Wiewia 1:1-26
1 Maing Diopwulos, I ntingihedier nan keieun pwuhko duwen soahng koaros me Sises ketin tapiada wia oh padahngki
2 lao lel rahn me e ketidahla, mwurin eh ketin wiahiong wahnpoaron ko me e ketin pilada kehkehlik kei sang ni sapwellimen Koht manaman.*
3 Mwurin eh ketin lokolok, e ketin kasalehiong irail me pein ih ieias sang ni mehn kadehde tohto. Re kin kilikilang ih erein rahn 40, oh e kin ketin padahngki duwen Wehin Koht.
4 Ni eh ketiket rehrail, e ketin kehkehlingkihong irail: “Kumwail dehr kohkohsang Serusalem, ahpw kumwail awiawihete dahme Sahmo ketin inoukihdi, duwen me kumwail rongasangieier;
5 pwe ni mehlel, Sohn kin papidaiski pihl, ahpw mwurin met ni ahnsou keren, kumwail pahn papidaiskihla sapwellimen Koht manaman.”*
6 Eri ni arail pokonpenehr, re ahpw patohwan idek reh: “Maing Kaun, komw pahn ketin kapwurehiong Israel wehio ahnsou wet?”
7 E ahpw mahsanihong irail: “Kumwail sohte anahne ese ahnsou kan de rahn akan me koasoandier me Sahmo kelehpw me ketin sapwellimanki manaman en koasoanehdi.
8 Ahpw kumwail pahn alehdi manaman ni ahnsou me sapwellimen Koht manaman* pahn kohdiong pohmwail, oh kumwail pahn wia ei sounkadehde kan nan Serusalem, nan Sudia pwon oh Sameria, oh pil wasa me keieu doh nin sampah.”*
9 Mwurin eh mahsanih mepwukat ni arail wie uduhdiahl, e ahpw ketin pwekipwekdahla oh pelien depwek ehu ahpw perehla ih oh irail solahr kak kilang.
10 Oh ni arail kilikilengdalahng pahnlahng ni eh ketiket kohdahla, ohl riemen me likou pwetepwet pa kesihnenda limwahrail
11 oh nda: “Kumwail mehn Kalili kan, dahme kumwail kesikesihnen kilikilengkidalahng pahnlahng? Sises menet me ketidahla nanleng sang rehmwail pahn ketido ni soangen mwohmwohte me kumwail kilangehr ni eh ketidahla nanleng.”
12 Irail ahpw pwuralahng Serusalem sang ni nahna ehu me adaneki Nahnahn Olip, me karanih Serusalem, ni uwen doh me mweimweiong seiloak rahnen Sapad.*
13 Ni arail lella mwo, re kohdahla nan pere powe, wasa me re kin mi ie. Irail iei Piter oh pil Sohn oh Seims oh Andru, Pilip oh Tomas, Pardolomiu oh Madiu, Seims nein Alpius, oh Saimon me adaneki ngoang, oh Sudas nein Seims.
14 Irail pwukat ahpw wiahki ehu ni poaden kapakap, iangahki lih ekei oh Mery inen Sises oh pil rie pwutak ko.
15 Erein rahn ako, Piter ahpw kesihnenda nanpwungen irail pirieno (wadepen* aramas ako koaros mpen meh 120) oh nda:
16 “Ohl ako, riei ko, nting sarawio anahne pweida me sapwellimen Koht manaman* kalokaiahki Depit en kohpada duwen Sudas, me kahluwa irail ko me salihedi Sises.
17 Pwe e iang atail pwihn oh e pilipilda en iang doadoahk wet.
18 (Ahpw ohl menet, pwainkihda mwaht ehu eh wiewia suwed, oh ni eh pwupwukihdi moange, paliwereo pospeseng* oh kanengen kapehde koaros wudekieisang.
19 Tohn Serusalem koaros ahpw esehda duwen met, kahrehda mwahto adaneki Akeldama ni pein arail lokaia, me iei “Mwaht en Nta.”)
20 Pwe e ntingdier nan pwuhken Melkahka kan, ‘Eh wasahn kousoan en tehnla, oh dehr mweidohng emen en mi loale,’ oh, ‘Emen tohrohr en ale eh doadoahk en sounapwalih.’
21 Eri kitail anahne pilada emen ohl, emen irail ko me kin iang kitail erein ahnsou me Kaun Sises ketin wiewia sapwellime doadoahk kan* rehtail,
22 tepisang Sohn eh papidaisihala ih lel rahn me e ketidahla nanleng. E uhdahn pahn iang kitail wia sounkadehdepen sapwellime iasada.”
23 Irail eri kalangahda meh riemen, Sosep me adaneki Parsapas, me pil adaneki Sustus, oh Madaias.
24 Irail ahpw kapakap oh patohwan: “Maing Siohwa,* komwi me ketin mwahngih mohngiong en aramas koaros, komw ketin kasalehda ihs rehn ohl riemenet me komw ketin piladahr
25 pwe en alehda doadoahk wet oh dewen wahnpoaron me Sudas keselahr pwe en idawehn pein eh koasoandi.”
26 Irail eri usuhski ira oh Madaias me pilipildahr, e ahpw wadawadohng* wahnpoaron 11 ko.
Footnote kan
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ De “lel ni irepen sampah.”
^ Met iei, mpen 1/2 mi.
^ De “pokon en.”
^ LK, pneuʹma. Kilang KLL.
^ De “nanwerenge pospeseng.”
^ LK, “ketilong oh ketieila.”
^ Kilang KLL.
^ De “kapatapatohng,” me wehwehki re kilangwohng ih duwehte 11 teiko.
