Wiewia 16:1-40
16 Pohl eri lella Derpe oh pil Listra. Oh tohnpadahk men me adaneki Timoty mi mwo, nein lihen Suhs men me pil pwoson, ahpw eh pahpa mehn Krihs,
2 oh e kin adamwahu rehn riatail kan nan Listra oh Aikoniomw.
3 Pohl eri kasalehda eh men Timoty en iang ih, e ahpw sirkumsaisihala ih pwehki mehn Suhs me mi wasa pwuko, pwe irail koaros ese me eh pahpa mehn Krihs.
4 Ni arail kin seiseiloak nan kahnimw kan, irail kin walahng irail koasoandi kan me wahnpoaron ko oh sounapwalih ko* nan Serusalem koasoanehdier pwe ren kapwaiada.
5 Mwomwohdiso kan eri kin kehlailla nan pwoson oh towe kan wie tohtohla rahn koaros.
6 Oh irail pil seiloak kotehla Prikia oh sapwen Kalesia, pwehki sapwellimen Koht manaman* sohte mweidohng irail en kalohki mahseno nan wehin Eisia.
7 Oh pil ni arail pahn kohdihla Misia, re song en pedolong Pidinia, ahpw manaman* me Sises ketin doadoahngki sohte mweidohng irail.
8 Irail eri daulih Misia oh kohdihla Troas.
9 Oh nipwongo, kaudiahl ehu ahpw kohieng Pohl—ohlen Masedonia men kesikesihnen oh peki reh, nda: “Kohdo Masedonia oh sewesei kiht.”
10 Ni ahnsowohte me e kilangada kaudiahlo, se song en pedolong Masedonia, pwe se esehda me Koht me ketin malipei kiht sen lohkiseli rongamwahu ong irail.
11 Kiht eri dakehda pwoht ehu sang Troas inenlahng Samodreis, mandahn rahno, se ahpw douluhllahng Neapolis;
12 oh sang wasao se kohla Pilipai, kahnimw en Rom ehu,* kahnimw kesempwal ehu nan wehin Masedonia. Se mihmihki nan kahnimw wet erein rahn ekei.
13 Ni rahnen Sapad, se ahpw kohla likin ewen kehl en kahnimwo limwahn pillap ehu, wasa me se lemehiong me wasahn kapakap ehu kin mi ie, se ahpw mwohndi oh tepida koasoakoasoiong lih ekei me pokonpene wasao.
14 Lih emen me ede Lidia me kin netiki likou pohn ntahnmwel,* me kohsang kahnimw Daiadaira, me kin kaudokiong Koht wie rongorong, oh Siohwa* ketin ritingada douluhl eh mohngiong pwe en tehk mwahu soahng kan me Pohl koasoakoasoia.
15 A ni ahnsou me ih oh tohnimweo papidaislahr, e ahpw kangoangehkin kiht: “Ma kumwail leme me I kin lelepek ong Siohwa,* kumwail kohdo oh mihmi nan imweiet.” E ahpw ngidingidki sen kohla.
16 Rahn ehu ni at kohkohlahng wasahn kapakapo, mie lidu serepein men me tuhwong kiht me ngehn suwed men tiada powe. E kin kak kasawih audepen ahnsou kan me kohkohdo. E kin kihong eh kaun akan mwohni laud pwehki kosetipw.
17 Serepein menet ahpw kin ideidawehn Pohl oh kiht oh kin weriwerki: “Ohl pwukat ladun Koht Wasa Lapalahpie, oh re kin lohkihong kumwail elen komour.”
18 E wiewiahier met erein rahn tohto. Pohl ahpw pwangahkihda oh sohpeilahng oh ndaiong ngehno: “I ndaiong uhk ni mwaren Sises Krais ken pedoisang reh.” E ahpw pedoisang ni ahnsowohte.
19 Eri ni ahnsou me eh kaun ako kilangada me solahr arail koapworopwor en wiahda mwohni, re ahpw koledi Pohl oh Sailas oh wurahdekihiralahng rehn kaun ako nan wasahn netineto.
