Wiewia 11:1-30
11 Eri wahnpoaron ko oh riatail kan me mi nan Sudia rongadahr me mehn liki kan pil kamehlelehla mahsen en Koht.
2 Eri, ni Piter eh kohdahla Serusalem, irail kan me kin utung sirkumsais ahpw tepida kauwe ih,
3 nda: “Ke pedolong nan imwen aramas akan me sohte sirkumsais oh iang irail mwenge.”
4 Piter eri doula oh kawehwehiong irail ni oaritik duwen ireo oh nda:
5 “I mihmi nan kahnimw en Sopa wie kapakap, oh ni ei kilangada kaudiahl ehu, I ahpw kilangada mehkot* kohkohdihdo me rasehng tehi linen ehu me keimw pahieu me pekederdihdo sang nanleng, oh e kohdihdo rehi.
6 Ni ei kilenglong oh kadehde mwahu, I kilangada mahn me neh pahpwoat, mahn lawalo oh sineik oh kieil kan* en sampah, oh pil menpihr en pahnlahng kan.
7 I pil rongada ngihl ehu me ndaiong ie: ‘Uhda Piter, kemehla oh kang!’
8 I ahpw nda: ‘Soh kowahlap maing Kaun, pwehki saikinte mehkot me keinepwi oh samin nin duwen kosonned me kohlongehr nan eweiet.’
9 Keriapak en ahnsou, ngihl me kohsang nanlengo sapengki: ‘Ke dehr nda me soahng kan me Koht ketin kamwakeledahr me samin.’
10 Met wiawi pak siluh, oh soahng koaros ahpw epidalahng nanleng.
11 A pil ni ahnsowohte, ohl silimen wie kesikesihnen ni ihmw me se mihmi ieo, irail pekederdo rehi sang Sesaria.
12 Sapwellimen Koht manaman* eri mahsanihong ie I en iangirailda ni soh peikasal. Ahpw riatail meh wenemen pwukat pil iangiehda oh se pedolong nan imwen ohlo.
13 “E kairehkin kiht duwen eh kilangada tohnleng men nan imweo me nda: ‘Kadaralahng ekei ohl Sopa oh eker Saimon me adaneki Piter,
14 oh e pahn ndaiong uhk soahng kan me kowe oh omw peneinei pwon pahn mourkihla.’
15 Ahpw ni ei tepida koasoi, sapwellimen Koht manaman* ahpw kohdi pohrail duwehte eh pil wiawihong kitail nin tapio.
16 Ngehi eri tamanda mahsen en Kauno, duwen eh kin mahsanih: ‘Sohn kin papidaiski pihl, ahpw kumwail pahn papidaiskihla sapwellimen Koht manaman.’*
17 Eri ma Koht ketikihong irail kisakisohte* me e ketikihong kitail me kin kamehlele Kauno, Sises Krais, a ihs ngehi pwe I en kak irehdi Koht?”
18 Ni arail rong mepwukat, irail sohla pelian,* irail eri kalinganahda Koht, nda: “Eri, Koht pil ketin kupwurki mehn liki kan ren koluhla pwe ren kak ale mour.”
19 Eri irail ko me mwarahkpeseng pwehki kahpwal me pwarada mwurin kamakamalahn Stipen, kohpeseng lella Penisia, Saiprus oh Andiok, ahpw re kin lohkihong mehn Suhste mahseno.
20 Ahpw ekei ohl nanpwungen irail me kohsang Saiprus oh Sairihni kohdo Andiok oh tepida koasoakoasoiong aramas akan me kin lokaiahn Krihs, kalokalohki rongamwahu en Kaun Sises.
21 Patehng met, limen Siohwa* kin ieiang irail, oh aramas tohtohie pwosonlahr oh sohpeiongehr Kauno.
22 Rongen irail ahpw lel mwomwohdiso nan Serusalem, irail eri kadaralahng Parnapas Andiok.
23 Ni ahnsou me e lella mwo oh kilang duwen Koht eh ketikihong tohnpadahk ko kadek sapan, e ahpw inenen perenkihda oh tepida kangoange irail koaros ren loalopwoatohngete Kauno nan arail mohngiong unsek;
24 pwe ih ohl mwahu men oh diren sapwellimen Koht manaman* oh pwoson. Eri, aramas tohtohie ahpw pwosonla Kauno.
25 Ih eri kolahng Tarsus pwe en nantihong rapahkihda Sohl.
26 Mwurin eh diarada, e ahpw wahdohng Andiok. Erein sounpar ehu me ira kin iang irail pokonpene nan mwomwohdiso oh kin padahkih aramas tohto, oh nan Andiok me tohnpadahk ko tepin adanekihla Kristian sang ni sapwellimen Koht kaweid.
27 Ni rahn pwuko, soukohp kei ahpw kohdihdo Andiok sang Serusalem.
28 Emen irail ede Akapwus ahpw kesihnenda oh kohpada ni sapwellimen Koht manaman* me lehk laud ehu pahn kereniongehr wiawi nan sahpwo pwon, ni mehlel e wiawiher ni mwehin Klaudius.
29 Eri, tohnpadahk ko ahpw koasoanehdi me emenemen irail en kadarala sawas* ni uwen me e kak ong riarail kan me koukousoan nan Sudia;
30 irail eri kapwaiada met ni arail kadarala sawas ong sounapwalih kan,* Parnapas oh Sohl me wa kohla.
Footnote kan
^ LK, “soangen mehn deudeu ehu.”
^ De “mahn kerep kan.”
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ De “kisakis me sohte isepe.”
^ LK, “re nennenla.”
^ Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ De “koasoandi en sawas ehu.”
^ LK, “ohl mah kan.”
