Wiewia 10:1-48
-
Kaudiahl me Kornilius kilangada (1-8)
-
Piter kilangada kaudiahl en mahn akan me mwakelekelda (9-16)
-
Piter mwemweitla rehn Kornilius (17-33)
-
Piter lohkihong mehn liki kan rongamwahu (34-43)
-
“Koht sohte kin ketin lipilipilki aramas” (34, 35)
-
-
Mehn liki kan alehdi sapwellimen Koht manaman oh papidaisla (44-48)
10 Eri mie ohl emen nan Sesaria me ede Kornilius, kaunen sounpei* men me mi nan pwihn ehu me adaneki pwihnen Itali.*
2 Ih ohl poadidi men me kin lemmwiki Koht iangahki tohn imwe koaros, oh e kin wiahiong aramas akan kisakis en kadek kalahngan tohto oh kin poaden kapakap ong Koht ni ngidingid.
3 A mpen awa keduwau en rahno,* e kilangada ni sansal kaudiahl ehu me sapwellimen Koht tohnleng men kohdo reh oh nda: “Kornilius!”
4 Kornilius ahpw kangkakil ih oh inenen masepwehkada, oh idek: “Maing Kaun, dahme komw kupwurki?” E ahpw nda: “Omw kapakap kan oh kisakis en kadek kalahngan kan leldalahr rehn Koht nin duwen mehn kataman ehu.
5 Eri met, kadaralahng Sopa ohl kan ren ekerodo ohl emen me ede Saimon me pil adaneki Piter.
6 Ohl menet mihmi rehn Saimon, sounwia kilin mahn men me imwaneki ihmw ehu limwahn sehdo.”
7 Mwurinte tohnleng me koasoiongo eh kohkohla, Kornilius ekerodo eh ladu riemen oh sounpei poadidi men sang nanpwungen irail me kin papah ih,
8 e ahpw ndaiong irail mehkoaros oh kadariraillahng Sopa.
9 Mandahn rahno, ni arail usehlahte arail seiseiloak oh kerenlahngehr kahnimwo, Piter ahpw doudahla pohn ihmwo mpen awa keweneu* pwe en kapakap.
10 E ahpw duhpekla oh men mwengehda. A ni arail kaukaunop mwenge, e ahpw kilangada kaudiahl ehu
11 oh kilangada nanleng eh ritpeseng oh mehkot* kohkohdi me rasehng lapalahn tehi linen ehu me keimw pahieu me pekederdiong sampah;
12 oh nan tehio soangen mahn neh pahpwoat koaros oh sineik oh kieil kan* en sampah oh menpihr en pahnlahng kan mi loale.
13 Ngihl ehu ahpw ndaiong: “Uhda Piter, kemehla oh kang!”
14 Piter ahpw nda: “Soh, maing Kaun, I sohte kak, pwehki I saikinte kang mehkot me keinepwi oh samin nin duwen kosonned.”
15 Oh ngihlo pwurehng ndaiong ih keriapak: “Dehr nda me soahng kan me Koht ketin kamwakeledahr me samin.”
16 Met wiawi pak siluh, oh tehio* mwadangete pwekipwekdahla nanleng.
17 Ni Piter eh wie pwonopwonkihte dahme kaudiahl me e kilangadahro wehwehki, eri ni ahnsowohte ohl ako me Kornilius kadarodo ahpw idek ia wasa me imwen Saimono mi ie oh re kesikesihnen ni ewen kehlo.
18 Irail ahpw likwer oh idek ma Saimon me adaneki Piter mihmi wasao.
19 Ni Piter eh medemedewehte duwen kaudiahlo, sapwellimen Koht manaman* ahpw mahsanih: “Kilang! Ohl silimen men tuhwong uhk.
20 Eri uhda oh doudihla oh iangirailda, oh ke dehpa peikasal pwe ngehi me kadariraildo.”
21 Piter ahpw kohdihla rehn ohl ako oh nda: “Iet ngehi me kumwail raparapahki. Ia kahrepen amwail mihmi me?”
22 Irail ahpw nda: “Kornilius, kaunen sounpei men iei ohl pwung oh kin lemmwiki Koht me adamwahu rehn mehn Suhs koaros. Koht ketin poaronedohr tohnleng sarawi men en kaweid ih en luke iuk ken kohla ni imweo pwe en rong dahme ke pahn nda.”
23 Ih eri kasamwolong irail oh irail mihmi reh.
Mandahn rahno, e ahpw pirida oh iangirailda oh ekei riatail kan sang Sopa iangada ih.
24 Mwurin rahno, e ahpw pedolong nan Sesaria. Kornilius uhdahn kasikasik irail, ih eri ekerpene kiseh ko oh kompoakepah likilik ko.
