Wiewia 13:1-52
13 Eri nan Andiok, mie soukohp oh sounpadahk kei nan mwomwohdisohn wasao: Parnapas, Semion me adaneki Toantoal,* Lusius sang Sairihni, Manaen me iang Erod, kaunen wehin Kalili sukuhl, oh Sohl.
2 A ni arail kin papah Siohwa* oh kaisihsol, sapwellimen Koht manaman* ahpw mahsanih: “Kumwail katohrehla Parnapas oh Sohl ong ie, pwe I pilirahda en wia doadoahk ehu.”
3 Eri, mwurin arail kaisihsol oh kapakap, irail ahpw pwil pehrail ko pohra oh kadarirahla.
4 Sapwellimen Koht manaman* eri kadarirahla, ira eri kohdilahng Seluhsia, oh sang wasao ira ahpw sereklahng Saiprus.
5 Ni ara lella Salamis, ira ahpw tepida lohki mahsen en Koht nan sinakoke kan en mehn Suhs akan. Sohn pil iang ira pwe en sawas.
6 Ni arail kakahnseli wasa koaros nan dekeo lellahng Papos, irail eri tuhwong ohlen Suhs emen me ede Par-Sises, sounakmanaman oh soukohp likamw men.
7 E mihmi rehn kepinao, Serkius Paulus, ohl loalokong men. Ohl menet ahpw ekerodo Parnapas oh Sohl pwehki eh uhdahn men rong mahsen en Koht.
8 Ahpw Elimas sounakmanamano (pwe ih wehwehn ede) tepida pelianirahda ni eh songosong en irehdi kepinao en dehr pwosonla.
9 Eri Sohl, me pil adaneki Pohl, ahpw direkihla sapwellimen Koht manaman,* e ahpw kakiledi ih
10 oh ndaiong: “Ohl emen kowehn me diren soangen widing koaros oh soangen mwersuwed koaros, kowe nein Tepil, imwintihti en soahng koaros me pwung. Ke sou uhdihsang omw kin wekidseli sapwellimen Siohwa* ahl pwung kan?
11 Kilang! Limen Siohwa* pahn ketidi pohmw oh ke pahn maskunla oh sohte pahn kilang marain en ketipin erein ahnsou kis.” Ni ahnsowohte, e kehn mese ko eh ediedla oh rotala, e ahpw alialuseli raparapahki emen en kol peh oh kahluwa.
12 Eri ni kepinao eh kilang dahme wiawiher, e ahpw pwosonla pwehki e pwuriamweikihla padahk en Siohwa.*
13 Pohl oh ienge ko ahpw dakehda pwoht pwoat sang Papos oh kohlahng Perka nan Pampilia. Ahpw Sohn kohkohsang ira oh pwuralahng Serusalem.
14 Ira ahpw mweselsang Perka oh kolahng Andiok nan Pisidia. Oh ni rahnen Sapad, ira ahpw pedolong nan sinakokeo oh mwohndi.
15 Mwurin wadawad en Kosonnedo oh pwuhken Soukohp ako ong wehipokon, soumas en sinakoke ko ahpw ileklahng ira nda: “Ohl ako, riat ako, ma mie amwa lokaiahn kangoang ong aramas akan, kumwa kasalehda.”
16 Pohl eri uhda oaloahl oh nda:
“Mehn Israel kan oh kumwail teikan me kin lemmwiki Koht, kumwail rong.
17 Koht en aramas en Israel ketin piladahr samatail mehn mahs ako oh ketin kasapwilada aramas pwukat ni arail koukousoan nin duwen mehn liki kei nan sapwen Isip, oh ketin wahkinirail sang wasao sapwellime roson lapalap.*
18 Oh mpen sounpar 40, e ketin kanengamahiong irail nan sapwtehn.
19 Mwurin eh ketin kamwomwala wehi isuh nan sapwen Kenan, e ahpw ketin koasoanehdi me sapwarailo pahn wia sohso ehu.
20 Mepwukat koaros wiawi mpen sounpar 450.
“Mwurin met, e ketikihong irail sounkopwung kei lel soukohp Samuel.
21 Ahpw mwurin mwo irail kin pekipeki emen nanmwarki, Koht ahpw ketikihong irail Sohl, nein Kis pwutak, ohlen keinek en Pensamin, pwe en kaunirailda erein sounpar 40.
22 Mwurin eh ketikihsang ih, e ketin piladahng irail Depit nin duwen nanmwarki men, ih me e ketin kadehdehda duwe oh mahsanih: ‘I diaradahr Depit, nein Sehsi pwutak, ohl emen me kin kaperenda kupwurei; e pahn wia soahng koaros me I kupwurki.’
23 Nin duwen sapwellime inou, sang ni kadaudok en ohl menet, Koht ketikihong Israel sounkomour men, Sises.
24 Mwohn ketidohn memenet, Sohn kin kalohkseli ong aramas en Israel koaros nan wehipokon pwe ren papidaisla ong kilelepen arail koluhla.
25 Ahpw ni Sohn eh kereniongehr kanekehla eh pwukoa doadoahk, e kin nda: ‘Ihs me kumwail medemedewe ong ie? Kaidehn ngehi ih. Ahpw kilang! Emen ketiket kohdo mwuri oh I sohte warohng sapwadada sapwellime suht ni aluweluwe kan.’
26 “Ohl ako, riei ko, kumwail kadaudok en peneinei en Eipraam kan oh meteikan me mi nanpwungamwail me kin lemmwiki Koht, mahsen en komour pekederdohngehr kitail.