20 Irail ahpw kahreiralahng rehn kaun akan en kahnimwo oh nda: “Ohl pwukat uhdahn kapingadahr atail kahnimwet. Ira mehn Suhs,
21 oh ira kin padapadahngki tiahk kan me sohte mweimweiong kitail en wia pwehki kitail mehn Rom.”
22 Pokono ahpw ehupene uhwongada ira, oh kaun ako ruwese ara likou ko en teiteisang oh ira en wowokihki lepin tuhke.
23 Mwurin arail keme ira pak tohto, irail ahpw keseirahlong nan imweteng oh ruwese silepen imwetengo en salihirahdi pwe ira de pitila.
24 Pwehki eh alehdier ruwes wet, e ahpw keseirahlong nan pere me keieu mi loale oh salihedi teng nehra ko nan lepin tuhke toutou kei.
25 Ahpw kodahng lukepen pwong, Pohl oh Sailas wie kapakap oh kapikapingahki Koht koul, oh tohnimwetengo wie rongorong ira.
26 Ni ahnsowohte rerrer en sahpw laud ehu ahpw wiawi me itikada poahsoan en imwetengo. Oh pil ni ahnsowohte wenihmw ko koaros ritida, oh seliparail ko koaros ahpw sapwedekda.
27 Ni silepen imwetengo eh pirida oh kilangada me wenihmw kan en imwetengo ritpesengier, e ahpw usada nah kedlahso oh kereniong pahn kemehla pein ih, pwehki eh kihkihong me irail me sensel ko tangehrdoaui.
28 Pohl ahpw likwerla ni ngihl laud: “Ke dehpa kemeiukala pwe kiht koaros mihmihte met!”
29 Ih eri pekihda mehn ser kei oh tangolong loale, e ahpw rerrer oh kelepwikihdi mwohn Pohl oh Sailas.
30 Ih eri kahreirahla likio oh nda: “Maing ko, dahme I anahne wia pwe I en komourla?”
31 Ira ahpw nda: “Pwoson Kaun Sises oh ke pahn komourla, kowe oh tohnimwomwo.”
32 Ira eri padahkihong ih mahsen en Siohwa* iangahki irail koaros me mihmi nan imwe.
33 Eri nipwongo ni ahnsowohte, e kahreirahda oh widenda ara ohla ko. Ih oh tohnimweo pwon ahpw mwadangete papidaisla.
34 E ahpw kahreirahla nan imweo oh kaunopadahng ira tehpel en mwenge ehu, e ahpw perenda laud iangahki tohnimwe koaros pwehki eh pwosonlahr Koht.
35 Mandahn rahno, kaun ako ahpw kadaralahng sounsilasil kei ren nda: “Lapwahda ohl akan.”
36 Silepen imwetengo eri kairehki Pohl: “Kaun akan en kahnimwo kadarodohr ohl ekei pwe en lapwahda kumwa. Eri kumwa mweselda met oh kohkohwei ni popohl.”
37 Pohl ahpw ndaiong irail: “Mendahki kiht mehn Rom, re wokih kiht mwohn pokono ni at sohte ale kopwung,* oh keseikitlong nan imweteng. A met re pahn kadarkitala ni rir? Sohte kak! Irail en pein kohdo oh kahreikitala.”
38 Sounsilasil ko eri kairehki kaun akan en kahnimwo koasoi pwukat. Irail eri masepwehkada ni arail rongada me ohl ako mehn Rom kei.
39 Irail eri kohla oh peki mahk rehra, oh mwurin arail kahreirahsang nan imwetengo, irail peki ira en mweselsang nan kahnimwo.
40 Ahpw ira pedoisang nan imwetengo oh kohla ni imwen Lidia; oh ni ara tuhwong riatail ko, ira ahpw kangoange irail oh mweselda.
Footnote kan
^ LK, “ohl mah kan.”
^ LK, pneuʹma. Kilang KLL.
^ LK, pneuʹma. Kilang KLL.
^ Kahnimw ehu likin Itali me towe kan kin alehdi kapai tohrohr kan.
^ De “sounnetiki mehn rei pohn ntahnmwel.”
^ Kilang KLL.
^ Kilang KLL.
^ Kilang KLL.
^ De “sohte repenpwung.”
