Wiewia 18:1-28
18 Mwurin met, e ahpw mweselsang Adens oh kolahng Korint.
2 Oh e tuhwong mehn Suhs men me ede Akwila, pwilidak en Pondus, me ahpwtehn kohsang Itali iangahki eh pwoud Persila, pwehki Klaudius ruweseier me mehn Suhs koaros en kohkohsang Rom. Ih eri kolahng rehra,
3 oh pwehki eh pil kin wia soangen doadoahkohte me ira kin wia, e mihmi ni imwarao oh kin iang ira doadoahk, pwe irail kin wiahda ihmw likou.
4 Rahnen sapad koaros, e kin padahk* nan sinakokeo pwe en kamwakid mehn Suhs oh mehn Krihs kan ren pwosonla.
5 Eri ni ahnsou me Sailas oh Timoty kohdihdo sang Masedonia, Pohl ahpw tepida soupisengkihla kalohki mahseno, kadekadehdehiong mehn Suhs akan me Sises iei Krais.
6 Ahpw mwurin arail kin pelipelian oh kin kaukauwe ih, e ahpw siped eh likowo oh ndaiong irail: “Kumwail me pwukoahki amwail mehla.* I sohte pahn dipikihda. Sang met kohla, I pahn kohla rehn mehn liki kan.”
7 Ih eri kasausang wasao* oh kohla nan imwen ohl emen me ede Ditius Sustus, tohnkaudok en Koht men, me imweo mi limwahn sinakokeo.
8 Ahpw Krispus, soumas en sinakokeo pwosonla Kauno iangahki tohnimwe kan koaros. Oh mehn Korint tohto me rong mahseno tepida kamehlele oh papidaisla.
9 Patehng met, Kauno mahsanihong Pohl nan kaudiahl ehu nipwongo: “Ke dehr masak, ahpw padapadahkte oh dehr nennenla,
10 pwe I kin ieiang uhk oh sohte aramas emen pahn kauweiukala; pwehki nei aramas tohto mi nan kahnimw wet.”
11 Ih eri mihmi wasao erein sounpar ehu oh sounpwong weneu, padapadahkihong irail mahsen en Koht.
12 Ni ahnsou me Kalio wia kepinahn Akaia, mehn Suhs akan ahpw ehupene pelianda Pohl oh walahng ih ni mwoalen kadeiko,
13 ndinda: “Ohl menet kin padahkihong aramas akan en kaudokiong Koht ni ahl ehu me uhwong kosonned.”
14 Ahpw mwohn Pohl eh pahn koasoi, Kalio ndaiong mehn Suhs ako: “Kumwail mehn Suhs akan, ma met uhdahn wiewia sapwung ehu de suwed laud ehu, a e pahn konehng I en kanengamahiong oh rongorong kumwail.
15 Ahpw ma akamai duwen lokaia kan oh ahd akan oh pein amwail kosonned, kumwail en pein koasoanehdi. I sohte men wia sounkopwungpen soahng pwukat.”
16 Ih eri kausirailsang ni mwoalen kadeiko.
17 Irail koaros eri poarehng Sostenihs, soumas en sinakokeo oh tepida keme ih mwohn mwoalen kadeiko, ahpw Kalio sohte mwahn iang pidada mepwukat.
18 A mwurin Pohl eh mihmihki erein rahn tohto, e ahpw kamwurala riatail ko oh sereklahng Siria, iangahki Persila oh Akwila. Nan Senkria, e sehkala pitenmoangeo mwotomwot pwehki inou ehu me e wiadahr.
19 Irail eri lella Episos oh e pwilikihdi ira wasao; ahpw e pedolong nan sinakokeo oh padahkih mehn Suhs akan sang ni eh kin sewese irail en medemedewe.
20 Mendahki arail pekipeki reh en mihmihki rehrail ahnsou reirei, e sohte pwungki
21 ahpw e kamwurirailla oh nda: “I pahn pwurodo rehmwail ma Siohwa* ketin kupwurki.” E ahpw sereksang Episos
22 oh kohdihla Sesaria. Oh e kohdahla* oh rahnmwahwih mwomwohdiso, e ahpw kohdihla Andiok.
23 Mwurin eh mihmihkiher wasao erein ahnsou kis, e ahpw mweselda oh kohla ehuehu wasa nan wehin Kalesia oh Prikia, oh kin kakehlaka tohnpadahk ko koaros.
24 Eri mehn Suhs emen me ede Apolos, pwilidak en Aleksandria ahpw leledo Episos; ih ohl emen me kin kadek kapahrek oh samanihla Nting Sarawi kan.
25 Ohl menet aleier kasukuhl* duwen elen Siohwa* oh direkihla ngoang sang ni sapwellimen Koht manaman,* oh e kin koasoia oh padahkihwei ni pwung soahng kan me pid duwen Sises, ahpw e kin wehwehkihte papidais en Sohn.
26 E tepida eimah padahk nan sinakokeo oh ni ahnsou me Persila oh Akwila rong ih, ira ahpw kahrehda ih oh kawehwehiong ni pwung elen Koht.
27 Oh pwehki eh pil men kohla Akaia, riatail ko ahpw ntinglahng tohnpadahk kan wasao oh kangoangehkin irail en kasamwo ih ni kadek. Eri ni ahnsou me e lella mwo, e ahpw sewesehda laud irail ko me pwosonlahr pwehki sapwellimen Koht kadek sapan;
28 pwehki eh ngoangki kadehdehda douluhl nan wehipokon me mehn Suhs akan sapwung, oh kasalehiong irail sang nan Nting Sarawi kan me Sises iei Krais.
Footnote kan
^ De “e kin padahkohng irail sang ni eh kin sewese irail en medemedewe.”
^ LK, “Amwail nta en mi pohn moangamwail kan.”
^ Me iei, sinakoke.
^ Kilang KLL.
^ E sansal me kolahng Serusalem.
^ De “aleier kasukuhl sang ni eh rong.”
^ Kilang KLL.
^ LK, pneuʹma. Kilang KLL.