27 Pwe tohn Serusalem oh arail kaun akan sohte kin pohnese memenet, ahpw ni arail kin kadeik ih, irail kin kapwaiada mehkan me Soukohp akan koasoiaier me kin wadawad rahnen sapad koaros.
28 Mendahki arail sohte diarada kahrepe ehu me en kamakamkihla, re ngidingidkihong Pailet en kemehla.
29 Oh ni arail wiadahr soahng koaros me ntingdi duwen ih, re ahpw kihdihsang ih nin tuhkeo oh nekidediong nan sousou* ehu.
30 Ahpw Koht ketin kaiasada ih sang rehn me melahr akan,
31 oh erein rahn tohto e kin ketin pwarohng irail ko me iang ih kohdahla Serusalem sang Kalili. Met, irail pwukat wialahr sapwellime sounkadehde ong aramas akan.
32 “Eri se kin lohkihong kumwail rongamwahu duwen inou me wiawihong samatail mehn mahs ako.
33 Koht ketin kapwaiadahr met ni unsek ong kitail, me neirail seri kan, sang ni eh ketin kaiasada Sises; duwehte me ntingdier nan melkahka keriau: ‘Kowe me nei pwutak; rahnwet I wialahr semomw.’
34 A ire mehlel me E ketin kaiasada ih sang rehn me melahr akan oh e solahr pahn pwurehng ale paliweren aramas me kin mwerpeseng, E ketin mahsanih ni ahl wet: ‘I pahn kihong uhk kasalepen limpoak loalopwoat me I inoukihong Depit, met me likilik.’*
35 Eri ehu melkahka tohrohr pil nda: ‘Komw sohte pahn ketin mweidohng sapwellimomwi me loalopwoato en mwerpeseng.’
36 Ahpw, Depit kin papah Koht* erein eh mour, oh e melahr* oh nekinekdiong rehn seme mehn mahs ako, oh e mwerpeseng.
37 Ahpw, me Koht ketin kaiasadao sohte mwerpeseng.
38 “Riei ko, I pahn pakairkihong kumwail me Koht pahn ketin mahkohng dipamwail kan pwehki pwoulahn ohl menet,
39 oh Kosonned en Moses sohte kak wiahiong kumwail en pwungla, ahpw pwehki pwoulahn ohl menet, Koht pahn ketin wiahkihla aramas koaros me kamehlele, me pwung kei.
40 Eri, kumwail en kanahieng pwe dahme pwuhken Soukohp ako koasoia en dehr lelohng kumwail:
41 ‘Kilang met, kumwail me lahlahwe kan, oh pwuriamweikihla oh sohrala, pwe I pahn wia doadoahk ehu nan amwail rahn akan, iei doadoahk ehu me kumwail sohte pahn kamehlele mehnda ma emen pahn kawehwehiong kumwail ni oaritik.’”
42 Ni ara kohkohieila, aramas akan eri peki rehra en pil koasoia duwen ire pwukat ni rahnen Sapad me kohkohdo.
43 Mwurin irail me pokonpene nan sinakokeo ar kohkohpeseng, mehn Suhs tohto oh mehn liki tohto me iangala lamalam en mehn Suhs me kin kaudokiong Koht ahpw idawehnla Pohl oh Parnapas. Oh ni ara koasoakoasoiong irail, ira ahpw kangoange irail en tengediong sapwellimen Koht kadek sapan.
44 Ni rahnen Sapad en mwurio, kereniong aramas koaros nan kahnimwo ahpw pokonpene pwe ren rong mahsen en Siohwa.*
45 Ni mehn Suhs ako ar kilangada pokono, irail ahpw direkihla peirin oh tepida pelianda Pohl oh lahlahwe soahng kan me e koasoia.
46 Pohl oh Parnapas eri eimah koasoiaiong irail: “E konehng mahsen en Koht en kohieng kumwail mahs. Pwehki kumwail soikala oh kasalehda amwail sohte warohng mour soutuk, kilang! se sohpeilahngehr mehn liki kan.
47 Pwe Siohwa* ketin kehkehlingkihong kiht nan mahsen pwukat: ‘I idihiukada nin duwen marain en wehi kan, pwe ken wahdo komour lel ni irepen sampah.’”
48 Ni mehn liki kan arail rongada met, irail ahpw tepida perenda oh kalinganahda mahsen en Siohwa,* oh irail koaros me ahneki mohngiong mwahu en ale mour soutuk ahpw pwosonla.
49 Patehng met, mahsen en Siohwa* ahpw lohkseli wasa koaros nan sahpwo.
50 Mehn Suhs akan ahpw kamwoarongehda lih lapalap kei me kin lemmwiki Koht oh ohl kesempwal kei en kahnimwo pwe ren uhwong Pohl oh Parnapas, irail eri kaloke ira oh kausirahsang nan sapwarailo.
51 Ira eri sipedasang pwelpar ni nehra ko oh kohla Aikoniomw.
52 Oh tohnpadahk ko kin pousehlahte direkihla peren oh sapwellimen Koht manaman.*
Footnote kan
^ LK, “Niger.”
^ Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ Kilang KLL.
^ Kilang KLL.
^ Kilang KLL.
^ LK, “nin lime me e ketikihda.”
^ De “sousoun kataman.”
^ De “lelepek.”
^ De “papah kupwuren Koht.”
^ LK, “e meirla.”
^ Kilang KLL.
^ Kilang KLL.
^ Kilang KLL.
^ Kilang KLL.
^ LK, pneuʹma. Kilang KLL.
