil Koht en mehn liki kan? Ei, ih pil Koht en mehn liki kan.
30 Pwe Koht mehtehmen, aramas akan me sirkumsaisla pahn pwungla reh pwehki arail pwoson oh aramas akan me sohte sirkumsaisla pahn pwungla reh sang ni arail pwoson.
31 Eri ia duwe, kitail kasohrehla kosonned sang ni atail pwoson? Uhdahn soh! Ahpw, kitail kin utung kosonned.
