Seims 3:1-18
3 Riei ko, me tohto sang rehmwail en dehr wiahla sounpadahk, pwehki kumwail ese me kitail pahn ale kadeik laudsang meteikan.
2 Pwe kitail koaros kin sapwungala* pak tohto. Ma emen sohte kin sapwungala ni lokaia, ih aramas unsek men oh pil kak kaunda paliwere pwon.
3 Ma kitail kihong mete* nan ewen oahs kan pwe en kahrehiong ren kin peikiong kitail, kitail pil kin kaweid paliwararail pwon.
4 Kumwail pil kilang sohp akan: Mendahki re uhdahn laud oh mwekidki kisinieng kehlail, mehn ilihl tikitik kis me kin kaweid sohpo en tangalahng wasa koaros me kaunen sohpo men kohla ie.
5 Eri ih pil duwen lowen aramas me kisehn paliwar ehu me tikitik ahpw kin suwei laud. Kilang uwen tikitik en kisin mpwul kis eh kak isikada wahl kalaimwun ehu!
6 Lowen aramas iei pil kisiniei ehu. Nanpwungen kisehn paliwaratail kan koaros, lowen aramas kin diren suwed pwe e kin kasaminehla paliwar pwon oh isikala elen mour pwon oh mwasingkihla kisiniei en Kiehna.*
7 Pwe soangen mahn lawalo koaros oh menpihr koaros oh sineik oh kieil* koaros oh mahn en nansed koaros kin kak mandala oh aramas kamandalahr soangen mahn pwukat.
8 Ahpw sohte aramas emen kak kamandahla lowe. E me ketihwo oh kin kauwehla wasa oh diren pwoisin me aramas kin mehkihla.
9 Kitail kin kapingahki Siohwa* Sahmo lowatail, ahpw kitail pil kin keriahkihla aramas me wiawihda “rasehng Koht” lowatail.
10 Kaping oh keria kin kohsang nan au tehieu.
Riei ko, e sohte pwung soahng kan en kin wiawi ni ahl wet.
11 Ia duwe, pihl iou oh pihl katik kin pwilisang utuhnpihl tehieu?
12 Riei ko, ia duwe, tuhke pik kak wa olip, de tuhke kreip kak wa pik? Pwarer rensed ehu pil sohte kak kihda pihl iou.
13 Ihs me ahneki erpit oh wehwe nanpwungamwail? E anahne kasalehda met sang ni eh wiewia mwahu, oh wia soahng koaros ni mpahi me kohsang erpit.
14 Ahpw ma peirin laud oh akamai* mi nan amwail mohngiong, kumwail dehr suwei oh koasoi likamwiki me mehlelo.
15 Met kaidehn erpit me kohdihdo sang powe, ahpw iei ahn sampah wet, ahn irail kan me duwehte mahn oh ngehn suwed kan.
16 Pwe sohte lipilipil wasa me mie peirin oh akamai,* e pil pahn mie pingiping oh soahng suwed koaros.
17 Ahpw erpit sang powe, mwohn mehkoaros me mwakelekel, a mwuri popohl, toupahrek, kin men peik, diren kadek kalahngan oh wiewia mwahu,* sohte kin lipilipilki aramas oh sohte kin mwalaun.
18 Patehng met, irail kan me kin wiahda popohl pahn kamwarak nan irair en popohl oh dolung wahn pwung.
Footnote kan
^ De “dipekelekel.”
^ De “kihong mehn kaweid oahs.” Sahl me kin pirapiriong ni tepinwere oh ewen oahs pwe en kaunda oahso.
^ Kilang KLL.
^ De “mahn kerep.”
^ Kilang KLL.
^ De kakete, “ineng en pweida ni elen roporop.”
^ De kakete, “ineng en pweida ni elen roporop.”
^ De “kapwarehda wah mwahu tohto.”