25 A ni Piter eh pedolong, Kornilius ahpw tuhwong, kelepwikihdiong nin neh ko oh poaridiong.
26 Piter ahpw kasihnenihada oh nda: “Uhda; ngehi pil aramas emen.”
27 Ni eh koasoakoasoiong ih, e pedolong oh diarada me aramas tohto pokonpenehr.
28 Ih eri ndaiong irail: “Kumwail ese mwahu ia uwen eh uhwong kosonned mehn Suhs men en werekiong de kohla rehn emen sang ehu keinek tohrohr, ahpw Koht ketin kasalehiong ie me I en dehr wiahki aramas emen me samin.
29 Ihme I kohkihdo ni soh peikasal douluhl ni amwail ileklahng ie. Eri I pahn idek rehmwail, dahme kahrehda kumwail ileklahng ie?”
30 Kornilius eri nda: “Rahn pahieu samwalahro ni soangen ahnsou wet, I wie kapakap nan imweio ni awa keduwau,* a ni ahnsowohte, ohl emen me mi nan likou melengileng ahpw kesihnenda mwohi
31 oh nda: ‘Kornilius, Koht ketin karonge omw kapakap oh ketin tamataman omw kisakis en kadek kalahngan kan.
32 Eri kadarala ekei aramas Sopa pwe ren ekerodo Saimon me adaneki Piter. Ohl menet mihmi ni imwen Saimon, sounwia kilin mahn men, limwahn sehdo.’
33 Ngehi eri mwadangete ilekwohng uhk, oh omw kadek me ke kohkihdo wasaht. Eri met, kiht koaros patohier mwohn Koht pwe sen rong soahng koaros me Siohwa* ketin mahsanihong uhk en padahkihong kiht.”
34 Piter ahpw tepida koasoi oh e nda: “Met I uhdahn wehwehkidahr me Koht sohte kin ketin lipilipilki aramas,
35 ahpw nan wehi koaros, e kin ketin kupwurperenki aramas emen me kin lemmwiki ih oh wia dahme pwung.
36 E ketin kadarala mahseno ong mehn Israel kan pwe en lohkihong irail rongamwahu me pid popohl pwehki Sises Krais. Ih me Kaunen mehkoaros.
37 Kumwail ese ire me koasoipe wiawiher nan Sudia pwon, tepisang Kalili mwurin papidais me Sohn kalohkiseliher:
38 duwen Sises me kohsang Nasaret, duwen Koht eh ketin keiekihdi sapwellime manaman* oh ketikihong ih kehl, oh e kin ketiketseli nan sahpwo, ketin wiewia me mwahu oh kamwahwihala irail me kin lokolok pahn manaman en Tepil, pwehki Koht kin ketin ieiang ih.
39 Eri kiht me sounkadehdepen soahng koaros me e ketin wiadahr nan sapwen mehn Suhs akan oh nan Serusalem; ahpw irail kemehla ih ni arail langahda nin tuhke pwoat.
40 Koht ahpw ketin kaiasada memenet ni kesiluhwen rahn oh ketin mweidohng en sansalda,
41 kaidehn ong aramas koaros, ahpw ong sounkadehde me Koht ketin piladahr mwowe, iei kiht me iang ih sak oh nim mwurin eh ketin iasada sang rehn me melahr akan.
42 E pil ketin kehkehlingkihong kiht sen kalohki ong aramas akan oh pil kadehde ni unsek me iei ih me Koht ketin idihadahr pwe en wia sounkopwung en me momour akan oh me melahr akan.
43 Soukohp ako koaros kadehdehda duwen ih, me mehmen me pwosonla ih pahn ale mahkpen dipe kan pwehki mware.”
44 Ni Piter eh wie koasoakoasoiahte duwen ire pwukat, sapwellimen Koht manaman* ahpw kohdi pohn irail koaros me rongorong mahseno.
45 Oh me pwoson akan* me sirkumsaislahr me iang Piter kohdo ahpw pwuriamweila, pwehki mehn liki kan pil ale kisakis* en sapwellimen Koht manaman.*
46 Pwe re rong arail lokolokaiahki ekei lokaia tohrohr oh kalinganahda Koht. Piter eri nda:
47 “Aramas pwukat aleier sapwellimen Koht manaman* duwehte kitail, kahrehda, ihs me kak irehdihsang irail en papidaiskihla pihl?”
48 Eri, e ahpw ndaiong irail en papidaisla ni mwaren Sises Krais. Irail ahpw peki en mihmi rehrail erein rahn ekei.
Footnote kan
^ Me kin kaun sounpei 100.
^ Pwihn en sounpei en Rom ehu me wiawihkihda sounpei 600.
^ Me iei, mpen 3:00 pm.
^ Me iei, mpen 12:00 ni souwas.
^ LK, “soangen mehn deudeu ehu.”
^ De “mahn kerep kan.”
^ LK, “mehn deudeuo.”
^ LK, pneuʹma. Kilang KLL.
^ Me iei, mpen 3:00 pm.
^ Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ De “me lelepek kan.”
^ De “kisakis me sohte isepe.”
^ LK, pneuʹma. Kilang KLL.
^ LK, pneuʹma. Kilang KLL.
